1. Nen asingger lan ompatey si Jesus, antoy imbaga to ed samay sakey ya kriminal ya walad abay to? (Lucas 23:39-43)

 NEN asingger lan ompatey si Jesus, walay duaran kriminal ed abay to ya akapasak met ed panamairapan ya poste. (Luc. 23:32, 33) Sikatoy binalawbalaw na sarayan kriminal kanian mapatpatnag ya agto ra disipulo. (Mat. 27:44; Mar. 15:32) Pero ag-abayag, apaisip tan anguman imay sakey ya kriminal. Oniay imbaga to ed si Jesus: “Jesus, nonot mo ak sano onsabi kad Panarian mo.” Inmebat si Jesus: “Ibagak ed sika natan, nakaiba ta ka ed Paraiso.” (Basaen so Lucas 23:39-43.) Anggapoy nabasa ed Biblia ya inawat na sayan kriminal so mensahe tungkol ed “Panarian na tawen” ya impulong nen Jesus, tan agmet imbaga nen Jesus ya sayan laki et nakaiba to diad Panarian ed tawen. (Mat. 4:17) Mapatnag sirin ya say tutukoyen nen Jesus ya ilalo na sayan kriminal et say pambilay ed Paraison dalin ya nagawa nid arapen. Akin et nibaga tayo itan?

2. Panon tayon amta ya Judio imay magbabawin kriminal?

² Mapatpatnag ya Judio imay magbabawin kriminal. Oniay imbaga to ed samay kapara ton kriminal: “Anggapo tay takot mod Dios, anta nadudusa ka la lanti a singa sayan too?” (Luc. 23:40) Saksakey a Dios so dadayewen na saray Judio, aliwan singa saray totoo ed arum a nasyon ya manisia ed dakel a dirios. (Exo. 20:2, 3; 1 Cor. 8:5, 6) No aliwan Judio irayan kriminal, di say intepet to komon may sakey et “Anggapo tay takot mod saray dirios?” Sakey ni, kaslakan et agpupulongan nen Jesus iray aliwan Judio ta sikatoy imbaki na Dios parad saray “abalang a karnero ed sankaabungan na Israel.” (Mat. 15:24) Impaamta na Dios ed saray Israelita ya bilayen to iray inaatey. Mapatpatnag ya amta iya na samay magbabawin kriminal. Base ed samay imbaga to, talagan manisia ya bilayen nen Jehova si Jesus pian manuley ed Panarian na Dios. Tan mapatnag ya iilaloan met na sayan kriminal ya sikatoy bilayen na Dios.

3. Antoy posiblin naisip to may magbabawin kriminal nen abitla nen Jesus so Paraiso? Ipaliwawa. (Genesis 2:15)

 ³ Bilang sakey ya Judio, amta na samay magbabawin kriminal so tungkol ed si Adan tan Eva, tan amta to met ya impanayam ira nen Jehova diad Paraiso. Kanian nen abitla nen Jesus so Paraiso, seguradon say naisip to may kriminal et sakey ya marakdakep ya hardin diad dalin.​—Basaen so Genesis 2:15.

4. Antoy naisip tayo kada no nabasa tayod Biblia imay imbaga nen Jesus ed samay kriminal?

⁴ Kada no nabasa tayod Biblia imay imbaga nen Jesus ed samay kriminal, seguro napapaisip tayo no anto kasi magmaliw ya bilay diad Paraiso. Makaala tayoy ideya diad impanuley nen Arin Solomon. Mareen tan mainawa so bilay ed Israel nen sikato so ari. Pero ibabaga na Biblia ya si Jesus et mas maong tan mas marunong ya ari nen say si Solomon. (Mat. 12:42) No si Jesus la tan saray kaiba ton arari so manuley dia ed dalin, seguradon pagmaliwen da iyan marakdakep ya Paraiso. No kabiangan itayo na ‘arum a karnero,’ duga labat ya amtaen tayo no antoy nepeg tayon gawaen pian manbilay tayo na andi-anggaan diad Paraiso.​—Juan 10:16.

