1-2. (a) Antoy nenengnengen nen Jehova sano mantitipon so minilyon ya totoo parad Pangdem na Katawan? (Nengnengen so litrato ed apis.) (b) Antoy pantongtongan tayo ed sayan artikulo?

ISIP mo pa no antoy nenengnengen nen Jehova sano mantitipon so minilyon ya totoo ed interon mundo parad Pangdem na Katawan. Aliwa labat ya say baleg a grupo na totoo so nenengnengen to, noagta iimanoen to so kada indibidual ya inmatendi. Singa bilang, amta to no siopa iramay matoor ya onaatendi kada taon. Kaibad sikara iramay oonla anggano nipapaarap irad graben panamasegsegang. Saray arum et aliwan regular ya onaatendi ed aral, balet ipapasen dan importantin obligasyon so iyatendi ed Memoryal. Naiimano met nen Jehova iramay pilpilimero day onatendi ed Memoryal, nayarin lapud labay dan naamtaan no antoy nagagawa ditan.

² Seguradon naliliketan si Jehova no nanenengneng ton dakdakel so onaatendi ed Memoryal. (Luc. 22:19) Balet, aliwan say bilang na onaatendi so manuna ed si Jehova. Sikatoy mas interesado ed rason no akin ya onaatendi ira; importante ed si Jehova so motibo. Diad sayan artikulo, pantongtongan tayo iyan importantin tepet: Akin et aliwa labat ya say tinaon ya Memoryal so aatendian tayo noagta pati saray sinimban aral ya itatarya nen Jehova parad saray mangaaro ed sikato?

3-4. (a) Akin et onaatendi tayod saray pantitipon? (b) Anton kualidad so napatnagan ed sikatayo ed iyaatendi tayod saray pantitipon? (c) Base ed ibabaga na 1 Corinto 11:23-26, akin ya nepeg itayon onatendi ed Memoryal?

³ Say sankaimportantian ya rason no akin ya onaatendi tayo ed saray pantitipon na kongregasyon et lapud kabiangan itan na panagdayew tayo. Onaatendi tayo met lapud ibabangat itayo  nen Jehova ed saratan ya pantitipon. Aglabay na saray mapaatagey a totoo so paibangat. (3 Juan 9) Balet duma tayo ta labalabay tayoy paibangat ed si Jehova tan ed organisasyon ya uusaren to.​—Isa. 30:20; Juan 6:45.

⁴ Napatnagan ed iyaatendi tayod saray pantitipon ya mapaabeba tayo—akaparaan tan mabulos tayon paibangat. Diad labi na Memoryal na impatey nen Jesus, onatendi tayo ed sayan importantin okasyon aliwa labat ya lapud obligasyon tayo itan noagta lapud mapaabeba tayon uunoren iyan ganggan nen Jesus: “Itultuloy yon gawaen iya bilang pannodnonot ed siak.” (Basaen so 1 Corinto 11:23-26.) Satan ya pantitipon et mamabiskeg ed ilalo tayo ed arapen tan mangipanonot ed sikatayo ya talagan inar-aro itayo nen Jehova. Balet amta nen Jehova ya aliwa labat ya maminsan ed sakey taon a kaukolan tayoy panamaseseg tan panamaseguro. Kanian intarya to parad sikatayo iray sinimban aral tan ingganggan ton atendian tayo iratan. Pakiwasen itayo na inkamapaabeba pian unoren itan. Manguusar tayo na pigaran oras kada simba diad panagparaan tan iyatendi ed saratan ya aral.

5. Akin ya aawaten na saray mapaabeban totoo so imbitasyon nen Jehova?

⁵ Kada taon, dakel ya mapaabeban totoo so mangaawat ed imbitasyon nen Jehova ya bangatan to ra. (Isa. 50:4) Mabetbet ya say Memoryal so unonan inatendian da insan ginapoan da met lay onatendi ed saray sinimban aral. (Zac. 8:20-23) Kaiba tayo la ra ya maliket a paibangat tan paigiya ed si Jehova, say “mananulong [tayo] tan say manangiliktar [tayo].” (Sal. 40:17) Wala ta ni mas makapaliket odino mas importante nen say pangawat ed imbitasyon ya bangatan nen Jehova tan si Jesus, say inar-aro ton Anak?​—Mat. 17:5; 18:20; 28:20.

