1-2. Antoy imbaga na anghel ed saramay bibii ya linma ed lubok nen Jesus, tan antoy ingganggan nen Jesus ed sikara?

PALBANGON lad saman na Nisan 16, 33 C.E. Walay maer-ermen ya grupo na matoor a bibii ya linma ed sakey a lubok. Ditan so angiponponan ed bangkay na Katawan a Jesu-Kristo masulok lan 36 oras so apalabas. Wala ray awit dan pampabalingit tan ambalingit a larak ya usaren da komon ed bangkay, balet mankelaw ira ta kasabi da et anggapoy karga na lubok! Walay anghel ya angibaga ed sikara ya inmoli lad bilay si Jesus, tan inyarum to: “Sikatoy unona lad Galilea. Sikatoy nanengneng yod man.”​—Mat. 28:1-7; Luc. 23:56; 24:10.

² Kaalis na saramay bibii, nabet ira nen Jesus tan ingganggan to ra: “La kayo, ibaga yod saray agagik pian onla rad Galilea, tan nanengneng da ak diman.” (Mat. 28:10) Seguradon walay importantin instruksion ya iter nen Jesus ed saray disipulo to, ta sayan pantitipon so sankaunaan ya inyuksoy to kayari na inkioli to!

3-4. Akin et nibaga tayon aliwan parad saray apostol labat so ganggan a walad Mateo 28:19, 20? (Nengnengen so litrato ed apis.)

³ Basaen so Mateo 28:16-20. Diad satan ya pantitipon ya inorganisa nen Jesus, imbaga to so importantin kimey a nepeg ya sumpalen na saray disipulo to diad saman a panaon, ya pareho ed kimey ya gagawaen tayo natan. Imbaga nen Jesus: “Onla kayo sirin tan ibangat yo iray totoo ed amin a nasyon  pian magmaliw iran disipulok, . . . ya ibangat yo ran mangunor ed amin ya ingganggan kod sikayo.”

⁴ Labay nen Jesus ya manpulong so amin a papatumbok to. Aliwan saray 11 ya matoor ya apostol labat so angiteran to ed sayan ganggan. Panon tayon amta? Isipen pa, kasin saray apostol labat so wadman ed palandey ed Galilea sanen inter nen Jesus so ganggan ya ibangat iray totoo? Tandaan ya oniay imbaga na anghel ed saramay bibii: “Sikatoy nanengneng yod man [ed Galilea].” Kanian segurado ya wadman met irayan matoor a bibii. Balet aliwan satan labat. Insulat nen apostol Pablo ya si Jesus et “nampanengneng ed masulok a 500 ya agagi diad sakey a pankanawnawa.” (1 Cor. 15:6) Iner itan agawa?

5. Akin et manisia tayo ya say tutukoyen na 1 Corinto 15:6 et samay pantitipon ed Galilea ya abitla ed Mateo kapitulo 28?

⁵ Wala ray rason no akin ya duga labat ya isipen tayo ya say tutukoyen nen Pablo et say mismon pantitipon diad Galilea ya abitla ed Mateo kapitulo 28. Anto iratan? Unona, maslak ed saray disipulo nen Jesus et taga Galilea. Kanian mas matukoy ya diad palandey ed Galilea so pantitiponan na dakel a disipulo nen say diad sakey labat ya abung ed Jerusalem. Komadua, nen inmoli Jesus, sikatoy akinengneng la ed saray 11 ya apostol to diad sakey ya abung ed Jerusalem. No saray apostol labat so labay nen Jesus ya manpulong tan manbangat, imbaga to la komon itan ed sikara nen wala rad Jerusalem imbes ya paonlaen to ni ra ed Galilea, pati saramay bibii tan arum nin disipulo.​—Luc. 24:33, 36.

6. Base ed Mateo 28:20, akin ya nibagan onaplika met natan so ganggan ya ibangat iray totoo, tan panon kalaknab so pakakasumpal na satan?

⁶ Imanoen so komatlo ya importantin rason. Samay ganggan nen Jesus ya ibangat iray totoo et aliwa labat ya parad saray Kristiano ed saman a panaon. Panon tayon amta? Oniay sampot ya imbaga nen Jesus ed saray papatumbok to: “Wala ak ed sikayo ed amin ya agew anggad kaunoran a parte na sistema na mundo.” (Mat. 28:20) Nasusumpal la natan itan ya imbaga nen Jesus, ta dakdakel lay mibibiang ed kimey ya panagbangat! Isipen pa. Kada taon, ngalngali 300,000 so nababautismoan bilang Tasi nen Jehova tan magmamaliw ya disipulo nen Jesu-Kristo!

7. Antoy pantongtongan tayo, tan akin?

⁷ Dakel so iyaaralan tayoy Biblia ya onaaligwas anggad bautismo. Balet wala ray iyaaralan tayo ya manaalangan a magmaliw ya disipulo nen Kristo. Labalabay day paiyaralan, balet ag-ira onaaligwas. No walay iyaaralan mo, seguradon labay mon tulongan pian niyaplika to ray nanaaralan to tan magmaliw ya disipulo nen Kristo. Aralen tayo ed sayan artikulo no panon tayon nasabi so puso na iyaaralan tayo tan no panon tayon natulongan ya onaligwas. Akin et kaukolan tayon pantongtongan iya? Lapud nayarin onsabi panaon ya kaukolan tayo lay mandesisyon no kasin ituloy ni pangiyaaral odino itunda la.