5. Antoy naiimadyin mon bilay ed Paraiso?

⁵ Antoy naisip mon tampol no nabitla so salitan Paraiso? Seguro naiimadyin moy marakdakep ya park ya singa onman ed hardin na Eden. (Gen. 2:7-9) Ompan naisip mo met may propesiya ya insulat nen Miqueas ya “onyurong so balang sakey diad silong na ubas to tan diad silong na kiew ton igos.” (Miq. 4:3, 4) Ompan nanonotan mo met iramay teksto ed Biblia ya mangibabagan amayamay lay naakan. (Sal. 72:16; Isa. 65:21, 22) Kanian seguro naiimadyin moy sarilim ya wala kad marakdakep ya garden tan diad arapan mo et walay lamisaan ya napnoy masarap ya naakan. Amayamay so tanaman tan rosas kanian ambalbalingit so siplog na dagem. Sankarengel mo met so istoryaan tan elekan na saray kapamilyam tan kakaarom​—pati saramay inmoli lad bilay. Kasin anggad pangarap labat iraya? Andi. Sarayan naiimadyin mo et seguradon nagawa. Tan siempre, mankimey tayo met diad Paraiso.

6. Anto ray gawaen tayo diad Paraiso? (Nengnengen so litrato.)

⁶ Pinalsa nen Jehova so too ya panliketan toy mankimey. (Ecl. 2:24) Seguradon dakdakel so gawaen tayo legan na Sanlibon Taon ya Uley nen Kristo. Saramay akaligtas ed baleg a kairapan tan saray minilyon ya napaoli et kaukolan day kawes, naakan, tan abung, kanian amayamay so kimey! Pero seguradon na-enjoy tayoy mantrabaho. Ituloy tayo may kimey ya ag-agawaan nen Adan tan Eva. Gawaen tayon Paraiso so interon dalin.  Bangatan tayo met so minilyon ya bilayen nen Jehova ya daiset ni so amta ra tungkol ed sikato tan ed gagala to. Anggan saramay matoor ya lingkor na Dios ya inatey antis ya linmay Jesus diad dalin et bangatan tayo met ta dakel ni kaukolan dan naamtaan.

7. Antoy kipapasen na bilay ed Paraiso, tan akin et segurado tayod satan?

⁷ Mareen, organisado, tan mainawa so bilay ed Paraiso. Akin et segurado tayod satan? Impaisulat nen Jehova diad Biblia so impanuley nen Arin Solomon pian nawalaan tayoy ideya no antoy magmaliw ya bilay tayo no uleyan la na Anak na Dios so dalin.

8. Panon ya asumpal legan na uley nen Solomon imay insulat nen Arin David ya nabasad Salmo 37:10, 11, 29? (Nengnengen so “Tepetepet na Saray Manbabasa” ed sayan isyu.)

⁸ Impaisulat nen Jehova ed si Arin David no antoy kipapasen na bilay no say manuley et marunong tan matoor ya ari. (Basaen so Salmo 37:10, 11, 29.) No manpupulong tayo, mabetbet tayon ibabasa so Salmo 37:11 pian ipaamtad arum no antoy kipapasen na bilay diad Paraiso. Diad tua, atan ya teksto so angalaan nen Jesus ed samay imbaga to diad Sermon ed Palandey ya nagawad arapen. (Mat. 5:5) Pero idedeskribe met na Salmo 37:10, 11, 29 no antoy kipapasen na bilay legan na uley nen Arin Solomon. Nen si Solomon so ari, talagan mareen tan mainawa so bilay ed Israel, say dalin ya “manag-agus so gatas tan dilo.” Oniay insipan na Dios ed saray Israelita: “No mantultuloy kayon ontumbok ed saray totontonen ko . . . , mangiyan ak na kareenan diad dalin, tan ondukol kayo ya anggapoy manaktakot ed sikayo.” (Lev. 20:24; 26:3, 6) Agawa itan diad panaon nen Solomon. (1 Awa. 22:9; 29:26-28) Tan kaiba ingen ed propesiya ya “anggapo lay mauges” legan na uley to. (Sal. 37:10) Kanian amay nabasa ed Salmo 37:10, 11, 29 et agawa la nensaman tan nagawa lamet diad arapen.

9. Antoy imbaga na reyna na Sheba tungkol ed uley nen Arin Solomon?

⁹ Legan na uley nen Arin Solomon, abalitaan na reyna na Sheba so mareen tan mainawan  bilay na saray Israelita. Sayan reyna et nambiahe na arawrawi paonlad Jerusalem ta labay ton nengnengen no kasin tua so abalitaan to. (1 Ara. 10:1) Nen anengneng ton mismo so panarian nen Solomon, oniay imbaga to: “Apalumbasan mo ni so abalitaan kon karunongan tan inkaaligwas mo. Maliket iray totoom, tan maliket iray lingkor mo a naynay a walad arapan mo, ya ondedengel ed karunongan mo!” (1 Ara. 10:6-8) On, marakdakep so bilay na saray Israelita legan na uley nen Solomon. Pero diad tua, mas dakel ni so gawaen nen Jehova parad totoo no si Jesus ya Anak to so manuley la diad dalin.

