1-2. (a) Anto so jubileo? (Nengnengen so kahon ya “ Anto so Jubileo?”) (b) Antoy imbaga nen Jesus diad Lucas 4:16-18?

DIAD arum ya bansa, wala ray gagawaen dan espisyal ya selebrasyon parad koma-50 taon na uley na ari odino reyna. Satan ya koma-50 taon et tatawagen ya taon na jubileo na satan a manuley. Saray piesta legan na jubileo et sakey agew, sakey simba, odino mas andukey ni, balet manampot lanlamang iratan, tan nalingwanan na totoo so liket da.

² Pantongtongan tayo so mas maabig ya jubileo, ya mas maabig ni nen samay sakey taon ya piesta a seselebraan ed Israel nensaman kada koma-50 taon. Satan ya Jubileo nensaman so angiter na kibulos ed saray Israelita. Akin ya importantin aralen tayo itan? Lapud say taon na Jubileo ed Israel et ipanonot to ed sikatayo so makapadinayew ya probisyon nen Jehova parad andi-anggaan ya kibulos tayo. Natan ni labat et nagugunggonaan tayo la ed satan ya kibulos a binitla nen Jesus.​—Basaen so Lucas 4:16-18.

3. Base ed Levitico 25:8-12, panon ya agunggonaan iray Israelita ed Jubileo?

³ Mas natalosan tayo so labay ya ibaga nen Jesus ed samay binitla to nipaakar ed kibulos no aralen tayo nin unona so Jubileo ya inyuksoy na Dios parad saray totoo to nensaman. Imbaga nen Jehova ed saray Israelita: “Nepeg yon pasantosen so koma-50 taon tan iyabawag yo so kibulos diad amin a manaayam ed dalin. Magmaliw itan a sakey a Jubileo parad sikayo, tan ompawil so balang sakey ed kayarian ton dalin tan ompawil so balang sakey ed pamilya to.” (Basaen so Levitico 25:8-12.) Diad akaunan  artikulo, inaral tayo no panon ya agunggonaan iray Israelita ed sinimba ya Sabaton. Panon balet iran agunggonaan ed Jubileo? Singa bilang, nayarin alubog ed utang so sakey ya Israelita, kanian apilitan ya ilako so dalin to pian nabayaran toy utang to. Legan na taon na Jubileo, nepeg ya ipawil ed sikato so dalin to. Kanian sarag toy ‘ompawil ed kayarian ton dalin,’ tan agnaandian na tawir iray ananak to. Posible met ya lapud irap na bilay et napilitan so sakey ya Israelita ya ilako so anak to—odino say sarili to—pian magmaliw ya aripen tan nabayaran toy utang to. Legan na taon na Jubileo, say aripen et nepeg ya ‘ompawil ed pamilya to.’ Kanian amin ya Israelitan aripen et walaan na ilalon nibulos! Talagan inar-aro nen Jehova iray totoo to!

4-5. Akin et importante ya aralen tayo so Jubileo?

⁴ Anto ni sakey ya gunggona ya inter na Jubileo? Imbaga nen Jehova: “Anggapod sikayoy nepeg a magmaliw a pobri, ta seguradon bendisyonan kayo nen Jehova diad dalin ya iter ed sikayo nen Jehova a Dios yo bilang tawir a nakayarian yo.” (Deu. 15:4) Kabaliktaran itan ed nagagawa ed mundo natan ya saray mayaman et lalon onyayaman, tan saray mairap et lalon oniirap!

⁵ Sikatayo ran Kristiano et agla sakop na Mosaikon Ganggan. Kanian agtayo la uunoren iray uksoyan ed Jubileo ya singa say pangibulos ed saray aripen, agla pansingil ed utang, tan pangipawil ed tawir ya dalin. (Roma 7:4; 10:4; Efe. 2:15) Balet siansia nin importante ya aralen tayo so Jubileo. Akin? Lapud ipanonot na satan imay ginawa nen Jehova parad sikatayo pian nibulos itayo ed kasalanan.

6. Akin et kaukolan tayon amin so nibulos?

⁶ Kaukolan tayon amin so nibulos lapud aripen itayo na kasalanan, say sankaugesan a mangaaripen ed totoo. Lapud kasalanan et ontatatken, mansasakit, tan ompapatey itayo. Nanengneng tayoy prueba na satan lalo la no man-espiho tayo odino manpanengneng tayod doktor. Nadidismaya itayo met no makakagawa tayoy kasalanan. Binidbir nen apostol Pablo ya ‘say kasalanan et walad laman to tan  mangokontrol ed sikato.’ Imbaga to ni: “Pakaskasi ak lan too! Siopa so mangisalba ed siak ed laman a mamapawala ed sayan ipapatey?”—Roma 7:23, 24.

