1. Nen masiken lay Abraham, akin et inilaloan to ya sikatoy nawalaan nin siansia na anak ya laki?

 INSIPAN nen Jehova ed kaaro ton si Abraham ya sikatoy nawalaan na anak ya laki, tan lapud satan ya anak et nabendisyonan so amin ya nasyon ed interon dalin. (Gen. 15:5; 22:18) Baleg so tiwala nen Abraham ya nagawa itan ta mabiskeg so pananisia tod Dios. Pero nen asabi la nen Abraham so edad ya 100 tan 90 la na asawa ton si Sara, anggapo nin siansiay anak da. (Gen. 21:​1-7) Imbaga balet na Biblia ya “siansia nin nanilalo [si Abraham] tan walaan na pananisia a sikatoy magmaliw ya ama na dakel a nasyon.” (Roma 4:18) Ag-asayang so impanalagar nen Abraham. Inlukon tan inyanak nen Sara si Isaac—say anak ya abaybayag to lan pipirawaten. Akin et ontan lay kabiskeg na tiwala nen Abraham ed si Jehova?

2. Akin et ontan lay kabiskeg na tiwala nen Abraham ed sipan nen Jehova?

² Kabkabat nen Abraham si Aman Jehova. Atan so rason kanian mabiskeg so tiwala to ya “nayarian na Dios a gawaen imay insipan to.” (Roma 4:21) Inturing ingen nen Jehova si Abraham ya kaaro tan inyabawag ton matunong lapud pananisia to. (Sant. 2:23) Nanengneng ed Roma 4:18 ya mankonektaan so ilalo tan pananisia—inilaloan nen Abraham so sipan nen Jehova ta mabiskeg so pananisia to. Pantongtongan tayo natan so pigaran bersikulo ed Roma kapitulo 5 pian naamtaan tayo no anto ray imbaga nen apostol Pablo tungkol ed ilalo.

3. Antoy in-explain nen Pablo diad Roma kapitulo 5?

³ In-explain nen Pablo no akin ya segurado tayo ya “say ilalo  [tayo] et agmansumpal ed pakadismaya.” (Roma 5:5) In-explain to met so proseso no panon ya ombiskeg so ilalo na sakey ya Kristiano. Legan tayon pantotongtongan itan ya proseso ya nabasad Roma 5:​1-5, isip mo ray subok ya dinadalan mo. Ditan mo na-realize ya mas mabiskeg la natan so tiwalam ed saray sipan nen Jehova, ta mas tudtua lad sika so ilalom! Pantongtongan tayo met no antoy gawaen tayo pian lalo nin ombiskeg so ilalo tayo. Pero amtaen tayo nin unona no anto tay ilalo ya imbaga nen Pablo ya agmansumpal ed pakadismaya.

4. Antoy tutukoyen nen Pablo diad Roma 5:​1, 2?

⁴ Basaen so Roma 5:​1, 2. Insulat iya nen Pablo parad saray agagi diad kongregasyon ed Roma. Nen naamtaan day tungkol ed si Jehova tan Jesus, impatnag da so pananisia tan nandesisyon iran magmaliw ya Kristiano, kanian ‘inyabawag ira na Dios ya matunong lapud pananisia ra’ tan nilanaan to ra na masanton espiritu. Lapud satan, awalaan ira na mabmablin ilalo.

5. Antoy ilalo na saray alanaan ya Kristiano?

⁵ Nen sinulatan nen Pablo iray agagi ed Efeso, imbaga to no anto tay ilalo ya inter na Dios ed saray alanaan ya Kristiano. Indeskribe to itan ya ‘maglorian kayamanan ya tawiren na saray masanto.’ (Efe. 1:18) Nen sinulatan nen Pablo iray agagi ed Colosas, imbaga to no iner da awaten itan ya ilalo—atan ya ilalo et ‘akaparaan parad sikara diad tawen.’ (Col. 1:​4, 5) On, say ilalo na saray alanaan ya Kristiano et napaoli ra diad tawen, manbilay ira ditan na andi-anggaan, tan manuley ira kaiba nen Kristo.—1 Tes. 4:​13-17; Apo. 20:6.

