Kasin binasam tan tinalosan mo iray artikulo ed Say Panag-bantayan ed sayan taon? Nengneng mo pa sirin no naebatan mo irayan tepet:

Antoy labay ya ibaga na bilin ya ‘uman yoy panagnonot yo’? (Roma 12:2)

Agto labay ya ibaga ya basta manggagawa tayoy maabig et sapat la. Dapat usisaen tayo no anton talagay inkatoo tayo, tan no walay nanengneng tayon aliwliwan ugali o kagagawa tayo, umanen o ekalen tayo itan pian naliketan si Jehova ed sikatayo.—w23.01, p. 8-9.

Panon tayon mansiansian balanse legan tayon akabantay ed saray nagagawad mundo?

Duga labat ya imanoen tayo ray nagagawa ed mundo tan no antoy koneksion da ed saray propesiya ed Biblia. Pero no paniistoryaan tayo iratan, nepeg ya saray ibabaga tayo et akabase ed updated ya impormasyon ya im-publish na organisasyon nen Jehova. Agtayo manggagawa na sarili tayon espikulasyon o interpretasyon pian agnaderal so pankakasakey ed kongregasyon. (1 Cor. 1:10)—w23.02, p. 16.

Antoy pandumaan na bautismo nen Jesus tan say bautismo na saray papatumbok to?

Agla kaukolan ya idedika nen Jesus so sarili to ed si Jehova ta sikatoy inyanak ed bansa ya dedikado la ed Dios. Agmet la kaukolan nen Jesus so magbabawi ta sikatoy perpekto—anggapoy kasalanan to.—w23.03, p. 5.

Antoy gawaen tayo pian napaseseg tayoy arum ya mankomento?

Maabig no antikey labat so komento tayo pian dakel ni ray makapankomento. Iwasan tayo met so mangibaga na dakdakel ya impormasyon pian sananey met lay mangikomento ed arum ya punto.—w23.04, p. 23.

Antoy tutukoyen na samay “Dalan na Kasantosan” ya nabasad Isaias 35:8?

Nensaman, sayan dalan et ontutukoy ed simbolikon rota ya dinalan na saray Judio manlapud Babilonia paonlad Israel. Diad panaon tayo ey? Nilasus ya taon antis na 1919, wala ray ginawa pian naiparaan so “dalan,” singa say printing tan translation na Biblia, tan arum ni. Sikatayo ran lingkor na Dios natan et manaakar ed sayan “Dalan na Kasantosan.” Ditan tayo naeksperiensya so espiritual ya paraiso tan atan labat so dalan pian naawat tayoy bendisyon na Panarian.—w23.05, p. 15-19.

Antoy isisimbolo na duaran bii ya nabasad Proverbio kapitulo 9?

Nabasa ditan so simbolikon “makulangkulang a bii,” ya say imbitasyon to et ompugta ed “Lubok” o ipapatey. Nabasa met ditan so bii ya isisimbolo toy “tuan karunongan,” tan say imbitasyon to et ompugta ed “dalan na pakatalos” tan ed bilay. (Pro. 9:​1, 6, 13, 18)—w23.06, p. 22-24.

Akin et nibaga tayon mapaabeba si Jehova tan walay malasakit to diad impantrato tod si Lot?

Ingganggan nen Jehova si Lot ya taynan toy Sodoma tan ontakas ed kapalandeyan. Nen akikasi si Lot ya dia lad baley na Zoar so batikan da ya pamilya, pinagbigyan nen Jehova so kerew to.—w23.07, p. 21.

Antoy gawaen na asawan bii no say mister to et onnenengneng ed pornograpiya?

Agto dapat tetetelen so sarili to. Importante ya pabiskegen toy relasyon tod si Jehova. Makatulong no dalepdepen to iray bibii ed Biblia ya aproblema met pero nampikasi irad si Jehova tan kinerew day tulong To. Sarag to met ya tulongan so mister to ya manggaway paraan pian makaiwas ed tukso.—w23.08, p. 14-17.

No walay mantepet tungkol ed saray papanisiaan tayo, panon ya makatulong so aralem ya pakatalos pian maulimek o mahinahon so iyebat tayo?

Say toon aralem so pakatalos to et agtampol man-react no kuestionen na arum iray papanisiaan to. Misalamat ingen ta naamtaan toy iisipen da, kanian mas baleg so posibilidad ya maulimek so paraan na iyebat to.—w23.09, p. 17.

Antoy ginawa nen Maria nen kakkaukolan toy panamabiskeg, tan antoy naaralan tayod sikato?

Nen naamtaan nen Maria ya sikato so magmaliw ya ina na Mesias, kakkaukolan ton pabiskegen so liknaan to kanian nampatulong ed arum. Inawat toy panamabiskeg nen Gabriel tan Elizabet. No kaukolan tayo met so panamabiskeg, manpatulong tayo ed saray agagi.—w23.10, p. 15.

Antoy nailaloan tayon gawaen nen Jehova no manpikasi tayod sikato?

Im-promise to ya dengelen to iray pikakasi tayo. No walay kerew tayod sikato, ikokonsidera to so gagala to. (Jer. 29:12) No maminsan, mandumaan so ebat nen Jehova ed saray lingkor to anggano pareho so kekerewen da. Pero tandaan tayo ya sikatoy lanang ya akaparaan ya ontulong.—w23.11, p. 21-22.

Binitla nen apostol Pablo so “ilalo” diad Roma 5:​2, kanian akin et tinukoy to lamet itan ed bersikulo 4?

No naamtaan na sakey ya too so sipan na Dios ya walay bilay ya andi-anggaan diad paraison dalin, ontubo so ilalo diad puso to. Pero no sikatoy ondalan ed saray subok tan anosan to iratan, nalikna to ya sikatoy inar-aro na Dios. Kanian diman lalon ombaleg tan ombiskeg so ilalo to. Mas magmaliw itan ya tudtua ed sikato.—w23.12, p. 12-13.