Kasin binasam tan tinalosan mo iray artikulo ed Say Panag-bantayan ed sayan taon? Nengneng mo pa sirin no naebatan mo irayan tepet:

Panon ya tratratoen nen Jehova iray bibii?

Patas so panagtrato to ed sikara, anggapoy nabasad Biblia ya mas paborito to ray lalaki. Dedengelen na Dios iray bibii, ta importante ed sikato so liknaan da tan imamalasakit to ra. Baleg met so tiwala to ya sarag day mikimeyan ed sikato.​—w24.01, p. 15-16.

Panon tayon niyaplika imay ibabaga na Efeso 5:7 ya, “Agkayo mibibiang ed sikara”?

Bibilinen to tayo nen apostol Pablo ya agtayo mimiulop ed saray totoo ya pakapuyen day determinasyon tayon unoren si Jehova. Ontutukoy itan ed saray totoon personal tayon nakakaiba tan anggan saray ‘friends’ tayo ed social media.​—w24.03, p. 22-23.

Anto ran palson istorya so nepeg tayon panalwaran?

Manalwar tayo ed saray istorya ya impasa ed sikatayo na kaaro tayo pero agto sinegurado no kasin tua iratan. Manalwar tayo met ed saray email ya nanlapud totoo ya agtayo kabat, tan diad saray apostata ya manpapanggap ya interesado.​—w24.04, p. 12.

Anto ray amta tayo tan anto ray agtayo amta nipaakar ed pangukom nen Jehova ed si Arin Solomon, ontan met ed saramay inatey diad Sodoma tan Gomorra tan diad samay Delap?

Agtayo amta no kasin senentensiaan la ra nen Jehova na andi-anggaan ya ipapatey. Basta say amta tayo, makasi ya Dios si Jehova tan sikato so makaamta na amin ya detalye.​—w24.05, p. 3-4.

Akin et atawag si Jehova ya “say Bato,” tan antoy ipapaseguro na satan ed sikatayo? (Deu. 32:4)

Sasalimbengan to tayo nen Jehova. Sikatoy nailaloan tayo ta sarasarag ton tooren iray sipan to. Mabisbiskeg tan agbalot manguman si Jehova, kanian sumpalen ton sumpalen so gagala to tan agmanguman so ugali to.​—w24.06, p. 26-28.

Antoy makatulong pian makapan-adjust kad balon kongregasyon mo?

Manmatalek ka ya tulongan ka nen Jehova, no panon ya tinulongan to iray lingkor to nensaman. Iwasan mon ikompara so balon kongregasyon mo ed samay nanlapuan mon kongregasyon. Mansiansia kan aktibo ed balon kongregasyon mo, tan mikaaro kad saray agagi.​—w24.07, p. 26-28.

Anto ran leksion so naaralan tayo ed samay taloran parabolo o ilustrasyon ya nabasad Mateo kapitulo 25?

Naaralan tayod samay parabolo na karnero tan kanding ya importantin mansiansia tayon matoor ed si Jehova. Idadanet na parabolo na saray makabat tan makulangkulang ya mamarikit ya nepeg ya akaparaan tan alerto tayo. Tan naaralan tayod samay parabolo na saray talento ya importantin makuli tan maseet tayo.​—w24.09, p. 20-24.

Antoy katagey to may balkonahe na templo nen Solomon?

Diad 2 Awaran 3:4, nabasa ed arum ya patalos ya say katagey na balkonahe et “120 ya kasiko,” kanian singa itan tore ya 53 metro so katagey to. Pero “20 kasiko” so akasulat ed arum ya napantiwalaan ya manuskrito, odino ngalngali 9 metro so katagey to. Mapatnag ya atan so duga ya sukat no ibase ed kakapal na padir na templo.​—w24.10, p. 31.

Antoy labay ya ibaga na samay nabasad 1 Timoteo 3:12 ya ‘say ministeryal ya lingkor et nepeg ya saksakey so asawa to’?

Labay ton ibaga, uunoren to may estandarte nen Jehova ya say sakey ya laki et para labat ed sakey ya bii. Agnepeg ya manggawa na seksual ya imoralidad, tan aga dapat mifi-flirt tan agmangiiter na duman motibo ed arum ya bibii.​—w24.11, p. 19.

Akin et nibaga tayon amay imbaga nen Jesus diad Juan 6:53 et duma ed samay imbaga to diad Pangdem na Katawan?

Diad Juan 6:53, imbaga nen Jesus ya kaukolan ya kanen na totoo so laman to tan inumen day dala to. Imbaga to itan nen 32 C.E. diad Galilea, tan say katongtong to et saray Judio ya anggapo ni pananisia rad sikato. Pero amay Pangdem na Katawan et inggapo nen Jesus kalabas ni na sakey taon. Ginawa to itan diad Jerusalem, tan say katongtong to et saramay nakaiba ton manuley diad tawen.​—w24.12, p. 10-11.