1-2. (a) Antoy epekto na mensahen walad Isaias 41:10 ed si Yoshiko? (b) Siopa ray nagunggonaan ed satan ya mensahen impaisulat nen Jehova?

SI Yoshiko, a sakey ya matoor a Kristianon sister, et walay naamtaan ton mauges a balita. Imbaga na doktor to ya pigaran bulan labat lay pambilay to. Antoy reaksion to? Anonotan nen Yoshiko may paborito ton teksto ed Biblia, Isaias 41:10. (Basaen.) Kanian kalmado ton imbaga ed doktor to ya sikatoy agnatatakot ta sankabembenan nen Jehova so lima to. * Say makaligliwan mensahe ya walad satan a teksto so akatulong ed sayan agi tayo ya sigpot a manmatalek ed si Jehova. Makatulong met ed sikatayo itan a teksto pian mansiansia tayon kalmado no nipapaarap tayod grabe iran subok. Pian natalosan tayo no panon itayon natulongan na satan, amtaen tayo nin unona no akin ya inter na Dios itan ya mensahe ed si Isaias.

² Impaisulat nen Jehova ed si Isaias iratan ya salita pian ligliwaen iray Judio ya ibantak ed Babilonia. Balet, sinegurado nen Jehova ya nipreserba itan ya mensahe aliwa labat ya parad pakagunggonaan na saratan ya Judio noagta parad amin ya totoo to manlapud saman anggad natan. (Isa. 40:8; Roma 15:4) Manbibilay tayo la natan ed “mapeligro tan mair-irap a panaon,” kanian kakkaukolan tayo so panamaseseg ya walad libro na Isaias.​—2 Tim. 3:1.

3. (a) Anto ran sipan so nabasa ed Isaias 41:10, say apilin teksto ed taon 2019? (b) Akin ya kaukolan tayo irayan panamaseguro?

³ Diad sayan artikulo, manpokus tayo ed taloran sipan nen Jehova ya mamabiskeg ed pananisia tayo ya nabasa ed Isaias  41:10: (1) Si Jehova et walad sikatayo, (2) sikato so Dios tayo, tan (3) tulongan to tayo. Kaukolan tayo irayan panamaseguro * ta singa si Yoshiko, wala ray subok ya dadalanen tayod bilay tayo. Wala met iray kairapan ya aarapen tayo lapud mauges a kipapasen ed sayan mundo. Say arum ed sikatayo et papasegsegangen ni ingen na saray makapanyarin gobierno. Sansakey tayon aralen irayan taloran panamaseguro.

4. (a) Anto so unonan panamaseguro ya konsideraen tayo? (Nengnengen met so paimanod leksab.) (b) Panon ya imbalikas nen Jehova so liknaan tod sikatayo? (c) Antoy naliliknam lapud satan ya imbalikas na Dios?

⁴ Nia so unonan panamaseguro nen Jehova ed sikatayo: “Agka ontatakot, ta wala ak ed sika.” * Nibagan walad sikatayo si Jehova lapud talagan iimanoen tan papablien to tayo. Nengnengen no panon ton imbalikas so aralem ya liknaan to ed sikatayo. “Nagmaliw kan mabmabli ed pakanengneng ko,” so kuan nen Jehova. “Apagalangan ka, tan inaro ta ka.” (Isa. 43:4) Anggapoy antokaman ya puersa ed uniberso ya makapangekal ed panangaro nen Jehova ed saray manlilingkor ed sikato; agmanguman so katooran to ed sikatayo. (Isa. 54:10) Say panangaro tan pikakaaro to so mangiiter ed sikatayo na pakpel. Protektaan to tayo, no panon ya prinotektaan toy Abram (Abraham) ya kaaro to. Imbaga nen Jehova ed sikato: “Agka ontatakot, Abram. Siak so samper mo.”​—Gen. 15:1.

5-6. (a) Panon tayon amta ya labalabay itayon tulongan nen Jehova ed saray subok ya dadalanen tayo? (b) Antoy naaralan tayo ed alimbawa nen Yoshiko?

