1-2. Anto ray situasyon ya agtayo naiwasan so onakis?

 ANGGAPO tay too ya agto ni asali inmakis. No maminsan, onakis tayo lapud liket, lalo la no walay importante o espisyal ya agawa. Singa bilang, makaakis iray atateng no first time dan nanengneng so kapangiyanak ya baby da. Makaakis tayo met no walay anonotan tayon balibalin agawa ed bilay tayo. Insan no akapannengneng kayo may malet ya kaarom ya abaybayag mon aga anengneng, ompan agmo napigilay onakis.

² Pero di ba, say maslak ya rason no akin ya onaakis tayo et lapud walay ambelat ya dadalanen tayo? Singa bilang, makaakis tayo no asakisakitan tayo ed imbaga o ginawa na arum. Agti met naiwasay onakis no walay graben sakit tayo odino inateyan tayoy kapamilya o kaaro. Diad ontan iran situasyon, ompan agmanunday akis tayo, ya singa si propetan Jeremias nen asakop na Babilonia so Jerusalem. Kuan to: ‘Manag-agus iray luak, manak-akis ak, ag-ontunda tan agmanpainawa iray matak.’​—Tag. 3:48, 49.

3. Antoy nalilikna nen Jehova no nanenengneng ton maniirap iray lingkor to? (Isaias 63:9)

³ Amta nen Jehova no panon la karakel so inyakis mo lapud dinadalan mon problema. Ibabaga na Biblia ya nanenengneng nen Jehova so paniirap na saray lingkor to tan dedengelen toy ikekerew day tulong. (Sal. 34:15) Pero aglabat onnenengneng tan ondedengel. Maar-aron Ama si Jehova. Di ba say maaron ateng, no nanengneng ton maniirap tan onaakis so anak to, nasasakitan met? Agto nitepel ya maniirap so anak to kanian pakalmaen tan kuyongen to. Ontan ya ontan si Jehova. No nanenengneng to tayon onaakis, nasasakitan met tan labalabay to tayon tulongan.​—Basaen so Isaias 63:9.

4. Siopa ran karakter ed Biblia so pantongtongan tayo ed sayan artikulo, tan antoy aralen tayo tungkol ed si Jehova?

 ⁴ Wala ray nabasa tayo ed Biblia ya lingkor nen Jehova ya manakis met nen dinmalan irad problema. Pero nabasa met ditan no antoy alikna nen Jehova nen anengneng to ran onaakis tan no panon to ran tinulongan. Pantongtongan tayo ed sayan artikulo so alimbawa nen Hana, David, tan Arin Hezekias. Akin et manakis ira? Antoy ginawa nen Jehova nen kinmerew iray tulong ed sikato? Tan antoy naaralan tayo ed sarayan salaysay no bilang ta onaakis tayo met lapud ermen, no walay nantraidor ed sikatayo, odino no walay graben sakit tayo?

NO ONAAKIS KA LAPUD GRABEN ERMEN

5. Antoy problema nen Hana, tan antoy epekto to ’tan ed sikato?

⁵ Ambelbelat so dadalanen nen Hana kanian agaylay ermen to tan agto naiwasan so onakis. Say asawa nen Hana et wala ni sananey ya asawa to, si Penina. Kakkabusol nen Penina si Hana. Pero aliwan satan labat. Agmakaanak si Hana, si Penina balet, pigapigaray anak to. (1 Sam. 1:1, 2) Gagagalaen nen Penina ya sutilen tan pasyodoten si Hana ta anggapoy anak to. No sikay walad situasyon nen Hana, anto kasi naliknam? Ibabaga na Biblia ya “agaylay ermen” nen Hana kanian “sikatoy onakis tan agmangan.”​—1 Sam. 1:6, 7, 10.

6. Antoy ginawa nen Hana pian onlemew so liknaan to?

⁶ Antoy ginawa nen Hana pian onlemew so liknaan to? Say sakey ya akatulong ed sikato et say inyakar tod tabernakulo pian mandayew ed si Jehova. Ditan et “sikatoy nampikasi ed si Jehova tan agtinmundan nannangis.” Oniay impikasi to: ‘O Jehova, imanom pay paniirap na lingkor mo tan nonot mo ak.’ (1 Sam. 1:10b, 11) Imbaga nen Hana ed si Jehova so amin ya walad puso to. Seguradon nasasakitan met si Jehova legan ton nanenengneng ya onaakis ya ampaipait iyan inar-aro ton lingkor!

