1. Akin et dakel ya totoo so agmanisia ed bilay ya andi-anggaan?

 WALA ray totoo natan ya pipilien dan maong iray kakanen da tan lanang iran mani-exercise pian maksil so laman da. Pero amta ra ya anggan antoy gawaen da, ontatken tan ompatey lanlamang ira. Diad tua, dakel so agmanisia ya wala tay bilay ya andi-anggaan. Agda kuno labay so ontan ya bilay ta manirap lanlamang ira lapud tatken da. Balet imbaga nen Jesus ya posible tan makapalikliket so “bilay ya andi-anggaan” ya nabasad Juan 3:16 tan 5:24.

2. Antoy ibabaga na Juan kapitulo 6 nipaakar ed bilay ya andi-anggaan? (Juan 6:39, 40)

² Wala may inkagawa ya pinarakel nen Jesus so pigpigaran tinapay tan sira pian napakan so libo-libon totoo. a Makapakelaw iman! Pero diad sinmublay ya agew, walay mas makapakelaw ya imbaga to ed saramay totoon tinmumbok ed sikato diad Capernaum, diad asingger ed gilig na Dayat na Galilea. Imbaga to ya paolien to ray inaatey, tan imbaga to met ya posiblin manbilay na andi-anggaan iray totoo! (Basaen so Juan 6:39, 40.) Isip mo pa ray kakaarom tan kapamilyam ya inatey.  Imbaga nen Jesus ya posiblin nabilay ira tan nakaibam iran manbilay na andi-anggaan. Diad tua, wala ni ray imbaga nen Jesus ya nabasad tinmutumbok iran bersikulo na Juan kapitulo 6. Pero ag-itan atalosan na dakel ya totoo nensaman tan agmet itan natatalosan na dakel ya totoo natan. Anto iratan ya imbaga nen Jesus?

3. Antoy imbaga nen Jesus nipaakar ed sarili to ya nabasad Juan 6:51?

³ Kayarin pinarakel nen Jesus may pigpigaran tinapay, anonotan na saray Judio imay mana ya inter nen Jehova ed saray inmuunan atateng da. Amta na sarayan katongtong nen Jesus ya diad Kasulatan et tinawag so mana ya “tinapay a nanlapud tawen.” (Sal. 105:40; Juan 6:31) Kanian inusar nen Jesus so mana pian ibangat ed sikara so importantin katuaan. Imbaga tod sikara ya sikato so “tuan tinapay manlapud tawen,” “tinapay na Dios,” tan “tinapay na bilay.” (Juan 6:32, 33, 35) Insan impaliwawa to ya baleg so pidumaan to ed samay mana. Tua ya regalo nen Jehova imay mana, pero saramay angan ed satan et inatey lanlamang. (Juan 6:49) Onia balet so imbaga nen Jesus nipaakar ed sarili to: “Siak so mabilay a tinapay a linmeksab manlapud tawen. Siopaman a mangan ed sayan tinapay et manbilay ya andi-anggaan.” (Basaen so Juan 6:51.) Agmakapanisia iray Judio ed satan ya imbaga to. Agda natalosan no akin ya tinawag nen Jesus so sarili to ya “tinapay” manlapud tawen ya mas maong ni nen samay mana ya inter nen Jehova ed saray inmuunan atateng da. Onia ni imbaga tod sikara: “Say tinapay ya iter ko et say laman ko.” Anto kasi labay ton ibaga? Importantin natalosan tayo itan ta walay koneksion to ’tan ed pakaawat tayoy bilay ya andi-anggaan. Pantongtongan tayo sirin.

MABILAY YA TINAPAY TAN SAY LAMAN TO

4. Akin et agmakapanisia iray Judio ed samay imbaga nen Jesus?

⁴ Abigbigla iramay Judion katongtong nen Jesus nen imbaga ton ‘iter toy laman to pian manbilay so katooan.’ Ompan inisip da ya labay nen Jesus ya kanen day mismon laman to. (Juan 6:52) Pero mas lalo ran abigla ed sinmublay ya imbaga nen Jesus. Kuan to: “No agyo kanen so laman na Anak na too tan inumen so dala to, agkayo nawalaan na bilay.”​—Juan 6:53.