6. Antoy imbaga na sakey ya alanaan ya brother tungkol ed ilalo to?

⁶ Papablien ya maong na saray alanaan ya Kristiano so ilalo da. Oniay impapuson imbaga nen Brother Frederick Franz tungkol ed ilalo to. “Seguradon nagawa so iilaloan tayo. Amin tayo ya kaiba ed 144,000 et awaten tayon awaten itan. Marakdakep iyan premyo.  Anggapon balot so makapipara ed satan.” Kayari na dakel ya dekada ya impanlingkor nen Brother Franz, oniay imbaga to nen 1991: “Agnabawasan so kablian na ilalo tayo. . . . No diman ingen ombabayag so panaalagar tayo, diman tayo met mas lalon napapabli so ilalo tayo. Anggano milyon-milyon nin taon so onlabas, sulit so manalagar. Diad panakar na panaon, mas lalon nagmaliw ya mabmabli ed siak so ilalok.”

7-8. Antoy ilalo na maslak ya lingkor nen Jehova? (Roma 8:​20, 21)

⁷ Duma balet so ilalo na maslak ya lingkor nen Jehova natan. Say ilalo da et pareho ed ilalo nen Abraham—say pambilay ya andi-anggaan diad dalin ya uleyan na Panarian na Dios. (Heb. 11:​8-10, 13) Insulat nen Pablo ya espisyal met so premyo ya awaten na saray parad dalin. (Basaen so Roma 8:​20, 21.) Nen first time mon naamtaan so promise na Biblia tungkol ed Paraiso, antoy aliknam? Seguro malikeliket ka ta naamtaan mon nabilay iray inaatey tan nanengneng mo lamet iray inatey lan kapamilyam tan kakaarom. Seguro iimadyinen mo lay bilay no perpekto ka la tan agmo la kailangan so milaban ed kasalanan. Marakdakep irayan bendisyon ya tatalaranan tayo. Maong labat ta walay onian ilalo ya inter na Dios ed sikatayo!

⁸ On, say arum ya Kristiano et parad tawen tan say arum et parad dalin. Pero anggano mandumaan so ilalo tayo, parehon papablien tan panliliketan tayo itan. Diad tua, lalon ombiskeg so ilalo tayo diad ilalabas na panaon. Atan so in-explain nen Pablo diad ontutumbok iran bersikulo na Roma kapitulo 5. Atan so onsublay ya pantongtongan tayo pian amta tayo no panon tayo nin napabiskeg so tiwala tayo ed saray promise nen Jehova.

9-10. Singa agawad si Pablo, antoy seguradon naeksperiensya na kada Kristiano? (Roma 5:3) (Nengnengen met so litrato.)

⁹ Basaen so Roma 5:3. Kasin naimano yo may imbaga nen Pablo ya no say sakey et ondalan ed kairapan o subok, diman lalon ombiskeg  so ilalo to? Akin et ontan so imbaga to? Pian naebatan tayo itan, tandaan tayo ya ondalan ya ondalan ed kairapan so amin ya Kristiano. Diad tua, anggan si Pablo et asali toy nanduruman klase na irap. Oniay imbaga tod saray agagi ed Tesalonica: “Sanen kaiba mi kayo ni, ibabaga mi lad sikayo a napairap itayo, tan agawa itan.” (1 Tes. 3:4) Tan oniay imbaga to ed saray agagi ed Corinto: “Agmi labay . . . ya anggapoy amta yo ed irap a naeksperiensya mi . . . Agkami segurado no antoy nagawad bilay mi.”—2 Cor. 1:8; 11:​23-27.

¹⁰ On, anggapo tay Kristiano ya exempted ed subok. (2 Tim. 3:12) Sika ey? Anto la ray dinadalan mon subok lapud pananisiam? Ompan asalim lay binalaw tan ininsulto ni ingen na saray kakaarom tan kakanayon mo. Kasin kabusol ka laingen na saray katrabahom o na mismon boss mo ta honest ka? (Heb. 13:18) Kasin diad lugar yo et kontra so gobierno ed kimey ya panagpulong? Antokaman ya kairapan so dadalanen tayo, imbaga nen Pablo ya maliket tayo nin siansia. Akin ey?

