1, 2. No mandedesisyon ka no antoy gawaen mod bilay mo, akin et nibagan sakey a karunongan so idengel ed Manamalsa? (Nengnengen iray litratod gapo na artikulo.)

NO SAKEY kan kabataan, dakel la seguroy naawat mon simbawa nipaakar ed arapen mo. Nayarin saray maestram tan maestrom, guidance counselor, odino arum ni et papasesegen da ka ya mangalay atagey ya edukasyon tan karera. Duma balet so simbawa nen Jehova ed sika. Siempre, labay ton manaral kan maong ed eskuelaan pian nasuportaan moy sarilim kayarim ya man-graduate. (Col. 3:23) Balet no mandedesisyon ka no antoy nepeg mon iyuna ed bilay mo, papasesegen to ka ya paigiya ed saray maabig a prinsipyo ya ontulong pian makapambilay ka unong ed gagala tan linawa to diad sayan panaon na anggaan.​—Mat. 24:14.

² Tandaan mo met ya amta nen Jehova so amin a bengatla. Amta to no antoy nagawad sayan mundo diad arapen tan amta to no panon la kaasingger so isabi na anggaan. (Isa. 46:10; Mat. 24:3, 36) Kabkabat to itayo met​—amta to no anto ray mangiter ed sikatayo na tuan inkapnek tan liket, pati saray sengegay pakadismaya tan  panermen tayo. Kanian anggano singa maabig so simbawa na too, no ag-itan base ed Salita na Dios, aliwa itan ya tuan karunongan.​—Pro. 19:21.

3, 4. Antoy agawa ed si Adan tan Eva pati ed saray ilalak da lapud dinmengel irad makapuy a simbawa?

³ Nensaman ni et wala lay makapuy a simbawa. Ginmapo itan nen angiter si Satanas na makapuy a simbawa ed too. Imbaga tod si Eva ya magmaliw iran mas maliket a sanasawa no sikara so mandesisyon a bukor parad bilay da. (Gen. 3:1-6) Balet diad tua, makasarili so motibo nen Satanas. Labay to ya si Adan tan Eva, pati saray magmaliw ya ilalak da, et manpasakop tan mandayew ed sikato imbes ya mandayew irad si Jehova. Balet anggapon balot so agawaan to parad sikara. Si Jehova so angiter na amin ya walad sikara. Inter toy sakey tan sakey bilang kapareha, say balibalin hardin ya ayaman da, tan say perpekton laman da ya makapambilay na andi-anggaan.

⁴ Makapaermen ta agtinmulok ed Dios si Adan tan Eva, ya insian day sarili ra ed Sikato. Singa amta tayo la, mauges so nansumpalan da. Singa ra rosas ya pinongsil ed tanaman a kalkalnan amagaan tan inatey. Ontan met so agawad ananak da lapud atawir dan kasalanan. (Roma 5:12) Singa si Adan tan Eva, maslak a totoo natan et agda labay so manpasakop ed Dios. Imbes, gagawaen da no antoy labay da. (Efe. 2:1-3) Malinew a napatnagan ed saray resulta ya “anggapoy tuan karunongan . . . no sumpa iratan ed si Jehova.”​—Pro. 21:30.

5. Antoy panmamatalekan na Dios a gawaen na totoo, tan akin et nibaga tayon duga labat itan ya panmamatalek to?

⁵ Balet matalek si Jehova ya wala ray totoon mananap tan manlingkor ed sikato, kaiba lay dakel a kabataan. (Sal. 103:17, 18; 110:3) Talagan papablien to ira! Kasin sakey ka ed sikara? No ontan, seguradon dakel so naaawat mon “maong iran bengatla” a manlalapud Dios tan mamapaliket a maong ed sika. (Basaen so Salmo 103:5; Pro. 10:22) Naaralan tayod sayan artikulo ya kaiba ed “maong iran bengatla” so dakel ya espiritual a naakan, saray sankaabigan a kakaaro, makabaliksan iran kalat o goal, tan tuan kawayangan.