7. Antoy impasakbay nen Isaias nipaakar ed kibulos?

⁷ Maong labat ta nanggaway paraan so Dios pian niliktar odino nibulos tayo ed kasalanan. Nagmaliw itan ya posible panamegley nen Jesus. Masulok ya 700 taon antis ya linma diad dalin si Jesus, impasakbay la nen propeta Isaias so baleg a kibulos ya nagawa diad arapen. Satan ya baleg a kibulos et mas dakel so iter ton gunggona nen samay kibulos ed taon na Jubileo ed Israel. Insulat to: “Walad siak so espiritu na Soberanon Katawan a Jehova, ta nilanaan ak nen Jehova a mangiyabawag na maong a balita ed saray mauyamo. Imbaki to ak pian bedberan iramay asugatan a puso, pian iyabawag so kibulos ed saray naaripen.” (Isa. 61:1) Siopa so tutukoyen na satan ya propesiya?

8. Siopay tutukoyen na samay propesiya nen Isaias nipaakar ed kibulos?

⁸ Satan ya importantin propesiya nipaakar ed kibulos et ginmapon asumpal diad kagapo na ministeryo nen Jesus. Nen sikatoy linmad sinagoga diad baley to ya Nazaret, imbasa to iyan propesiya nen Isaias ed saray Judio ya nantitipon diman: “Walad siak so espiritu nen Jehova ta nilanaan to ak a mangiyabawag na maong a balita ed saray mairap-bilay. Imbaki to ak pian iyabawag so kibulos ed saray naaripen tan kipawil na pakanengneng ed saray bulag, pian mangibulos ed saray napapairap, pian mangipulong na makapaliket a taon nen Jehova.” Insan imbaga nen Jesus ya satan ya propesiya et ontutukoy ed sikato. (Luc. 4:16-19, 21) Panon a sinumpal nen Jesus itan ya propesiya?

9. Anton kibulos so inilaloan na dakel ya totoo diad panaon nen Jesus?

⁹ Say kibulos odino kalayaan ya impasakbay nen Isaias tan binasa nen Jesus et ginmapon naawat na saray totoo nen inmunan siglo. Amta tayo itan lapud imbaga nen Jesus: “Diad sayan agew et asumpal iyan kasulatan a kaykayari yon nadngel.” (Luc. 4:21) Nayarin iilaloan na dakel ed saramay akarengel ed binasa nen Jesus ya diad saman et nibulos la ra ed uley na Roma. Ompan naisip da met so imbaga na duaran lalaki: “Iilaloan mi a sayan too so mangiliktar ed Israel.” (Luc. 24:13, 21) Balet amta tayo ya aglabay nen Jesus ya manrebelde iray papatumbok to ed maruksan uley na Roma. Imbes, binilin to ra ya iter da “ed Cesar iray bengatlan  kien na Cesar.” (Mat. 22:21) Panon sirin ya imbulos nen Jesus iray totoo ed saman ya panaon?

10. Diad anton paraan ya imbulos nen Jesus iray totoo?

¹⁰ Linma diad dalin so Anak na Dios pian ibulos iray totoo diad duaran paraan. Unona, imbulos nen Jesus iray totoo ed saray makapairap a doktrina ya ibabangat na saray lider na relihyon. Dakel ya Judio nensaman so aripen na saray tradisyon tan palson bangat. (Mat. 5:31-37; 15:1-11) Ibabaga na sarayan lider na relihyon ya tutulongan da ray totoo ya manlingkor ed Dios, balet singa ra bulag ya manangigiya. Lapud agda inawat so Mesias tan say katuaan ya imbangat to, nansiansia ra ed bilunget tan kasalanan. (Juan 9:1, 14-16, 35-41) Diad panamegley na saray katuaan ya imbangat nen Jesus tan ed maabig ya alimbawa to, impaamta to ed saray mapaabeba no panon iran nibulos ed saray palson bangat.​—Mar. 1:22; 2:23–3:5.

11. Anto so komaduan paraan ya imbulos nen Jesus iray totoo?

¹¹ Komadua, imbulos nen Jesus iray totoo ed panangaripen na kasalanan. Lapud dondon bagat nen Jesus, nayari lan perdonaen na Dios iray kasalanan na saray mangipapanengneng na pananisia tan mangawat ed dondon ya intarya To. (Heb. 10:12-18) Imbaga nen Jesus: “No ibulos kayo na Anak, talagan nibulos kayo.” (Juan 8:36) Satan ya kibulos et talagan mas baleg nen samay kibulos ya naawat na saray Israelita ed taon na Jubileo! Singa bilang, say sakey ya Israelita ya nibulos legan na Jubileo et posiblin magmaliw lamet ya aripen, tan ompatey lanlamang diad ilabas na panaon.

