1. Antoy epekto no nadidismaya odino onkakapuy so liknaan tayo?

AMIN tayo et walaay problema tan gagawaen tayoy anggaay nayarian tayon saragen iratan. Balet mas mairap ya arapen iray problema no nadidismaya odino onkakapuy so liknaan tayo. Ta no nadidismaya tayo, ompan naekal so tiwala tayod sarili tayo, isipen tayon anggapoy kana tayo, tan agtayo la maliket. Oniay ibabaga na Proverbio 24:10: “No onkapuy so liknaan mo diad agew na kairapan, say biskeg mo et onkulang.” Tua itan ta no onkakapuy so liknaan tayo, naupot so biskeg tayo tan singa agtayo la nasarag iray problema.

2. Anto ray nayarin pakadismayaan tayo, tan antoy aralen tayo ed sayan artikulo?

² Dakel so nayarin pakadismayaan tayo. Singa bilang, saray nagagawaan tayon lingo, kakapuyan, tan say ikapuy na laman lapud sakit. Nadismaya tayo met no agniiter ed sikatayo so pribilehyon labalabay tayo, odino anggapoy masyadon interesado ed teritorya tayo. Aralen tayo ed sayan artikulo no anto ray nagawaan tayo pian ag-itayo natalo na pakakadismaya tayo.

3. Antoy nepeg tayon tandaan no onkakapuy so liknaan tayo lapud saray nagagawaan tayon lingo?

³ No wala ray kakapuyan odino nagagawaan tayon lingo, ompan onabebay pakanengneng tayod sarili tayo. Tan ompan isipen tayon agto tayo lanlamang iliktar nen Jehova no Armagedon. Pero aliwa itan. Diad tua, ibabaga na Biblia ya amin a too et mankakasalanan. Si Jesus labat so perpekton too ya nambilay diad dalin. (Roma 3:23) Anto sirin so nepeg tayon tandaan no onkakapuy so liknaan tayo lapud saray nagagawaan tayon lingo? Tandaan tayo ya si Jehova et aliwan perfectionist, ya puros  lingo so nenengnengen to. Imbes, maar-aron Ama si Jehova tan labalabay to tayon tulongan. Sikatoy maan-anos. Amta toy pansasagpot tayo ya labanan iray kakapuyan tayo pian nagawaan tayoy duga.​—Roma 7:18, 19.

4-5. Base ed 1 Juan 3:19, 20, antoy akatulong ed duaran sister pian nalabanan day ikakapuy na liknaan da?

⁴ Imanoen tayo pay naeksperiensya nen Deborah tan Maria. * Nen ugaw ni Deborah, aliwliway impantrato ed sikato na pamilya to, tan agda iimanoen iray maong ya nagagawaan to. Kanian abebbebay pakanengneng tod sarili to. No makagawa na lingo anggano melmelag labat, say pakalikna to et anggapo lay nagagawaan ton duga. Ontan met so eksperiensya nen Maria. Nensaman et lanang ya pabpabaingan na saray kakanayon to. Kanian inisip to ya anggapoy kana to. Anggan nen Tasi la, say pakalikna to et agmakanepegan ya manlingkor ed si Jehova!

⁵ Balet agsinmuko iyan duaran sister. Antoy akatulong ed sikara? Nampikasi ira ed si Jehova tan impasakbat dad sikato so ambelbelat ya awit da. (Sal. 55:22) Atalosan da ya say Ama tayo ed tawen et maar-aro, tan amta to ya walay epekto na dinadalan tayo nensaman ed pakanengneng tayod sarili tayo. Diad tua, say nenengnengen nen Aman Jehova et saray kamaongan ed puso tayo, anggan saray maong ya ugali ya agtayo nanenengneng ed sarili tayo.​—Basaen so 1 Juan 3:19, 20.

