1. Antoy imbaga nen Jehova ya nagawa ed panaon tayo?

ONIAY imbaga nen Jehova ya nagawa ed panaon tayo: “Samploran lalaki a nanlapud amin a lenguahe na saray nasyon et ombemben, on, ombemben a malet ed andukey a kawes na sakey a Judio, ya ikuan dan: ‘Mila kami ed sikayo, ta nadngelan min say Dios et walad sikayo.’” (Zac. 8:23) Say “Judio” ya abitla dia et ontutukoy ed saramay nilanaan na Dios na masanton espiritu. Natatawag met iran “Israel na Dios.” (Gal. 6:16) Say “samploran lalaki” et ontutukoy ed saramay say ilalo da et manbilay na andi-anggaan diad dalin. Amta ra ya pinili nen Jehova iyan grupo na saray alanaan tan ipapasen dan baleg ya pribilehyo so mila ed sikara ya mandayew ed sikato.

2. Panon ya “mila” ed saray alanaan so “samploran lalaki”?

² Anggano imposible ya naamtaan so ngaran na amin ya alanaan diad dalin natan, * sarag na saramay maniilalon manbilay diad dalin so “mila” ed saray alanaan. Panon? Ibabaga na Biblia ya say “samploran lalaki” et “ombemben a malet ed andukey a kawes na sakey a Judio, ya ikuan dan: ‘Mila kami ed sikayo, ta nadngelan min say Dios et walad sikayo.’” Sakey labat ya Judio so abitla ed sayan bersikulo. Balet say imbaga na samploran lalaki et “sikayo.” Labay ton ibaga sirin, sayan Judio et ag-ontutukoy ed sakey labat ya too noagta ontutukoy ed interon grupo na saray alanaan. Saray aliwan alanaan et kaiba  dan manlilingkor ed si Jehova iray alanaan. Balet, agda ipapasen ya saray alanaan so lider da, ta amta ra ya si Jesus so Lider da.​—Mat. 23:10.

3. Anto ran tepet so naebatan ed sayan artikulo?

³ Lapud wala ni ray nakekeran alanaan diad dalin, posiblin naisip tayo iraya: (1) Antoy nepeg ya panmoria na saray alanaan ed sarili da? (2) Panon so nepeg ya pantrato tayo ed saramay mangan na tinapay tan oninum na alak legan na Memoryal? (3) Kasin nepeg tayon pampagaan no ondadakel so mibibiang ed saray emblema? Naebatan iratan diad sayan artikulo.

4. Anton pasakbay ed 1 Corinto 11:27-29 so nepeg ya nonoten a maong na saray alanaan, tan akin?

⁴ Nepeg ya nonoten a maong na saray alanaan so pasakbay ya nabasa ed 1 Corinto 11:27-29. (Basaen.) Panon ya nibagan say sakey ya akibiang ed Memoryal et “agmakanepegan”? No sikatoy angan tan inminum na saray emblema balet ta agto uunoren iray matunong ya estandarte nen Jehova. (Heb. 6:4-6; 10:26-29) Amta na saray alanaan ya nepeg iran mansiansian matoor no labay dan naawat so “premyo a panatawag na Dios ed tawen diad panamegley nen Kristo Jesus.”​—Fil. 3:13-16.

5. Antoy nepeg ya pangipasen na saray alanaan ed sarili da?

 ⁵ Say masanton espiritu nen Jehova so ontutulong ed saray lingkor to pian magmaliw iran mapaabeba, aliwan mapaatagey. (Efe. 4:1-3; Col. 3:10, 12) Kanian ag-ipapasen na saray alanaan ya mas atagey ira nen say arum. Amta ra ya aliwan lapud alanaan ira et mas dakel lay iter nen Jehova ed sikara ya masanton espiritu nen say arum ya lingkor to. Agda iisipen ya mas aralem so pakatalos da ed saray katuaan ed Biblia nen say arum ya agagi. Tan agdan balot ibaga ed sakey ya agi ya posiblin sikatoy alanaan met tan nepeg lan mibiang ed saray emblema no Memoryal. Imbes, mapaabeba dan bibidbiren ya si Jehova labat so mamipili no siopa ray onla ed tawen.

