1. Antoy sekreto pian na-enjoy mon aralen iray propesiya ed Biblia?

 “LABALABAY kon aralen iray propesiya ed Biblia,” so imbaga nen Ben, amay kabataan ya abitla ed imbeneg ya artikulo. Sika ey, kasin nai-enjoy mo met ya aralen iray propesiya? Odino nabo-boring ka no atan lay topic ta singa mairap? Antoy sekreto pian na-enjoy mon aralen iray propesiya? Dapat antam so rason no akin ya impila iratan nen Jehova diad Biblia.

2. Antoy aralen tayo ed sayan artikulo?

² Pantongtongan tayod sayan artikulo no akin ya importantin aralen tayo iray propesiya ed Biblia tan no panon tayon aralen iratan. Insan tayo pantongtongan so duaran propesiya ed libro na Daniel tan no antoy epekto to ed bilay tayo no natatalosan tayo iratan.

3. Antoy kailangan tayon gawaen pian natalosan tayo iray propesiya ed Biblia?

³ Kailangan tayoy manpatulong ed si Jehova pian natalosan tayo iray propesiya ed Biblia. Say panaral na propesiya et singa ipasyar ed sakey ya lugar ya agmo kabisado. Mas na-enjoy moy pampasyar mo no mangitagar kay kaarom ya amta toy pasikot-sikot ed satan ya lugar. Legan kayon manbiabiahe, kabisado to no iner lay kulaan yo tan no iner kayo la paarap. No walay ontan ya kaarom ya kaibam ed biahe, panatag so loob mo ta antam ya agka nabalang. Si Jehova et singa ontan ya kaaro. Kabisado to no anto lan panaon so pambibilayan tayo tan no iner tayo la paarap. Kanian pian natalosan tayo iray propesiya ed Biblia, importante ya manpatulong tayo ed si Jehova.—Dan. 2:28; 2 Ped. 1:19, 20.

4. Akin et impaisulat nen Jehova iray propesiya ed Biblia? (Jeremias 29:11) (Nengnengen met so litrato.)

⁴ Si Jehova et singa maar-aron ateng ya sankanonot toy arapen na ananak to, tan labay to ya maong so pansumpalan da. (Basaen so Jeremias 29:11.) Pero say pidumaan nen Jehova ed saray atateng tayo, sarag ton amtaen no antoy eksakton nagawa ed arapen. Impaisulat to iray propesiya ed Biblia pian amta tayo iray importantin nagawa ed arapen tan makapanparaan tayo la antis nin nagawa iratan. (Isa. 46:10) On, saray propesiya ed Biblia et mabmablin regalo nen Aman Jehova ed sikatayo. Pero antoy dapat tayon gawaen pian kombinsido tayo ya talagan nagawa irayan propesiya?

5. Antoy naaralan na saray kabataan ed eksperiensya nen Max?

⁵ Diad eskuelaan, wala ray nakakaiba na saray kabataan ya Tasi ya agmanisia ed Biblia tan agda itan uunoren. Ompan wala ray ibabaga o gagawaen da ya lapud satan et pandudaan la na sakey ya kabataan ya Tasi iray papanisiaan tayo. Ontan so agawa ed sakey ya brother, si Max. Kuan to: “Binmaleg ak ed katuaan pero nen tinedyer ak, apaisip ak no kasin tua so ibabangat na saray Tasi tan kinuestion ko no talaga kasin nanlapud Dios so Biblia.” Antoy reaksion na atateng to? Oniay imbaga nen Max: “Alikas ko ya naaburido ra, pero agda ak nampasnokan.” Inebatan na atateng nen Max iray tepet to tan imbase da itan ed Biblia. Pero walay ginawa met nen Max. Kuan to: “Im-personal study’k iray propesiya ed Biblia tan in-share ko iray naaralan ko ed saray kaparak ya kabataan ed kongregasyon.” Antoy resulta ey? Oniay imbaga nen Max: “Manlapu lad saman, kombinsido ak la ya talagan nanlapud Dios so Biblia.”

