1-2. (a) Antoy imbaga nen Jehova ya gawaen na saray taloran apostol nen Jesus, tan panon tayon amta ya inunor da itan? (b) Antoy aralen tayo ed sayan artikulo?

KAYARI na Paskua nen 32 C.E., walay makapakelkelaw ya anengneng nen apostol Pedro, Santiago, tan Juan. Posiblin agawa iya diad Palandey Hermon. Ditan et anengneng da ya anguman so itsura nen Jesus! “Sinminag so lupa to a singa agew, tan say latop ton kawes et nagmaliw a masnag a singa liwawa.” (Mat. 17:1-4) Insan oniay arengel na saray apostol ya imbaga na Dios: “Saya so Ana’ko, say inad-arok, ya inabobonan ko. Dengel kayod sikato.” (Mat. 17:5) Nanengneng tayo ed impanmatoor na sarayan taloran apostol ya talagan dinengel day Jesus, tan labay tayo met iran aligen.

² Diad imbeneg ya artikulo, naamtaan tayo ya dedengelen tayoy boses nen Jesus no uunoren tayo ray bangat to. Apantongtongan tayo la so duaran imbaga to ya agtayo nepeg ya gawaen. Aralen tayo balet ed sayan artikulo so duaran imbaga to ya nepeg tayon gawaen.

3. Antoy nepeg tayon gawaen base ed Mateo 7:13, 14?

³ Basaen so Mateo 7:13, 14. Imanoen ya walay duaran puerta ya binitla nen Jesus, tan ompugta iratan ed duaran mandumaan ya dalan. Say sakey ya dalan et “maawang,” amay sakey balet et “makisir.” Duara labat ya dalan so napampilian.  Anggapo lay komatlo. Sikatayon mismo so mandesisyon no dinan ya dalan so pilien tayo. Aya so sankaimportantian ya desisyon ya gawaen tayo, ta ditan akadepende so pakaawat tayoy bilay ya andi-anggaan.

4. Ideskribe so “maawang” a dalan.

⁴ Baleg so pandumaan na samay duaran dalan. Diad samay “maawang” ya dalan, main-inomay so manbiahe kanian dakel so malabay ditan. Makapaermen balet ta kaslakan ya wadtan et mimila labat ed agus. Agda la labay so onalis, ta ditan so kawalaan na karaklan. Agda amta balet ya say promotor ed satan ya dalan et si Satanas ya Diablo, tan say pugtaan na satan et patey.—1 Cor. 6:9, 10; 1 Juan 5:19.

5. Antoy ginawa na arum pian naromog da so “makisir” a dalan, tan antoy nansagpotan dan gawaen pian makapanakar ira ditan?

⁵ Samay komaduan dalan et “makisir,” tan imbaga nen Jesus ya daiset labat so makaromog ed satan. Akin kasi? Makaala tayoy ideya ed samay tinmumbok ya imbaga to ya nabasa ed Mateo 7:15. Pinasakbayan to ray papatumbok to ya manalwar ira ed saray palson propeta. Nilibo so relihyon natan, tan amin da et ibabaga ran katuaan so ibabangat da. Ag-amta laingen na saray totoo no antoy panisiaan da, kanian dakel lay sinmawa ya anapen so dalan ya ompugtad bilay. Pero impaseguro nen Jesus ya basta mansagpot ira, naromog da itan. Oniay imbaga to: “No mansiansia kayod salitak, tua a sikayo iray disipulok, tan naamtaan yo so katuaan, tan say katuaan so mangibulos ed sikayo.” (Juan 8:31, 32) Maong labat ta inanap moy katuaan tan agka labat basta akila ed agus! Inaral mon maong so Salita na Dios pian naamtaan moy panlabayan to tan dinengel mo ray bangat nen Jesus. Naaralan mo ya kaukolan mo lan ibeneg iray bangat tan kagagawa na palson relihyon, tan agmo la dapat selebraan iray holiday odino okasyon ya nanlapud saray pagano. Naaralan mo met ya aliwan mainomay ya gawaen itan. (Mat. 10:34-36) Seguro, ompan nairapan ka nen onggagapo ka lan manguman. Pero agka sinmuko ta inar-arom ya maong si Aman Jehova, kanian apaliket mon maong so puso to!—Pro. 27:11.