6. Panon ya akatulong ed sakey a laki so inkamapaabeba pian onatendi ed Memoryal?

⁶ Kada taon, mansasagpot tayon imbitaan so dakel a totoo anggad posible ya onatendi ed Memoryal na impatey nen Jesus. Dakel ya mapaabeban totoo so agunggonaan lapud inawat day imbitasyon tayo. Imanoen so sakey ya alimbawa. Pigaran taon lay apalabas, sakey a laki so akaawat na niimprintan imbitasyon parad Memoryal, balet imbaga tod samay brother ya angiter na imbitasyon ya agto makaatendi. Pero diad samay labi na Memoryal, abigla may brother ta anengneng tod Kingdom Hall imay laki. Mandinayew iman a laki ed malikeliket ya impangawat ed sikato na saray agagi kanian ginapoan toy onatendi ed saray sinimban aral. Diad tua, taloran aral labat so agto naatendian ed loob na sakey taon. Antoy akatulong ed sikato pian ontan so ikiwas to? Say inkamapaabeba so amakiwas ed sikato ya umanen so nonot to kanian inmatendi lanlamang. Imbaga na samay brother ya angiter ed sikato na imbitasyon: “Sikatoy talagan mapaabeba.” Seguradon inyasingger nen Jehova iman a laki pian mandayew ed Sikato, tan natan et sikatoy bautismado la.​—2 Sam. 22:28; Juan 6:44.

7. Panon ya makatulong iray nanaaralan tayod saray pantitipon tan saray nababasa tayo ed Biblia pian magmaliw tayon mapaabeba?

⁷ Saray nanaaralan tayod saray pantitipon tan saray nababasa tayo ed Biblia et ontulong ed sikatayon magmaliw ya mapaabeba. Pigaran simba antis na Memoryal, mabetbet ya saray aral tayo et akapokus ed alimbawa nen Jesus tan ed inkamapaabeba ya impanengneng to nen inter toy bilay to bilang dondon. Tan pigaran agew antis na Memoryal, ipapaseseg ed sikatayo ya basaen tayo iray salaysay ed Biblia nipaakar ed saray agawa ya mikonektaan ed impatey tan inkioli nen Jesus. Saray nanaaralan tayod saratan ya pantitipon tan saray nababasa tayo ed saratan ya salaysay ed Biblia et mamaaralem na apresasyon tayo ed bagat nen Jesus parad sikatayo. Napapakiwas itayon aligen so inkamapaabeba to tan gawaen so linawa nen  Jehova, anggano wala ray panaon ya nairapan tayon gawaen itan.​—Luc. 22:41, 42.

8. Panon ya impanengneng nen Jesus so inkakpel?

⁸ Gagawaen tayo met so anggaay nayarian tayo ya aligen so inkakpel nen Jesus. Isipen pay pakpel ya impanengneng to pigaran agew antis na impatey to. Amta to ya sikatoy pabaingan, siplatan, tan pateyen na saray mamubusol ed sikato. (Mat. 20:17-19) Balet siansian mabulos ton inarap so ipapatey. Nen sinmabi la itan a panaon, imbaga tod saray matoor ya apostol to ya kaiba ton wadman ed Getsemani: “Alagey kayo, ta onla ti la. Nitan lay mangiyawat ed siak.” (Mat. 26:36, 46) Tan sanen sinmabi iray totoon de-awit na armas ya mangaresto ed si Jesus, sikato lay inmasingger, nampakabat, tan imbaga tod saray sundalo ya paulyan da lan onalis iray apostol to. (Juan 18:3-8) Talagan makmakpel si Jesus! Natan, pansasagpotan ya aligen na saray alanaan a Kristiano tan saray arum a karnero so inkakpel nen Jesus. Panon?

