1. Antoy kaslakan ya gagawaen nen Jehova pian naebatan toy pikakasi na saray lingkor to?

 ANTAM ta ya sarag kan usaren nen Jehova pian ebatan so pikakasi na lingkor to? Sarag ton usaren so anggan siopa​—saray elder, ministeryal a lingkor, payunir, odino anggan siopan agi—​balanglan brother o sister, ugaw man o matatken. On, no say sakey et onkerew na tulong ed si Jehova, maslak et usaren to iray elder o arum nin agagi pian niiter so pankaukolan na satan ya lingkor to. (Col. 4:11) Balbaleg ya pribilehyo ya usaren ka nen Jehova pian natulongan iray agagi! Nagawaan mo itan no walay onkakalat ya sakit, no walay kalamidad, tan no ibawal na gobierno so kimey tayo.

2. Akin et nayarin mairap so ontulong no walay onkakalat ya sakit?

² Nayarin mairap so ontulong ed arum no walay onkakalat ya sakit. Singa bilang, ompan labalabay tayon bisitaen iray kakaaro tayo, pero delikado ni. Ompan labay tayon imbitaan ya mangan iray agagin medyo mairap so bilay da, balet agni nayari. Ompan labay tayoy ontulong ed arum, pero diad mismon pamilya tayo et walay mansasakit o mairap met so bilay tayo. Antokaman so situasyon tayo, komon ta manggawa tayo nin siansia na paraan pian natulongan tayo iray agagi, tan naliliketan si Jehova no ontan so gawaen tayo. (Pro. 3:27; 19:17) Anto ray sarag tayon gawaen?

3. Antoy naaralan mod saray elder ed kongregasyon nen Desi? (Jeremias 23:4)

³ No antoy nagawaan na saray elder. No sakey kan elder, pansagpotan mon kabaten tan kaaroen iray agagi. (Basaen so Jeremias  23:4.) Oniay imbaga nen Desi b ya abitla ed imbeneg ya artikulo: “Antis na pandemic, nakakaiba min lanang ed ministeryo tan ed saray gathering iray elder ya kagrupo mi.” Lapud palagay so loob nen Desi ed saraman ya elder, agnababaingan ya manpatulong ed sikara nen COVID-19 pandemic tan nen inatey so pigaran kapamilya to lapud satan ya virus.

4. Akin ya agnababaingan si Desi ya manpatulong ed saray elder nen pandemic, tan antoy naaralan mod satan?

⁴ Oniay imbaga nen Desi: “Lapud kaarok iray elder, agak nababaingan ya ibagad sikara iray naliliknak tan saray problemak.” Antoy naaralan na saray elder ed satan? Antis nin onsabi iray mairap ya situasyon, pastolan yo ray agagi ed kongregasyon yo tan mikaaro kayod sikara. No walay onkakalat ya sakit tan agyo ra personal ya nabisita, manisip kayoy arum ya paraan pian nakontak yo ra. Onia ni imbaga nen Desi: “No maminsan et pigapigaran elder so ontawag o man-text ed siak. Apaseseg ak ed saray in-share dan teksto anggano kabisadok la iratan.”

5. Panon ya naamtaan na saray elder no antoy kaukolan na saray agagi, tan panon da ran natulongan?

⁵ Naamtaan yoy pankaukolan na saray agagi no kumustaen yo ra tan tepeten yoy situasyon da diad paraan ya ag-ira nabaingan. (Pro. 20:5) Kasin wala ni naakan da? Kasin kailangan day tambal tan arum nin nakaukolan ed inagew-agew? Kasin wala ni trabaho da, odino ompan anggapo lay pambayar dad renta na abung? Ompan kaukolan day mangiba ed sikara pian makala ray tulong na gobierno. Ontan so ginawa na saray kakongregasyon nen Desi. Maliket dan tinulongan ed saray materyal ya pankaukolan to. Pero imbaga to ya say baleg ya akatulong pian nasarag to ray subok et say impamabiskeg tan impamaseseg ed sikato na saray elder. Oniay kuan to: “No kukumustaen ak na saray elder, manpipikasi ira ya kaiba ak. Agko la natandaan iray eksakton imbaga rad pikakasi ra, pero say agko nalingwanan et say malasakit dad siak. Talagan impalikna nen Jehova ed siak ya agko bukbukor.”​—Isa. 41:10, 13.

