1. Antoy labay ya ibaga na panagbabawi?

 NO WALAY agawaan tayon aliwa, importante ya magbabawi tayo. Panon tayon nibaga ya say sakey ya too et magbabawi? Ibabaga na Biblia ya say toon magbabawi et inuman to lay panagnonot to kanian kabusol to la may datin kabibilay to, intunda to lay aliwan gagawaen to, tan pampupursigian ton agla itan uliten.—Nengnengen so Glosaryo na Saray Termino ed Biblia, “Panagbabawi.”

2. Akin et kaukolan tayon amin ya aralen so nipaakar ed panagbabawi? (Nehemias 8:​9-11)

² Inagew-agew tayon mankakasalanan, kanian kaukolan tayon amin ya aralen so nipaakar ed panagbabawi. Ananak itayo nen Adan tan Eva kanian atawir tayoy kasalanan tan patey. (Roma 3:23; 5:12) Anggapo tay toon agmankakasalanan. Anggan saramay totoon mabiskeg lay pananisia ra, ya singa si apostol Pablo, et lalabanan da nin siansiay mauges ya pilalek da. (Roma 7:​21-24) Labay to kasin ibaga, pakaskasi tayo la tan miserable so bilay tayo lapud saray nagagawaan tayon kasalanan? Andi, ta makasin Dios si Jehova tan akaparaan ya mamerdona. Labay to ya maliket so bilay tayo. Imanom pay agawa ed saray Judio nen panaon nen Nehemias. (Basaen so Nehemias 8:​9-11.) Aglabay nen Jehova ya pawilpawilen tan panermenan da ni iray agawaan dan kasalanan nensaman. Say labay to et maliket iran mandayew ed sikato. Amta nen Jehova ya no say sakey et magbabawi, ompawil so liket to. Atan so rason no akin ya labay to tayon ibangat nipaakar ed panagbabawi. Ipapaseguro na makasin Ama tayo ya no pagbabawian tayo ray kasalanan tayo, perdonaen to tayo.

3. Antoy pantongtongan tayo ed sayan artikulo?

³ Walay taloran pantongtongan tayo ed sayan artikulo nipaakar ed panagbabawi. Unona, amtaen tayo no panon ya imbangat nen Jehova so bansan Israel nipaakar ed panagbabawi. Insan tayo pantongtongan no antoy ginawa nen Jehova pian natulongan to ray totoo nensaman ya magbabawi. Tan diad sampot, amtaen tayo  no antoy imbangat nen Jesus ed saray disipulo to nipaakar ed panagbabawi.

NO PANON YA IMBANGAT NEN JEHOVA SO BANSAN ISRAEL NIPAAKAR ED PANAGBABAWI

4. Antoy imbangat nen Jehova ed bansan Israel nipaakar ed panagbabawi?

⁴ Akisipanan si Jehova ed saray Israelita nen inter tod sikara iray ganggan to. Nanggawa na pormal ya paknaan odino kontrata diad baetan to tan na bansan Israel. Insipan nen Jehova ya no unoren day ganggan to, protektaan tan bendisyonan to ra. Tan oniay impaseguro to: “Sayan ganggan ya iter kod sikayo natan et aliwan mairap a talosan odino mairap a tuloken.” (Deu. 30:​11, 16) Pero no manrebelde irad sikato tan mandayew irad arum ya dios, agto la ra protektaan tan bendisyonan, tan manirap ira lapud satan. Kasin labay ton ibaga et anggapo lay tsansa dan ompawil ed si Jehova? Andi. Sarag da nin siansiay ‘ompawil ed si Jehova tan dengeley boses to.’ (Deu. 30:​1-3, 17-20) On, inikdan ira nen Jehova na tsansa ya magbabawi. Insipan to ya no ontan so gawaen da, naala da lamet so pabor to tan bendisyonan to ra lamet.

5. Akin et nibaga tayon agsinukoan nen Jehova so bansan Israel? (2 Arari 17:​13, 14)

⁵ Paulit-ulit ya nanrebelde so bansan Israel ed si Jehova. Nandayew ira ed saray idolo tan dakel so ginawa ran mauges tan makapadimla, kanian nanirap ira. Pero ag-ira sinukoan nen Jehova. Aminpigapigan angibaki na saray propeta ta labay to ran tulongan ya magbabawi tan ompawil ed sikato.​—Basaen so 2 Arari 17:​13, 14.

6. Panon ya inusar nen Jehova iray propeta to pian natalosan na saray Israelita ya importante so panagbabawi? (Nengnengen met so litrato.)