5. Akin et segurado tayo ya aliwan literal may imbaga nen Jesus ya inumen day dala to?

⁵ Diad panaon nen Noe, ingganggan nen Jehova iray totoo ya ag-ira nepeg ya mangay dala. (Gen. 9:3, 4) Ontan met so ingganggan to ed saray Israelita. Nabasad Mosaikon Ganggan ya “siopaman a mangan na dala et nepeg ya pateyen.” (Lev. 7:27, paimanod leksab) Nen wadiad dalin si Jesus, agto kinontra so Mosaikon Ganggan. (Mat. 5:17-19) Kanian imposible ya iganggan nen Jesus iray totoo ya literal dan kanen so laman to tan inumen so dala to. Anto sirin so rason akin et onmay imbaga nen Jesus? Labay ton ibangat ed sikara no antoy kaukolan dan gawaen pian naawat day “bilay ya andi-anggaan.”​—Juan 6:54.

6. Panon tayon amta ya simboliko labat may imbaga nen Jesus nipaakar ed laman tan dala to?

⁶ Malinew ya simboliko labat may imbaga nen Jesus nipaakar ed laman tan dala to. Ontan so ginawa to nen katongtong to may biin Samaritana. Kuan to: “Siopaman ya oninum ed danum ya iter kod sikato et aglan balot napaet, ta say danum ya iter kod sikato et magmaliw a singa subol na danum ed loob to a mansusbol pian mangiter na bilay ya  andi-anggaan.” (Juan 4:7, 14) b Aglabay ya ibaga nen Jesus ya walay espisipikon klase na literal ya danum ya inumen na samay biin Samaritana pian nawalaay bilay ya andi-anggaan. Kanian agto met labay ya ibaga sirin ya kanen na saray Judio so literal ya laman to tan inumen day literal ya dala to pian manbilay ira na andi-anggaan.

SARAY PANDUMAAN NA DUARAN INKAGAWA

7. Antoy ibabaga na arum nipaakar ed samay imbaga nen Jesus ya nabasad Juan 6:53?

⁷ Wala ray relihyoson totoo ya mangibabagan amay imbaga nen Jesus ya nabasad Juan 6:53 ya nepeg ya kanen so laman to tan inumen so dala to et onman met so nepeg ya gawaen no Pangdem na Katawan. Ontan so papanisiaan da ta halos pareho kunoy imbaga nen Jesus ed sayan duaran inkagawa. (Mat. 26:26-28) Kanian ibabaga ra ya amin ya onatendi ed Pangdem na Katawan et dapat ya mangan na tinapay tan oninum na alak. Duga kasi itan? Importante ya amta tayoy ebat ed satan ta minilyon ya totoo ed interon mundo so onaatendi kada Memoryal. Pantongtongan tayo sirin so pigaran pandumaan na samay imbaga nen Jesus ya nabasad Juan 6:53 tan samay imbaga to nen inggapo toy Pangdem na Katawan.

8. Anto ray pandumaan na samay imbaga nen Jesus nen 32 C.E. ya nabasad Juan kapitulo 6 tan samay imbaga to diad Pangdem na Katawan? (Nengnengen met so litrato.)