7. Antoy epekto ed si Hana nen nibaga to lad si Jehova so amin ya nalilikna to?

⁷ Antoy epekto ed si Hana nen nibaga to lad si Jehova so amin ya nalilikna to tan pinaseseg na Atagey ya Saserdoten si Eli? Ibabaga na Biblia ya “sikatoy angan la, tan agla maermen.” (1 Sam. 1:17, 18) On, akainawan maong si Hana anggano agni asolusyonan so problema to. Impalima to lan amin ed Dios tan baleg so tiwala to ya tulongan nen Jehova. Ag-alingolingo si Hana! Sikatoy inimano nen Jehova, dinengel To so pikakasi to, tan inebatan To so kerew to ya nawalaan na anak.​—1 Sam. 1:19, 20; 2:21.

8-9. Akin et gawaen tayoy anggaay nayarian tayon miaral? (Hebreo 10:24, 25) (Nengnengen met so litrato.)

⁸ Antoy naaralan tayo? Kasin walay ambelbelat ya dadalanen mo natan ya lapud satan et maer-ermen ka tan akis ka lan akis? Ompan inateyan kay kapamilya o kaaro. No ontay  situasyon mo, ompan labay moy manbukbukor. Normal met labat so ontan ya liknaan. Pero isip mo pay alimbawa nen Hana. Di ba, aligliwa tan linmemew so liknaan to nen linmad tabernakulo? Ontan met so naliknam no miaral ka. Ompan wala ray panaon ya ngalngali agmo labay so miaral ta ambelbelat so liknaan mo. Pero tandaan mo ya no miaral ka, ligliwaen tan pabiskegen ka nen Jehova. (Basaen so Hebreo 10:24, 25.) Pantotongtongan tayo ed saray aral iray makapaseseg ya teksto ed Biblia, kanian nasalatan iray negatibon iisipen tan nalilikna tayo. Baleg so nitulong to ’tan pian onlemew so liknaan tayo anggano wadtan ni may problema.

⁹ No miaral tayo, tsansa met itan pian nakumusta tan napaseseg itayo na saray agagi, kanian sankalikna tayoy malasakit tan panangaro da. (1 Tes. 5:11, 14) Oniay imbaga na sakey ya espisyal payunir ya brother ya inatey so asawa to: “Anggad natan, makaakis ak ni no nanonotan koy asawak. No maminsan, wala ak labat ed sukong insan ak onakis ya bukor. Pero agko papaulyanay pipiaral ko ta ditan ak napapaseseg. Onlelemew so liknaan ko no kaistoryaan ko ray agagi tan no narerengel ko ray komento da. Kanian anggano ambelbelat so liknaan ko antis ak ya miaral, naiinawaan ak no wadman ak la.” On, no miaral tayo, usaren nen Jehova iray agagi pian pabiskegen so liknaan tayo.

10. Panon tayon naalig si Hana no walay ambelbelat ya dadalanen tayo?

¹⁰ Linmemew met so liknaan nen Hana nen imbalikas tod si Jehova so amin ya nalilikna to. Alig moy ginawa to. ‘Ipaawit mod si Jehova so amin ya kapagaan mo’ tan mantiwala ka ya dengelen to ray pikakasim. (1 Ped. 5:7) Oniay imbaga na sakey ya sister ya say asawa to et pinatey na saray matakew: “Nen inatey si asawak, singa amisimisi tan asugatsugat so pusok, tan pakaliknak et aglan balot itan onabig. Pero maong labat ta wadtay Aman Jehova, sankaliknak so panangaro to. Kada no manpipikasi ak, onlelemew so liknaan ko. No maminsan, agko la amtay ibagak ed sikato, pero amtak ya natatalosan toy naliliknak. No maer-ermen ak ya maong tan nambabangil lay iisipen ko, ipipikasik ed sikato ya ikdan to ak komoy deen na nonot. Kayarik ya manpikasi, onkakalma ak la tan walay biskeg ko lamet ya arapen so sanagew.” On, no iyakis mod si Jehova tan ibalikas mod sikato so amin ya naliliknam, makapantiwala ka ya mililikna met ed sika tan natatalosan toy dadalanen mo. Anggano agni asolusyonay problemam, manggawan-manggaway paraan si Jehova pian onkalma ka tan ondeen so nonot mo. (Sal. 94:19; Fil. 4:6, 7) Tan seguradon bendisyonan to so panaanos tan panmamatoor mo.​—Heb. 11:6.