6. Base ed Salmo 119:9, 10, 45, 133, antoy makatulong pian mansiansia tayo ed makisir ya dalan?

⁶ No wala tayo lad makisir ya dalan, antoy makatulong pian tuloytuloy so biahe tayo ditan? Imanoen iyan ilustrasyon. Maslak ya karsada ed palandey et walay harang to diad gilig. Proteksion itan ed saray driver ya ombiabiahe ditan. No anggapo itan, ompan agnatantiya na saray driver ya asingger la ra manaya ed tambib tan ompan nadisgrasya ra. Siempre, anggapo ’tay driver ya mangibagan sagabal iratan ed panmamaneho to! Mipadpara, saray ganggan nen Jehova ya walad Biblia et singa saratan ya harang ed gilig na dalan. Proteksion iratan ed sikatayo. Ontulong iratan pian makapansiansia tayo ed makisir a dalan.—Basaen so Salmo 119:9, 10, 45, 133.

7. Antoy dapat ya tandaan na saray kabataan diad panaakar dad makisir ya dalan?

⁷ Sikayo ran kabataan, kasin say pakalikna yo no maminsan et masyadon istrikto si Aman Jehova? Ontan so labay nen Satanas ya isipen yo. Labay to ya makaibeg kayo ed gagawaen na saramay walad maawang a dalan, ta singa nagagawaan day amin ya labay da. Ompan usaren to ray kaklasem odino saray nanenengneng mod Internet pian naliknam ya singa walay kulang ed bilay mo tan agka maliket. Labay nen Satanas  ya isipen mo ya agmo nai-enjoy so bilay mo ta dakdakel so bawal. * Pero niay tandaan mo: Si Satanas, iyaaamot to ed saray manbibiahe ed maawang a dalan no antoy pansumpalan da. Pero si Aman Jehova, impaamta to lad sika no anton klase na bilay so manatalaran ed saramay mansiansia ed makisir ya dalan.—Sal. 37:29; Isa. 35:5, 6; 65:21-23.

8. Antoy naaralan na saray kabataan ed alimbawa nen Erik?

⁸ Imanoen no antoy naaralan mo ed eksperiensya na kabataan ya brother ya si Erik. * Sikatoy lalagyaten na saray kaklase to ya manggawa na imoral. Nen imbaga to ya sikatoy sakey ed Saray Tasi nen Jehova tan uunoren to ray prinsipyo na Biblia, a-challenge laingen iray kaklase ton bibii kanian sinali dad akiten pian mi-sex ed sikara! Pero agnampatukso si Erik. Diad tua balet, aliwan  satan labat so pressure ya inarap to. Oniay imbaga to: “Kokombinsien ak na saray teacher ko ya man-college, ta no atagey kunoy inaral mo, respetoen ka na totoo. No agak kuno man-college, pakaskasi kunoy bilay ko.” Antoy ginawa nen Erik pian nalabanan to itan ya pressure? Oniay imbaga to: “Akikaaro ak ed saray kakongregasyon ko. Inturing ko ran kapamilyak. Mas sineryosok met so panag-personal study’k. Nen mas mabetbet tan mas aralem so panag-personal study’k, mas akombinse ak ya tua iray ibabangat na Biblia. Kanian nagmaliw ak ya mas determinadon manlingkor ed si Jehova.”

9. Antoy gawaen tayo pian mansiansia tayo ed makisir ya dalan?

⁹ Labay nen Satanas ya agmo la ituloy so pambiabiahem ed dalan paarap ed bilay. Labay to ya ombasil ka ed maawang ya dalan ya “ompugta ed kadederal.” (Mat. 7:13) Pero, agka nalagyat nen Satanas no tuloytuloy mon dengelen si Jesus tan ipasen mon proteksion iray ganggan nen Jehova. Pantongtongan tayo natan imay sakey nin imbaga nen Jesus ya nepeg tayon gawaen.