6. Base ed 1 Corinto 4:7, 8, antoy nepeg ya ugali na saray alanaan?

⁶ Anggaman ipapasen na saray alanaan ya baleg a pribilehyo so naimbitaan ya onlad tawen, agda iilaloan ya espisyal so pantrato na arum ed sikara. (Fil. 2:2, 3) Amta da met ya nen nilanaan ira nen Jehova, agto itan impaamta ed arum. Kanian agla pankelawan na sakey ya alanaan no wala ray agmanisian tampol ya sikatoy alanaan. Sankanonot to so ibabaga na Biblia ya agtayo nepeg ya panisiaan ya tampol so sakey ya mangibabagan sikatoy inikdan na Dios na espisyal ya responsabilidad. (Apo. 2:2) Lapud agto labay ya alaen so atension na arum, agto la kaukolan ya ibaga ed saray nakakabat ton agagi ya sikatoy alanaan. Tan agto itan nepeg ya ipasirayew ed arum.​—Basaen so 1 Corinto 4:7, 8.

7. Antoy agnepeg ya gawaen na saray alanaan, tan akin?

⁷ Ag-iisipen na saray alanaan ya Kristiano ya say piulopan da labat et saray kapara dan alanaan, ya singa walay sarili dan ulopan. Agda met anapen no siopa ray kapara dan alanaan, ya pantongtongan da no panon so impakalanaan da odino pian manggawa ira na sarili dan grupo parad panaral na Biblia. (Gal. 1:15-17) No ontan so gawaen na saray alanaan, anggapoy pankakasakey na kongregasyon tan kokontraen da so masanton espiritu ya ontutulong ed saray lingkor na Dios pian niwala so kareenan tan pankakasakey.​—Roma 16:17, 18.

8. Akin et kaukolan moy manalwar ed pantratom ed saray mibibiang ed saray emblema no Memoryal? (Nengnengen met so paimanod leksab.)

⁸ Panon so nepeg ya pantrato tayo ed saray alanaan ya agagi? Agnepeg ya sobra so pangirayew ed sakey ya too, anggano sikatoy alanaan  ya agi nen Kristo. (Mat. 23:8-12) Nen binitla na Biblia so nipaakar ed saray elder, impaseseg na satan ya ‘aligen tayoy pananisia ra,’ balet ag-imbaga na satan ya ipasen tayon lider so sakey ya too. (Heb. 13:7) Tua ya ibabaga na Biblia ya wala ray “makanepegan na doblin galang.” Balet say rason et lapud “maabig so panangidaulo ra” tan “mansasagpot [ira] ed panagsalita tan panagbangat,” aliwan lapud alanaan ira. (1 Tim. 5:17) No sobran atension tan panangirayew so iiter tayod saray alanaan, ompan nababaingan ira. * Odino sikatayo laingen so rason ya magmaliw iran mapaatagey. (Roma 12:3) Agtayo labay ya sikatayo so sengegan ya makagawa na seryoson lingo so sakey ya alanaan ya agi nen Kristo!​—Luc. 17:2.

9. Panon tayon nipanengneng ya rerespetoen tayo iray alanaan ya Kristiano?

⁹ Panon tayon nipanengneng ya rerespetoen tayo iray nilanaan nen Jehova? Agtayo ra tetepetan no panon iran nagmaliw ya alanaan. Personal itan kanian agtayo la kanepegan ya amtaen. (1 Tes. 4:11; 2 Tes. 3:11) Tan agtayo iisipen ya say asawa, ateng, odino arum nin kapamilya ra et alanaan met. Say ilalon manbilay ed tawen et agnatawir ed pamilya, noagta manlalapu itan ed Dios. (1 Tes. 2:12) Paliisan tayo met so mantepet na makasakit ed liknaan da. Singa bilang, agtayo tetepetan so asawa na sakey ya alanaan no antoy nalilikna to ya agto nakaiba ed paraiso so asawa to. Segurado tayo ya diad balon mundo et ‘peneken nen Jehova so pirawat na balang mabilay.’​—Sal. 145:16.

10. Akin et naprotektaan tayo so sarili tayo no agtayo sobran “irarayew so arum a totoo”?

¹⁰ No agtayo ipapasen ya mas importante iray alanaan nen say arum, naprotektaan tayo met so sarili tayo. Akin ey? Ibabaga na Biblia ya posiblin agmansiansian matoor so arum ya alanaan. (Mat. 25:10-12; 2 Ped. 2:20, 21) No agtayo sobran “irarayew so arum a totoo,” agtayo magmaliw ya patumbok na arum, anggan saray alanaan odino saray kabkabat ya agagi ya abayag lan manlilingkor ed si Jehova. (Jud. 16, paimanod leksab) Kanian no bilang ta ag-ira manmatoor odino taynan da so kongregasyon, agnaapektoan so pananisia tayo ed si Jehova tan agtayo ontundan manlingkor ed sikato.

11. Diad agano ni ran taon, antoy naimano ed bilang na mibibiang ed saray emblema no Memoryal?

¹¹ Diad dakel ya taon, say bilang na mibibiang ed saray emblema no Memoryal et ondadaiset. Balet diad agano ni ran taon et ondadakel so bilang da. Kasin nepeg tayon pampagaan itan? Andi. Aralen tayo so pigaran manunan rason.