6. Akin et nepeg mon nonoten so espiritual a pankaukolan mo, tan panon ya itatarya iratan nen Jehova parad sika?

⁶ Aliwan singa saray ayayep, walay espiritual a pankaukolan mo, ya napenek labat na Manamalsa. (Mat. 4:4) No ondengel kad sikato, nawalaan kay aralem a pakatalos tan karunongan, tan magmaliw kan maliket. Inkuan nen Jesus: “Maliket iray manonot ed espiritual a pankaukolan da.” (Mat. 5:3) Pepeneken na Dios so espiritual a pankaukolan mo diad panamegley na Salita to tan dakel ya espiritual a naakan ya itatarya to panamegley na “matoor tan makabat ya aripen.” (Mat. 24:45) Tan talagan dakel tan makapabiskeg iratan ya naakan!​—Isa. 65:13, 14.

7. Anto ray pigaran maabig ya resulta no aawaten tayoy espiritual a naakan ya itatarya na Dios?

⁷ Say espiritual a naakan ya itatarya na Dios et mangiter ed sika na karunongan tan abilidad a mannonot, ya manprotekta ed sika ed dakel ya paraan. (Basaen so Proverbio 2:10-14.) Singa bilang, lapud saratan a kualidad et nibiig mo iray palson bangat, singa say pananisia ya anggapoy Manamalsa. Naprotektaan ka na saratan ed katilaan ya say kuarta tan kaykayarian so makapangiter na liket. Tan natulongan ka na saratan pian nabidbir tan nalabanan iray mauges a pilalek tan saray ugalin  makapuy so epekto tod sika. Kanian itultuloy moy mansagpot pian nawalaan kay karunongan a manlalapud Dios tan abilidad a mannonot, ya ipasen mo iratan ya kayamanan! Legan mon napapaaligwas iratan ya mablin kualidad, naeksperiensyam a mismo so panangaro nen Jehova ed sika tan nanengneng mo ya say sankaabigan so labay to parad sika.​—Sal. 34:8; Isa. 48:17, 18.

8. Akin et natan la so panaon ya nepeg kan onapit ed Dios, tan antoy nitulong na satan ed sika diad arapen?

⁸ Magano lan naderal so amin a kabiangan na mundo nen Satanas, tan diad satan et si Jehova labat so makayarin manprotekta ed sikatayo. Nayarin onsabi ni ingen so panaon ya sikato labat so pandependian tayon mangiter na anggan say ontumbok ya panangan tayo! (Hab. 3:2, 12-19) On, natan la so panaon pian onapit ka ed Ama tayod tawen tan pabiskegen so panagmatalek mod sikato. (2 Ped. 2:9) No ontan so gawaen mo, anggano antoy nagawa ed kaliberliber mo, naliknam so singa alikna na salmistan si David, ya oniay insulat to: “Naynay a walad arapan ko si Jehova. Agak balot nagalaw, lapud sikatoy walad nikawanan ko.”​—Sal. 16:8.

9. (a) Unong ed Juan 6:44, antoy gagawaen nen Jehova? (b) Akin ya nikadkaduma no say nakabat tayo et sakey ya Tasi?

⁹ Iyaasingger nen Jehova iramay labay ton magmaliw a membro na espiritual a pamilya to, a maaro ton iyaapit ed dugan panagdayew iramay matuan impanpuso. (Basaen so Juan 6:44.) No walay akabat mon sakey ya anggapod katuaan, antoy antam ed sikato? Ompan daiset labat, singa say ngaran tan itsura to. Duma balet no say akabat mo et kabat to tan aaroen to si Jehova. Anggano duma so binalegan, bansa, tribu, odino kultura to, dakel lay antam ed sikato​—tan dakel met lay amta to ed sika!

10, 11. Anto ray pamparehoan na saray totoo nen Jehova, tan anto ray maabig ya resulta na satan?

¹⁰ Singa bilang, nabidbir yon tampol so “lenguahe” na kada sakey​—say “puron lenguahe” na katuaan. (Sof. 3:9) Kanian amta yo so papanisiaan na kada sakey nipaakar ed Dios, saray estandarte ed moral, say ilalo ed arapen, tan arum ni. Saratan so sankaimportantian ya naamtaan yod sakey a too, ta makatulong iratan pian nawalaan kayoy  kompiyansa tan talek ed sakey tan sakey. Magmaliw met iratan ya pundasyon parad maong tan manbayag ya pankakaaro.

¹¹ Aliwan alablabas ya panangibaga ya bilang Tasi nen Jehova et walaan ka na sankamaongan iran kakaaro. Tan naromog mo ra ed interon mundo. Agmo ni ra labat akabat ya amin. Likud ed saray totoo nen Jehova, wala ni kasi arum ya panliliketan day onian mabmablin regalo?