10. Akin et mas maong ya ari si Jesus nen say si Solomon?

¹⁰ Dakdakel so rason no akin ya mas maong ya ari si Jesus nen say si Solomon. Aliwan perpekto si Solomon tan akagawa ni ingen na ambelat iran kasalanan. Wala ray aliwan desisyon to ya adamay pati saray sakop to. Duma balet si Jesus ta perpekto tan agbalot nalingo. (Luc. 1:32; Heb. 4:14, 15) Nen wadiad dalin si Jesus, sikatoy nansiansian matoor ed si Jehova anggano aminpigan sinubok nen Satanas. Prueba itan ya agbalot manggawa na aliwa si Jesus, ya nadamay iray matoor ya sakop to. Maong labat ta sikato so pinili nen Jehova ya magmaliw ya ari tayo!

11. Siopa ray kaiba nen Jesus ya manuley?

¹¹ Walay 144,000 ya lalaki tan bibii ya pinili nen Jehova ya nakaiba nen Jesus ya mangasikaso ed saray totoo tan ontulong ira pian nasumpal so gagala nen Jehova diad dalin. (Apo. 14:1-3) Nen wadia ni rad dalin, asali da met so dinmalan ed nanduruman subok tan problema. Kanian seguradon natatalosan day situasyon tayo no uleyan da tayo la. Antoy asainmin na sarayan kaiba nen Jesus?

12. Anton kimey so ipagawa nen Jehova ed 144,000?

¹² Mas ambelat so responsabilidad nen Jesus tan saray kaiba ton manuley no ikompara ed si Solomon. Say inasikaso labat nen Solomon et minilyon ya totoo tan diad saksakey labat ya bansa. Pero say asikasoen na 144,000 et binilyon ya totoo diad interon mundo. Talagan balbaleg ya pribilehyo so inter nen Jehova ed sikara!

13. Antoy espisyal ya asainmin na 144,000?

¹³ Singa si Jesus, manlingkor met so 144,000 bilang arari tan saserdote. (Apo. 5:10) Base ed Mosaikon Ganggan, responsabilidad na saray saserdote ya seguroen ya maabig so pisikal tan espiritual ya kondisyon na saray Israelita. Ibabaga na Biblia ya say Mosaikon Ganggan et “anino labat na saray maabig a bengatlan onsabi.” (Heb. 10:1) Lapud manlingkor ya saserdote iray 144,000, responsabilidad da met sirin ya asikasoen so pisikal tan espiritual ya pankaukolan na saray lingkor na Dios. Agtayo ni amta no panon ya mitongtong irayan arari tan saserdote ed saray totoo no Paraiso lay dalin. Antokaman so uksoyan, makapantiwala tayo ya seguroen nen Jehova ya naigiya to iray lingkor to diad dalin.​—Apo. 21:3, 4.

14. Akin et maap-apit so liknaan na ‘arum a karnero’ ed saray agagi nen Kristo?

¹⁴ Saramay nakaiba nen Jesus ya manuley et tinawag ton “melag a pulok.” (Luc. 12:32) Pero wala ni sakey ya grupo ya tinawag ton ‘arum a karnero.’ Imbaga to ya sayan duaran grupo et mankasakey tan “magmaliw iran sakey a pulok.” (Juan 10:16) Natan ni labat et saniba lan mankikimey iyan duaran grupo, tan mantulongan ni ran siansia anggad balon  mundo. Diad satan ya panaon, amin ya membro na “melag a pulok” et wala lad tawen, tan say ‘arum a karnero’ et panliliketan da lay bilay diad Paraison dalin. Pero siempre, wala ray kaukolan ya gawaen natan na ‘arum a karnero’ pian manbilay ira diad Paraiso.

15. (a) Panon ya mitutulongan so ‘arum a karnero’ ed saray agagi nen Kristo? (b) Panon mon naalig so alimbawa na brother ed litrato ya angaliw ed parmasya?