6. Antoy nalikna na sakey a lingkor nen Jehova no walay kakapuyan to ya nitunda to la balet naulit to lamet?

⁶ Ompan say sakey a lingkor nen Jehova et walay kakapuyan to ya nitunda to la balet naulit to lamet, kanian nadismaya ed sarili to. Normal labat ya nakonsiensia tayo no makagawa tayoy kasalanan. (2 Cor. 7:10) Balet agkomon sobsobra so pakakakonsiensia tayo ya isipen tayon: ‘Anggapo lay kanak. Agto ak lan balot naperdona nen Jehova.’ Aliwan tua itan. Ekalen tayo itan ed isip tayo, ta no andi, naupot so biskeg tayo ya singa ibabaga na Proverbio 24:10 ya abitla niman. Tan ompan atan la laingen so rason ya ontunda tayo lan manlingkor ed si Jehova. Maabig sirin no manpikasi kad si Jehova, kerew moy panamerdona to, tan ibagam ya labay mon ipetek iray lingom. (Isa. 1:18) No nanengneng nen Jehova ya talagan magbabawi ka tan gagawaen moy anggaay nayarian mon agla uliten so lingom, perdonaen to ka. Ontan met, kerew moy tulong na saray elder. Akaparaan iran ontulong pian ombiskeg ka lamet ed espiritual.​—Sant. 5:14, 15.

7. Akin et agtayo nepeg ya nadismaya no walay lalabanan tayon kakapuyan?

⁷ Si Jean-Luc ya elder ed France et oniay  ipapanonot to ed saramay walay lalabanan dan kakapuyan: “Diad pakanengneng nen Jehova, say talagan matunong a too et aliwan samay agbalot makakagawa na lingo, noagta samay pagbabawian toy lingo to tan gagawaen toy anggaay nayarian ton agla itan uliten.” (Roma 7:21-25) Kanian no walay lalabanan mon kakapuyan, agmo iisipen ya anggapo lay kanam. Tandaan mo ya amin tayo et nalilingo. Kanian amin tayo et kaukolan tayoy agnaparaan ya kaabigan nen Jehova ya inter to panamegley na dondon.​—Efe. 1:7; 1 Juan 4:10.

8. No onkakapuy so liknaan tayo, siopay sarag tayon asinggeran?

⁸ Ibagam ed saray agagi so naliliknam pian napaseseg da ka. Akaparaan iran ondengel no kaukolan moy katongtong, tan pabiskegen da ka. (Pro. 12:25; 1 Tes. 5:14) Ontan so naeksperiensya nen Joy ya taga Nigeria, ya abayag ton nilabanan so pakakadismaya to. Oniay imbaga to: “Panon ko la kasi no anggapo ray agagi? Seguro abayag ak lan sinmuko. Sikara so ebat nen Jehova ed saray pikakasik. Naaralan kod sikara ya kaukolan ko met ya pasesegen iramay onkakapuy so liknaan da.” Tandaan tayo ya agnabasa na agagi no antoy walad nonot tan puso tayo. Kanian no kaukolan tayoy panamaseseg, sikatayo lay unonan onasingger ed maespiritual ya agi tan ibaga tayo ya kaukolan tayoy tulong.

9. Akin et balibalin dalepdepen so Salmo 41:3 tan 94:19 no mansasakit tayo?

⁹ Manmatalek ka ed tulong nen Jehova. No onkakapuy so laman odino walay sakit tayo ya abayag tayo lan aanosan, ompan main-inomay tayoy nadismaya. Anggano agpaabigen nen Jehova so sakit tayo natan, sarag to tayon pakalmaen tan pabiskegen pian naanosan tayoy situasyon tayo. (Basaen so Salmo 41:3; 94:19.) Nayarin usaren to ray agagi ya ontulong ed sikatayo, singa bilang, diad kimey ed abung odino diad pangaliw ed saray kaukolan tayo. Nayarin pakiwasen to ra ya pasyaren tan ipikasi da tayo. Odino ipanonot nen Jehova ed sikatayo iray makaligliwan teksto ed Biblia, singa saray teksto ya pakabasaan na ilalo tayo ya diad balon mundo et perpekto lay bilay tan anggapo lay sakit tan irap.​—Roma 15:4.

10. Panon ya nilabanan nen Brother Isang so pakakadismaya to nen naaksidente?

¹⁰ Si Brother Isang ya taga Nigeria et naaksidente tan abaldado so arum a parte na laman to. Imbaga na doktor to ya aglan balot makaakar. “Nen naamtaan ko, singa bebetagen so pusok tan adisdismaya ak,” so kuan to. Balet kasin nampatalo ed liknaan to? Andi! Antoy akatulong ed sikato? Imbaga to: “Pikasi kami lan pikasi nen asawak ed si Jehova tan naynay kamin manpe-personal study. Say sankanonot mi et saray bendisyon na Dios ed sikami, lalo lay bilay ya ipaparaan to ed balon mundo.”

