1-2. Akin et importantin aralen na amin a Kristiano so kioli diad tawen?

DAKEL ed saray lingkor nen Jehova natan et iilaloan day manbilay na andi-anggaan diad dalin. Balet daiset labat lay nakekeran alanaan ya Kristiano ya say ilalo da et manbilay diad tawen. Sarayan alanaan et labalabay dan naamtaan no antoy magmaliw ya bilay da diad tawen. Anggano say ilalo tayo et manbilay diad dalin, kaukolan tayo met itan ya aralen. Akin? On ta saray parad dalin et nabendisyonan no asumpal la so kioli ed tawen. Kanian labay tayon aralen itan anggano say ilalo tayo et parad dalin.

² Nen inmunan siglo, impaisulat na Dios ed saray disipulo nen Jesus so nipaakar ed kioli ed tawen. Oniay insulat nen apostol Juan: “Natan et ananak itayo la na Dios, ingen ta agni nipaamta no antoy pagmaliwan tayo. Balet amta tayo a sano sikatoy nipatnag la, magmaliw itayon singa sikato.” (1 Juan 3:2) Kanian ag-amta na saray alanaan no antoy pagmaliwan da no paolien la ra na Dios diad tawen bilang espiritu. Balet say segurado, nanengneng da lan mismoy Jehova no onoli rad tawen. Ag-ibabaga na Biblia so amin a detalye nipaakar ed kioli diad tawen, pero wala ray pigaran impormasyon ya insulat nen apostol Pablo nipaakar ed satan. Insulat to ya saray alanaan et kaiba da lay Kristo no ‘paandien to lay amin a gobierno tan amin ya autoridad tan pakayari,’ kaiba lay “unor a kabusol, say patey.” No asumpal la itan, ipasakop la nen Jesus ed Ama to so amin ya bengatla. Sikaton mismo tan saray kaiba ton  manuley et manpasakop met ed si Jehova. (1 Cor. 15:24-28) Seguradon malikeliket itan a panaon! *

3. Base ed 1 Corinto 15:30-32, antoy epekto ed si Pablo lapud mabiskeg so pananisia to ed kioli?

³ Lapud mabiskeg so pananisia nen Pablo ed kioli, agsinmuko anggano dakel so dinadalan ton subok. (Basaen so 1 Corinto 15:30-32.) Oniay insulat tod saray agagi ed Corinto: “Inagew-agew ak a nipapaarap ed ipapatey.” Imbaga to ni: “Akilaban ak ed saray atap ya ayep diad Efeso.” Posible ya si Pablo et inawit na saray kalaban ed stadium diad Efeso pian onarap ed masesebeg ya ayep. (2 Cor. 1:8; 4:10; 11:23) Odino nayarin say tutukoyen to et saray Judio tan arum ni ya onkokontra ed sikato, ya singa ra “atap ya ayep.” (Gawa 19:26-34; 1 Cor. 16:9) Anggano nipeligro so bilay nen Pablo, say nampokusan to et say balibalin ilalo to ed arapen.​—2 Cor. 4:16-18.

4. Antoy epekto ed saray Kristiano natan lapud mabiskeg so pananisia ra ed kioli? (Nengnengen so litrato ed apis.)

⁴ Dakel met so peligro ya dadalanen na saray Kristiano natan. Wala ray agagi ya biktima na krimen. Say arum et manaayam ed lugar ya ag-ontutunday guerra. Dakel met so agagi ya manaayam ed saray bansa ya limitado so panagpulong odino imbawal ni ingen na gobierno. Balet ag-ira ontutundan manlilingkor ed si Jehova anggano amta ra ya posiblin napriso ira odino nasentensiaan ira na patey. Makaaral tayo ed katooran da. Ag-ira natatakot ta amta ra ya anggano ompatey ira natan, walay marakdakep ya bilay ya ipaparaan nen Jehova parad sikara.

5. Anton ugali o panag-isip so mamakapuy ed pananisia tayod kioli?

⁵ Walay imbaga nen Pablo ya ugali odino panag-isip ya mamakapuy ed pananisia tayo ed kioli. Atan imay ibabaga na arum ya: “Mangan tan oninum tayo, ta nabuas et ompatey tayo.” Ontan lay panag-isip na arum ya totoo antis ni na panaon nen Pablo. Diad tua, nayarin inala to itan ed samay nabasa ed Isaias 22:13, ya ontutukoy ed saray Israelita. Imbes ya say panlingkor ed Dios so iyuna dad bilay da, puro liket so sankanonot da. Say rason da et gawaen da lay labalabay da, ta ompatey met ira lanlamang. Di ba ontan met so iisipen na dakel a totoo natan? Balet amta tayo ya aliwa itan, ta base ed Biblia et aliwliway nansumpalan na saray Israelita.​—2 Awa. 36:15-20.