⁶ Imbaki nen Jehova iray propeta to pian pasakbayan tan ipetek iray Israelita. Singa bilang, oniay mensahe nen Jehova ya impasabi nen Jeremias: “Pawil ka, O rebelden Israel . . . Agak onusdong a walaay pasnok ed sika, ta matoor ak . . . Agmansiansia so sanok ko ed andi-anggaan. Basta bidbir moy impankasalanan mo, ta nanrebelde kad si Jehova.” (Jer. 3:​12, 13) Onia met so imbaga nen Jehova panamegley nen Joel: “Pawil kayod siak ed interon puso yo.” (Joel 2:​12, 13) Tan oniay mensahe nen Jehova ya impasabi nen Isaias: “Magmaliw kayon malinis; ekal yo iray mauges a kagagawa yo; tunda kayo lan  manggaway mauges.” (Isa. 1:​16-19) Onia met so imbaga nen Jehova ed si Ezequiel ya ipasabi tod saray Israelita: “Kasin panliketan koy ipatey na sakey a mauges? . . . Agta mas labay ko nin sikatoy magbabawi ed saray dalan to tan mantultuloy a manbilay? Agko panliketan so ipatey na siopaman . . . Kanian magbabawi kayo pian manbilay kayo.” (Eze. 18:​23, 32) On, naliliketan si Jehova no nanenengneng ton magbabawi so sakey ya nankasalanan, ta labay to ya mantultuloy ya manbilay itan ya too ya anggad angga. Agto alagaren ya manguman ni so sakey ya too antis ton tulongan. Pantongtongan tayoy arum nin alimbawa ed saya.

7. Panon ya inusar nen Jehova so alimbawa nen Gomer pian nibangat to ray Israelita?

⁷ Pian natalosan na saray Israelita ya talagan labay nen Jehova ya magbabawi ira, inusar toy alimbawa nen Gomer, say asawa nen propetan Oseas. Kayari ton akikalugoran, tinaynan toy Oseas tan akilad arum ya laki. Seryoson kasalanan so ginawa to! Kasin imposible lan manguman si Gomer? Si Jehova labat so makabasa ed puso na sakey ya too. Oniay imbaga tod si Oseas: “La ka lamet, arom imay biin aaroen na sananey a laki tan mikakalugoran, a singa ed pangaaro nen Jehova ed saray totoo na Israel anggaman oonla rad arum a dirios.” (Os. 3:1; Pro. 16:2) Kasin naimano yo ya tuloytuloy nin manggagaway seryoson kasalanan si Gomer nen imbaki nen Jehova ed sikato si Oseas? Seguradon ansakisakit ed si Oseas iman ya gagawaen nen Gomer. Pero ingganggan nen Jehova ya sikato lay unonan onasingger ed si Gomer, perdonaen to, tan iyamong to lamet. a Antoy labay nen Jehova ya naaralan na saray Israelita ed sayan agawa? Labay ton natalosan da ya agto ra sukoan anggano benger ira. Inar-aro to ni ran siansia anggano dakel so ginawa ran ambelat ya kasalanan. Sikato ni ingen so nanggaway paraan pian natulongan to ran magbabawi tan umanen day kabibilay da. On, naaralan tayod saya ya amta nen Jehova no antoy walad puso na kada too. (Pro. 17:3) Anggano tuloytuloy nin manggagaway seryoson kasalanan so sakey ya too, manggawan-manggaway paraan si Jehova pian natulongan ton magbabawi. Pantongtongan tayo no panon ton tinulongan so pigaran indibidual nensaman ya akagaway seryoson kasalanan.

NO ANTOY GAGAWAEN NEN JEHOVA PIAN NATULONGAN TON MAGBABAWI SO SAKEY YA NANKASALANAN

8. Antoy ginawa nen Jehova pian natulongan ton magbabawi si Cain? (Genesis 4:​3-7) (Nengnengen met so litrato.)

⁸ Si Cain so panguloan ya anak nen Adan tan Eva. Atawir nen Cain so kasalanan na atateng to kanian makasalanan met ya singa sikatayo. Pero agto nilabanan iray makasalanan ya pilalek to. Ibabaga na Biblia ya “mauges iray mismon gagawaen to.” (1 Juan 3:12) Nayarin atan so rason no akin ya ‘ag-inabobonan nen Jehova si Cain tan say apay to’ nen nambagat. Pero imbes ya isipen to no antoy kaukolan ton umanen ed sarili to pian abobonan nen Jehova, “sinmanok si Cain tan naermenan a maong.” Antoy ginawa nen Jehova ey? Kinatongtong toy Cain. (Basaen so Genesis 4:​3-7.) Maar-aroy impitongtong tod si Cain. Imbaga to ya no manguman tan manggawa na maong, bendisyonan to. Pero winarningan to met ya no pinunuyan toy sanok to, ag-arawi ya makagaway kasalanan. Makapaermen balet ta agdinmengel si Cain. Labalabay komon ya tulongan nen Jehova ya magbabawi, pero inkakkaloor to. Kasin aderya si Jehova ed satan ya reaksion nen Cain, tan agto la labay ya tulongan ya magbabawi iray totoo? Andi!