NO ONAAKIS KA LAPUD WALAY NANTRAIDOR ED SIKA

11. Antoy alikna nen David nen aliwliway ginawa na arum ed sikato?

¹¹ Dakdakel met so agawad bilay nen David ya inakisan to. Dakel so mamubusol ed sikato, tan trinaidor ni ingen na mismon kapamilya tan kakaaro to. (1 Sam. 19:10, 11; 2 Sam. 15:10-14, 30) Aminsan lapud kabelat na dadalanen to, oniay imbaga to: “Naknaksawan ak lad pannanangis ko; sanlabin atalem so dukolan ko ed saray luak; nadedelap itan ed panaakis ko.” Ontan kunoy alikna to ta dakel so kalaban to ya “mangogonigon” ed sikato. (Sal. 6:6, 7) Asakisakitan si David ed ginawa na arum kanian akis lan akis.

12. Antoy insulat nen David nipaakar ed si Jehova? (Salmo 56:8)

¹² Anggano dakel so mamubusol ed si David, kombinsido ya sikatoy inar-aro nen Jehova. Kuan to: “Dengelen nen Jehova so panaakis ko.” (Sal. 6:8) Aminsan, walay marakdakep ya  insulat to nipaakar ed si Jehova ya nabasa ed Salmo 56:8. (Basaen.) Nanengneng tayo ed satan ya teksto ya importantin maong ed si Jehova iray nalilikna tayo. Imbaga nen David ya singa titiponen nen Jehova iray lua to ed katat ya pananginan tan singa To iratan isusulat ed sakey ya libro. On, segsegurado si David ya mabmabli ed si Jehova iray lua to tan agbalot lingwanan na Ama tod tawen so amin ya impanirap to. Kombinsido si David ya aliwan amay problema to labat so amta nen Jehova, amta met nen Jehova no antoy epekto to ’tan ed sikato.

13. Anggano asakisakitan ka ed ginawa na arum, antoy nepeg mon tandaan? (Nengnengen met so litrato.)

¹³ Antoy naaralan tayo? Kasin asakisakitan ka ed imbaga o ginawa na arum, odino trinaidor ka na toon pantitiwalaan mo? Ompan basta ka labat insian na inarom anta wala lay plano yon mankasal, o tinaynan ka na asawam. Odino ompan walay kapamilyam o kaarom ya tinmunda lan manlingkor ed si Jehova. Talagan ansakisakit itan. Oniay imbaga na sakey ya brother ya akilad arum ya laki so asawa to: “Agak makapanisia ya nagawaan to man ed siak. Ansakisakit may ginawa to. Pakaliknak et anggapoy kanak.” No walay nantraidor ed sika o adismaya ka ed ginawa na arum, tandaan mo ya walay sakey ya agto kan balot taynanan​—si Jehova. Onia ni imbaga to may brother: “Atalosan ko ya anggano nitepel kan traidoren na arum ya too, agkan balot traidoren nen Jehova. Naynay ya wadtan parad sika anggan antoy nagawa. Agton balot taynanan iray matoor ed sikato.” (Sal. 37:28) Tandaan mo met ya say panangaro nen Jehova et mas ni nen say panangaro na anggan siopan too. No atraidor ka, ompan isipen mo ya agka la karapat-dapat ya aroen. Pero andi, agbalot manguman so panangaro nen Jehova ed sika. (Roma 8:38, 39) Kanian anggano aliwliway ginawa na arum ed sika, agmo lilingwanan ya inar-aro ka nen Aman Jehova.

14. Antoy ipapaseguro ed sikatayo na Salmo 34:18?

¹⁴ No walay nantraidor ed sika, makatulong no dalepdepen mo imay imbaga nen David ya nabasad Salmo 34:18. (Basaen.) Base ed sakey ya reperensya, amay abitla ditan ya “nagogonigon so espiritu ra” et nayarin ontutukoy ed “saramay totoon nanaekalan lay ilalo.” Panon to tayon tulongan nen Jehova no ontan lay nalilikna tayo? Ibabaga na Biblia ya “si Jehova et asingger ed samay asugatay puso to,” singa sakey ya maaron ateng ya ebaen tan kuyongen toy anak ton onaakis. Kanian no nanengneng nen Jehova ya asugatay puso tayo tan asakisakitay liknaan tayo, tulongan to tayon tampol. Agto labay ya naekalan tayoy  ilalo. Kanian impaisulat tod Biblia iray balibalin gawaen to diad arapen pian walay talaranan tayo tan naanosan tayo ray dadalanen tayon subok.​—Isa. 65:17.