⁵ Amta tayo ya labalabay itayon tulongan nen Jehova ed saray subok ya dadalanen tayo lapud oniay sipan tod saray totoo to: “Wala ak ed sika sano ombaliw kad saray aralem a danum, tan agka nalener sano ombaliw kad saray ilog. Sano ondalan kad apoy, agka napoolan, tan agka nasinit.” (Isa. 43:2) Antoy labay ya ibaga na sarayan salita?

⁶ Ag-isisipan nen Jehova ya ekalen to ray subok ya mamapairap ed sikatayo, balet agto abuloyan ya nalener tayo ed saray singa ilog ya problema tan agto paulyanan ya napoolan  tayo ed saray singa apoy ya subok. Ipapaseguro to ya sikatoy walad sikatayo, ya tulongan to tayon nalampasan iratan ya subok. Panon itan ya gawaen nen Jehova? Tulongan to tayon onkalma pian agtayo ontakot tan napansiansia tayoy katooran tayo ed sikato, anggano nipapaarap tayo ed ipapatey. (Isa. 41:13) Si Yoshiko, ya abitla niman, et apaneknekan to ya tua itan. Imbaga na anak to: “Pandinayewan mi so inkakalmado nen Mama. Talagan anengneng mi ya sikatoy inikdan nen Jehova na deen na nonot. Kakatongtongen nen Mama iray nars tan arum ya pasyente nipaakar ed si Jehova tan saray sipan To anggad samay mismon agew na impatey to.” Antoy naaralan tayo ed alimbawa nen Yoshiko? No manmatalek tayo ed sipan na Dios ya “Wala ak ed sika,” magmaliw tayo met ya makpel tan mabiskeg legan tayon susungdoan iray subok.

7-8. (a) Anto so komaduan panamaseguro ya konsideraen tayo, tan antoy labay ya ibaga na satan? (b) Akin et imbaga nen Jehova ed saray nibantak ya Judio: “Agka ompapaga”? (c) Anto ran balikas ed Isaias 46:3, 4 so nampakalma ed puso na totoo na Dios?

⁷ Imanoen so komaduan panamaseguro ya insulat nen Isaias: “Agka ompapaga, ta siak so Dios mo.” Antoy labay ya ibaga na sayan imbalikas na Dios nipaakar ed kapagaan? Diad sayan bersikulo, say orihinal a salita parad “ompapaga” et mangipapasabi ed ideya ya say sakey et “lanang ya onlilingaw ed beneg to lapud takot ya ompan walay nagawan mauges ed sikato” odino “manpa-panic ya singa napepeligroy bilay to.”

⁸ Akin et imbaga nen Jehova ya agnepeg ya ‘ompaga’ iray Judio ya ibantak ed Babilonia? Lapud amta to ya onsabi panaon et ontakot iray manaayam ed satan a dalin. Akin? No manampot lay 70 taon ya inkibantak na saray Judio, say Babilonia et lusoben na mabiskeg ya armada na Medo-Persia. Usaren nen Jehova itan ya armada pian ibulos iray totoo to diad impakaaripen da ed Babilonia. (Isa. 41:2-4) Diad satan a panaon, nen naamtaan na saray taga Babilonia tan saray arum a nasyon ya manasingger la ray kalaban da, sinali ran pansiansiaen so pakpel da diad impangibaga rad sakey tan sakey: “Manpabiskeg ka.” Nanggawa met ira na dakel nin idolo, ya saratan so inilaloan dan manprotekta ed sikara. (Isa. 41:5-7) Balet oniay imbaga nen Jehova ed saray nibantak a Judio ya nampakalma ed puso ra: “Sika so lingkor ko, O Israel [aliwan saray arum a nasyon] . . . Agka ompapaga, ta siak so Dios mo.” (Isa. 41:8-10) Imanoen ya imbaga nen Jehova: “Siak so Dios mo.” Diad saratan ya imbaga nen Jehova, papaseguroan to iray matoor ya mandadayew ed sikato ya agto ra nilingwanan—siansia nin sikato so Dios da tan sikara so totoo to. Imbaga tod sikara: “Awiten . . . tan iliktar ta kayo.” Seguradon apabiskeg iray nibantak ya Judio lapud satan ya panamaseguro.​—Basaen so Isaias 46:3, 4.