9. Panon ya tinulongan nen Jehova si David ya magbabawi?

 ⁹ Inar-aro nen Jehova si Arin David. Onia ni ingey imbaga To: ‘Si David et lakin makapaliket ed pusok.’ (Gawa 13:22) Pero wala ray agawaan nen David ya ambelat ya kasalanan. Singa bilang, akirelasyon ed si Bat-sheba ya asawa nen Urias, insan to impapatey si Urias. Base ed Mosaikon Ganggan, kanepegan nen David so ompatey. (Lev. 20:10; Num. 35:31) Pero nanggaway paraan si Jehova pian natulongan toy David. b Diad saman et anggapo ni anggan sakey ya pakanengnengan o sinyales ya pagbabawian nen David so ginawa to. Pero imbaki nen Jehova so propeta to ya si Natan pian mitongtong ed si David. Angusar si Natan na ilustrasyon pian natalosan nen David no panon kabelat so kasalanan ya ginawa to. Asabi so puso nen David tan atalosan to ya asakisakitan ton maong si Jehova, kanian nagbabawi. (2 Sam. 12:​1-14) Nan-compose ni ingen na kansion pian nibalikas toy graben ermen tan panagbabawi to. (Sal. 51, superskripsion) Wala ray lingkor nen Jehova ya akagaway kasalanan ya aligliwa tan apakiwas ya magbabawi lapud sayan salmo nen David. Misatsalamat tayo ta tinulongan nen Jehova si David ya magbabawi!

10. Antoy nibagam ed anos tan panamerdona nen Jehova?

¹⁰ Kabusol nen Jehova so kasalanan, tan agto kokonsintien iramay manggagaway kasalanan. (Sal. 5:​4, 5) Pero amta to ya makasalanan tayon amin. Lapud inar-aro to tayo, tulongan to tayo nin siansia anggano makagawa tayoy kasalanan. Anggan panon la kagrabe so kasalanan ya ginawa na sakey ya too, akaparaan si Jehova ya tulongan pian magbabawi tan ipawil to may datin pankakaaro da. Maong labat ta makasi tan maar-aron Dios si Jehova! No isipen tayon maong so anos tan panamerdona to, mas desidido tayon manmatoor ed sikato tan napakiwas tayon magbabawin tampol no akagawa tayoy kasalanan. Nen wadiad dalin si Jesus, imbangat to ray disipulo to nipaakar ed panagbabawi. Atan so onsublay ya pantongtongan tayo.

NO ANTOY IMBANGAT NEN JESUS ED SARAY DISIPULO TO NIPAAKAR ED PANAGBABAWI

11-12. Nen wadiad dalin si Jesus, antoy ginawa to pian natalosan na saray totoo ya say Ama to et mabulos ya mamerdona? (Nengnengen met so litrato.)

¹¹ Nen inmunan siglo C.E., sinmabi so Mesias. Singa abitla ed imbeneg ya artikulo, inusar nen Jehova si Juan ya Managbautismo tan si Jesu-Kristo pian ibangat ed saray totoo ya talagan importante so panagbabawi.​—Mat. 3:​1, 2; 4:17.

¹² Nen wala nid tawen si Jesus, seguradon anengneng ton mismo no panon ya kinasian tan  pinerdona nen Ama to iray magbabawin nankasalanan. Kanian nen wadiad dalin, labay ton natalosan na saray totoo ya mabulos ya mamerdona so Ama to. Pian natalosan da itan, walay inistorya to—say parabolo o ilustrasyon nipaakar ed managdarak ya anak. Diad satan ya istorya, walay anak ya laki ya tinmaynan ed pudir na ama to pian nagawaan toy labalabay to. Nanggaway imoral iyan anak tan nagmaliw ya mauges so panagbilay to. Pero “nen akapannonot a maong” tan naisip to ya aliway ginawa to, sinmempet lad sikara. Antoy reaksion na ama to? Imbaga nen Jesus ya “legan a wala nid arawi [may anak], sikatoy abantag nen ama to tan naabagey to, kanian binatik to tan nilakap to insan to inangoban.” Diad tua, agla iilaloan na anak ya perdonaen ni nen ama to. Kanian plano to komoy mikasi ya no nayari et anggan mantrabaho la diad abung nen ama to tan ituring to lan aripen. Pero tinawag nen ama to ya “ana’ko”! On, mabulbulos ton pinerdona may anak to tan inawat to lamet bilang parte na pamilya da. Kuan to may ama: “Sikatoy abalang tan aromog.” (Luc. 15:​11-32) Lapud sayan ilustrasyon nen Jesus, atalotalosan tayo ya talagan makasin Ama si Jehova!