10. Base ed Mateo 5:23, 24, antoy imbaga nen Jesus ya nepeg tayon gawaen?

¹⁰ Basaen so Mateo 5:23, 24. Indeskribe dia nen Jesus so sakey ed saray sankaimportantian ya gagawaen na saray Judio—say pangiyaapay day ayep ed altar. Imadyin mo pay sakey ya Judio ya linmad templo tan iyawat to lad saserdote so ayep ya iyapay to. Pero anonotan ton walay babarongan ed sikato na agi to. Imbaga nen Jesus ya no ontan so nagawa, kaukolan to nin itilak so apay to tan anapen to may agi to. Akin ey? On ta wala ni mas importantin gawaen to antis ton ibagat may apay tod si Jehova. Oniay imbaga nen Jesus: “Mikareenan ka nid [agim].”

11. Anto ray ginawa nen Jacob pian makapikareenan ed si Esau?

¹¹ Walay naaralan tayo ed patriarkan si Jacob tungkol ed pikakareenan. Manga 20 taon ya akaarawi si Jacob ed lugar ya binalegan to. Aminsan, imbaki na Dios so sakey ya anghel pian ibagad si Jacob ya ompawil la diman. (Gen. 31:11, 13, 38) Pero walay problema. Wala may inkagawa pigay taon lay apalabas ya sikatoy implanon pateyen na kuya ton si Esau. (Gen. 27:41) Natatakot tan aburidon maong si Jacob ta ompan wala ni pasnok tan sakit na linawa nen Esau ed sikato. (Gen. 32:7) Pero antoy ginawa nen Jacob pian makapikareenan ed kuya to? Say unonan ginawa to et impikasi to itan ed si Jehova. Insan pinauna to la ray lingkor to ya awi-awit day dakdakel ya ayayep pian iregalo ed si Esau. (Gen. 32:9-15) Tan nen akapannengneng iran siansia, agaylan panamagalang so impanengneng nen Jacob ed kuya to. Sikatoy dinmakmomo—aliwa labat ya aminpinsan, noagta aminpito! Lapud marespeto tan mapaabeba si Jacob, akapikareenan ed kuya to.—Gen. 33:3, 4.

12. Antoy naaralan tayo ed si Jacob nen akikareenan ed si Esau?

¹² Makaaral tayo ed saray ginawa nen Jacob nen akikareenan ed si kuya to. Mapaabeban nampikasi tan kinmerew na tulong ed si Jehova. Pero tinekepan to met na gawa so pikakasi to. Wala ray ginawa to pian onlemek so puso nen kuya to. Nen akapannengneng la ra, agla akirasonan ed si Esau, tan agto la inungkat so apalabas no siopay duga tan no siopay aliwa ed sikaran dua. Say importante ed sikato et makapikareenan ed si kuya to. Panon tayon naalig so alimbawa nen Jacob?

13-14. Antoy gawaen tayo no apabarong tayoy sakey ya agi?

¹³ Pian tuloytuloy tayon makapanbiahe ed dalan paarap ed bilay, gawaen tayoy anggaay nayarian tayo ya mikareenan ed saray agagi tayo. (Roma 12:18) Antoy gawaen mo no bilang ta naamtaan mon apabarong mo so sakey ya agi? Alig moy Jacob, manpikasi kad si Jehova tan kerew moy tulong to. Ibagam ed si Jehova ya bendisyonan to komoy planom pian naayos yoy problema yo.

¹⁴ Maabig met no usisaen mo ni so sarilim. Isip mo pa iraya: ‘Sarag ko kasin akmonen so pride ko tan mapaabeban onkerew na perdona pian makapikareenan ak? Anto kasi nalikna nen Jehova tan Jesus no siak lay unonan onasingger ed agik?’ No usisaen mo ni so sarilim, mas napakiwas kan dengelen si Jesus tan agka manalangan ya mikareenan ed agim. Wala ni naaralan tayod si Jacob tungkol ed saya.

