1-2. Antoy aralen tayo ed sayan artikulo?

SEGURO naiisip mo met no maminsan ya anta antiktikey la lanti bilay, napnapno ni na problema. (Job 14:1) Kanian wala ray panaon ya onkakapuy so liknaan tayo. Alikna met itan na saray lingkor nen Jehova nensaman. Wala ra ingey labay da lay ompatey. (1 Ara. 19:2-4; Job 3:1-3, 11; 7:15, 16) Balet pinabiskeg ira nen Jehova, say Dios ya nanmatalekan da. Impairekord to ed Biblia so agawa ed bilay da pian nibangat tan napabiskeg tayo.​—Roma 15:4.

² Diad sayan artikulo, aralen tayo ray lingkor nen Jehova ya dinmalan ed nanduruman subok: si Jose ya anak nen Jacob, si Noemi tan say manugang ton si Ruth, samay Levita ya nansulat ed Salmo 73, tan si apostol Pedro. Panon iran pinabiskeg nen Jehova? Anto ray naaralan tayo ed eksperiensya ra? Legan tayon aamtaen so ebat, napaneknekan tayo met ya “si Jehova et asingger ed samay asugatay puso,” tan “ililiktar to iramay nadidismaya.”​—Sal. 34:18, paimanod leksab.

3-4. Antoy agawad si Jose nen kabataan ni?

³ Manga 17 labat nen Jose nen walay duaran akugip to ya nanlapud Dios. Say labay ya ibaga na sarayan kugip et onsabi panaon ya si Jose et igalang na amin ya kapamilya to. (Gen. 37:5-10) Balet ag-abayag kayari na satan, walay makapaermen ya agawad bilay to. Imbes ya igalang na saray kuya to, sikatoy inlako da tan nagmaliw ya aripen na sakey ya opisyal ed Ehipto ya say ngaran to et Potifar. (Gen. 37:21-28) Maples ya anguman so siplog na dagem! Amay datin inar-aron anak et nagmaliw ya abebbeban aripen na toon agto kabat si Jehova.​—Gen. 39:1.

 ⁴ Balet gapo ni labat itan na kalbaryo nen Jose. Sikatoy inakusaan na asawa nen Potifar ya labay to kunon rape-en. Agla impa-imbistigaan nen Potifar no antoy tuan agawa. Impaipriso ton tampol si Jose, tan inkadena day beklew to. (Gen. 39:14-20; Sal. 105:17, 18) Ugaw nid saman si Jose. Isip mo pay alikna to nen inakusaan da ya rapist. Anto kasi imbagbaga na totoo nipaakar ed Dios to ya si Jehova nen naamtaan da itan? Ompan abalaw so ngaran nen Jehova. Seguradon kinmapkapuy so liknaan nen Jose!

5. Antoy akatulong pian nalabanan nen Jose so inkapuy na liknaan to?

⁵ Nen nagmaliw ya aripen si Jose insan apriso, singa anggapo lay nagawaan to pian manguman so situasyon to. Balet antoy akatulong pian nalabanan toy inkapuy na liknaan to? Imbes ya kaskasian toy sarili to, nankuli ed trabaho to. Tan agton balot nilingwanan si Jehova. Si Jehova nin siansia so sankaimportantian ed bilay to. Kanian benendisyonan nen Jehova so amin ya ginawa nen Jose.​—Gen. 39:21-23.

6. Akin et ombibiskeg so liknaan nen Jose kada no iisipen to iramay akugip to?

⁶ Seguradon ombibiskeg so liknaan nen Jose kada no iisipen to iramay akugip to. Akin ey? On ta singa ibabaga na saraman ya kugip ya nanengneng to lamet so pamilya to tan onsabi panaon et manguman so situasyon to. Tan talagan ontan so agawa. Nen manga 37 la nen Jose, tinmua irayan kugip to diad paraan ya agton balot naisip!—Gen. 37:7, 9, 10; 42:6, 9.

