1. Antoy inmatalek nen Jehova ed saray atateng?

PINALSA nen Jehova so inmunan sanasawa ya walaan na pilalek ya nawalaay ananak. Kanian duga imay ibabaga na Biblia: “Saray ananak et tawir manlapud si Jehova.” (Sal. 127:3) Antoy labay ya ibaga na satan? Imadyin mon walay baleg a kantidad na kuarta ya impaisinop ed sika na maapit a kaarom. Antoy naliknam? Lapud nanmatalekan to ka, seguradon maliket ka. Balet ompan mapaga ka no panon mon isinop itan ya kabaleg na kuarta. Si Jehova, say sankaapitan ya Kaaro tayo, et inmatalek to ed saray atateng so pangasikaso ed mas importante nen say kuarta. Inmatalek tod sikara so responsabilidad ya asikasoen tan seguroen ya maliket iray ananak da.

2. Anto ran tepet so pantongtongan tayo?

² Siopay nepeg ya mandesisyon no kasin say sanasawa et mananak tan no kapigan ira nawalaay anak? Tan panon ya natulongan na atateng iray ananak da pian magmaliw ya maliket so bilay da? Aralen tayo so pigaran prinsipyo ya walad Salita na Dios ya makatulong ed saray sanasawan Kristiano pian makapandesisyon ira na duga.

3. (a) Siopay nepeg ya mandesisyon no kasin say sanasawa et mananak? (b) Anto ran prinsipyo na Biblia so nepeg ya tandaan na kakaaro tan kapamilya na sanasawa?

³ Diad arum ya kultura, iilaloan iray balon kasal ya nawalaan ya tampol na ananak. Ompan desdesen ni ingen ira na kapamilya da  tan na arum a totoo ya gawaen itan. Oniay imbaga nen Jethro, sakey a brother ed Asia, “Diad kongregasyon mi, dedesdesen na saray walaan na anak iray sanasawan anggapo ni anak da ya manpamilya la ra.” Onia met so naobserbaan nen Jeffrey, sakey nin brother ed Asia, “Wala ray mangibabaga ed saray sanasawan anggapoy anak ya anggapo kunoy mangasikaso ed sikara no ontatken ira.” Balet, nepeg ya say sanasawa so mandesisyon no kasin mananak ira odino andi. Desisyon da itan; sikaray akanresponsabilidad ed satan. (Gal. 6:5) Siempre, labay na saray kakaaro tan kapamilya na balon kasal ya maliket so sanasawa. Balet kaukolan dan tandaan ya aliwan sikara so mandesisyon noagta say sanasawan mismo.​—1 Tes. 4:11.

4-5. Anton duaran tepet so importantin pantongtongan, tan kapigan itan nepeg ya pantongtongan? Ipaliwawa.

⁴ No say desisyon na sanasawa et mananak ira, kaukolan dan pantongtongan so duaran importantin tepet: Unona, kapigan da labay ya nawalaay anak? Komadua, pigara so labay dan anak? Balet, kapigan da nepeg ya pantongtongan itan? Tan akin ya importantin pantongtongan da iratan ya tepet?

⁵ Kaslakan, antis nin mankasal so saninaro, mas maabig no apantongtongan da la no kasin mananak ira. Akin ey? Lapud kaukolan ya pareho so desisyon da nipaakar ed satan. Ontan met, kaukolan dan ikonsidera no kasin akaparaan la ra ed satan ya responsabilidad. Wala ray saninaro ya nandesisyon ya palabasen da ni sakey o duaran taon kayari na pankasal da insan ira mananak, lapud no magmaliw la ran atateng, mas dakel lan panaon tan biskeg so usaren da ed pangasikaso ed anak da. Iisipen da ya no agni ran tampol mananak, wala ni panaon dan makapan-adjust ed bilay na walaay asawa tan mas onapit ni rad sakey tan sakey.​—Efe. 5:33.

6. Lapud panaon ya pambibilayan tayo, antoy desisyon na arum ya sanasawa?

⁶ Saray arum ya Kristiano et inalig day alimbawa na taloran ananak nen Noe tan saray kaasawaan da. Agni ra nananak ya tampol. (Gen. 6:18; 9:18, 19; 10:1; 2 Ped. 2:5) Inkompara nen Jesus so panaon tayo ed “panaon nen Noe,” tan mapatnag ya manbibilay tayo met ed “mapeligro tan mair-irap a panaon.” (Mat. 24:37; 2 Tim. 3:1) Lapud satan, wala ray sanasawa ya nandesisyon ya agni ra mananak pian mas dakel ni nagawaan da ed panaglingkor ed si Jehova.