6. No agtayo labay ya onkapuy so pananisia tayo ed kioli, siopa ray iwasan tayon kaulop?

⁶ Nepeg tayo sirin ya pilien no siopa ray lanang tayon kaulop, ta no andi et ompan naapektoan so pananisia tayo ed kioli. Nayarin ontan so agawa ed arum ya agagi ed Corinto. Akiulop ira ed saray totoon agmanisia ed kioli, kanian naimpluensyaan ira. Nia so tandaan tayo: no say lanang tayon kaulop et saray totoon puro liket so sankanonot da, aliway pansumpalan tayo. Ompan naalig tayoy panag-isip tan ugali da ya anggad ibaliwala tayo la ray prinsipyo ed Biblia tan makagawa tayo lay kasalanan. Kanian oniay seryoson bilin nen Pablo: “Pawil kayod dugan panagnonot yo . . . tan agkayo manggagaway kasalanan.”​—1 Cor. 15:33, 34.

7. Antoy nayarin intepet na arum nipaakar ed kioli a singa nabasa ed 1 Corinto 15:35-38?

⁷ Basaen so 1 Corinto 15:35-38. Say sakey ya agmanisia ed kioli nensaman et ompan  labay ton naimpluensyaan so arum, kanian itepet to: “Panon a paolien iray inaatey?” Marakep no amtaen tayoy ebat nen Pablo ed satan ta nandurumay papanisiaan na totoo no antoy nagawa ed sakey no ompatey. Anto kasi ibabangat na Biblia?

8. Anton panangikompara so inusar nen Pablo pian natalosan tayo no panon ya paolien iray parad tawen?

⁸ No say sakey a too et ompatey, kalkalna ya nabulok so laman to. Balet sarag na Dios ya ikdan na balon laman no paolien to la. Akin et segurado tayon sarasarag to itan ya gawaen? On ta ayarian na Dios ya gawaen so uniberso manlapud anggapo. (Gen. 1:1; 2:7) Nen tatalakayen nen Pablo so kioli ed tawen, walay balibalin angikomparaan to pian natalosan tayo ya agla kaukolan na Dios ya usaren imay datin laman na inatey. Isipen pa so sakey ya “ilik,” odino “bukel” na tanaman. No mangisukit kay bukel ed dalin, onsimit itan ya anggad ombaleg tan magmaliw ya tanaman. Sayan tanaman et duma lay itsura to ed samay melmelag ya bukel. Atan so angikomparaan nen Pablo pian ipaliwawa ya sarasarag na Amalsa so manggawa na “sakey a laman unong ed panliketan to.”

9. Antoy ibabaga na 1 Corinto 15:39-41 nipaakar ed pandurumaan na saray pinalsa na Dios?

⁹ Basaen so 1 Corinto 15:39-41. Imbaga nen Pablo ya aliwan parepareho iray pinalsa. Singa bilang, dumay laman na ayayep ed laman na saray manok tan sira. Imbaga to met ya diad tawen et sankanengneng tayoy pandumaan na agew tan bulan. Tan impaimano to met ya “nandurumaan so karakpan na kada bitewen.” Tua itan, ta anggano singa parepareho ira diad pakanengneng tayo, ibabaga na saray scientist ya nanduruma so klase na saray bitewen. Wala ray tatawagen ya red giant star, white dwarf, tan yellow star, ya singa say agew. Imbaga met nen Pablo ya “dumay karakpan na laman na saray walad tawen, tan dumay karakpan na laman na saray walad  dalin.” Antoy labay ton ibaga? Say laman na saray walad dalin et pisikal. Balet saray walad tawen et espiritu, singa saray anghel.

10. Anton klase na laman so iter na Dios ed saramay paolien to diad tawen?

¹⁰ Imanoen so sinmublay ya imbaga nen Pablo: “Ontan met so kioli na saray inaatey. Intanem itan ed kabubulok; paolien itan ed agkabubulok.” Amta tayo ya no say sakey et ompatey, nabulok so laman to tan ompawil ed dabok. (Gen. 3:19) Pero akin et imbaga nen Pablo ya “paolien itan ed agkabubulok”? Say tutukoyen to et aliwan saramay pinaoli nensaman diad dalin, ya singa saramay pinaoli nen Elias, Eliseo, tan Jesus. Say tutukoyen dia nen Pablo et saramay totoo ya paolien na Dios diad tawen tan ikdan To na “espiritual a laman.”​—1 Cor. 15:42-44.

11-12. Anton pananguman so agawad si Jesus nen sikatoy pinaoli, tan panon ya nagawa met itan ed saray alanaan?

¹¹ Nen wadiad dalin si Jesus, pisikal so laman to. Balet nen sikatoy pinaoli nen Aman Jehova, ‘nagmaliw ya espiritu,’ insan pinmawil diad tawen. Ontan met so nagawa ed saray alanaan ya Kristiano no paolien la ra diad tawen. Imbaga nen Pablo: “No panon a kapara tayo imay sakey a pinalsa na Dios manlapud dabok, magmaliw itayo met a kapara na samay sakey a nanlapud tawen.”​—1 Cor. 15:45-49.