7. Base ed 1 Pedro 5:10, panon tayon nasarag iray subok?

⁷ Saray naaralan tayo. Ipapanonot ed sikatayo na bilay nen Jose ya walan-walay ag-inkahustisya ed sayan mundo, tan ompan nabiktima tayo na aliwliwan panagtrato na arum. Ompan kaagian tayo ni ingen ya mismo so manggawa ed satan. Balet no si Jehova so Bato tan Salimbengan ya batikan  tayo pian kerewan na tulong, “gawaen to [tayon] mabiskeg” tan makapantultuloy tayon manlingkor ed sikato. (Sal. 62:6, 7; basaen so 1 Pedro 5:10.) Tandaan met ya manga 17 ni labat nen Jose nen wala ray impakugip nen Jehova ed sikato. Mapatpatnag sirin ya walay tiwala nen Jehova ed saray kabataan ya lingkor to. Dakel met natan so kabataan ya singa si Jose. Mabiskeg so pananisia ra ed si Jehova. Say arum ed sikara et impriso lapud panmamatoor da ed Dios.​—Sal. 110:3.

8. Antoy agawa ed si Noemi tan Ruth?

⁸ Lapud grabe so eras ed Juda, inmalis si Noemi tan say pamilya to diad Moab tan ditan la ra nanayam. Balet ag-abayag et inatey si Elimelec ya asawa to, tan bukor to lay amabaleg ed ananak ton lalaki. Kalabas na panaon, angasawa irayan ananak to na bibiin Moabita, si Ruth tan Orpa. Balet kayari na manga samploy taon, inatey irayan ananak nen Noemi, tan say mas makapaermen et anggapoy anggan sakey ya ilalak da. (Ruth 1:1-5) Seguradon agaylay ermen na sarayan bibii ta abalo la ran talo! Siempre, si Ruth tan Orpa et sarag da ni miasawa lamet. Panon to balet si Noemi ey, siopay mangasikaso ed sikato ta akulaw la? Maer-ermen ya maong si Noemi kanian aminsan et nibaga ton: “Agyo ak tatawagen a Noemi. Tawag yo ak lan Mara, ta inyabuloy na Makapanyarin-amin a magmaliw a maer-ermen so bilay ko.” Lapud sayan agawa, nandesisyon si Noemi ya ompawil lad Betlehem, tan akilad sikato si Ruth.​—Ruth 1:7, 18-20.

9. Base ed Ruth 1:16, 17, 22, panon ya pinabiskeg nen Ruth so liknaan nen Noemi?

⁹ Say akatambal ed ermen nen Noemi et matoor ya panangaro. Impalikna itan nen Ruth ed sikato. Agton balot tinaynan so katulangan to. (Basaen so Ruth 1:16, 17, 22.) Diad Betlehem, makulikulin nantudtor si Ruth na sebada pian walay pambilay da nen Noemi. Lapud makuli tan maasikaso si Ruth, sikatoy balitado ed lugar da ya maomaong a bii.​—Ruth 3:11; 4:15.

10. Panon ya impanengneng nen Jehova so panangaro ed saray mairap-bilay ya singa si Noemi tan Ruth?

¹⁰ Lapud maar-aroy Jehova, inikdan to ray Israelita na espisipikon ganggan parad pankaabigan na saray mairap-bilay ya singa si Noemi tan Ruth. Ingganggan to ray Israelita ya agda aanien so amin ya walad gilig na alog da pian walay naala odino natudtor na saray mairap-bilay. (Lev. 19:9, 10) Lapud satan ya ganggan, agnapilitan si Noemi tan Ruth ya mipayabol. Ta basta mankuli ra, walay naakan da.

11-12. Antoy ginawa nen Boaz kanian nagmaliw ya malikeliket si Noemi tan Ruth?

¹¹ Say akanggawa ed alog ya pantutudtoran nen Ruth et si Boaz, tan sikatoy mayamyaman ya laki. Pandinayewan ton maong so panangaro nen Ruth ed katulangan ton si Noemi ta agto tinaynan. Kanian agnambayag, dinondon to so dalin na pamilya nen Noemi tan inasawa toy Ruth. (Ruth 4:9-13) Awalaan ira na anak, si Obed, tan sinmabi panaon ya nagmaliw ya apo nen Obed si Arin David.​—Ruth 4:17.

¹² Imadyin mo pay Noemi ya misalsalamat ed si Jehova tan malikeliket legan ton sanka-eba si Obed! Balet diad arapen, mas maliket si Noemi tan Ruth no bilayen la ra na Dios ta naamtaan da ya diad pamilya nen Obed so nanlapuan na Mesias, si Jesu-Kristo!