9-10. Akin et agtayo nepeg ya ontakot? Iyilustra.

⁹ Diad sayan panaon tayo, talagan mapagpaga iray totoo lapud onggragrabe so situasyon ed mundo. Siempre, apektado tayo met ed saratan ya problema. Balet agtayo nepeg ya ontakot. Ibabaga nen Jehova ed sikatayo: “Siak so Dios mo.” Akin et mabiskeg itan ya rason pian mansiansia tayon kalmado?

¹⁰ Imanoen iyan ilustrasyon: Walay duaran pasahero, si Jim tan Ben, ya akalugan ed eroplano. Magalagalaw so eroplano lapud maksil so dagem. Legan na satan, walay nadngel dan anunsio: “Seguroen yon aka-seat belt kayo. Maksil so dagem kanian magalagalaw so eroplano.” Naaburidon maong si Jim. Balet wala ni imbaga na piloto: “Agkayo mapaga. Kontrolado so situasyon. Ayay mansasalita et say piloto yo.” Nen arengel itan nen Jim, manpeyeng  tan imbaga ton, “Anto ’tay ibabaga to, panon kan ag-ompaga?” Balet naimano to ya agnatatakot si Ben kanian tinepetan to: “Akin et kakkalmado ka?” Akaimis si Ben tan inkuan to: “Ta kabkabat ko so piloto. Tatay ko!” Insan imbaga nen Ben: “Istoryaen kod sikay tatay ko pian nakabkabat mo. Segurado, no naamtaan mon marundunong a piloto, onkalma ka met.”

11. Anto ray naaralan tayo ed ilustrasyon nipaakar ed duaran pasahero?

¹¹ Anto ray naaralan tayo ed sayan ilustrasyon? Singa si Ben, kalmado tayo lapud kabkabat tayo so Ama tayod tawen, si Jehova. Amta tayo ya igiya to tayo pian nalampasan tayo iray singa bagyon problema legan na kaunoran iran agew na sayan sistema. (Isa. 35:4) Manmamatalek tayo ed si Jehova, kanian makapansiansia tayon kalmado anggano natatakot a maong so arum a totoo ed sayan mundo. (Isa. 30:15) Singa tayo met si Ben no ibabaga tayod arum iray rason no akin ya makapanmatalek ira ed Dios. No naamtaan da iratan, nakombinse met ira ya anggan anton subok so arapen da, tulongan ira nen Jehova.

12. (a) Anto so komatlon panamaseguro ya konsideraen tayo? (b) Anton katuaan so ipapanonot ed sikatayo nen tinukoy nen Isaias so “taklay” nen Jehova?

¹² Imanoen so komatlon panamaseguro ya insulat nen Isaias: “Pabiskegen ta ka, on, tulongan ta ka.” Antis na saya et deneskribe la nen Isaias no panon ya pabiskegen nen Jehova iray totoo to nen inkuan to: “[Si] Jehova et onsabin walaay pakayari, tan say taklay to et manuley parad sikato.” (Isa. 40:10) Mabetbet ya uusaren ed Biblia so salitan “taklay” pian isimbolo so pakayari. Kanian ipapanonot ed sikatayo na balikas ya “say taklay [nen Jehova] et manuley” ya si Jehova et makapanyarin Ari. Inusar to so agnaparaan a biskeg to pian tulongan tan iyagel iray  lingkor to nensaman, tan tuloytuloy ton papabiskegen tan proprotektaan iray manmamatalek ed sikato natan.​—Deu. 1:30, 31; Isa. 43:10, paimanod leksab.

13. (a) Kapigan ya lalon totooren nen Jehova so sipan to ya pabiskegen to tayo? (b) Anton panamaseguro so mangiiter ed sikatayo na biskeg tan kompiyansa?

¹³ Totooren nen Jehova so sipan to ya “Pabiskegen ta ka” lalo la no papasegsegangen itayo na saray kalaban. Diad arum a pasen na mundo natan, gagawaen na saray kalaban so anggaay nayarian da ya patundaen so kimey tayon panagpulong odino sebelan so organisasyon tayo. Balet agtayo masyadon mapaga ed ontan iran panangataki. Walay impaseguro nen Jehova ya mangiiter ed sikatayo na biskeg tan kompiyansa. Insipan to: “Ag-ontalona so antokaman ya armas a gawaen parad sika.” (Isa. 54:17) Ipapanonot ed sikatayo na satan a balikas so taloran importantin katuaan.