6. Antoy gawaen mo no wala ray pandududaan mo ed saray papanisiaan tayo, tan akin et ontan so gawaen mo?

⁶ Singa si Max, kasin no maminsan et pandududaan mo met no kasin tua so amin ya ibabaga na Biblia? Imbes ya na-guilty ka lapud ontay iisipen mo, manggawa kay paraan pian naekal so pandududam. Say panduda et singa lati. No nalatian so sakey ya gamit tan paulyanan mo labat, kalkalnan naderal itan diad ilabas na panaon. Pian naekal iray “lati” ya manderal ed pananisiam, tepetan moy sarilim: ‘Kasin manisia ak ed amin ya ibabaga na Biblia tungkol ed saray nagawa ed arapen?’ No agka segurado ed ebat mo, kaukolan mo sirin ya i-personal study iray propesiya ed Biblia ya agawa la. Panon mon gawaen itan?

7. Akin et maong ya alimbawa si Daniel ed panag-aral na propesiya? (Daniel 12:10) (Nengnengen met so litrato.)

⁷ Maong ya alimbawa si Daniel ed panaral na saray propesiya. Say rason no akin ya inaral to iratan et lapud labay ton naamtaan so katuaan. Mapaabeba met si Daniel. Binidbir to ya natalosan to labat iray propesiya no sikatoy matoor tan maunor ed si Jehova. (Dan. 2:27, 28; basaen so Daniel 12:10.) Lanang to met ya kekerewen so tulong nen Jehova. (Dan. 2:18) Ontan met, no manaaral si Daniel, tatalosan ton maong tan manri-research ed saray akadkauna lan libro ya parte na Kasulatan.  (Jer. 25:11, 12; Dan. 9:2) Panon mon naalig si Daniel?

8. Antoy rason na arum akin et aaralen da ray propesiya ed Biblia, pero anto dapat so rason tayo?

⁸ Dapat duga so rason mo. Kasin say motibom ed panaral moy propesiya et labay mon naamtaan so katuaan? No atan so rason mo, seguradon tulongan ka nen Jehova diad panaral mo. (Juan 4:23, 24; 14:16, 17) Pero wala ray totoo ya dumay rason da ed panaaral day propesiya. Aaralen da iratan ta labay dan anapan na lingo so Biblia. Labay dan patunayan ya say Biblia et agnanlapu ed Dios pian nagawaan day labalabay da ya kontra ed bangat na Biblia. Agtayo ra aaligen. Dapat say rason no akin ya aralen tayo ray propesiya et pian naamtaan tayoy katuaan. Pero anton kualidad so kailangan pian natalosan tayo ray propesiya ed Biblia?

9. Anton kualidad so kailangan pian natalosan tayo ray propesiya ed Biblia? Ipaliwawa.

⁹ Importante ya mapaabeba ka. Imbaga nen Jehova ya sikatoy akaparaan ya ontulong ed saray mapaabeba. (Sant. 4:6) Kanian antis tayon i-personal study iray propesiya, manpikasi tayo nid sikato. Espisipiko tayon ibaga ya komon et tulongan to tayon natalosan iray aralen tayo. Ipapanengneng tayo met ed si Jehova ya mapaabeba tayo no usaren tayod pam-personal study iray publikasyon ya imparaan na matoor tan makabat ya aripen. Atan ya grupo so uusaren to pian mangitarya na espiritual ya naakan diad dugan panaon. (Luc. 12:42) Organisadon Dios si Jehova kanian agtayo la pankelawan ya saksakey labat ya grupo so uusaren to ya ontulong ed sikatayon natalosan iray katuaan ya walad Biblia.—1 Cor. 14:33; Efe. 4:4-6.

10. Antoy naaralan mo ed eksperiensya nen Esther?

¹⁰ Talosan mon maong tan man-research ka. Manpili kay propesiya—amay talagan paninteresan mo tan iyunam itan ya i-research. Ontan so ginawa nen Esther, amay kabataan ya abitla ed imbeneg ya artikulo. A-curious kuno ed saray propesiya tungkol ed isabi na Mesias. Oniay imbaga to: “Nen 15 so taon ko, in-research ko no talagan insulat irayan propesiya antis nin niyanak si Jesus.” Akombinse si Esther nen in-research to so tungkol ed Dead Sea Scrolls. Kuan to: “Naamtaan ko ya say arum ya piraso na Dead Sea Scrolls et insulat antis ya nambilay si Jesus diad dalin. Kanian akombinse ak ya saray propesiyan nabasa ditan et nanlapud Dios.” Oniay inamin to: “Aminpigak nin binasa iray reperensya insan ko atalosan.” Pero sulit kuno so impan-research to. Kayari ton im-personal study iray pigaran propesiya ed Biblia, oniay imbaga to: “Apatunayan kon mismo ed sarilik ya tua so ibabaga na Biblia!”