13. Anto ray balibalin naaralan tayo ed si Noemi tan Ruth?

¹³ Saray naaralan tayo. No nantatabonan la ray problema, nayarin nadismaya tan onkapuy tayo la. Ompan isipen tayo ni ingen ya agtayo lan balot makaimwas ta anggapo lay solusyon na problema tayo. No ontan so nagawa, importantin manmatalek tayod si Aman Jehova tan naynay tayon miulop  ed saray agagi. Tua, nayarin agmet ekalen nen Jehova iray problema tayo. Singa diad si Noemi, agbinilay na Dios so asawa tan ananak to. Balet say segurado, tulongan itayo na Dios ya nalampasan iray problema tayo. Nayarin usaren to ray agagi pian ipaliknay panangaro ed sikatayo.​—Pro. 17:17.

14. Akin et adismayan maong so sakey a Levita?

¹⁴ Say nansulat na Salmo 73 et sakey a Levita. Balibali pribilehyo to ta manlilingkor ed lugar ya pandadayewan ed si Jehova. Balet walay panaon ya sikatoy adismayan maong. Akin ey? On ta akaibeg ed saray mauges tan malalastog, ta nanenengneng ton onaasenso ira anggano aliway gagawaen da. (Sal. 73:2-9, 11-14) Singa wala lad sikaran amin​—mayaman ira, maong so bilay da, tan anggapoy problema ra. Adisdismaya ed saratan ya naiimano to, kanian nibaga ton: “Anggapoy kakanaan ya impansiansiak a malinis so pusok tan say impanguras koy limak pian ipanengneng ya anggapoy kasalanan ko.” Mapatpatnag ed satan ya imbaga to ya onkakapuy lay espiritualidad to.

15. Base ed Salmo 73:16-19, 22-25, antoy ginawa to may Levita pian nalabanan toy pakakadismaya to?

¹⁵ Basaen so Salmo 73:16-19, 22-25. “Linmoob [imay Levita] ed masanton santuaryo na Dios.” Ditan et akaiba to ray kapara ton manlilingkor ed si Jehova, kinmalma so liknaan to, aliwawaan so nonot to, tan akapampikasi ed si Jehova. Bilang resulta, atalosan to ya aliwa may inisip to tan no agto umanen so panagnonot to, naapektoan so relasyon tod si Jehova. Atalosan to met ya saray mauges et singa ra walad “andanglel a pasen” lapud natumba tan “naderal ira” lanlamang, kanian aliwliway pansumpalan da. Pian nalabanan toy pakakadismaya to tan naekal so pakakaibeg to, kaukolan ton aligen so panagnonot nen Jehova. Nen ontan so ginawa to, dinmeen so nonot to, tan nagmaliw lamet ya maliket ed panlilingkor to. Imbaga to: “Likud ed [si Jehova] et anggapo lay arum a pipirawaten ko diad dalin.”

16. Anto ray naaralan tayo ed samay Levita?

¹⁶ Saray naaralan tayo. Agtayon balot komon naiinggit ed saray mauges a totoo ya singa main-inawa so bilay da. Diad tua, ataptapew tan temporaryo labat so liket da, ta  anggapoy ilalo ran manbilay na andi-anggaan. (Ecl. 8:12, 13) No nainggit tayod sikara, ompan natabangan tayo laingen ed panaglingkor tayod si Jehova tan naapektoan so relasyon tayod sikato. Kanian no nalikas mon makakaibeg ka ed maasenson bilay na saray mauges, alig moy ginawa na samay Levita. Unor moy bilin na maaron Dios tayo, tan miulop ka ed saramay manggagawa na panlabayan to. No si Jehova so sankaimportantian ed bilay mo, naliknam so tuan liket. Tan tulongan to ka pian makapantultuloy kan manakar diad dalan ya paarap ed “tuan bilay.”​—1 Tim. 6:19.

