ANTO kasi naliknam no makaawat kay makapaseseg ya sulat manlapud kaarom? Akaawat na ontan ya sulat so Kristianon disipulo ya si Timoteo. Nanlapu itan ed si apostol Pablo. Atan ya sulat et nagmaliw a parte na Biblia tan tatawagen ya 2 Timoteo. Seguradon nananap ya tampol si Timoteo na mareen a lugar pian diman to basaen so sulat na kaaro to. Nayarin inisip nen Timoteo: ‘Kumusta la kasi si Kuya Pablo? Anto kasi bilin dad siak ya makatulong ed pampulong, pambangat, tan pangipasal kod arum?’ Naebatan iratan ya tepet nen Timoteo nen binasa to itan ya sulat, tan dakel so naaralan to. Diad sayan artikulo, amtaen tayo met no anto ray naaralan tayod saray bilin nen Pablo.

Diad gapo ni labat na sulat nen Pablo, aliknan tampol nen Timoteo ya asingsingger so liknaan nen Pablo ed sikato. Tinawag toy Timoteo ya “ana’kon inad-aro.” (2 Tim. 1:2) Diad tua, ompan masulok lan 30 nen Timoteo nen naawat to itan ya sulat nen manga 65 C.E., tan abayag met lan elder. Masulok ya samploran taon ya akaulop nen Timoteo si Pablo, kanian akaaral ya maong.

Seguradon apaseseg ya maong si Timoteo nen naamtaan ton mansiasiansian matoor si Pablo anggano dakel so dadalanen ton subok. Diad saman et akagulonggulong si Pablo diad prisoan ed Roma, tan asingger da lan pateyen. (2 Tim. 1:15, 16; 4:6-8) Seguradon apabiskeg si Timoteo ed inkakpel nen apostol Pablo ed sayan imbaga to: “Susungdoan koy amin a bengatla.” (2 Tim. 2:8-13) Napapabiskeg tayo met ed impan-anos nen Pablo.

Binilin nen Pablo si Timoteo ya pablien ton maong so asainmin to. Imbaga tod si Timoteo ya ‘pandarlangen ton singa apoy so regalo na Dios’ ed sikato. (2 Tim. 1:6) Say inusar nen Pablo ya salita parad “regalo” et kharisma. Sayan Griegon salita et ontutukoy ed bengatlan impangaro, ag-itan inter ed sakey lapud kanepegan odino impansagpot to. Akaawat na ontan ya regalo si Timoteo nen naikdan na pribilehyo ya manlingkor diad kongregasyon.​—1 Tim. 4:14.

Antoy gawaen nen Timoteo ed satan ya regalo? Legan ton babasaen iray salitan “pandarlang mon singa apoy,” nayarin anonotan  to so gagawaen na totoo no manpaparlang irad kaabungan da. No agsungloran so apoy, magmaliw labat lan ngalab. Kanian kaukolan itan ya tuloytuloy a parlangan tan paypayan pian mas onapoy tan mas ondangat. Nabasa ed sakey ya diksionaryo ya say Griegon salita (anazopyreo) ya inusar nen Pablo et mankabaliksan na “padalangen lamet, bilayen, paypayan pian onliob.” Diad arum ya panangibaga et “magmaliw ya ganado lamet ed pankimey.” Kanian singa bibilinen nen Pablo si Timoteo ya, ‘Mamasya ka ed asainmin mo!’ Tan ontan met so nepeg tayon gawaen natan​—mamasya tayo ed panaglingkor.

Legan ya itutuloy ya babasaen nen Timoteo so sulat na kaaro to, walay abasa to ya makatulong pian napaaligwas toy ministeryo to. Insulat nen Pablo: “Alwaran mo iyan maabig a bengatlan nimatalek ed sika diad panamegley na masanton espiritu a walad sikatayo.” (2 Tim. 1:14) Antoy inmatalek ed si Timoteo? Diad akaunan bersikulo, binitla nen Pablo so nipaakar ed “maabig iran salita,” say katuaan ya nabasa ed Kasulatan. (2 Tim. 1:13) Bilang Kristianon ministro, nepeg ya ibangat nen Timoteo so katuaan diad kongregasyon tan diad saray totoo ed teritorya to. (2 Tim. 4:1-5) Sakey ni, say rason no akin ya aturon elder si Timoteo et pian pastolan to so pulok na Dios. (1 Ped. 5:2) Naalwaran nen Timoteo so katuaan tan say pribilehyo to no sikatoy manmatalek ed tulong na masanton espiritu tan ed Salita na Dios.​—2 Tim. 3:14-17.

Inmatalek met ed sikatayo natan so katuaan ya ipupulong tan ibabangat tayo. (Mat. 28:19, 20) Agnabalang so panamabli tayod katuaan no lanang tayon manpikasi tan no regular tayon aralen so Salita na Dios. (Roma 12:11, 12; 1 Tim. 4:13, 15, 16) Nayarin imatalek met ed sikatayo so asainmin ya pagmaliw ya elder odino iloob ed full-time ya panaglingkor. No walay ontan ya pribilehyo tayo, nepeg ya mansiansia tayon mapaabeba tan tandaan tayo ya nagawaan tayo labat itan lapud tulong na Dios. Kanian naalwaran o naprotektaan tayoy inmatalek ed sikatayo no pablien tayo itan tan lanang tayon kerewen so tulong nen Jehova.

Kaiba ed asainmin nen Timoteo so pangipasal ed arum. Atan so rason no akin ya oniay impaseseg nen Pablo ya gawaen nen Timoteo: “Saray nadngel mo ed siak . . . et imatalek mo ed saray matoor a lalaki, pian magmaliw iran kualipikado a manbangat ed arum.” (2 Tim. 2:2) No panon ya makaaral si Timoteo ed saray agagi, makaaral met ira ed sikato. Importante ya gawaen met itan na amin a manangasikaso ed kongregasyon natan. Say maong ya manangasikaso et agto isiblet iray amta to. Imbes, mabulos ton ibangat so arum pian naaralan dan gawaen so sakey a kimey. Agton balot isipen ya ompan magmaliw lan mas marunong tan mas maabilidad iray ipapasal to komparad sikato. Kanian agto labat ibangat no panon ya gawaen so sakey ya kimey, ipasal to met ira ya usaren day pakatalos tan karunongan da anggad ontatken irad espiritual. No ontan so gawaen na sakey a manangasikaso, saray ipapasal ton “matoor a lalaki” et magmaliw a baleg ya tulong ed kongregasyon.

Seguradon naapresyan maong nen Timoteo so maaron sulat nen Pablo. Ompan inulit-ulit ton basaen iray bilin ya wadtan tan inisip to no panon ton iyaplika ed asainmin to.

Labay tayon ipapuso met itan ya bilin. Panon? Dapat determinado itayon pandarlangen ya singa apoy so regalo na Dios ed sikatayo, alwaran tayoy inmatalek ed sikatayo, insan ibangat tayo met ed arum so amta tayo tan ipasal tayo ra. Diad ontan et ‘sigpot tayon nasumpal so ministeryo tayo,’ ya singa imbaga nen Pablo ed si Timoteo.​—2 Tim. 4:5.