‘KASIN maapresya ak tan amtak so misalamat?’ Importantin itepet itan na balang sakey ed sarili to. Impropesiya na Biblia ya diad panaon tayo, dakel ya totoo so “agda amtay misalamat.” (2 Tim. 3:2) Nayarin wala ray kabat mo ya iisipen dan dapat labat ya panserbian ira na arum, ya singa balbaleg so utang na arum ed sikara. Lapud satan, pakalikna da et agda kaukolan so misalamat no walay naawat da. Kasin labay mon kaiba iray ontan ya totoo?

Onia balet so bilin nen Jehova ed saray lingkor to: “Ipanengneng yon misalsalamat kayo.” Nepeg ya ‘pisalamatan tayo so amin a bengatla.’ (Col. 3:15; 1 Tes. 5:18) Diad tua, sikatayo lanlamang so minabang no iyugali tayo so misalamat. Wala ray pigaran rason no akin ya ontan.

Say sakey ya importantin rason no akin ya kaukolan tayon iyugali so misalamat et lapud makatulong itan pian magmaliw ya positibo so pakanengneng tayo ed sarili tayo. No misasalamat so sakey ya too, balibali liknaan to, pati samay pisasalamatan to. Akin et pareho ran maliket? Singa bilang, no labalabay na arum so manggawa na kamaongan ed sika, labay ton ibaga et nalilikna ra ya kanepegan mo itan. Prueba itan ya walay malasakit da ed sika. No naliknam so malasakit da, agta balibali liknaan mo? Ontan so alikna nen Ruth sanen sikatoy tinulongan nen Boaz. Seguradon malikeliket si Ruth nen alikna ton walay manmamalasakit ed sikato.​—Ruth 2:10-13.

Say manunan pisalamatan tayo et say Dios. Segurado ya no maminsan et nanonotan mo ray dakel ya espiritual tan pisikal ya regalo to ya tuloytuloy ton iiter. (Deu. 8:17, 18; Gawa 14:17) Balet imbes ya bastam labat nonoten ya magano iratan, mas maong no ipanaon mon dalepdepen iray dakel ya bendisyon na Dios ed sika tan diad saray inarom ed bilay. No dalepdepen mo so inkamaiter na Amalsa, sikatoy mas naapresyam tan mas naliknam ya inar-aro tan papablien to ka.​—1 Juan 4:9.

Balet aliwan magenap ya nonoten mo labat so inkamaiter na Dios tan dalepdepen iray bendisyon to ed sika; nepeg mo met ya pisalamatan si Jehova ed kamaongan to. (Sal. 100:4, 5) Papanisiaan na dakel ya “say pangibalikas na pisasalamat et baleg so nitulong to pian magmaliw a maliket so sakey a too.”

Say sakey nin maabig ya resulta no iyugalim so misalamat et onelet so relasyon mod saray kakaarom. Labalabay tayon walay mangapresya ed sikatayo. No pisalamatan mo so sakey ya nanggaway kaabigan ed sika, mas onelet so pankakaaro yo. (Roma 16:3, 4) Sakey ni, saray totoon amta day misalamat et maslak met ya sikara so matulong. Naiimano day kaabigan ya gagawaen ed sikara kanian napapakiwas met iran manggawa na maabig parad arum. On, makapaliket so ontulong. Atan ya mismo so imbaga nen Jesus: “Mas makapaliket so mangiter nen say mangawat.”​—Gawa 20:35.

Si Robert Emmons ya codirector ed University of California et nanggaway study project nipaakar ed pisasalamat. Imbaga to ya pian naaralan tayoy misalamat, kaukolan tayon natalosan ya akadepende itayo ed balang sakey. No maminsan sikatayo so mangiter, tan no maminsan sikatayo so mangawat. Labay ton ibaga, kaukolan tayo so tulong tan suporta na arum pian mantultuloy tayon manbilay tan mansiansian maliket. Singa bilang, nayarin itarya day naakan tayo tan asikasoen da tayo no mansasakit tayo. (1 Cor. 12:21) Say too ya  niyugali to lay misalamat et aapresyaen toy gagawaen na arum parad sikato. Sika ey, kasin iyuugalim so misalamat?

Say sakey nin maabig ya resulta no iyugalim so misalamat et makatulong itan pian mas makapampokus ka ed saray positibo imbes ya diad saray negatibo. Magmaliw ya singa filter so utek mo, kanian sarag moy manpokus ed pigaran bengatla tan agmo la imanoen iray arum. Mas nanengneng mo ray positibo tan agmo la tanton ikday imano iray problema. No maapresya ka, mas dakel so maabig ya nanengneng mo kanian mas dakel so pisalamatan mo. No akapokus ka ed saratan, mainomay mon nagawaan iyan bilin nen apostol Pablo: “Manliket kayon naynay ed Katawan.”​—Fil. 4:4.

Napaliisan moy manisip na negatibo no lanang kan misasalamat. No maapresya ka, agka mainomay ya nainggit, onermen, odino ombarong. Saray maapresya et mas mainomay da ya labanan so tendensian magmaliw ya materyalistiko. Aapresyaen da no antoy wala ed sikara tan aliwan say pamarakel na kayarian so sankanonot da.​—Fil. 4:12.

Bilang sakey ya Kristiano, antam ya say labay nen Satanas et manermen tan nadismaya ka ed saray kairapan ya dadalanen mo ed sarayan kaunoran ya agew. Labalabay to no magmaliw kan negatibo tan mareklamo. No ontan so naliknam, ompan agmo epektibon nipulong so maong a balita. Diad tua, mankonektaan so pisasalamat tan say bunga na espiritu na Dios. Singa bilang, lapud saray maabig ya iiter na Dios ed sikatayo et nalilikna tayoy liket tan ombibiskeg so pananisia tayo ed amin ya sipan to.​—Gal. 5:22, 23.

Bilang lingkor nen Jehova, seguradon onabobon ka ed saray abasam ed sayan artikulo nipaakar ed pisasalamat. Balet aliwan lanang ya mainomay so misalamat tan mansiansian positibo. Agka nadidismaya. Sarag mon aralen tan iyugali itan. Panon? Kada agew et ipanaon mon isipen iray pigaran agawa ed bilay mo ya sarag mon pisalamatan. No lanang mon gagawaen itan, magmaliw lan natural ed sika so misalamat. Bilang resulta, mas maliket ka nen saray totoon problema lan lanang so sankanonot da. Isip mo iray makapaseseg tan makapaliket ya gagawaen na Dios tan na arum parad sika. Sarag mo ni ingen ya isulat iratan. Kada agew et mangisulat ka na duara o taloran bengatla ya naapresyam tan pisalsalamatan mo.

Imbaga na arum a researcher ya “say lanang ya pisalamat et nayarin umanen toy koneksion na saray neuron ed utek tayo” tan lapud satan et magmaliw tayon mas positibo. Say too ya maapresya tan amta toy misalamat et maliket. Kanian isip mo iray naawat mon bendisyon, apresyam iray balibalin eksperiensyam, iyugalim so misalamat! Imbes ya ibaliwalam iray maabig ya bengatla, ‘misalamat kad si Jehova, ta sikatoy maomaong.’ On, ‘pisalamatan mo so amin a bengatla.’—1 Awa. 16:34; 1 Tes. 5:18.