9. (a) Akin ya no maminsan et kaukolan tayoy pakpel pian regular tayon makaatendi ed saray aral? (b) Panon ya makaapekto so alimbawa tayo ed saray agagi ya nipriso lapud pananisia ra?

⁹ No maminsan, ondadalan tayod mairap iran kipapasen kanian kaukolan tayoy pakpel pian makaatendi tayon regular ed saray aral. Arum ed saray agagi tayo et onaatendi ed saray aral anggano maneermen ira, walay pakakadismayaan da, odino walay sakit da. Say arum et makpel ya onaatendi ed saray aral anggano susumpaen ira na kapamilya ra odino say gobierno. Isip mo pan magano no panon ya makaapekto so alimbawa tayo ed saray agagi ya nipriso lapud pananisia ra. (Heb. 13:3) No naamtaan da ya tuloytuloy tayon manlilingkor ed si Jehova anggano wala ray subok, napapaseseg iran pansiansiaen ya mabiskeg so pananisia, pakpel, tan integridad da. Ontan so naeksperiensya nen apostol Pablo. Nen sikatoy apriso diad Roma, sikatoy malikeliket kada no naamtaan ton matoor ya manlilingkor ed Dios iray kapananisiaan to. (Fil. 1:3-5, 12-14) Ag-abayag antis na inkibulos nen Pablo odino kayarin mismo na satan, sinulatan to iray Hebreon Kristiano. Diad satan a sulat, binilin to irayan matoor ya Kristiano ya “mantultuloy [iran] manaaroan bilang sanaagi” tan agdan balot papaulyanan so pantitipon.​—Heb. 10:24, 25; 13:1.

10-11. (a) Siopa ray nepeg tayon imbitaan ed Memoryal? (b) Base ed Efeso 1:7, antoy rason no akin ya iimbitaan tayo ra?

¹⁰ Ipapanengneng tayoy inkakpel no iimbitaan tayod Memoryal iray kanayon, katrabaho, tan kakaabay tayo. Akin et iimbitaan tayo ra? Ontan lay pisasalamat tayo ed ginawa nen Jehova tan si Jesus parad sikatayo kanian labalabay tayon imbitaan so arum ya onatendi ed Memoryal. Labay tayon naamtaan da no panon met iran nagunggonaan ed “agnaparaan a kaabigan” nen Jehova panamegley na dondon.​—Basaen so Efeso 1:7; Apo. 22:17.

¹¹ No makpel tayon onatendi ed saray pantitipon, ipapanengneng tayo met so sakey nin  mabmablin kualidad​—say kualidad ya ipapanengneng na Dios tan say Anak to ed sankaabigan iran paraan.

12. (a) Panon ya saray pantitipon tayo et mamaaralem na panangaro tayo ed si Jehova tan ed si Jesus? (b) Bilang pangalig ed si Jesus, antoy ipapaseseg na 2 Corinto 5:14, 15 ya gawaen tayo?

¹² Say panangaro tayo ed si Jehova tan si Jesus so mamapakiwas ed sikatayon onatendi ed saray pantitipon. Tan saray nanaaralan tayo ditan so mamaaralem na panangaro tayo ed si Jehova tan ed Anak to. Regular itayon napapanonotan ed saray pantitipon no antoy ginawa da parad sikatayo. (Roma 5:8) Say Memoryal so nagkalalo lan mangipapanonot ed sikatayo ya talagan inar-aro da tayo, pati saramay agda ni natatalosan so kablian na dondon. Lapud misalsalamat itayon maong, gagawaen tayoy anggaay nayarian tayon aligen si Jesus diad inagew-agew ya kabibilay tayo. (Basaen so 2 Corinto 5:14, 15.) Ontan met, papakiwasen itayo na puso tayo ya idayew si Jehova lapud impangitarya to ed dondon. Say sakey a paraan pian sikatoy nidayew tayo et diad pangiter na impapuson komento diad saray aral.