11. Akin et importante ya desidido tayon anosan iray subok?

¹¹ Anggano ondadalan tayod kairapan o subok, walay rason tayon manliket ta walay nadi-develop tayon kualidad. Ibabaga na Roma 5:3 ya “say kairapan et mamapawala na panagsungdo” o panag-anos. Lapud amin ya Kristiano et nasubok, amin tayo et kailangan tayoy anos. Importante ya desidido tayon anosan so antokaman ya subok ya onsabi ed bilay tayo. Ta no onsuko tayo la, agtayo nanengneng iramay iilaloan tayo. Agtayo aaligen iramay klase na totoo ya tinukoy nen Jesus nen binitla to so tungkol ed saray bini ya naplag ed mabaton dalin. Diad gapo et maliket dan inawat so salita pero “sanen sinmabi so kairapan odino panamasegsegang,” kinmapuy so pananisia ra. (Mat. 13:​5, 6, 20, 21) Siempre, aliwan mainomay so ondalan ed irap o subok, pero parad pankaabigan tayo lanlamang no anosan tayo itan. Akin et ontan so nibaga tayo?

12. Akin et parad pankaabigan tayo lanlamang no anosan tayo ray subok?

¹² Imbaga nen Santiago no antoy maong ya resulta no anosan tayo ray subok. Kuan to: “Abuloyan yon nasumpal na panagsungdo [o panag-anos] so gagala to, pian magmaliw kayon nagnap tan andiay pakabalawan ed amin a pamaakaran, ya anggapoy pankulangan yo.” (Sant. 1:​2-4) Antoy punto nen Santiago? Idadanet to ya walay gagala na panaanos tayo. No diman ka manaanos, diman met mas napipino so ugalim tan saray kualidad mo. Singa bilang, ombiskeg so pananisiam, magmaliw kan mas mapasensya, tan lalo kan mantiwala ed si Jehova. Pero aliwan satan labat, wala ni arum ya gunggona na panaanos tayo.

13-14. Base ed Roma 5:​4, antoy resulta na panagsungdo, tan antoy koneksion to ’tan ed ilalo?

¹³ Basaen so Roma 5:4. Imbaga nen Pablo ya say panagsungdo et mamapawala o manresulta ed “naabobonan a kipapasen.” No nanengneng nen Jehova ya aanosan mo ray subok, naalam so pabor to tan sikatoy napaliket mo. Labay to kasin ibaga, naliliketan si Jehova lapud nanairapan ka ed subok ya dadalanen mo? Andi. Naliliketan si Jehova ed sika ta manmamatoor ka ed sikato. No antam ya walad sika so pabor na Dios, balibali itan ed liknaan!—Sal. 5:12.

¹⁴ No pawilen tayoy Abraham, say rason no akin ya apaliket toy Aman Jehova et lapud inanosan to ray subok tan nansiansian matoor kanian sikatoy inturing na Dios ya kaaro tan inyabawag ton matunong. (Gen. 15:6;  Roma 4:​13, 22) Sikatayo natan ey? Antoy gawaen tayo pian ontan met so turing nen Jehova ed sikatayo? Tandaan tayo ya say pabor na Dios et ag-akadepende ed pribilehyo tayo odino diad karakel na nagagawaan tayo parad sikato. Naawat tayoy pabor to basta manmatoor tan mananos tayo. Sarasarag tayo itan ya gawaen anggan antoy edad, situasyon, o abilidad tayo. Kasin walay dadalanen mon subok natan pero manmamatoor kad si Jehova? No on, tandaan mo ya napapaliket moy Aman Jehova tan walad sika so pabor to. No kombinsido ka ya inar-aro ka nen Jehova, walay balibalin epekto to—lalon ombiskeg so ilalom!