12. Siopa ray unonan agunggonaan ed samay kibulos ya inyabawag nen Jesus?

¹² Nen Pentecostes 33 C.E., nilanaan nen Jehova na masanton espiritu iray apostol tan arum nin matoor ya bibii tan lalaki. Tinagibi to ra bilang ananak to pian diad arapen et paolien to ra diad tawen tan manuley ira ya kaiba nen Jesus. (Roma 8:2, 15-17) Sikara so unonan agunggonaan ed kibulos ya inyabawag nen Jesus diad sinagoga ed Nazaret. Aliwa la ran aripen na saray palson bangat tan kustombre ya ibabangat na saray Judion lider na relihyon. Impasen na Dios ya bulos la ra manlapud makapatey ya epekto na kasalanan. Say simbolikon Jubileo ya ginmapo sanen alanaan iray papatumbok nen Kristo nen 33 C.E. et manampot no nasumpal so Sanlibon Taon ya Uley nen Kristo. Anto ni ray nagawa antis na satan?

13-14. Nilikud ed saray alanaan ya Kristiano, siopa ni ray makaawat ed kibulos ya inyabawag nen Jesus?

¹³ Diad panaon tayo, minilyon ya matoor a totoo ya nanlapud amin a bansa so kabiangan la na ‘arum a karnero.’ (Juan 10:16) Ag-ira kaiba ed saramay pinili na Dios ya miuley ed si Jesus diad tawen. Imbes, ibabaga na Biblia ya walay ilalo ran manbilay na andi-anggaan diad dalin. Kasin ontan met so ilalom?

¹⁴ Natan ni labat et panliliketan mo la iray arum ya bendisyon ya inter ed saray alanaan. Lapud pananisiam ed dondon bagat nen Jesus, sarag mon kerewen ed si Jehova ya perdonaen to ray kasalanan mo. Manresulta itan ed panangabobon na Dios tan nawalaan ka na malinis ya konsiensia ed arapan to. (Efe. 1:7; Apo. 7:14, 15) Isipen met iray bendisyon ya panliliketan mo lapud nibulos ka ed saray bangat ya agnibase ed Biblia. Imbaga nen Jesus: “Naamtaan yo so katuaan, tan say katuaan so mangibulos ed sikayo.” (Juan 8:32) Talagan makapaliket itan ya kibulos!

15. Anton kibulos so asingger lan nagawa tan anto ran bendisyon so panliketan tayo?

¹⁵ Makapanmatalek ka ya walay mas baleg ya kibulos a nagawad arapen. Asingger lan onkiwas si Jesus pian deralen so palson relihyon tan say mauges ya uley na totoo. Protektaan na Dios so “baleg ya ulop” a manlilingkor ed sikato,  tan panliketan da so dakel ya bendisyon diad paraison dalin. (Apo. 7:9, 14) Dakel so paolien tan nawalaan ira na pankanawnawan nibulos ed amin ya epekto na impankasalanan nen Adan.​—Gawa 24:15.

16. Anton baleg a kibulos so tatalaranan tayo?

¹⁶ Legan na Sanlibon Taon, tulongan nen Jesus tan saray kaiba ton manuley iray totoo ya anggad magmaliw lan perpekto so laman da tan say relasyon da ed Dios. Sayan panaon na panangipawil tan panangibulos et mipara ed samay Jubileo diad Israel. Amin ya matoor a mandadayew ed si Jehova diad dalin et magmaliw ya perpekto tan bulos la ed kasalanan.

17. Antoy impasakbay na Isaias 65:21-23 nipaakar ed totoo na Dios? (Nengnengen so litrato ed apis.)

¹⁷ Say kipapasen na bilay diad dalin ed arapen et nipropesiya ed Isaias 65:21-23. (Basaen.) Dakdakel so kimey ed satan ya panaon. Ibabaga na Biblia ya saray totoo na Dios et panliketan da so mankimey tan nagunggonaan iran maong ed saray sagpot da. Diad panampot na Sanlibon Taon, makaseguro tayo ya “saray pinalsa et nibulos met manlapud impakaaripen ed kabubulok tan nawalaan na maglorian kawayangan bilang ananak na Dios.”​—Roma 8:21.

18. Akin et makapanmatalek tayo ya maliket so bilay ed arapen?

¹⁸ No panon ya nanggaway uksoyan si Jehova pian saray Israelita et nawalaan na balansin panaon parad panagkimey tan panagpainawa, seguradon ontan met so gawaen to parad saray totoo to diad Sanlibon Taon ya Uley nen Kristo. Seguradon diad satan et walay panaon tayo parad panagdayew ed Dios. Importante itan pian magmaliw tayon maliket natan, tan diad balon mundo et seguradon dakel so panaon tayo parad satan. On, amin ya matoor a totoo et manliket diad Sanlibon Taon ya Uley nen Kristo lapud amin tayo et manlingkor ed Dios tan nawalaan na makapnek ya kimey!