 ⁸ Walay duaran pandumaan na sayan duaran inkagawa. Unona, imanoen no kapigan tan no iner imbaga nen Jesus imay nabasad Juan 6:53-56. Imbaga nen Jesus irayan salita nen 32 C.E. diad Galilea, manga sakey taon antis ton inggapo so panselebra na Pangdem na Katawan. Komadua, imanoen no siopa ray katongtong to. Maslak ed saramay katongtong nen Jesus ed Galilea et mas importantid sikara so materyal nen say espiritual ya pankaukolan da. (Juan 6:26) Diad tua, nen wala may imbaga nen Jesus ya agda atalosan, kinmapuy ya tampol so pananisia ra. Wala ni ingen iray disipulo to ya tinmunda lan tinmumbok ed sikato. (Juan 6:14, 36, 42, 60, 64, 66) Duma balet iramay 11 ya matoor ya apostol ya kaiba nen Jesus nen inggapo toy Pangdem na Katawan nen 33 C.E. Anggano wala ray agda atalosan ed imbangat to, agda tinaynan. Talagan kombinsido ira ya sikato so Anak na Dios ya nanlapud tawen. (Mat. 16:16) Kanian oniay imbaga nen Jesus ed sikara: “Sikayo ray nansiansiad siak diad saray subsubok ed siak.” (Luc. 22:28) Lapud sarayan detalye, atalosan tayo ya amay imbaga nen Jesus ya nabasad Juan 6:53 et ag-onaplika ed panselebra na Pangdem na Katawan. Pantongtongan tayo ni arum ya prueba ya talagan mandumaan iyan duaran inkagawa.

ANTOY GAWAEN MO PIAN NATUMBOK MO MAY IMBAGA NEN JESUS?

9. Siopan grupo na totoo so tutukoyen nen Jesus diad samay imbaga to ed Pangdem na Katawan?

⁹ Legan na Pangdem na Katawan, inikdan nen Jesus na andi-lebaduran tinapay iray apostol to tan imbaga tod sikara ya irerepresenta na satan so laman to. Insan to insublay ya inter so alak ya mangirerepresenta ed “[dala to] nipaakar ed sipanan.” (Mar. 14:22-25; Luc. 22:20; 1 Cor. 11:24) Importante itan ya imbaga to. Tinawag to itan ya “balon sipanan.” Say kaiba labat ed satan ya sipanan et saramay kaiba ton manuley “diad Panarian na Dios.” (Heb. 8:6, 10; 9:15) Diad saman et agni atalosan na saray apostol no antoy labay ya ibaga nen Jesus. Say labay ton ibaga et onsabi so panaon ya nalanaan ira na masanton espiritu tan nakaiba day Jesus diad tawen.​—Juan 14:2, 3.

10. Anto ni sakey ya prueba ya talagan mandumaan imay imbaga nen Jesus diad Pangdem na Katawan tan amay imbaga to nen walad Galilea? (Nengnengen met so litrato.)

¹⁰ Tandaan ya amay imbaga nen Jesus legan na Pangdem na Katawan et para labat ed grupo na totoo ya tinawag ton “melag a pulok.” Say unonan kabiangan na sayan grupo et saramay matoor ya apostol ya kaiban mismo nen Jesus nen inggapo to itan ya okasyon. (Luc. 12:32) Sikara so angan na tinapay tan inminum na alak diad saman ya labi. Kanian saray arum nin kabiangan na sayan grupo so nepeg ya mangan na tinapay tan oninum na alak kada no Memoryal. Sikara labat so naikdan na pasen ed tawen ya kaiba nen Jesus. On, talagan midumaan iya sirin diad samay inkagawa ed Galilea ta dakel so katongtong nen Jesus ed saman.

11. Antoy prueba ya amay imbaga nen Jesus diad Galilea et ag-ontutukoy ed melag ya grupo na totoo?

¹¹ Maslak ed saramay katongtong nen Jesus diad Galilea nen 32 C.E. et saray Judio ya say habol da labat et naakan. Tinulongan ira nen Jesus pian natalosan da ya wala ni mas importante nen say literal ya naakan ya makapangiter ed sikara na bilay ya andi-anggaan. Imbaga to met ya wala ray inaatey ya napaoli diad kaunoran ya agew tan manbilay met ira na  andi-anggaan. Sarayan bendisyon et aliwa labat ya parad melag ya grupo na totoo. Kanian duma iya ed samay imbaga to nen Pangdem na Katawan. Amay bendisyon ya imbaga to nen walad Galilea et parad amin ya totoo. Diad tua, oniay imbaga to: “Siopaman a mangan ed sayan tinapay et manbilay ya andi-anggaan . . . Say tinapay ya iter ko et say laman ko pian manbilay so katooan.”​—Juan 6:51. c