¹⁵ Amay magbabawin kriminal ya walad abay nen Jesus et anggapo lay pagkakataon ton ipanengneng so pisasalamat to ed ginawa nen Kristo parad sikato. Pero sikatayo ran kabiangan na ‘arum a karnero’ et dakel so tsansa tayon ipanengneng ya inar-aro tayoy Jesus. Singa bilang, nipanengneng tayo itan diad pitulongan tayo ed saray alanaan ya agagi to. Diad tua, imbaga nen Jesus ya atan so basiyan no kasin say sakey et ipasen ton karnero. (Mat. 25:31-40) Nasuportaan tayo ray agagi nen Kristo no makuli tayon manpulong tan man-Bible study. (Mat. 28:18-20) Usaren tayo sirin iray ginawa ran publikasyon parad panag-Bible study, singa say Panliketan so Bilay ya Anggapoy Anggaan! No anggapoy Bible study’m natan, anto kasi no i-goal mon tepetan iray kabat mo tan saray nakakatongtong mo no labay day manpa-Bible study?

16. Antoy gawaen tayo la natan pian akaparaan tayo lan manbilay ed Paraiso?

¹⁶ Natan ni labat et ipanengneng tayo lad si Jehova ya talagan labay tayoy manbilay ed Paraiso. Singa bilang, dapat matua tayo ed saray ibabaga tan gagawaen tayo, tan balanse tayo ed amin ya gagawaen tayod bilay tayo. Manmatoor tayo ed si Jehova, ed asawa tayo, tan ed saray agagi. No natan ni labat et gagawaen tayo lay anggaay nayarian tayon unoren so estandarte na Dios anggano mauges so impluensya na sayan mundo, mas mainomay tayo lan unoren so Dios no Paraiso la. Maabig met no ipasal tayo la ray ugali ya labalabay nen Jehova, tan manaral tayoy skill ya mausar ed Paraiso. Wala ni ray nabasam ya suggestion diad artikulon “Kasin Akaparaan Ka La ya ‘Tawiren so Dalin’?” ya walad sayan isyu.

17. Duga kasi ya isipen tayon ag-itayo makanepegan ya manayam ed Paraiso ta akagawa tayoy seryoson kasalanan nensaman? Ipaliwawa.

¹⁷ Importante met ya agtayo la pawil-pawilen  ya isipen iray agawaan tayon seryoson kasalanan nensaman tan labanan tayoy pakakakonsiensia tayo. Pero siempre, agtayo ‘gagalaen so mankasalanan’ ta irason tayo ya wala met so dondon. (Heb. 10:26-31) No bilang ta akagawa tayoy seryoson kasalanan balet ta nagbabawi tan anguman tayo la, tan nampatulong tayo lad si Jehova tan ed saray elder, makaseguro tayo ya talagan pinerdona itayo la nen Jehova. (Isa. 55:7; Gawa 3:19) Tandaan imay imbaga nen Jesus ed saray Fariseo: “Linma ak dia pian manawag ed saray makasalanan, aliwan saray matunong.” (Mat. 9:13) Agmo lilingwanan ya mabmabli so imbayar nen Jehova pian naperdona so amin ya kasalanan tayo.

18. No nabilay la imay magbabawin kriminal ya impasak ed abay nen Jesus, anto ray labay mon itepet ed sikato?

¹⁸ No Paraiso la, kasin labay mon nakabat imay magbabawin kriminal ya impasak ed abay nen Jesus? Anto ra kasi panistoryaan yo? Seguradon misatsalamat kayon dua ed dondon bagat nen Jesus. Ompan tepetan mo no anto ni ray agawa antis ya ompatey si Jesus, tan no antoy alikna to nen imbaga nen Jesus ed sikato ya nakaiba tod Paraiso. Ompan tepetan to ka met no anto ray agawa legan na kaunoran iran agew. Baleg ya pribilehyo ya iyaralan iray napaoli ed Paraiso ya singa sayan laki!​—Efe. 4:22-24.

19. Akin et aliwan boring so manbilay ed Paraiso? (Nengnengen so litrato ed apis.)

¹⁹ Aliwan boring so bilay ed Paraiso. Dakel so nakabat tan nakaaro tayo. Agtayo naupotan na gawaen ta dakel so kimey, pero seguradon na-enjoy tayoy mantrabaho. Tan say sankaimportantian ed amin, kada agew et lalo tayon nakabat tan onapit ed si Aman Jehova, tan panliketan tayoy bendisyon ya iiter to. Anggano manbilay tayo ni na andi-anggaan, walan-walay balo ya naaralan tayo tungkol ed sikato tan ed saray palsa to. Diad ilabas na kada agew, lalo tayon naaro so Dios tayo. Misatsalamat tayod si Aman Jehova tan ed si Jesus ta inikdan da tayoy ilalo ya manbilay na andi-anggaan diad Paraiso!