6. Antoy sarag ya gawaen na kada sakey ed kongregasyon pian makapantutulongan tayo? (Nengnengen so litrato.)

⁶ No antoy nagawaan na amin ed kongregasyon. Tua, saray elder so mangidaulo pian naasikaso iray agagi ed kongregasyon. Balet labay nen Jehova ya amin tayo et manpapasesegan tan mantutulongan. (Gal. 6:10) Anggan say simpli ya pangipanengneng na panangaro et  balbaleg lay epekto to ed sakey ya mansasakit. Singa bilang, sarag na sakey ya ugaw so manggawa na card o mandrowing pian napaseseg so sakey ya agi. Sarasarag na saray kabataan ya itindaanan o ibaan so maedad lan agi diad kimey tod abung. Say arum ed kongregasyon et sarag dan ilutoan so agin mansasakit, insan da iyakar ed abung to. Diad tua, makapanpapasesegan tayon amin anggano walay onkakalat ya sakit. Ompan sarag tayoy agni onaalis ya tampol kayari na aral pian nakumusta tayo ni ray agagi, balanglan diad Kingdom Hall o diad video conference. Agtayo lilingwanan ya kaukolan met na saray elder so panamaseseg. Wala ray agagi ya angiter na thank you card ed saray elder ya busy’n maong ya ontutulong ed saray agagi. Importante sirin ya kada sakey ed sikatayo et “itultuloy [tayon] pasesegen tan pabiskegen so sakey tan sakey”!​—1 Tes. 5:11.

7. Antoy maslak ya epektod sikatayo no walay kalamidad?

⁷ No walay nagawan kalamidad, ompan biglan manguman so bilay na sakey ya too. Nayarin naderal iray kaykayarian o abung to, odino wala ni ingey ompatey ya inad-aro tod bilay. Aliwan exempted iray lingkor nen Jehova ed sarayan trahedya. Anto sirin so gawaen tayo pian akaparaan tayon ontulong?

8. Antis ya walay nagawan kalamidad, antoy nepeg lan gawaen na saray elder tan ulo na pamilya ?

⁸ No antoy nagawaan na saray elder. Sikayo ran elder, tulongan yo iray agagi ya manparaan antis nin walay nagawan kalamidad. Segurado yo ya amta na amin ed kongregasyon no antoy gawaen da pian ligtas ira tan ipanonot yo ya ag-ira manaalangan ya kontaken iray elder. Oniay imbaga nen Margaret ya abitlad imbeneg ya artikulo: “Diad lokal a pankaukolan ed kongregasyon mi, impanonot na saray elder ya agni asumpal so panaon na wildfire. Imbaga ra ya no iganggan na saray autoridad ya kaukolan mi lay man-evacuate odino nanengneng min delikado lay situasyon, kaukolan mi lay onalis ya tampol.” Dugaruga iman ya panonot na saray elder ta kayari na limay simba et walay agawan wildfire ed lugar da. Sikayo ran ulo na pamilya, pantongtongan yod family worship yo no antoy gawaen na kada sakey no walay nagawan kalamidad. No akaparaan kayon amin, pati saray angkekelag nin ananak yo, agkayo man-panic.

9. Antoy dapat ya gawaen na saray elder pian organisado so itulong dad saray agagi no walay nagawan kalamidad?

⁹ No sakey kan manangasikaso na grupo, agmo la aalagaren ya wala ni nagawan kalamidad antis mon tiponen so contact information na amin ya kagrupom. Ilistam tan segurom ya updated itan, pian no walay nagawan kalamidad et nakontak mon amin so kagrupom tan naamtaan moy situasyon da. Ipaamtam ya tampol itan ed coordinator na ulop na mamatatken ta sikato so mangireport ed manangasikaso na sirkito. No kada sakey et gawaen toy responsabilidad to, mas maples ya natulongan iray agagi. Kayari na samay pool diad lugar di Margaret, agnaugip ed loob na 36 ya oras so manangasikaso na sirkito ta kokontaken to ray nanduruman elder pian niyanapan na panayaman iray 450 ya agagin apektado na pool tan niiter so pankaukolan da. (2 Cor. 11:27) Lapud saman ya impansagpot da, anggapoy anggan sakey ya apaulyanan.