11. Antoy epekto no napatunayan mon mismo ed sarilim ya tua so ibabaga na Biblia?

¹¹ No aralen tayo iray propesiya ed Biblia ya agawa la, ombiskeg so tiwala tayo ed si Jehova tan agtayo pandudaan iray instruksion tan bilin to. Tan no kabisado tayo ray propesiya ed Biblia, agtayo masyadon mapagpaga tan agtayo naekalan na pag-asa anggano dakdakel so dadalanen tayon subok. Pantongtongan tayo  so duaran propesiya nen Daniel ya nagagawa la natan. Talosan tayon maong irayan propesiya ta walay epekto tod bilay tayo.

12. Antoy isisimbolo na ‘sali ya gawad balatyang tan pitek’? (Daniel 2:41-43)

¹² Basaen so Daniel 2:41-43. Diad sayan kugip nen Arin Nabucodonosor ya impatalos nen Daniel, say sali to may imahen ya anengneng na ari et gawad “balatyang [ya] alaokan na pitek.” No ikonekta tayo iyan propesiya ed arum ni ran propesiya ya nabasa ed libron Daniel tan Apocalipsis, mapatpatnag ya say isisimbolo na sali et say alyansa na Britanya tan Amerika, say sankamakapanyarian ya gobierno ed mundo natan. Imbaga nen Daniel ya sayan gobierno et “mabiskeg ed arum a parte tan lupok ed arum a parte.” Akin et lupok itan ed arum a parte? On ta anggano singa balatyang so pakayari to, papakapuyen itan na “pitek”—saray mismon sakop to. b

13. Anto ran importantin katuaan so atalosan tayo nen inaral tayo iyan propesiya?

¹³ Dakel so atalosan tayon importantin katuaan nen inaral tayo so kahulugan na samay balbaleg ya imahen, lalo lad samay sali to. Unona, mabiskeg so alyansa na Britanya tan Amerika. Singa bilang, analo ira nen World War I tan World War II. Pero kinmapuy itan diad inlabas na panaon tan tuloytuloy ni itan ya onkapuy ta mankokontraan iray sakop to tan mibabali irad pamamalakad na gobierno. Komadua, sayan alyansa so sampot lan world power antis ya deralen na Panarian na Dios so amin ya gobierno ed mundo. Kanian anggano wala ray bansa ya mikokompetensia ed alyansa na Britanya tan Amerika, anggapo lay onsalat ed satan bilang world power. Segurado tayo ed satan ta say kenaan na “bato” ya mangisisimbolo ed Panarian na Dios et samay “sali” ya irerepresenta toy alyansa na Britanya tan Amerika.—Dan. 2:34, 35, 44, 45.

14. Antoy epekto ed saray desisyon tayo no natatalosan tayo imay propesiya tungkol ed sali ya gawad balatyang tan pitek?

¹⁴ Kasin kombinsido ka ya tua imay propesiya nen Daniel tungkol ed sali ya gawad balatyang tan pitek? No on so ebat mo, ipanengneng mo sirin ed kabibilay mo. Singa bilang, no kombinsido ka ed satan, agka la manpayaman ed sayan sistema ta antam ya asingsingger met la yan naderal. (Luc. 12:16-21; 1 Juan 2:15-17) Sakey ni, no natatalosan mo iyan propesiya, napakilos kan iprayuridad so panagpulong tan pananap na saray naiyaralan moy Biblia. (Mat. 6:33; 28:18-20) Kanian tepetan moy sarilim, ‘Kasin nanengneng ed saray desisyon ko ya kombinsido ak ya asingsingger lan deralen na Panarian na Dios so amin ya gobierno na too?’