14. Akin et agtayo la nabigla no atakien itayo na saray kalaban na Dios?

¹⁴ Unona, bilang papatumbok na Kristo, amta tayo ya busolen itayo na totoo. (Mat. 10:22) Impasakbay nen Jesus ya makaeksperiensya na graben panamasegsegang iray disipulo to legan na kaunoran iran agew. (Mat. 24:9; Juan 15:20) Komadua, impropesiya nen Isaias ya ag-itayo labat busolen na saray kalaban, noagta mangusar met ira na nanduruman armas sumpad sikatayo. Kaiba ed saratan ya armas so panagpalikdo, katilaan, tan brutal ya panamasegsegang. (Mat. 5:11) Ag-amperen nen Jehova iray kalaban ed pangusar dad saratan ya armas pian milaban ed sikatayo. (Efe. 6:12; Apo. 12:17) Balet agtayo nepeg ya ontakot. Akin?

15-16. (a) Anto so komatlon katuaan ya nepeg tayon tandaan, tan panon iyan susuportaan na Isaias 25:4, 5? (b) Panon ya adeskribe ed Isaias 41:11, 12 so pansumpalan na saray kalaban?

¹⁵ Imanoen so komatlon katuaan ya nepeg tayon tandaan. Imbaga nen Jehova ya “antokaman ya armas” ya usaren sumpad sikatayo et “ag-ontalona.” No panon ya protektaan itayo na padir ed maksil a bagyo, protektaan  itayo met nen Jehova ed “sanok na saray maruksan manuley.” (Basaen so Isaias 25:4, 5.) Anggapon balot so nagawaan na kalaban ya pansengegan na permanentin kaderal tayo.—Isa. 65:17.

¹⁶ Papabiskegen met nen Jehova so talek tayod sikato diad impangideskribe to ed pansumpalan na saray “onsasanok” ed sikatayo. (Basaen so Isaias 41:11, 12.) Anggan antoy gawaen na saray kalaban sumpad sikatayo odino anggan panon kagrabe so pilaban da, pareho so pansumpalan: Amin ya kalaban na totoo na Dios et “naandi tan naderal.”

17-18. (a) Panon ya ombiskeg so talek tayo ed si Jehova diad pambasa na Biblia? Mangiter na alimbawa. (b) Panon ya ontulong ed sikatayo so pandalepdep ed apilin teksto ed taon 2019?

¹⁷ Napabiskeg tayoy talek tayo ed si Jehova no sikatoy kabaten tayon maong. Tan say alenleneg ya paraan pian talagan nakabat tayoy Dios et diad pambasa na Biblia tan pandalepdep ed saray nababasa tayo. Karga na Biblia iray napanmatalkan ya salaysay no panon ya prinotektaan nen Jehova iray totoo to nensaman. Saratan so mangiiter ed sikatayo na kompiyansa ya asikasoen to tayo met natan.

¹⁸ Imanoen pa so sakey ya alimbawa, say marakdakep ya ilustrasyon ya inusar nen Isaias ya mangipapanengneng no panon itayon proprotektaan nen Jehova. Tinukoy toy Jehova bilang managpastol tan tinukoy to ray lingkor na Dios bilang kordero. Oniay imbaga nen Isaias nipaakar ed si Jehova: “Tiponen to iray kordero diad panamegley na taklay to, tan awiten to ra diad pagew to.” (Isa. 40:11) No nalilikna tayon akalakap ed sikatayo so mabiskeg ya taklay nen Jehova, maligen tan kalmado so liknaan tayo. Pian natulongan itayon mansiansian kalmado anggano nipapaarap tayod saray problema, pinili na matoor tan makabat ya aripen so Isaias 41:10 bilang teksto ed taon 2019, “Agka ompapaga, ta siak so Dios mo.” Dalepdep mo itan ya panamaseguro. Pabiskegen ka na satan pian nasarag mo ray subok ed arapen.