7. Panon ya makatulong ed sanasawa iray prinsipyo ya nabasad Lucas 14:28, 29 tan Proverbio 21:5?

 ⁷ Saray marunong ya sanasawa et unoren day prinsipyo ya ‘kuentaen ni nagastos’ antis iran mandesisyon no kasin mananak ira tan no pigara so labay dan anak. (Basaen so Lucas 14:28, 29.) Apruebaan la na saray atateng a nampabaleg na ananak ya aliwa labat itan ya magastos noagta mangupot met na panaon tan biskeg. Kanian importante ya ikonsidera na sanasawa irayan tepet: ‘Kasin kaukolan ya sikamin dua so mantrabaho pian nasuportaan iray pankaukolan na pamilya mi? Kasin apantongtongan mi la no anto ray “talagan kaukolan” na pamilya mi? No mantrabaho kamin dua, siopay mangasikaso ed ananak mi? Siopay labay min mangimpluensya ed panagnonot tan kakikiwas da?’ Saray sanasawa ya seryoso dan pantotongtongan iratan ya tepet et iyaaplika da so nabasad Proverbio 21:5.​—Basaen.

8. Anto ran mairap ya situasyon so ilaloan ya nagawa na saray Kristianon sanasawa, tan antoy gawaen na maaron asawan laki?

⁸ Kaukolan tan kanepegan na anak so magenap a panaon tan panangasikaso na kada ateng to. Kanian no mantutumbokan so ananak, ompan nairapan iray atateng ya iter so panangasikaso ya kaukolan na kada anak. Inamin na saray sanasawan walaan na pigaran angkekelag ya ananak ya nairapan ira. Nayarin naynay ya naknaksawan ed pisikal tan emosyonal so sakey ya ina. Ompan lapud satan et anggapo lay biskeg ton manaral, manpikasi, tan regular ya manpulong. Sakey ni, nayarin nairapan ya manpokus ed saray Kristianon pantitipon tan agtanton minabang ed saratan. Siempre, gawaen na maaron asawan laki so nayarian to pian nasuportaan so asawa to no kaukolan na ananak da so panangasikaso, balanglan wala rad aral odino diad abung. Singa bilang, sarag ton ibaan so asawa to ed saray kimey ed abung. Pansagpotan to ya seguroen ya amin et nagunggonaan legan na Panagdayew na Pamilya. Tan lanang ton kaiba so pamilya to ed panagpulong.

9-10. Antoy kaukolan ya gawaen na atateng pian natulongan da iray ananak da?

⁹ Anto ray nagawaan na atateng pian natulongan da ray ananak da ya aroen si Jehova? Panon da ran naprotektaan ed sayan mauges ya mundo? Aralen tayo so pigaran paraan pian nagawaan da itan.

¹⁰ Kerewen so tulong nen Jehova panamegley na pikakasi. Imanoen so alimbawa nen Manoa tan say asawa to, saray atateng nen Samson. Nen naamtaan nen Manoa ya malukon so asawa to, akikasi ed si Jehova ya ibangat To ra no panon dan pabalegen so anak da.

11. Panon ya naalig na saray atateng so alimbawa nen Manoa a singa nabasad Ukom 13:8?

 ¹¹ Si Nihad tan Alma, ya tagad Bosnia tan Herzegovina, et akaaral ed alimbawa nen Manoa. Oniay imbaga ra: “Singa si Manoa, akikasi kami ed si Jehova pian ibangat to kami no panon kamin magmaliw ya maong ya atateng. Tan inebatan nen Jehova iray pikakasi mi ed nanduruman paraan—panamegley na Biblia, saray publikasyon, saray aral, tan kombension.”​—Basaen so Ukom 13:8.