17. Anto ray rason ya nayarin adismaya si Pedro ed sarili to?

¹⁷ Si apostol Pedro et alisto; balet no maminsan et pabigla-bigla ed saray gagawaen to. No antoy walad nonot to, ibaga ton tampol. Kanian wala ray ginawa tan imbaga to ya pagbabawian to lanlamang. Singa bilang, nen imbaga nen Jesus ed saray apostol to ya sikatoy manirap tan ompatey, binano nen Pedro, ya say kuan to: “Kasian moy sarilim, Katawan; ag-iyan balot nagawa ed sika.” (Mat. 16:21-23) Impetek nen Jesus si Pedro ed satan ya imbaga to. Tan diad samay labi ya si Jesus et arestoen na saray sundalo, basta labat sinigbat nen Pedro so aripen na atagey a saserdote kanian atapyas so layag na aripen. (Juan 18:10, 11) Impetek lamet nen Jesus si Pedro ed satan ya ginawa to. Aminsan met et mapaspasirayew ya imbaga nen Pedro ya agton balot taynan si Jesus anggano taynanan la na amin ya apostol to! (Mat. 26:33) Balet inakmon to lanlamang so imbaga to ta amitlo ton intila ya kabat toy Jesus lapud takot tod too. Adisdismayay Pedro ed sarili to, kanian batik tan “inmaki-akis.” (Mat. 26:69-75) Seguro inisip to no kasin naperdona ni nen Jesus.

18. Panon ya tinulongan nen Jesus si Pedro pian nalabanan toy pakakadismaya tod sarili to?

¹⁸ Balet agnampatalo si Pedro ed pakakadismaya to ed sarili to. Anggano akagawa na lingo, agtinmundan nanlingkor ed si Jehova kaiba na arum nin apostol. (Juan 21:1-3;  Gawa 1:15, 16) Antoy akatulong ed si Pedro? Ninonot to imay imbaga nen Jesus ya impikasi to lay Pedro antis nin makagawa na lingo pian ag-onkapuy so pananisia to. Insan to pinaseseg si Pedro ya ompawil tan pabiskegen to ray agagi to. Inebatan nen Jehova itan ya pikakasi. Insan nen inmoli lay Jesus, sikatoy nampanengneng ed si Pedro. Anganko et pinaseseg to. (Luc. 22:32; 24:33, 34; 1 Cor. 15:5) Nampanengneng met si Jesus ed amin ya apostol kayari na sanlabin impansigay da ya anggapon balot so narel da. Kinatongtong nen Jesus si Pedro tan inikdan to na pankanawnawan ibaga ya inar-aro toy Jesus. Pinerdona nen Jesus iyan pinabpabli ton kaaro tan pinaneknekan ton agnakal so talek tod si Pedro lapud inikdan to na kaaruman nin kimey.​—Juan 21:15-17.

19. Base ed Salmo 103:13, 14, antoy sankanonot nen Jehova no makagawa tayoy kasalanan?

¹⁹ Saray naaralan tayo. Nanengneng tayod samay impamerdona nen Jesus ed si Pedro ya talagan mapangasi si Jesus, ya singa si Aman Jehova. Kanian no makagawa tayoy kasalanan, agtayo huhusgaan so sarili tayo tan agtayo iisipen ya ag-itayo lan balot naperdona nen Jehova. Diad tua, si Satanas so malabay ya ontan so nalikna tayo. Tandaan tayo ya inar-aro itayo nen Jehova tan natatalosan to ya aliwa itayon perpekto. No bilang makagawa tayoy kasalanan, sikatoy akaparaan ya mamerdona, tan labay to ya ontan met so gawaen tayo ed arum.​—Basaen so Salmo 103:13, 14.

20. Antoy aralen tayo ed ontumbok ya artikulo?

²⁰ Anengneng tayo ed agawad si Jose, Noemi tan Ruth, samay Levita, tan si Pedro ya “si Jehova et asingger ed samay asugatay puso.” (Sal. 34:18) No maminsan, agto ekalen so subok tan saray pakakadismayaan tayo. Balet no nalikna tayo ya tutulongan itayo nen Jehova pian nasarag tayo iratan, mas ombiskeg so pananisia tayo. (1 Ped. 1:6, 7) Diad ontumbok ya artikulo, aralen tayo no panon nin tutulongan nen Jehova iray matoor a lingkor to ya nadidismaya, nayarin lapud saray nagagawaan dan lingo odino lapud mairap so situasyon da.