¹² Tandaan tayo ya si Jesus et espiritu la nen sikatoy pinaoli na Dios. Nen asingger lan nasumpal so eksplinasyon nen Pablo nipaakar ed kioli, imbaga to no akin ya ontan. Kuan to: “Say [pisikal a] laman tan dala et agmakatawir ed Panarian na Dios,” ya walad tawen. (1 Cor. 15:50) Kanian no paolien la ray apostol tan arum nin alanaan diad tawen, agla nayari imay datin laman da. Kapigan ira balet paolien? Imbaga nen Pablo ya say kioli da et aliwa nin diad saman ya panaon. Nen insulat nen Pablo so 1 Corinto, say arum ya disipulo et “naugip lad patey,” singa si apostol Santiago. (Gawa 12:1, 2) Saray arum ya  apostol tan alanaan ed saman ya panaon et onugip ni ed patey, tan alagaren day kioli da.​—1 Cor. 15:6.

13. Anto ray nagawa legan na kiwawala nen Jesus?

¹³ Impropesiya nen Jesus tan Pablo so sakey ya importantin panaon—say kiwawala na Kristo. Imbaga nen Jesus ya say palatandaan na kiwawala to et no nagagawa la ray guerra, yegyeg, salot, tan arum nin kaugsan diad interon mundo. Nanenengneng tayon nagagawa la iratan manlapu la nen 1914. Balet wala ni importantin nagawa ya kaiba ed satan ya palatandaan. Imbaga nen Jesus ya say maong a balita ya manuuley lay Panarian na Dios et ipulong “ed interon dalin bilang pantasi ed amin a nasyon, insan onsabi so anggaan.” (Mat. 24:3, 7-14) Imbaga nen Pablo ya say kioli na saray alanaan a Kristiano ya “naugip lad patey” et nagawa met legan na “kiwawala na Katawan.”​—1 Tes. 4:14-16; 1 Cor. 15:23.

14. Antoy nagawa no ompatey so sakey ya alanaan legan na kiwawala nen Kristo?

¹⁴ No ompatey so sakey ya alanaan a Kristiano natan, sikatoy paolien ya tampol diad tawen. Atan imay imbaga nen Pablo ya walad 1 Corinto 15:51, 52: “Ag-itayon amin naugip ed patey, balet nauman itayon amin, diad sakey a bekta, diad kakirem na mata, legan na unor a trumpeta.” Nagagawa la ’ya natan! No onoli so sakey ya agi nen Kristo, seguradon malikeliket ta ‘naynay to lan kaiba so Katawan.’—1 Tes. 4:17.

15. Antoy gawaen na saramay napaoli diad tawen?

¹⁵ Nabasa ed Biblia no antoy gawaen na saramay napaoli diad tawen. Oniay imbaga nen Jesus ed sikara: “Samay manalo tan ontumbok ed saray gagawaen ko anggad kasampotan  et ikdan koy pakauley ed saray nasyon unong ya inawat ko ed Amak, tan pastolan to ray totoo diad panamegley na baston a balatyang pian namisimisi ira a singa saray banga a gawad pitek.” (Apo. 2:26, 27) Kanian saray napaoli ed tawen et tumboken da so instruksion nen Jesus diad paneral da ed saray nasyon panamegley na baston a balatyang.​—Apo. 19:11-15.

16. Panon ya taloen na dakel ya totoo so patey?

¹⁶ No napaoli la iray alanaan diad tawen, nibagan atalo da la so patey. (1 Cor. 15:54-57) Lapud apaoli la ra antis na guerra na Armagedon, kaiba la ra nen Jesus ya mangekal ed amin a kaugsan diad dalin. Milyon-milyon a Kristiano so makaliktar ed “baleg a kairapan” tan manbilay ira ed balon mundo. (Apo. 7:14) Nanengneng da so sakey nin pakatalo na patey sano bilayen la nen Jehova iray bilyon-bilyon ya inatey a totoo. Seguradon malikeliket tayo no nagawa la itan! (Gawa 24:15) Tan amin ya mansiansian matoor ed si Jehova et natalo da met so patey ta aglan balot onepekto ed sikara so ipapatey ya impatawir nen Adan. Manbilay la ra ya andi-anggaan!

17. Antoy ipapaseseg na 1 Corinto 15:58 ya gawaen tayo la natan?

¹⁷ Misalsalamat tayo ed sarayan makapabiskeg ya impormasyon ya insulat nen Pablo ed saray agagi ed Corinto. Lapud walay ilalo tayo, napapaseseg tayon iyaplika imay bilin to ya mamasya tayo la natan ed “kimey na Katawan.” (Basaen so 1 Corinto 15:58.) No makuli tan matoor tayo ed sayan kimey, seguradon sakey tayo ed saray mangawat ed dakel ya bendisyon diad balon mundo. Marakdakep ya bilay so ipaparaan nen Aman Jehova ed sikatayo. No wadman tayo la, seguradon nibaga tayo ya abawbawi tayoy amin ya sagpot tayo parad Katawan.