15. Panon ya makatulong imay nabasad Efeso 4:2, 3 diad pikareenan tayo ed agi tayo?

¹⁵ Imadyin mo pay agawa no ma-pride si Jacob tan akipaawetan ni ed si kuya to nen akapannengneng la ra. Seguradon aliwliway agawa. Kanian no katongtongen tayoy sakey ya agi ta labay tayon naayos so problema tayod sikato, dapat mapaabeba tayo. (Basaen so Efeso 4:2, 3.) Oniay ibabaga na Proverbio 18:19: “Say agin asakitan et mas mairap a pasukoen nen say apadiran a syudad, tan wala ray kolkolan a singa balewet na panag-amotan.” Say asakitan ya agi et singa apadiran ya syudad ya mairap ya looban. Pero no mapaabeba kan onkerew na perdona, ompan lukasan to lanlamang so puso to tan naayos yoy problema yo.

16. Antoy isipen tayo nin maong no mikareenan tayo, tan akin?

¹⁶ No mikareenan kad agim, isip mo nin maong no antoy ibagam tan apipiger moy panagsalitam. No katongtong mo la, tandaan mo ya say gagalam no akin ya linma kad man et pian napalemek moy puso to tan naekal so sakit ya nalilikna to. Ompan diad unaan et wala ray ibaga ton ansakit. No pinunuyan moy ibaga to odino manrason ka ni, kasin naayos yoy problema yo? Siempre andi! Agmo lilingwanan ya mas importante so pikareenan ed agim nen say napapaway mon sika so duga.—1 Cor. 6:7.

17. Antoy naaralan mo ed alimbawa nen Brother Gilbert?

¹⁷ Walay brother ya say ngaran to et Gilbert  ya ginawa toy anggaay nayarian ton mikareenan. Oniay imbaga to: “Abayag ya walay barongan mi may ana’kon bii. Masulok ya duay taon ya sinalik ya katongtongen pian ompawil so datin ulopan mi.” Anto ni balet so ginawa nen Brother Gilbert? Oniay imbaga to: “Kada no katongtongen koy ana’ko, manpikasi ak ni tan ipapanonot kod sarilik ya kontrolen koy liknaan ko no wala ray ansakit ya ibaga tod siak. Anggan anto lad tay ibaga to, agko la pinunuyan. Agak la mirasonan ta natatalosan ko ya obligasyon kon pansiansiaen so deen ed pamilyak.” Antoy resulta ey? Oniay imbaga to: “Mareen lay nonot ko natan ta pinmawil lay maong ya ulopan min sanama.”

18-19. Antoy gawaen tayo no walay apabarong tayon agi, tan akin?

¹⁸ Kanian antoy nepeg mon gawaen no naamtaan mon apabarong mo so sakey ya agi? Dengel moy Jesus, mikareenan ka. Ipikasim itan ed si Jehova, tan kerew moy masanton espiritu to pian napakiwas kan mikareenan. No gawaen moy anggaay nayarian mon mikareenan, magmaliw kan maliket, tan paneknek itan ya dedengelen moy Jesus.—Mat. 5:9.

¹⁹ Misalsalamat tayo ed si Jehova ta inter toy Jesu-Kristo bilang “ulo na kongregasyon” ya maar-aron mamibilin ed sikatayo. (Efe. 5:23) Komon ta gawaen tayoy anggaay nayarian tayon ‘ondengel ed sikato,’ ya singa ginawa nen apostol Pedro, Santiago, tan Juan. (Mat. 17:5) Nagawaan tayo itan no akaparaan tayon mikareenan ed agi ya apabarong tayo. No mikareenan tayo tan mansiansia tayod makisir a dalan ya paarap ed bilay, natan ni labat et dakel lan bendisyon so awaten tayo tan magmaliw tayon maliket ed andi-anggaan.