NO ONAAKIS KA LAPUD WALAY GRABEN SAKIT MO

15. Akin et “nanakis a maong” si Hezekias?

¹⁵ Nen 39 so taon nen Hezekias ya ari na Juda, nansakit na grabe. Imbaki nen Jehova si propetan Isaias pian ibaga ed si Hezekias ya asingger lan ompatey lapud sakit to. (2 Ara. 20:1) Maer-ermen si Hezekias tan “nanakis a maong” ta singa to labat aalagaren so ipatey to. Nen nadngel to may imbaga nen Isaias, nampikasin tampol ed si Jehova.​—2 Ara. 20:2, 3.

16. Antoy reaksion nen Jehova ed pikakasi nen Hezekias?

¹⁶ Nen arengel nen Jehova so pikakasi nen Hezekias tan anengneng To ray lua to, atenyeg so puso To. Kuan to: “Nadngel koy pikakasim. Anengneng ko ray luam . . . Paabigen ta ka.” Insipan nen Jehova ya suldongan to na 15 taon so bilay nen Hezekias tan iliktar toy Jerusalem ed lima na saray Asiryano.​—2 Ara. 20:4-6.

17. Panon to tayon tutulongan nen Jehova no walay graben sakit tayo? (Salmo 41:3) (Nengnengen met so litrato.)

¹⁷ Antoy naaralan tayo? Antoy gawaen mo no walay graben sakit mo tan singa agka la onabig? Ibagam ed si Jehova so amin ya naliliknam, anggano iyakis mo ni ingen. Ipapaseguro ed sikatayo na Biblia ya “say Ama na maaron panangasi tan say Dios na amin a ligliwa” et ligliwaen to tayo ed amin ya subok a dadalanen tayo. (2 Cor. 1:3, 4) Siempre diad panaon tayo, agti ilaloan ya paabigen nen Jehova so sakit tayo o ekalen toy amin ya problema tayo. Pero makapantiwala tayo ya asikasoen to tayo. (Basaen so Salmo 41:3.) Iter tod sikatayo so masanton espiritu to pian onkalma so puso tayo, ombiskeg so liknaan tayo, tan nawalaan tayoy karunongan pian makapandesisyon tayoy duga. (Pro. 18:14; Fil 4:13) Naliligliwa tayo met ed sipan to ya onsabi panaon et anggapo lan balot so mansakit.​—Isa. 33:24.

18. Anton teksto so makakatulong ed sika no ondadalan kad mairap ya situasyon? (Nengnengen so kahon ya “ Saray Teksto ya Manligliwa ed Sikatayo no Onaakis Tayo.”)

¹⁸ Aligliwa si Hezekias ed samay imbaga nen Jehova ed sikato. Diad panaon tayo, uusaren nen Jehova so Biblia pian ligliwaen to tayo. Impaisulat to ditan iray salita ya mamabiskeg na liknaan tayo no ondadalan tayod subok. (Roma 15:4) Walay sister ed West Africa ya akis lan akis nen naamtaan ton walay cancer to. Pero oniay imbaga to: “Say sakey ya teksto ya talagan makakatulong ed siak et amay Isaias 26:3. Wala ray situasyon ed bilay tayo ya agtayo kontrolado. Pero ipapaseguro na sayan teksto ya ikdan to tayo nen Jehova na kareenan  pian mansiansia tayo labat ya kalmado anggano wala ray subok ya dadalanen tayo.” Sika ey, no ondadalan kad problema ya singa anggapo lay solusyon to, anton makaligliwan teksto so naisip mon tampol?

19. Antoy tatalaranan tayon nagawa ed arapen?

¹⁹ Legan ya manasingger so anggaan na sayan sistema na mundo, ilaloan tayo ya ondakel ni so sengegan na iyakis tayo. Pero naaralan tayo ed alimbawa nen Hana, David, tan Arin Hezekias ya nanenengneng nen Jehova iray akis tayo tan nasasakitan met no maniirap tayo. Talagan mabmabli ed sikato iray lua tayo! Kanian no walay problemam, ibagam labat ed si Jehova so amin ya naliliknam. Mansiansia kan maapit ed saray agagi tan agmo ibibiig so sarilim. Tan ituloy mo labat so pambabasam na Biblia pian naligliwa ka nen Jehova. Tandaan mo ya balesen nen Jehova so panaanos tan panmamatoor mo. Insipan to ya onsabi panaon et ‘punasen to la so amin a lua ed kamataan tayo.’ (Apo. 21:4) On, onsabi panaon ya agtayo la onakis lapud ermen. Onakis tayo lapu labat ed liket!