12. Anto ray balibalin espiritual ya kalat a sarag mon dampoten?

¹² Basaen so Eclesiastes 11:9–12:1. Kasin walay sakey o pigaran espiritual ya kalat a dadampoten mo? Nayarin pansasagpotan mon basaen ya inagew-agew so Biblia. Odino nayarin papaaligwasen moy abilidad mon mansalita tan manbangat. Antokaman itan, antoy naliknam no nanengneng mo ray positibon resulta odino naimano iratan na arum tan komendaan da ka? Seguradon maliket ka ta pakaliknam et walay agawaan mo. Tan duga labat itan, ta mas iyuunam so panggawa na linawa na Dios nen say panlabayan mo, a singa ginawa nen Jesus.​—Sal. 40:8; Pro. 27:11.

13. Akin ya espisyal tan nikadkaduma so panlingkor ed Dios no ikompara ed saray ambisyon tan pilalek na sayan mundo?

¹³ No akapokus kad espiritual iran kimey, say gagawaen mo et talagan makapaliket lapud aliwa itan ya andi-kakanaan. Oniay insulat nen apostol Pablo: “Magmaliw kayon mapekder, agnagiing, a naynay a dakel so gagawaen yo ed kimey na Katawan, ta amta yo ya aliwan andi-kakanaan so pansasagpot yo nipaakar ed Katawan.” (1 Cor. 15:58) Balet, no akapokus so sakey ed saray ambisyon tan pilalek na sayan mundo​—anggano maasenso ni so bilay to​—andi-kakanaan lanlamang itan. (Luc. 9:25) Apruebaan a mismo itan nen Arin Solomon ed sarili to tan makaaral tayo ed satan.—Roma 15:4.

14. Antoy naaralan mo ed impan-eksperimento nen Solomon?

¹⁴ Si Solomon ya mayamyaman tan makapanyarin too et nan-eksperimento, ya ‘sinali toy manliket pian nengnengen no antoy maabig a nagawa.’ (Ecl. 2:1-10) Sikatoy angipaalagey na saray abung, saray hardin tan parke, tan ginawa to so amin ya labay to. Antoy alikna to? Kasin sikatoy aliketan tan apenek? Agtayo la kaukolay mannonot ta imbaga lan mismo nen Solomon ed sikatayo. Insulat to: “Sanen ninodnonot koy amin a kimey a ginawa na saray limak . . . , anengneng ko ya amin a bengatla et andi-kakanaan . . . Anggapoy bengatlan peteg a makana diad dalin.” (Ecl. 2:11) Talagan makaaral tayo ed satan!

15. Akin ya importante so pananisia, tan panon tayon nagunggonaan ed satan, ya singa nabasa ed Salmo 32:8?

¹⁵ Aglabay nen Jehova ya nasakitan ka ni antis kan makaaral. Tua, kaukolan moy pananisia pian unoren so Dios tan iyunam ed bilay mo so linawa to. Importantin maong itan ya pananisia, tan agkan balot dismayaen na satan. On, agbalot lingwanan nen Jehova so “aro ya impanengneng [mo] parad ngaran to.” (Heb. 6:10) Kanian gawam so anggaay nayarian mo ya pabiskegen so pananisiam, tan nanengneng mon mismo ya say labay na Amam ed tawen et say sankaabigan parad sika.​—Basaen so Salmo 32:8.

16. Akin et nepeg tayon pablien so kawayangan tan makabat ya usaren itan?

¹⁶ “No iner so kawalaay espiritu nen Jehova, wadman so kawayangan,” so insulat nen Pablo. (2 Cor. 3:17) On, papablien nen Jehova so kawayangan, tan inyan tod puso tayo so panamabli ed satan. Balet, labay to met ya makabat mon usaren so kawayangan mo ta proteksion itan ed sika. Nayarin wala ray kabat mon kabataan ya manbabantay na pornograpiya  odino manggagaway seksual ya imoralidad, mibibiang ed delikado iran isport, odino mandrudruga tan alabas so panag-inum day alak. Nayarin diad unaan et mani-enjoy ira. Balet mabetbet ya baleg so kasalat na satan. Nayarin mansakit ira, naadik ira, odino ompatey ni ra ingen. (Gal. 6:7, 8) Iisipen da ya walay kawayangan da, balet diad tua et anggapo.​—Tito 3:3.