15. Anto ni imbaga nen Pablo diad Roma 5:​4, 5 tan akin et makapalito itan ed arum?

¹⁵ Kayarin imbaga nen Pablo ya naala tayoy pabor nen Jehova no mananos tayo, oniay intuloy to: “Say naabobonan a kipapasen et mamapawala na ilalo, tan say ilalo et agmansumpal ed pakadismaya.” (Roma 5:​4, 5) Singa makapalito ed arum iyan imbaga nen Pablo. Akin ey? On ta diad Roma 5:​2, imbaga la nen Pablo ed saray Kristiano ed Roma ya wala lay ilalo da—say “ilalon pangawat ed gloria na Dios.” Kanian ompan nitepet tayo, ‘No wala lay ilalo da, akin et imbaga to ya say pabor na Dios et mamapawala na ilalo?’

16. Panon ya ontubo tan ombaleg so ilalo ed puso na too? (Nengnengen met so litrato.)

¹⁶ Natalosan tayoy labay ya ibaga nen Pablo no tandaan tayo ya say ilalo et sarag toy ontubo tan ombaleg ed puso na sakey ya too. Antoy naisip mo nen first time mon naamtaan so sipan na Dios ya bilay ya andi-anggaan? Ompan naisip mo ya singa imposible itan. Balet nen dinmakel lay antam tungkol ed si Jehova tan ed saray sipan to, diman ka akombinse ya talagan nagawan-nagawa iratan.

17. Kayari na dedikasyon mo tan bautismom, panon ya tuloytuloy ya ombaleg so ilalom?

¹⁷ Kayari na dedikasyon mo tan bautismom, tuloytuloy nin ombaleg tan ombiskeg so ilalom legan kan ontatatken ed espiritual tan ondadakel  so antam ed Biblia. (Heb. 5:13–6:1) Seguradon apatunayan mo la ya tua imay ibabaga na Roma 5:​2-4. Seguradon dakel lan subok so dinalan mo. Pero inanosan mon amin iratan kanian aliknam ya walad sikay pabor nen Jehova. Lapud kombinsido ka ya inaro ka na Dios tan naliliketan ed sika, mas binmiskeg so tiwalam ya talagan awaten mo so premyom—say bilay ya andi-anggaan. On, mas mabiskeg la natan so ilalom kompara nen Bible study ka ni labat. Mas malinew tan mabilabilay itan ed isip mo. Talagan balbaleg so epekto tod bilay mo—apakilos ka ya lalon aroen so pamilyam, usaren so panaon mo diad dugan paraan, tan sankanonot mon lanang so ilalom antis kan mandesisyon.

18. Anton garantiya so inter nen Jehova?

¹⁸ Anto ni imbaga nen Pablo tungkol ed ilalo tayo? Indanet to ya say ilalo tayo et seguradon nagawa. Oniay impaisulat nen Jehova ed si Pablo ya garantiya: “Say ilalo et agmansumpal ed pakadismaya; lapud say aro na Dios et nikalbo ed kapusoan tayo diad panamegley na masanton espiritu, a niiter ed sikatayo.” (Roma 5:5) On, makaseguro ka ya agkan balot dismayaen nen Jehova. Tooren ton tooren so iilaloan mo!

19. Singa si Abraham, antoy naseguradom?

¹⁹ Lanang mo komon ya nonoten so alimbawa nen Abraham. Nala toy pabor na Dios tan inturing ton kaaro. Maan-anos ton inalagar so pakagawa na sipan nen Jehova. Sulit so impanalagar to, ta say kuan na Biblia: “Kayari impan-anos nen Abraham, agamoran to yan sipan.” (Heb. 6:15; 11:​9, 18; Roma 4:​20-22) On, ag-adismaya si Abraham. Seguradon agka met nadismaya tan awaten mo met so premyom, basta mansiansia kan matoor. Aliwan drowing so ilalom, tua itan! Kanian natan ni labat et wala lay rason mon manliket legan kan manaalagar. (Roma 12:12) Insulat nen Pablo: “Say Dios a mangiiter na ilalo et panoen to kayo komon na liket tan deen lapud panmamatalek yod sikato, pian mas lalon ombiskeg so ilalo yo diad panamegley na pakayari na masanton espiritu.”—Roma 15:13.