12. Antoy kaukolan tayon gawaen pian nawalaan tayoy bilay ya andi-anggaan?

¹² Pero labay kasin ibaga nen Jesus ya automatic lan manbilay na andi-anggaan so amin ya totoo? Andi. Say imbaga ton manbilay ya andi-anggaan et saramay “mangan ed sayan tinapay” odino saramay mangipanengneng na pananisia ed sikato. Dakel ya totoo natan so mangibabaga ya Kristiano ira tan iisipen da ya basta ‘manisia ira ed si Jesus’ et nilaban la ra. (Juan 6:29, Say Biblia) Pero duga kasi itan ya iisipen da? Andi. Ta diad tua, dakel pa met ed saray Judio so anisia ed si Jesus pero tinaynan da lanlamang. Antoy rason akin et tinaynan day Jesus?

13. Antoy labay ya ibaga na pagmaliw ya tuan patumbok nen Jesus?

¹³ Tumbotumbok iramay Judio ed si Jesus ta walay napipinabangan dad sikato. Papaabigen to ray sakit da, iikdan to ray libren naakan, tan madengedengel irad bangat to basta ag-itan kontra ed labay dan narengel. Pero impalinew nen Jesus ed sikara ya say rason no akin ya linma diad dalin et aliwan pian iter so amin ya kerew da. Linma diad dalin pian ibangat ed sikara no antoy nepeg dan gawaen  pian magmaliw iran tuan patumbok to. Kaukolan day “ondago” ed sikato. Labay ton ibaga, kaukolan dan dengelen tan unoren so amin ya ibabangat to ed sikara.​—Juan 5:40; 6:44.

14. Antoy gawaen tayo pian minabang tayo ed laman tan dala nen Jesus?

¹⁴ Say sakey ed saray manunan imbangat nen Jesus ed saramay Judio et say pangiter toy laman tan dala to pian nawalaan na bilay ya andi-anggaan iray totoo. Importante ya nanengneng ed kabibilay da ya manisia ira ed satan ya katuaan. Tan kaukolan tayo met ya ipanengneng so ontan ya pananisia natan. (Juan 6:40) On, no ipanengneng tayoy pananisia ed dondon, minabang tayo ed laman tan dala nen Jesus, tan nawalaan tayoy bilay ya andi-anggaan ya singa ibabaga na Juan 6:53. Awaten itan na amin ya mangipanengneng na pananisia.​—Efe. 1:7.

15-16. Anto ray naaralan tayo ed Juan kapitulo 6?

¹⁵ Apaseseg tayon amin ed saray naaralan tayo ed Juan kapitulo 6. Anengneng tayo ya talagan imamalasakit nen Jesus iray totoo. Pinaabig to ray mansasakit, imbangat tod sikaray Panarian, tan sineguro ton walay naakan da. (Luc. 9:11; Juan 6:2, 11, 12) Pero say talagan indanedanet tod sikara et sikato so “tinapay na bilay.”​—Juan 6:35, 48.

¹⁶ Diad tinaon ya Pangdem na Katawan, saray kabiangan na ‘arum a karnero’ et agmamangan na tinapay tan agmet ira oniinum na alak. (Juan 10:16) Pero nibagan mamangan ira na “tinapay na bilay” lapud ipapanengneng day pananisia ed dondon bagat nen Jesus. (Juan 6:53) Saramay literal balet ya mamangan na tinapay tan oniinum na alak kada no Memoryal et ipapanengneng da ya kabiangan ira na balon sipanan tan apili iran manuley diad Panarian ed tawen. Kanian balanglan alanaan tayo o andi, dakdakel so naaralan tayo ed Juan kapitulo 6. On, ipanengneng tayo sirin so pananisia pian nawalaan tayoy bilay ya andi-anggaan!