Andi. Aliwan ontan so labay ton ibaga nen insulat to itan.

Imanoen no antoy nabasa ed satan ya teksto tan diad arum ni ran salmo ya insulat to: “Kansionan ko na panangidayew so ngaran mo ya anggad angga legan kon susumpalen iray sipan ko ed kada agew.” “O Jehova a Dios ko, idadayew ta ka ed interon pusok, tan igloriak so ngaran mo ya anggad angga.” “Idayew koy ngaran mo ya anggad angga.”​—Sal. 61:8; 86:12; 145:1, 2.

Nen insulat itan nen David, agto labay ya ibaga ya sikatoy aglan balot ompatey. Amta to imay imbaga nen Jehova ya say bayar na kasalanan et patey, tan binidbir ton mismo ya sikatoy makasalanan. (Gen. 3:3, 17-19; Sal. 51:4, 5) Amta to ya anggan saray matoor ya lingkor na Dios et inatey met, singa si Abraham, Isaac, tan Jacob. Tan amta nen David ya onsabi panaon et sikatoy ompatey met lanlamang. (Sal. 37:25; 39:4) Pero nen insulat to so Salmo 61:8, ipapanengneng to labat ya labalabay ton idayew si Jehova diad anggad angga​—gawaen to itan legan ya sikatoy mabilay.​—2 Sam. 7:12.

Say arum ed saray insulat nen David et tungkol ed saray agawgawad bilay to, ya singa nanengneng ed superskripsion na Salmo 18, 51, tan 52. Si David et sakey ya pastol, tan diad Salmo 23 et indeskribe toy Jehova bilang pastol ya mangiwawanwan, mamapakan, tan manproprotekta ed saray karnero to. Atan so rason no akin ya labay nen David ya panlingkoran so Dios ‘diad interon bilay to.’​—Sal. 23:6.

Tandaan met ya si Jehova so angigiya ed si David nen insulat to iratan ya salmo. Diad tua, wala ray propesiyan insulat to ya linmabas ni andukey ya panaon insan agawa. Singa bilang, diad Salmo 110, insulat to ya onsabi panaon et ‘onyurong so Katawan to ed nikawanan na Dios’ tan naikdan na baleg ya autoridad pian “ipaakseb [so] panangukom sumpad saray nasyon.” Diad pamilya nen David so panlapuan na Mesias, ya manuley ed tawen tan manlingkor bilang “saserdote ed andi-anggaan.” (Sal. 110:1-6) Nen wadiad dalin si Jesus, imbaga ton mismo ya sikato so tutukoyen na samay propesiya ed Salmo 110 tan nagawa itan diad arapen.​—Mat. 22:41-45.

On, impaisulat nen Jehova ed si David iray agawgawa ed bilay to tan saray nagawa nid arapen no sikato so paolien la tan naidayew to lay Jehova ya anggad angga. Kanian amay Salmo 37:10, 11, 29 et nibaga tayon agawa la diad Israel nensaman tan nagawa lamet itan diad arapen no tooren la na Dios so amin ya insipan to.​—Nengnengen so parapo 8 na artikulon “Nakaiba ta Ka ed Paraiso” ed sayan isyu.

Ipapanengneng sirin na Salmo 61:8 tan arum nin insulat nen David ya labalabay ton idayew si Jehova anggad ipatey to. Nanengneng met ed saratan ya bersikulo no antoy gawaen nen David no sikatoy paolien la nen Jehova.