12. Anton alimbawa so impanengneng nen Jose tan Maria ed saray ananak da?

¹² Manbangat panamegley na alimbawa. Importante no antoy ibagam, balet mas baleg so epekto ed anak mo na saray gagawaen mo. Segurado tayo ya angipanengneng na maabig ya alimbawa si Jose tan Maria ed saray ananak da, kaiba lay Jesus. Makulin nankimey si Jose pian nalegpet toy pamilya to. Ontan met, pinaseseg ira nen Jose ya pablien iray espiritual a bengatla. (Deu. 4:9, 10) Anggano agkekerewen na Ganggan ya awiten nen Jose so pamilya to ed Jerusalem pian “tinaon” ya selebraan so Paskua, siansia nin inawit to ra. (Luc. 2:41, 42) Ompan inisip na arum ya ulo na pamilya diad panaon nen Jose ya mairap, maabala, tan magastos no kaiba ed biahe so interon pamilya. Balet inapresya nen Jose iray espiritual a bengatla tan seguradon ontan met so imbangat to ya gawaen na ananak to. Kabkabisado met nen Maria so Kasulatan. Diad saray ibabaga tan gagawaen to, seguradon imbangat tod ananak to ya aroen day Salita na Dios.

13. Panon ya inalig na sakey ya sanasawa so alimbawa nen Jose tan Maria?

¹³ Inalig nen Nihad tan Alma so alimbawa nen Jose tan Maria. Panon itan ya akatulong ed sikara ya napabaleg so anak da ya aroen tan panlingkoran toy Dios? Imbaga ra, “Diad amin ya gagawaen mi, nansagpotan min ipanengneng ed anak mi ya talagan makapaliket no iyaplika iray prinsipyo nen Jehova.” Insan inyarum nen Nihad, “Ipanengneng mod alimbawam no antoy labay mon pagmaliwan na anak mo.”

14. Akin et kaukolan mon amtaen no siopa ray kaulop na ananak mo?

¹⁴ Tulongan so ananak mo ya manpili na maong iran kaulop. Kaukolan mon amtaen no siopa ray kaulop na ananak mo tan no antoy gagawaen da. Kaibad satan so pangamta no siopa ray ka-text tan ka-chat da panamegley na social media. Baleg so impluensya na saratan ya kaulop ed panagnonot tan kakikiwas na ananak mo.​—1 Cor. 15:33.

15. Antoy naaralan na atateng ed alimbawa nen Jessie?

¹⁵ Balet panon to no agkabisado na atateng ya usaren iray computer odino gadyet? Oniay imbaga nen Jessie, sakey ya ama diad Pilipinas: “Agmi kabisadon usaren iray gadyet. Balet siansia nin babangatan mi ray ananak mi no panon dan naiwasan iray posiblin peligro na saratan.” Agbinawalan nen Jessie iray ananak to ya mangusar na saray gadyet lapu labat ta agto kabisado iratan. Oniay imbaga to: “Pinaseseg ko ray ananak ko ya usaren iratan pian manaral na balon lenguahe, manparaan parad aral, tan manbasa na Biblia ya inagew-agew.” No sakey kan ateng, kasin binasam tan impaliwawam la ed ananak mo so balansin simbawa nipaakar ed panag-text tan pangi-post na saray litrato ed Internet ya naromog ed seksion ya “Tinedyer” diad jw.org^®? Kasin binantayan tan pinantongtongan yo lan kaiba iray ananak yo iray video ya Siopay Mangokontrol—​Sika o Say Gadyet Mo? tan Magmaliw ya Matalino ed Pangusar na Social Network? * Makatulong iratan pian  nibangat mod ananak mo no panon dan makabat ya usaren iray gadyet.​—Pro. 13:20.

16. Antoy ginawa na dakel ya atateng, tan antoy resulta?

¹⁶ Manggagaway paraan so dakel ya atateng pian makapiulop so ananak da ed saramay maong so alimbawa ra ed panaglingkor ed Dios. Singa bilang, si N’Déni tan Bomine, ya sanasawan tagad Côte d’Ivoire, et naynay dan iimbitaan so manangasikaso na sirkito diad abung da. Oniay imbaga nen N’Déni: “Balbaleg so epekto na satan ed anak mi. Sikatoy nampayunir tan natan et manlilingkor la bilang kasandin manangasikaso na sirkito.” Kasin sarag yo met iyan aligen parad ananak yo?

17-18. Kapigan nepeg ya igapo na atateng so pangipasal ed ananak da?