13. Panon tayon nipanengneng ya talagan inar-aro tayoy Jehova tan say Anak to? Ipaliwawa.

¹³ Nipanengneng tayo ya talagan inar-aro tayoy Jehova tan say Anak to no mabulos tayon mansakripisyo parad sikara. Mabetbet ya kaukolan tayoy mansakripisyo ed nanduruman paraan pian makaatendi tayod saray aral. Diad dakel ya kongregasyon, say oras na aral et kayari na trabaho kanian nayarin naksawan tayo la. Tan wala met so aral no Sabado odino Simba, ya panaon na panagpainawa na arum a totoo. Kasin naiimano nen Jehova so iyaatendi tayod aral anggano naksawan tayo? Siempre! Diad tua, no mas mansasagpot tayo, mas naaapresya nen Jehova so panangaro ya ipapanengneng tayo parad sikato.​—Mar. 12:41-44.

14. Panon ya angiter si Jesus na sankaabigan ya alimbawa ed pangipanengneng na masakripisyon aro?

¹⁴ Inikdan itayo nen Jesus na sankaabigan ya alimbawa ed pangipanengneng na masakripisyon aro. Sikatoy mabulos ya ompatey parad saray disipulo to tan mabulos ton inusar so bilay to diad kada agew pian iyuna so pankaabigan da nen say sarili to. Singa bilang, nila to ray papatumbok to anggan sanen sikatoy naknaksawan tan nagogonigon. (Luc. 22:39-46) Tan say sankanonot to et no antoy niiter to ed arum, aliwan say naala to ed sikara. (Mat.  20:28) No ontan so kabiskeg na panangaro tayo ed si Jehova tan ed saray agagi tayo, gawaen tayoy anggaay nayarian tayo ya onatendi ed Pangdem na Katawan tan ed amin ya aral na kongregasyon.

15. Siopa ray nagkalalo lan labay tayon tulongan?

¹⁵ Kabiangan itayo ed saksakey ya tuan Kristianon impanaagi, tan panliliketan tayon usaren so dakel ya panaon tayo pian imbitaan so arum ya miulop ed sikatayo. Balet, nagkalalo lan labay tayon tulongan iray “kapananisiaan tayo” a nagmaliw ya inaktibo. (Gal. 6:10) Nipanengneng tayoy panangaro tayod sikara no pasesegen tayo ran onatendi ed saray pantitipon, lalo la ed Memoryal. Singa si Jehova tan si Jesus, malikeliket itayo no walay inaktibo ya ompawil ed si Jehova, say maaron Ama tan Pastol tayo.​—Mat. 18:14.

16. (a) Panon tayon napaseseg so sakey tan sakey, tan antoy nitulong ed sikatayo na saray pantitipon tayo? (b) Akin a saya so maabig a panaon ed sayan taon pian nonoten iray imbaga nen Jesus diad Juan 3:16?

¹⁶ Diad ontumbok iran simba, imbitaan tayo so dakel a totoo anggad posible pian onatendi ed Memoryal no Biernes na labi, Abril 19, 2019. (Nengnengen so kahon ya “ Siopay Imbitaan Mo?”) Diad sayan interon taon, komon ta pasesegen tayoy sakey tan sakey diad regular tayon iyatendi ed amin ya pantitipon ya itatarya nen Jehova parad sikatayo. Legan ya manasingger so anggaan na sayan sistema, ontulong iray pantitipon tayo pian mansiansia tayon mapaabeba, makpel, tan maaro. (1 Tes. 5:8-11) Komon ta diad interon puso tayo et ipanengneng tayo no antoy nalilikna tayo ed si Jehova tan ed Anak to ed agaylan panangaro da ed sikatayo!​—Basaen so Juan 3:16.