11. Akin et maliket nin siansia si Cindy anggano walay graben sakit to?

¹¹ Si Cindy ya taga Mexico et a-diagnose ya walay graben sakit to. Balet nasasarag toy situasyon to. Antoy makakatulong ed sikato? Kada no onlad ospital, sasamboten toy manpulong. Oniay insulat to: “Akatulong itan pian say sankanonot ko et say itulong ko ed arum, imbes ya say pampa-operak odino say sakit ya naliliknak. Onia ay so gagawaen ko: No katongtong ko ray doktor tan nurse, kukumustaen koy pamilya ra. Insan ko ra tepetan no akin ya aman so apili dan trabaho anta mair-irap. Legan min maniistoryaan, nalikas ko no anton topic so labay dan pantongtongan. Dakel so angibaga ya mataltalag tay pasyente ya mangumusta ed sikara. Tan misalsalamat ira ta wala kunoy malasakit kod sikara. Inter ni ingen na arum ed siak so address tan  phone number da. Anggano oniay kipapasen ko, pinaliket to ak ya maong nen Jehova!”—Pro. 15:15.

12-13. Antoy gagawaen na saray agagin mansasakit odino maedad la pian makapanpulong ni ran siansia, tan antoy resulta?

¹² Ompan onkakapuy so liknaan na saray mansasakit odino saray maedad la lapud agda la nagagawaan iramay datin gagawaen da ed ministeryo. Anggaman ontan, manggagawa ray paraan pian makapanpulong ni ran siansia. Diad United States, walay sister ya say ngaran to et Laurel ya 37 taon ya akarukol ed makina a tatawagen ya iron lung pian makaingas. Sikatoy a-cancer, aminpigan naoperaan, tan walay skin disorder to. Balet anggano ontan so situasyon to, agtinmundan nampulong. Pinulongan to ray nurse tan arum ni ran mangaasikaso ed sikato diad abung. Amta yo no antoy resulta? Atulongan toy 17 ya totoo a magmaliw a Tasi nen Jehova! *

¹³ Walay suhestion nen Richard ya elder ed France parad saramay agagin agla makaalis ed abung odino walad nursing home. “Maabig no mangi-display ray libro tan magasin pian no nanengneng na totoo et mantepet ira tan naigapo day tongtongan. Kanian maliket irayan agagi ta makapanpulong ni ran siansia anggano aliwan diad kaabungan.” Saray agagin agla makaalis ed abung et sarag da met so man-letter writing tan telephone witnessing.

14. Akin et balibalin alimbawa si Arin David?

¹⁴ Wala ray rason no akin ya agtayo onkualipika ed sakey a pribilehyo o asainmin ya labalabay tayo, balanglan diad kongregasyon o diad sirkito. Ompan maedad tayo la, walay sakit tayo, odino arum nin rason. Makaaral tayo ed alimbawa nen Arin David. Abayag to lan plano ya ipaalagey so templo na Dios. Balet imbaga nen Jehova ya aliwan si David so manggawa ed satan. Anggan aliwan sikato so apili, siansian sinuportaan to imay pinili na Dios ya manggawa ed satan a proyekto. Balbaleg ni ingen so indonasyon to. Talagan balibalin alimbawa si David!—2 Sam. 7:12, 13; 1 Awa. 29:1, 3-5.

15. Panon ya alabanan nen Brother Hugues so pakakadismaya to?

¹⁵ Si Brother Hugues ya taga France et walay sakit to kanian akatunda ed panlilingkor to bilang elder. Anggan saray simplin kimey ed abung et agto la sarag ya gawaen. Insulat to: “Nen onman so agawa, adisdismaya ak tan singa anggapo lay kanak. Pero tinanggap kod sarilik ya limitado lan talagay nagawaan ko. Kanian natan, anggano daiset lay nagagawaan ko ed panaglingkor ko ed si Jehova,  maliket ak. Aaligen koy Gideon tan saray 300 ya sundalo to ya intuloy day milaban anggano naksawan la ra. Kanian siak, agak balot onsuko!”—Ukom 8:4.

16. Antoy naaralan tayo ed saray matoor ya anghel?

¹⁶ Balibali met ya alimbawa iray matoor ya anghel. Legan na uley nen Arin Ahab, tinepetan nen Jehova iray anghel no antoy suhestion da pian napalikdo yan mauges ya ari. Wala ray anghel ya angibaga na suhestion da. Balet amili labat si Jehova na sakey ya anghel tan imbaga To ya maong so pansumpalan na suhestion to. (1 Ara. 22:19-22) Kasin adismaya iramay arum ya anghel tan inisip dan, ‘Sayang labat so impannonot ko ta agak met lanlamang manaya napili?’ Siempre andi. Talagan mapaabeba irayan anghel tan labay dan si Jehova so nidayew.​—Ukom 13:16-18; Apo. 19:10.