13-14. Antoy naaralan nen apostol Pedro nipaakar ed panagbabawi, tan panon to itan ya imbangat ed arum? (Nengnengen met so litrato.)

¹³ No panagbabawi tan panamerdona so pantongtongan, say sakey ya talagan akaaral ed si Jesus et si apostol Pedro. Aminpigapigan alingo si Pedro kanian kaukolan toy panamerdona, tan ag-itan insiblet nen Jesus ed sikato. Singa bilang, nen amitlon imburi nen Pedro si Jesus, seguradon akonsiensian maong tan ibabaing toy sarili to. (Mat. 26:​34, 35, 69-75) Pero nen inmoli si Jesus, nampanengneng ed si Pedro ya siksikaran dua labat pian nakatongtong to. (Luc. 24:​33, 34; 1 Cor. 15:​3-5) Anto kasi nantongtongan da? Amta nen Jesus ya pagbabawian nen Pedro so ginawa to, kanian ompan sinambot nen Jesus iman ya pankanawnawa pian ipaseguro ed si Pedro ya aperdona to la.​—Nengnengen so Marcos 16:7 tan say study note ya “at kay Pedro” diad nwtsty-TG.

¹⁴ On, nagbabawi si Pedro tan amta toy liknaan na naperdona kanian labalabay ton ibangat itan ya katuaan ed arum. Kayari na piesta na Pentecostes, nampaliwawa si Pedro ed arapan na dakdakel iran Judio tan prangka ton imbagad  sikara ya pinatey day Mesias. Pero maar-aro to met iran pinaseseg. Kuan to: “Magbabawi kayo sirin tan manguman kayo pian naperdona [o “nabural,” paimanod leksab] iray kasalanan yo, pian onsabi iray makapainawan panaon a manlapud si Jehova a mismo.” (Gawa 3:​14, 15, 17, 19) On, impaliwawad sikara nen Pedro ya kaukolan day manguman pian nipanengneng da ya talagan magbabawi ira. Umanen day panagnonot tan kabibilay da pian napaliket da so Dios. Imbaga to met ya no ontan so gawaen da, perdonaen o buralen nen Jehova iray kasalanan da. Tan anggano deka-dekada lay linmabas, oniay impaseguro nen Pedro ed saray Kristiano: “Si Jehova et . . . maan-anos ed sikayo ta agto labay a walay siopaman a naderal noagta labay to ya amin et naikday pankanawnawan magbabawi.” (2 Ped. 3:9) Misatsalamat tayo ta anggano akagawa tayoy seryoson kasalanan, perdonaen to tayo nin siansia nen Jehova basta nanengneng to ya impapusoy panagbabawi tayo.

15-16. (a) Antoy naaralan nen apostol Pablo nipaakar ed panamerdona? (1 Timoteo 1:​12-15) (b) Antoy pantongtongan tayo ed ontumbok ya artikulo?

¹⁵ Say sakey met ya talagan kakkaukolan toy magbabawi tan naperdona et si Saulo ya taga Tarso. Pinairap ton maong iray disipulo nen Jesus. (Gawa 7:58–8:3) Kanian seguro diad pakanengneng na saray Kristiano nensaman et anggapo lay pag-asa ton manguman. Pero dumay pakanengneng nen Jesus ed sikato. Parad si Jesus, sarag ni nen Saulo so manguman tan magbabawi. Wala ray mararakep ya kualidad to ya anengneng nen Jesus tan nen Aman Jehova. Oniay imbaga nen Jesus nipaakar ed si Saulo: “Sayan too et sakey a pananginan a pinilik a mangawit na ngaran ko ed saray nasyon.” (Gawa 9:15) Diad tua, nanggawa ni ingen si Jesus na milagro pian napakiwas si Saulo ya magbabawi. (Gawa 9:​1-9, 17-20) Nen nagmaliw ya Kristiano si Saulo, sikatoy akabkabat bilang apostol Pablo. Misatsalamat ya maong ed kaabigan tan panangasi ya impanengneng nen Jehova tan nen Jesus ed sikato, tan atan ya lanang so bungay sangi to. (Basaen so 1 Timoteo 1:​12-15.) Oniay insulat to ed saray kapara ton Kristiano: ‘Lapud kaabigan na Dios et labay to kayon pakiwasen a magbabawi.’​—Roma 2:4.

¹⁶ Aminsan, abalitaan nen Pablo ya walay laki ed kongregasyon na Corinto ya manggagaway imoral, pero agda inekal ed kongregasyon. Antoy reaksion nen Pablo tan antoy imbaga to ya gawaen na saray agagi ditan? Marakep no amtaen tayoy imbaga tod sikara. Walay naaralan tayo ed satan nipaakar ed maaron panagdisiplina nen Jehova tan no panon ton ipapanengneng so panangasi ed saray magbabawi. Detalyado tayon pantongtongan itan diad ontumbok ya artikulo.