Binasam ta iray agano nin isyu na Say Panag-bantayan? Salim pa sirin ya ebatan irayan tepet:

Antoy ebidensya ed Biblia ya walay empatya na Dios ed sikatayo?

Nen naaripen ed Ehipto iray Israelita nensaman, aglabat amta na Dios ya nagogonigon ira, noagta nalilikna ton mismoy sakit ya nalilikna ra. (Exo. 3:7; Isa. 63:9) Pinalsa itayo na Dios unong ed indengan to, kanian sarag tayon ipatnag met so empatya. Walay empatya tod sikatayo anggano pakalikna tayo et agtayo makanepegan ed panangaro to.​—wp18.3, p. 8-9.

Panon a makatulong ed totoo iray bangat nen Jesus pian daegen so panangidumaduma?

Dakel ya Judio ed panaon nen Jesus so manangidumaduma. Indanet nen Kristo ya kaukolan so inkamapaabeba, tan kinondena to iramay mapaatagey lapud lahi ra. Pinaseseg to iray patumbok to ya ipasen dan sanaagi ira.​—w18.06, p. 9-10.

Antoy naaralan tayo ed ag-impangiyabuloy na Dios ed si Moises ya onloob ed Insipan a Dalin?

Si Moises et walaan na maapit a relasyon ed si Jehova. (Deu. 34:10) Diad bandad sampot na 40 taon ya impanbiahe na saray Israelita ed kalawakan, nanreklamo ira lamet ta anggapoy danum. Imbaga na Dios ed si Moises ya sikatoy mansalita ed bato. Balet say ginawa nen Moises et pinekpek to so bato. Nayarin sinmanok si Jehova lapud agtinumbok nen Moises iray instruksion To odino lapud ag-inggloria nen Moises so Dios ed saman a milagro. (Num. 20:6-12) Naaralan tayod saya ya importante ya unoren si Jehova tan sikato so igloria tayo.​—w18.07, p. 13-14.

Panon ya nayarin makagawa tayoy lingo no manhuhusga tayo base labat ed nanenengneng tayo?

Walay taloran maslak ya mangiimpluensya ed totoo diad panhuhusga rad arum base ed nanenengneng da: lahi odino kultura, kipapasen ed panagbilay, tan edad. Importante ya nengnengen tayo so arum ya anggapoy panaglabi a singa gagawaen na Dios! (Gawa 10:34, 35)​—w18.08, p. 8-12.

Anto ray pigaran paraan ya makatulong ed arum iray maedad lan Kristiano?

Siansian papablien na Dios iramay maedad lan Kristiano ya anguman so asainmin da tan dakel ni nagawaan da pian tulongan so arum. Sarag day ontulong ed saray agmananisian asawa tan ed saray inaktibo, mangiyaral na Biblia, tan aruman so panaon da ed ministeryo.​—w18.09, p. 8-11.

Anto ray kaiba ed Uusaren ed Panagbangat na saray Kristiano?

Kaiba dia iray contact card tan imbitasyon. Kaiba met so waloran tract tan saray magasin ya Panag-bantayan tan Onliing! Wadtan met iray pigaran brosyur, duaran libro ya manunan uusaren ed panangiyaral, tan apatiran mausar a video, kaiba lay Akin ya Aralen so Biblia?​—w18.10, p. 16.

Panon ya ‘nasaliw’ na sakey a Kristiano so katuaan a singa ipapaseseg na Proverbio 23:23?

Agtayo kaukolay kuarta pian nasaliw so katuaan. Balet, kaukolan tayoy panaon tan sagpot pian niwala itan ed sikatayo.​—w18.11, p. 4.

Antoy naaralan tayo ed ginawa nen Oseas ed asawa ton si Gomer?

Aminpigan akikalugoran si Gomer, balet sikatoy pinerdona nen Oseas tan nansiansian asawa to. No say sakey ya Kristianon asawa et makagawa na seksual ya imoralidad, desisyon na inosentin asawa no sikatoy perdonaen to. No ipawil toy seksual ya relasyon to ed nankasalanan ya asawa to, anggapo lay Makasulatan ya basiyan to parad diborsyo.​—w18.12, p. 13.