12. Akin et agtayo nepeg ya pampagaan so bilang na mibibiang ed saray emblema ed Memoryal?

¹² “Kabat nen Jehova iramay kayarian to.” (2 Tim. 2:19) Saray brother ya manbibilang na mibibiang ed saray emblema ed Memoryal et agda amta no siopa ray talagan nilanaan nen Jehova. Kanian naipipila ed bilang iramay iisipen dan alanaan ira anta andi manaya. Ontan met, wala ray datin mibibiang ya tinmunda lanlamang. Nayarin say arum et walay sakit da ed isip odino emosyon, kanian iisipen dan manuley met ira ed tawen kaiba nen Kristo. Malinew sirin ya agtayo amta so eksakton bilang na saray alanaan ya wadia nid dalin.

13. Kasin walay nabasa ed Biblia no pigaran alanaan so nakeraan diad dalin sano onggapo so baleg ya kairapan?

¹³ Wala ray alanaan ed nanduruman parte na dalin sano onsabi si Jesus tan awiten  to ra diad tawen. (Mat. 24:31) Ibabaga na Biblia ya legan na kaunoran iran agew, wala ni ray alanaan ya nakeraan diad dalin. (Apo. 12:17) Balet anggapoy nabasa ed Biblia no pigara ed sikara so wadia ni ed dalin sano onggapo so baleg ya kairapan.

14. Base ed Roma 9:11, 16, antoy kaukolan tayon talosan nipaakar ed panagpili nen Jehova na saray alanaan?

¹⁴ Si Jehova so mandesisyon no kapigan so pampili to na saray alanaan. (Roma 8:28-30) Ginmapon nampili si Jehova na saray alanaan kayari na inkioli nen Jesus. Mapatnag ya nen inmunan siglo et alanaan so amin ya tuan Kristiano. Diad saray tinmumbok ya nilasus a taon, maslak ed saramay mangibabagan Kristiano ira et agdan talaga tutumboken si Kristo. Anggaman ontan, nilanaan nen Jehova so daiset ya tuan Kristiano diad saman ya panaon. Imbaga nen Jesus ya singa ira trigo ya binmaleg a kabansag na saray sisanyas. (Mat. 13:24-30) Legan na kaunoran iran agew, manpipili nin siansia si Jehova na saray totoo ya magmaliw a kabiangan na 144,000. * Kanian no bilang ta wala ni ray pilien nen Jehova antis na anggaan, agtayo nepeg ya kuestionen so desisyon to. (Basaen so Roma 9:11, 16.) * Manalwar tayo sirin pian agtayo naalig so reaksion na saramay komikimey ya deneskribe nen Jesus ed sakey ya ilustrasyon to. Nanreklamo ira nen anengneng day maong ya impantrato na katawan da ed saramay nankimey labat na sakey oras.​—Mat. 20:8-15.

15. Kasin amin ya alanaan et kabiangan na samay abitla ed Mateo 24:45-47 ya “matoor tan makabat ya aripen”? Ipaliwawa.

 ¹⁵ Aliwan amin ya walaan na ilalon manbilay ed tawen et kabiangan na “matoor tan makabat ya aripen.” (Basaen so Mateo 24:45-47.) Singa nen inmunan siglo, uusaren nen Jehova tan Jesus natan so pigara labat ya agagin lalaki pian pakanen odino bangatan so dakel. Pigara labat ya alanaan ya Kristiano nen inmunan siglo so nausar pian isulat so Kristianon Griegon Kasulatan. Natan, pigara met labat ya alanaan a Kristiano so naikdan na responsabilidad ya mangitarya na ‘naakan diad dugan panaon’ parad saray totoo na Dios.

16. Antoy naaralan mo ed sayan artikulo?

¹⁶ Antoy naaralan tayo ed sayan artikulo? Nandesisyon si Jehova ya mas dakel a lingkor to so manbilay na andi-anggaan diad dalin tan daiset labat so manuley ya kaiba nen Jesus diad tawen. Ikdan nen Jehova na premyo so amin ya lingkor to​—say “Judio” ontan met ed “samploran lalaki.” Amin da et nepeg ya ontulok ed saray ganggan to tan nepeg ya mansiansia ran matoor, mapaabeba, tan manlingkor ya nankakasakey. Tan nepeg dan gawaen so anggaay nayarian da pian mansiansia so kareenan ed kongregasyon. Legan ya manasingger so anggaan, itultuloy tayon lingkoran si Jehova tan tumboken si Kristo bilang “sakey a pulok.”​—Juan 10:16.