10. Akin et importante ya man-shepherding iray elder? (Juan 21:15)

¹⁰ Kaiba ed kimey na saray elder so pamabiskeg tan pamaseseg ed saray agagi. (1 Ped. 5:2) No walay nagawan kalamidad, nepeg dan seguroen ya ligtas so amin ya agagi tan walay naakan, kawes, tan panayaman da. Pero anggano  linmabas lay pigaran bulan, kaukolan nin siansia na saray agagi so panamaseseg tan nalikna ran walay manmamalasakit ed sikara. (Basaen so Juan 21:15.) Oniay imbaga nen Harold, ya membro na Branch Committee tan dakdakel lay akatongtong ton agagi ya biktima na kalamidad: “Agan tampol maka-recover iray agagi. Seguro ompapawil met lad normal so kabibilay da balet nayarin pawil-pawil nin siansia so pakakailiw dad saray inatey ya kapamilya o kaaro da, sankanonot da ni ray aperdin kaykayarian da, odino man-panic lamet ira no nanonotan da may eksena ya dawdawit iran inatey. Normal labat ya pawil-pawil so ermen da, pero agto labay ya ibagan makapuy so pananisia ra.”

11. Anton tulong so kaukolan na saray pamilya?

¹¹ Sikayo ran elder, komon ta “miakis kayo ed saramay onaakis.” (Roma 12:15) Ipaseguro yod saray akaligtas ed kalamidad ya inar-aro ira nen Jehova tan imamalasakit ira na saray agagi. Tulongan yo met iray pamilya ya itultuloy da iray espiritual ya rotina ra singa say panagpikasi, panag-personal study, pipiaral, tan panagpulong. Paseseg yo met iray atateng ya tulongan da ray ananak dan manpokus ed saray walad sikara ya agnaderal na anggan anton kalamidad. Sikayo ran atateng, lanang yon ipanonot ed saray ananak yo ya si Jehova so sankaabigan ya kaaro, tan agto ran balot paulyanan. Tan ipaliwawa yod sikara ya walay maar-aron pamilya ra ed interon mundo ya akaparaan ya ontulong anggan antoy nagawa.​—1 Ped. 2:17.

12. Panon tayon makatulong ed disaster relief? (Nengnengen so litrato.)

¹² No antoy nagawaan na amin ed kongregasyon. No walay nagawan kalamidad ed lugar ya asingger ed sikayo, tepetan mo ray elder no panon kan makatulong. Ompan makapanpundo ya magano ed abung yo iray apektado na kalamidad odino saray construction volunteer. Sarag mo met so mangiba ya man-deliver na saray naakan tan suplay ed saray agagin mankaukolan. Panon to balet no arawi so akagawaan na kalamidad? Sarag mo nin siansiay ontulong. Singa bilang, ipikasim iray agagin apektado. (2 Cor. 1:8-11) Sarag mo met ya suportaan so relief work diad pandonasyon mod worldwide work. (2 Cor. 8:2-5) No walay pakasarag mon onla ed lugar ya akagawaan na kalamidad, tepetan mo ray elder no panon kan makapanboluntaryo. No natawag kan man-volunteer, seguradon makaawat kay training pian antam so gawaen mo anggan iner so pangibakian dad sika.

13. Antoy problema na saray agagi tayo ed saray bansa ya imbawal na gobierno so kimey tayo?

¹³ Diad saray bansa ya imbawal na gobierno so kimey tayo, mas mairap so situasyon na agagi ta agda bastabasta nagawaan iray rotina da. Aliwan satan labat, apektado met ira na sakit, ipatey na inad-aro, tan say ibabagsak na ekonomiya. Tan lapud bawal so kimey tayo, ompan saray elder et agda nakumusta ya personal iray agagin mankaukolan na panamaseseg. Ontan so agawad si Andrei, ya abitlad imbeneg ya artikulo. Walay sister ya kagrupo to ya mair-irap so bilay to, insan naaksidente ni legay pandemic. Aminpigan naoperaan tan agmakatrabaho. Pero nan-remedyo iray agagi pian natulongan imay sister. Inusar ira nen Jehova pian niiter so pankaukolan to.

14. Panon ya nipanengneng na saray elder ya mantitiwala ira ed si Jehova?

¹⁴ No antoy nagawaan na saray elder. Nampikasi si Andrei tan ginawa to no antoy nasarag to. Antoy ebat nen Jehova? Pinakiwas to iray agagi ya makakapaway nin siansia pian natulongan imay sister. Singa bilang, ilulugan da no walay check-up tod hospital. Wala met iray ontutulong ed sikato diad pinansyal. Pinakiwas ira nen Jehova ya gawaen no antoy nasarag da tan benendisyonan toy nankakasakey ya sagpot da. (Heb. 13:16) Sikayo ran elder, agyo lilingwanan ya no walay panagbawal, agyo sosoloen so amin ya kimey. Manpatulong kayo tan i-delegate yo so arum ya responsabilidad. (Jer. 36:5, 6) Tan say sankaimportantian, mantiwala kayo ed si Jehova. Seguradon tulongan to kayo pian naasikaso yo ray agagi.