17. Antoy gawaen tayo no nadidismaya tayo ta anggapoy pribilehyo tayo?

¹⁷ Tandaan mo ya say sankaimportantian ya pribilehyo et say pagmaliw a Tasi nen Jehova tan say pangipulong ed Panarian to. Saray asainmin et temporaryo labat tan aliwan saratan so basiyan no akin ya inar-aro itayo nen Jehova. Say importante ed sikato et amay nanengneng ton mapaabeba tayo. No mapaabeba tayo, mas aroen itayo nen Jehova tan na saray agagi. Kanian ipikasim ed si Jehova ya tulongan to kan mansiansian mapaabeba. Alig mo iramay nababasam ed Biblia ya mapaabeban lingkor nen Jehova. Say nonot mo et no panon mon naserbian iray agagim.​—Sal. 138:6; 1 Ped. 5:5.

18-19. Anto ray nepeg mon tandaan pian agka natabangan ya manpulong anggano daiset so ondengel ed teritorya yo?

¹⁸ Asalim met lay adismaya ta ngalngali anggapoy ondengel ed teritorya yo odino pigpigara labat so nakakatongtong yo ed kaabungan? No ontan ed teritorya yo, antoy gawaen mo pian agka natabangan ya manpulong? Wala ray makatulong ya suhestion diad kahon ya “ No Antoy Gawaen Mo Pian Mansiansia Kan Maliket ed Ministeryom.” Importante met ya duga so panmoria tayo ed ministeryo. Antoy labay ton ibaga ’tan?

¹⁹ Tandaan mo ya say manunan rason no akin ya manpupulong tayo et pian nipaamta ed totoo so ngaran na Dios tan say Panarian. Imbaga nen Jesus ya daiset labat so makaromog ed dalan ya paarap ed bilay. (Mat. 7:13, 14) No  manpupulong tayo, mikikimeyan tayo ed si Jehova, Jesus, tan saray anghel. Baleg itan ya pribilehyo! (Mat. 28:19, 20; 1 Cor. 3:9; Apo. 14:6, 7) Si Jehova so mangiyaasingger ed saray makanepegan. (Juan 6:44) No ag-ondengel so sakey a too, isipen tayo ya ompan diad ontumbok et ondengel lanlamang.

20. Antoy nepeg tayon gawaen pian nalabanan tayoy pakakadismaya tayo ya singa naaralan ed Jeremias 20:8, 9?

²⁰ Makaaral tayo met ed si propetan Jeremias. Agdinmengel iray totoon pinulongan to. “Inagew-agew” dan iinsultoen tan babalawen. (Basaen so Jeremias 20:8, 9.) Adisdismayan maong ya anggad sinmabid punton agto la labay so manpulong. Balet intuloy to nin siansia. Akin ey? Imbaga to ya “say salita nen Jehova” et singa kuno apoy ed pukel to tan agto nitepel ya ag-itan ibaga ed arum! Naalig tayoy Jeremias no inagew-agew tayon aralen tan dalepdepen so Salita nen Jehova. No ontan so gawaen tayo, agtayo ontabang ed panagpulong tan magmaliw tayon mas epektibo ed satan.​—Jer. 15:16.

21. Panon tayon nalabanan so pakakadismaya tayo?

²¹ “Say ikapuy na liknaan et sakey ed saray armas ya uusaren nen Satanas pian natalo tayo,” so imbaga nen Deborah ya abitla nen niman. Balet mas mabiskeg si Aman Jehova nen say anggan anton armas nen Satanas. Kanian no onkakapuy so liknaan mo, manpikasi kad si Jehova tan kerew moy tulong to. Seguradon tulongan to ka pian nalabanan mo ray kakapuyan mo. Agto kan balot paulyanan no mansasakit ka. Tulongan to kan mansiansian mapaabeba no bilang ta agka makakaawat na pribilehyo. Tan tulongan to kan mansiansian maliket ed ministeryom. Kanian ibagam labat ed si Jehova so amin ya naliliknam. On, diad tulong to et nalabanan mo so pakakadismayam!