17, 18. (a) Panon ya mangiter na tuan kawayangan so pangunor ed Dios? (b) Panon mon ikompara so kawayangan ya naeksperiensya nen Adan tan Eva ed kawayangan na totoo natan?

¹⁷ Balet, wala ta lay kabat mo ya nansakit lapud panguunor to ed saray estandarte na Biblia? Malinew ya say pangunor ed si Jehova et maabig ed laman tayo tan mangiter na tuan kawayangan. (Sal. 19:7-11) Sakey ni, no makabat mon usaren so kawayangan mo, ya ibasem ed saray ayadyarin ganggan na Dios tan prinsipyo, ipapanengneng mo ed Dios, pati ed atateng mo, ya mas napanmatalkan ka. Tan nayarin mas ikdan ka na atateng mo na kawayangan. Diad tua, gagala na Dios ya ikdan iray matoor a lingkor to na perpekton kawayangan, ya deneskribe ed Biblia ya “maglorian kawayangan bilang ananak na Dios.”​—Roma 8:21.

¹⁸ Naeksperiensya nen Adan tan Eva itan ya kawayangan. Pigaran ganggan so inter na Dios ed sikara diad hardin na Eden? Sakey labat. Ag-ira nayarin mangan na bunga na sakey a kiew. (Gen. 2:9, 17) Kasin ipasen mon masyadon istrikto o makapairap itan ya saksakey a ganggan? Siempre andi! Ikompara pa itan ed dakdakel ya ganggan a ginawa na too ya ipipilit dan aralen tan unoren na arum.

19. Diad anto ran paraan ya nibabangat itayo pian magmaliw ya totoon walaay kawayangan?

¹⁹ Agaylay abig na pidedeneng nen Jehova ed saray lingkor to. Imbes ya ikdan to tayoy dakdakel ya ganggan, maan-anos to itayon ibabangat ya tumboken so ganggan na aro. Labay ton manbilay tayo base ed saray prinsipyo to tan busolen tayo so kaugsan. (Roma 12:9) Say Sermon nen Jesus ed Palandey et maabig ya alimbawa na ontan ya panangibangat, lapud tinukoy na satan iray sengegan na panggaway mauges. (Mat. 5:27, 28) Bilang Ari ed Panarian na Dios, itultuloy itayon bangatan nen Kristo diad balon mundo pian perpekto tayon naalig so panmoria to ed inkatunong tan kaugsan. (Heb. 1:9) Gawaen to met ya perpekto so laman tan nonot tayo. Imadyin mo pa, agmo la kaukolan a labanan so impluensya na kasalanan odino naeksperiensya iray graben epekto na satan. Tan diad kaunoran et napanliketan mo lay “maglorian kawayangan” ya impromisa nen Jehova ed sika.

20. (a) Panon ya uusaren nen Jehova so kawayangan to? (b) Panon tayon naalig so Dios?

²⁰ Siempre, ag-itayon balot nawalaan na sigpot a kawayangan. Igiya itan na panangaro ed Dios tan ed kaparan too. Diad tua, labay nen Jehova ya sikatoy aligen tayo. Anggapoy limitasyon na kawayangan to, balet pinili ton sikatoy igiya na panangaro diad pidedeneng tod saray matalinon pinalsa to. (1 Juan 4:7, 8) Kanian nipatnag tayo ya walaan tayo na tuan kawayangan no papaigiya tayo ed panangaro a singa gagawaen na Dios.

21. (a) Antoy alikna nen David ed si Jehova? (b) Antoy aralen tayo ed ontumbok ya artikulo?

²¹ Kasin aapresyaen mo so iiter ed sika nen Jehova ya dakel a “maong iran bengatla,” a singa say dakel ya espiritual ya naakan, maong iran kakaaro, makabaliksan iran kalat, tan say ilalon nawalaan na perpekton kawayangan? (Sal. 103:5) No ontan, nayarin miparad si David so naliliknam sanen impikasi to so walad Salmo 16:11: “Impaamtam ed siak so dalan na bilay. Diad arapan mo et walay baleg a gayaga; diad nikawanan mo et walay liket ya anggad angga.” Aralen ed ontumbok ya artikulo so arum nin espiritual ya kayamanan a naromog ed Salmo 16. Ontulong iraya ed sikatayo ya mas natalosan no panon itayon nawalaan na maliket ya bilay.