15. Antoy gawaen tayo pian agnaderal so pankakasakey tayo anggano ibawal na gobierno so kimey tayo?

¹⁵ No antoy nagawaan na amin ed kongregasyon. No walay panagbawal, ompan apag-apagen ed angkelag ya grupo iray pantitipon tayo. Lapud daiset kayo, ompan mas nanengneng yo ray kakapuyan na saray agagi. Tandaan yo balet ya importantin pansiansiaen tayoy kareenan, kanian ayos yon tampol iray agpantatalosan. Tandaan, si Satanas so kalaban tayo, aliwan saray agagi. (Pro. 19:11; Efe. 4:26) Maabig met no mantutulongan kayo. (Tito 3:14) Lapud agpinaulyanan na saray agagi imay sister ya abitlad parapo 13, lalon binmiskeg so grupo ra. Mas inmelet so aroan da tan pamilya so turing dad sakey tan sakey.​—Sal. 133:1.

16. Base ed Colosas 4:3, 18, panon tayon natulongan iray agagin manaayam ed bansa ya imbawal so kimey tayo?

¹⁶ Nilibon agagi tayo so matoor ya manlilingkor  ed si Jehova anggano manaayam irad saray bansa ya ibabawal na gobierno so kimey tayo. Impriso ingen na gobierno so arum ed sikara. Panon tayo ran natulongan? Ipikasi tayo ra tan saray pamilya ra. Agtayo met lilingwanan ya ipikasi iray agagin mangiiter na espiritual, materyal, tan legal ya tulong ed saray akaprison agagi. Lapud satan ya gagawaen da et posiblin napriso met ira. c (Basaen so Colosas 4:3, 18.) Agmo lilingwanan ya balbaleg so nagawaan na pikakasim parad saray agagi!​—2 Tes. 3:1, 2; 1 Tim. 2:1, 2.

17. Antoy gawaen mo la natan pian akaparaan ka no ibawal na gobierno so kimey tayo?

¹⁷ Sarag yon pamilya so manparaan la natan pian amta yoy gawaen yo no bilang ta ibawal na gobierno so kimey tayo diad lugar yo. (Gawa 14:22) Kasin manpokus kayo ed saray posiblin mauges ya nagawa? Andi. Mas maabig no pabiskegen yoy relasyon yod si Jehova tan tulongan yo ray ananak yon pabiskegen so pananisia ra. No bilang ta mapaga kayo ed saray posiblin nagawa, ipikasi yo itan ed si Jehova. (Sal. 62:7, 8) Diad family worship yo, pantongtongan yo iray rason no akin ya makapantiwala kayod sikato. d No akaparaan kayo tan mabiskeg so tiwala yod si Jehova, agtanton mapaga iray ananak yo tan kalmado ira ta amta ra ya agkayo paulyanan nen Jehova.

18. Anton klase na bilay so manatalaran ed sikatayo diad arapen?

¹⁸ Anggano ondadalan tayod mairap iran situasyon, agtayo mapagpagan maong ta amta tayo ya walad sikatayo so kareenan na Dios. (Fil. 4:6, 7) Iiter itan nen Jehova pian kalmado labat so puso tayo anggano wala ray sakit, kalamidad, tan anggan ibawal ni ingen na gobierno so kimey tayo. Uusaren to met iray makukulin elder pian ag-itayo napaulyanan. Tan inikdan to tayon amin na pribilehyon ontulong ed sakey tan sakey. Lapud kareenan ya iiter na Dios, agtayo natatakot ed saray subok ya onsabi, lalo lad “baleg a kairapan.” (Mat. 24:21) Diad satan ya panaon, importante ya kalmado tayo labat tan tulongan tayo ray agagi ya mansiansia met ya kalmado. Kayari na baleg a kairapan, naandi lan amin iray problema tan pakakaaburidoan tayo. Sa wakas, nagawa la imay insipan nen Jehova ed sikatayo​—say perpekton bilay tan tuan kareenan!​—Isa. 26:3, 4.