15. Siopa so “ari na amianen” tan “ari na abalaten” natan? (Daniel 11:40)

¹⁵ Basaen so Daniel 11:40. Ibabaga na Daniel kapitulo 11 ya walay duaran arari o gobierno ya kompetensyaen day sakey tan sakey. No ikonekta tayo iyan propesiya ed arum ni ran propesiya ed Biblia, malinlinew ya say “ari na amianen” et say Russia tan saray kaalyansa ton bansa, tan say “ari na abalaten” et say alyansa na Britanya tan Amerika. c

16. Antoy situasyon na saray lingkor na Dios ya walad sakop na “ari na amianen”?

¹⁶ Papairapen na “ari na amianen” iray lingkor na Dios ya walad sakop to. Wala ray kaagian  tayo ya minaltrato tan impriso lapud pananisia ra. Pero imbes ya nataktakot irayan agagi ed gagawaen na “ari na amianen,” mas binmiskeg laingen so pananisia ra ed si Jehova tan ed Biblia. Akin ey? On ta amta ra ya say pamapairap na gobierno ed sikara et kasumpalan na saray propesiya ed libron Daniel. d (Dan. 11:41) No tandaan tayo itan, ombiskeg so tiwala tayo ed saray sipan na Dios tan determinado tayon manmatoor ed sikato.

17. Anto ray subok ed saray lingkor na Dios ya walad sakop na “ari na abalaten”?

¹⁷ Pinairap met na “ari na abalaten” iray lingkor na Dios nensaman. Singa bilang, nen World War I tan World War II, dakel ya agagi tayo so impriso lapud agda labay so mansundalo. Tan wala ray ananak na Tasi ya na-expel ed eskuelaan lapud ag-ira mansaludo ed bandira. Pero diad imbeneg iran dekada, duma tan agnaliklikas ya subok so aarapen na saray lingkor nen Jehova diad saratan ya lugar. Singa bilang, no panagkampanya na saray politiko, ompan say sakey ya agi et natukson suportaan  so sakey ya kandidato o partido ta labay ton sikara so manalo. Tua, anggapo met so plano ton omboto. Pero lapud magaan so loob tod sikara, ompan diad puso tan isip to et agto la nalilikas ya wala lay papanigan to. Manalwar tayo sirin ed sayan patit! Seguradoen tayo ya neutral tayo ed politika, pati diad puso tan isip tayo.—Juan 15:18, 19; 18:36.

18. Antoy reaksion tayo ed panlalaban na “ari na amianen” tan “ari na abalaten”? (Nengnengen met so litrato.)

¹⁸ Saramay agmanisia ed propesiya ed Biblia et aburidon maong ed ‘pambubunoan’ na “ari na amianen” tan “ari na abalaten.” (Dan. 11:40, paimanod leksab) Tua, dakdakel so nuclear bomb na sarayan bansa tan sarag ton pateyen so amin ya mabilay ed interon mundo. Pero amta tayo ya agan balot ompayag si Jehova ya nagawa itan. (Isa. 45:18) Kanian imbes ya naaburido tayon maong ed panlalaban na sayan duaran arari, lalon ombibiskeg so pananisia tayo ta patunay itan ya asingsingger lay anggaan.

19. Kasin amta tayo so eksakton pakagawa na amin ya propesiya? Ipaliwawa.

¹⁹ Agtayo amta no panon ya nagawa so arum ya propesiya ed Biblia. Anggan si propetan Daniel et agto pa met atalosan so amin ya insulat to. (Dan. 12:8, 9) Pero anggano agtayo amta so eksakton pakasumpal na saray propesiya, segurado tayo ya nagawan-nagawa iratan. Mantiwala tayo ya ipaamta lanlamang iratan nen Jehova ed sikatayo diad dugan panaon, ya singa ginawa to la nensaman.—Amos 3:7.

20. Anto ran eksayting ya propesiya so asingsingger lan nagawa, tan anto sirin so determinado tayon gawaen?

²⁰ Asingsingger lan ideklara na saray bansa so “kareenan tan kaligenan.” (1 Tes. 5:3) Insan, atakien na saray gobierno so amin ya palson relihyon tan deralen da iratan. (Apo. 17:16, 17) Tan isublay dan atakien iray lingkor na Dios. (Eze. 38:18, 19) Ditan la onggapo so guerra na Armagedon. (Apo. 16:14, 16) Segurado tayo ya asingsingger lan nagawa irayan amin. Misatsalamat tayod si Aman Jehova ta patiuna to lan impaamta iraya ed sikatayo. Itultuloy tayo sirin ya aralen tan talaranan so pakagawa na saray propesiya ed Biblia, tan tulongan tayo so arum ya ontan met so gawaen da.