¹⁷ Ipasal lan tampol so ananak yo. No ipasal ya tampol na atateng iray ananak da legan ya ugugaw ni ra, balibali epekto na satan ed sikara. (Pro. 22:6) Imanoen si Timoteo, ya sinmabi panaon et akaiba nen apostol Pablo ed impanbiahe to bilang misionero. Si Timoteo et impasal na nanay ton si Eunice tan say bai ton si Loida “manlapud inkaugaw” odino inkiyanak to.​—2 Tim. 1:5; 3:15.

¹⁸ Say sakey nin sanasawa ya tagad Côte d’Ivoire et si Jean-Claude tan Peace. Pinabaleg da ray anemiran ananak da ya aroen tan panlingkoran si Jehova. Antoy akatulong ed sikara pian nagawaan da itan? Inalig day alimbawa nen Eunice tan Loida. Imbaga da, “Impurek mi ed ananak mi so Salita na Dios manlapud inkiyanak da, inggapo mi lan tampol ag-abayag kayarin niyanak ira.”​—Deu. 6:6, 7.

19. Antoy labay ya ibaga na pangipurek na Salita na Dios ed ananak yo?

¹⁹ Antoy labay ya ibaga na “ipurek” so Salita nen Jehova ed ananak yo? Say labay ya ibaga na salitan “ipurek” et “pangibangat tan pangipanonot panamegley na mabetbet ya pangulit-ulit.” Pian nagawaan itan na atateng, kaukolan ya naynay dan kaiba iray angkelag nin ananak da. Nayarin no maminsan et nadismaya iray atateng ta kaukolan dan ulit-uliten ya bilinen iray ananak da. Balet, kaukolan ya ipasen na atateng ya sakey itan ya paraan pian natulongan da ray ananak da ya natalosan so Salita na Dios tan iyaplika itan.

20. Ipaliwawa no panon ya onaplika so Salmo 127:4 ed pamabaleg na ananak.

²⁰ Kabaten ya maong iray ananak yo. Inkompara  na Salmo 127 iray ananak ed saray pana. (Basaen so Salmo 127:4.) Saray pana et gawad nanduruman materyales tan nanduruma so kabaleg da. Ontan met iray ananak, duma so kada ugaw. Kanian kaukolan ya tebeken na atateng no panon dan ipasal so kada ugaw. Imbaga na sanasawan manaayam ed bansan Israel natan no antoy akatulong ed sikara pian napabaleg da so duaran ananak da ya manlingkor ed si Jehova, “Biig min inyaralan na Biblia so kada sakey ed saray ananak mi.” Siempre, say ulo na pamilya so mandesisyon no kasin kaukolan odino posible ya biig ya iyaralan so kada anak da.

21. Panon ya tutulongan nen Jehova iray atateng?

²¹ Ompan no maminsan, say pakalikna na atateng et agda sarag ya bangatan iray ananak da, balet saray anak et regalo ya nanlapu ed si Jehova. Sikatoy lanang ya akaparaan ya ontulong. Labalabay ton dengelen iray pikakasi na atateng. Tan eebatan toy pikakasi ra panamegley na Biblia, saray publikasyon tayo, ontan met ed alimbawa tan bilin na saray eksperiensyadon atateng ed kongregasyon.

22. Anto ray sankaabigan ya niiter na atateng ed ananak da?

²² Ibabaga na arum ya say responsabilidad na atateng ed pamabaleg na ananak et sabien toy 20 taon, balet diad tua, say inkaateng da et agbalot mangangga. Kaibad saray sankaabigan ya niiter da ed ananak da et say panangaro, panaon, tan panangipasal ya nibase ed Biblia. Nandurumay reaksion na kada ugaw ed panangipasal. Balet, dakel ed saray ananak ya pinabaleg na atateng ya mangaaro ed si Jehova et alikna da met imay alikna nen Joanna Mae, sakey ya sister ed Asia, oniay imbaga to: “No pawilen ko so impangipasal na atateng ko ed siak, pisalamatan kon maong ta dinisiplina da ak tan imbangat da ed siak ya aroen si Jehova. Agda ak labat basta inyanak, sineguro da met ya maliket so bilay ko.” (Pro. 23:24, 25) Ontan met so nalilikna na minilyon ya agagi tayo.