Kasin Akaparaan Ka La ya ‘Tawiren so Dalin’?
TATALARANAN ti lan nagawa imay insipan nen Jesus ya, “Maliket iray mauyamo, ta tawiren day dalin.” (Mat. 5:5) Saray alanaan et tawiren day dalin lapud uleyan da itan no man-ari la rad tawen kaibay Jesus. (Apo. 5:10; 20:6) Maslak balet ya tuan Kristiano et tawiren day dalin ta manayam ira ditan diad andi-anggaan. Magmaliw iran perpekto, tan mareen tan maliket la so bilay da. Pero pian nagawa itan, wala ray importantin gawaen da. Pantongtongan tayoy talora: asikasoen day dalin, iter day pankaukolan na saray napaoli, tan bangatan da iray napaoli. Amtaen tayo no anto ray gawaen tayo natan ni labat pian naipanengneng tayo ya labay tayoy manbilay diad paraiso.
KASIN AKAPARAAN KA LAN ASIKASOEN SO DALIN?
Nen ingganggan nen Jehova so inmunan sanasawa ya ‘panoen day dalin tan uleyan (o asikasoen) da itan,’ mapatnag ya labay na Dios ya magmaliw ya paraiso so interon mundo. (Gen. 1:28) Ag-anguman so gagala na Dios. Kanian satan ya ganggan et kaukolan ya ituloy na saray manawir ed dalin. Pero say problema, anggapoy hardin na Eden ya panumpisaan da. Kayari na Armagedon, seguradon dakdakel so aderal. Kanian kaukolan dan linisan so interon dalin. Talagan dakel a kimey so kaukolan ya gawaen!
Nanonotan tayod saya iray Israelita ya abihag ed Babilonia. Kayari na 70 ya taon, pinmawil ira ed dalin da. Apaulyanan itan ta abayag ya anggapoy nanayam. Pero impropesiya nen Isaias ya diad tulong nen Jehova et ondakep lamet itan. Oniay impropesiya nen Isaias: “Gawaen ton singa Eden so kalawakan tan singa hardin nen Jehova so patar a desierto.” (Isa. 51:3) Ontan a mismoy agawa. Diad arapen, tulongan met nen Jehova iray manawir ed dalin pian naasikaso da itan ya anggad magmaliw ya paraiso. Panon mon nipanengneng la natan ya talagan labay moy mitulongan ed satan ya kimey?
Say sakey ya paraan et no mapalinis ka ed abung tan sular yo, anggano aliwan mapalinis iray kakaabay yo. Manboluntaryo ka met ya manlinis tan manmintina na Kingdom Hall yo tan diad asingger ya Assembly Hall no wala. No iyabuloy na situasyon mo, man-apply kan volunteer parad disaster relief pian napasalan mo lay ontulong ed arum. Marakep met no manaral kay skill ya mausa-usar ed balon mundo.
KASIN AKAPARAAN KA LAN ITER SO PANKAUKOLAN NA SARAY NAPAOLI?
Kayarin tampol na inkioli na anak nen Jairo, imbaga nen Jesus ya pakanen da. (Mar. 5:42, 43) Siempre, mainomay labat ya pakanen so 12 años ya ugaw. Pero isip mo pay karakel na kimey ya gawaen tayo no nagawa la imay insipan nen Jesus ya “amin a walad pakanodnonotan iran lubok et narengel day boses to tan ompaway ira.” (Juan 5:28, 29) Anggano anggapoy espisipikon ibabaga na Biblia, seguradon kaukolan na sarayan onoli so naakan, kawes, tan panayaman. Panon mon nipanengneng la natan ya talagan labalabay moy ontulong pian niiter so pankaukolan na saray napaoli? Isip mo pa no antoy ebat mo ed sarayan tepet.
Anto ray gawaen mo natan ni labat pian nipanengneng mo ya akaparaan ka lan tawiren so dalin?
No inyanunsio ed kongregasyon yo so ibisita na manangasikaso na sirkito, kasin manboboluntaryo kan mamakan? No walay na-reassign ed kongregasyon yo ya datin Bethelite o datin manangasikaso na sirkito, sarag mo kasi ran tulongan ya mananap na napanayaman da? No walay nagawan regional odino espisyal a kombension ed lugar yo, kasin akaparaan kan manboluntaryo antis tan kayari na kombension o diad pan-welcome ed saray delegate?
KASIN AKAPARAAN KA LAN BANGATAN IRAY NAPAOLI?
Base ed Gawa 24:15, amta tayo ya binilyon ya totoo so napaoli. Dakel ed sikara et agda kabat si Jehova. Napaoli ra pian naikdan ira na tsansa ya kabaten so Dios. a Say manbangat ed sikara et saray kualipikado tan matoor ya lingkor na Dios. (Isa. 11:9) Si Sister Charlotte, ya asali toy nampulong ed Europe, South America, tan Africa, et eksayted la ed satan. Oniay imbaga to: “Eksayted ak lan manbangat ed saray napaoli. Kada no walay nabasak tungkol ed sakey ya too ya nambilay nensaman, naiisip ko, ‘No akabat to labat komon si Jehova, aliwan oniay bilay to.’ Labalabay ko lan ipaamta ed saray onoli so tungkol ed si Jehova tan no anto ray bendisyon no manlingkor irad sikato.”
Anggan saray matoor ya lingkor nen Jehova ya nambilay antis ya linmay Jesus diad dalin et dakel ni kaukolan dan naamtaan. Isip mo pa: Balbaleg ya pribilehyo ya ipaliwawa ed si Daniel no panon ya asumpal iray insulat ton propesiya ya agto natatalosan. (Dan. 12:8) Tan seguradon makapaliket met ya ibangat ed si Ruth tan Noemi ya diad pamilya ra so nanlapuan na Mesias. On, na-enjoy tayoy manbangat ed balon mundo, ta anggapo la ray problema tan mauges ya impluensya!
Panon mon nipanengneng ya labalabay mon bangatan iray napaoli? Maabig no natan ni labat et i-improve mo lay panagbangat mo tan mankuli ka ed panagpulong. (Mat. 24:14) Anggano limitado lay nagawaan mo lapud ontatatken ka la o lapud arum nin rason, nanengneng ed pansasagpot mo ya akaparaan ka lan manbangat ed saray napaoli.
Kanian pannonotan mo irayan tepet: Talaga kasin akaparaan ka la ya tawiren so dalin? Kasin eksayted ka lan asikasoen so dalin tan iter so pankaukolan na saray onoli tan bangatan ira? Ipapanengneng mo ya akaparaan ka la no natan ni labat et agmo papalampasen iray pagkakataon ya mitulongan ed saray kimey ya mipara ed saray gawaen tayo no tawiren tayo lay dalin!
a Nengnengen so artikulon “Saramay Ontutulong ed Dakerakel Pian Magmaliw a Matunong” diad Say Panag-bantayan ya Setyembre 2022.