8. Akin ya no maminsan et mairap ya sabien so puso na iyaaralan?

⁸ Labay nen Jehova ya manlingkor ed sikato iray totoo lapud sikatoy inaro da. Kanian tulongan tayo ray iyaaralan tayon natalosan ya personal iran iyaansakit nen Jehova tan inar-aro to ra. Labay tayon natalosan da ya si Jehova so “ama na saray ulila tan managprotekta na saray balon bibii.” (Sal. 68:5) No natatalosan la na saray iyaaralan mo ya inar-aro ira na Dios, nasabi so puso ra tan aroen da so Dios. Say arum balet et mairap dan awaten ya si Jehova et maaron Ama lapud agda alikna  so panangaro tan panangiyansakit na mismon ama ra. (2 Tim. 3:1, 3) Kanian legan na panaaral yo, idanet mo ray balibalin kualidad nen Jehova. Tulongan mo ra pian natalosan da ya say labay na maaron Dios tayo et nawalaan iray andi-anggaan a bilay, tan sikatoy akaparaan ya ontulong pian niwala itan ed sikara. Anto ni sarag tayon gawaen?

9-10. Anto ran publikasyon so nepeg tayon usaren diad pangiyaral tayoy Biblia, tan akin?

⁹ Usaren so libron “Antoy Ibabangat na Biblia?” tan “No Panon a Mansiansia ed Panangaro na Dios.” Im-publish irayan libro pian natulongan itayon sabien so puso na iyaaralan tayo. Singa bilang, diad kapitulo 1 na libron Antoy Ibabangat et naebatan irayan tepet: Kasin iyaansakit itayo na Dios odino maruksa ed sikatayo?, Antoy nalilikna na Dios no maniirap iray totoo?, tan Nayari kasi ya magmaliw kan kaaro nen Jehova? Say libron Mansiansia ey, antoy nitulong to? Ontulong itan pian natalosan na iyaaralan ya no iyaplika to ray prinsipyo na Biblia et magmaliw ya mas maliket so bilay to tan mas onapit ed si Jehova. Anggano  aminpigam lan inyaral ed arum irayan libro, importante nin siansia ya manparaan kan maong antis kan mangiyaral pian antam ya itukoy so topic ed pankaukolan na kada iyaaralan mo.

¹⁰ Panon to balet no say iyaaralan mo et interesado ed sakey a topic ya say kawalaan ton publikasyon et agkaiba ed Uusaren ed Panagbangat (Teaching Toolbox)? Paseseg mo ya basaen to lan bukor imay publikasyon pian nituloy yon aralen so libron Antoy Ibabangat odino Mansiansia.

11. Kapigan tayo nayarin lukasan tan sampotan so panagaral panamegley na pikakasi, tan panon tayon nipaamta ed iyaaralan ya importante itan?

¹¹ Manpikasi antis ya igapo so panaral. Mas maabig no pigaran simba ni labat kayarim ya nigapo so panangiyaral na Biblia et lukasan tan sampotan mo la itan ed pikakasi. Ipaliwawam ya natalosan tayo labat so Biblia diad tulong na masanton espiritu na Dios. Wala ray agagi ya ibabasa da ed iyaaralan da so Santiago 1:5 pian ipaamta so kaimportantian na pikakasi. Oniay nabasa ditan: “No walad sikayo so kulang na karunongan, mantultuloy komon ya onkerew ed Dios.” Insan da itepet, “Panon tayon kerewen so karunongan ed Dios?” Nayarin ibaga na iyaaralan ya diad panamegley na pampikasi ed Dios.

12. Panon mon usaren so Salmo 139:2-4 pian natalosan na iyaaralan ya sarag ton ibaga ed si Jehova so amin ya nalilikna to sano manpipikasi?

¹² Ibangat so iyaaralan no panon so manpikasi. Ipaseguro ed sikato ya labalabay nen Jehova ya dengelen iray impapuson pikakasi to. Ipaliwawam ya sarag ton ibaga ed si Jehova so amin ya nalilikna to, anggan saramay agto nibaga ed arum ya too. Diad tua, amta nen Jehova iray walad nonot tayo. (Basaen so Salmo 139:2-4.) Sarag tayo met ya pasesegen so iyaaralan tayo ya kerewen toy tulong na Dios pian nauman toy makapuy a panagnonot tan kagagawa to. Singa bilang, ompan walay abayag lan iyaaralan mo ya labalabay to ni mibiang ed saray paganon selebrasyon. Amta to ya makapuy iratan, balet ompan naliliketan nin siansia ed arum ya gagawaen ed saratan a selebrasyon. Paseseg mo ya ibaga tod si Jehova so amin ya nalilikna to tan kerewen toy tulong To pian naarawian to ray kagagawan aglabay na Dios.​—Sal. 97:10.

13. (a) Akin ya nepeg tayon imbitaan a tampol so iyaaralan ya onatendi ed Kingdom Hall? (b) Antoy gawaen tayo pian say iyaaralan et agla tanton nababaingan no miaral la?

¹³ Imbitaan a tampol so iyaaralan ya onatendi ed Kingdom Hall. No miaral so sakey ya iyaaralan na Biblia, nayarin makatulong iray narengel tan naobserbaan to pian nasabi so puso to tan onaligwas. Ipabantay so video ya Antoy Gagawaen Diad Kingdom Hall? tan imbitaan mo ya mila ed sika diad aral. Sarag mon abeten no posible. Makatulong no mangitagar kay nanduruman agagi kada no iyaralan mo. Diad ontan et nakabat to la ray arum ya agagi ed kongregasyon, kanian no miaral la et agla tanton nababaingan.

14. Antoy makatulong ed iyaaralan pian onaligwas ed espiritual?

¹⁴ Say gagala tayo et tulongan so iyaaralan tayo ya onaligwas ed espiritual. (Efe. 4:13) No labay na sakey so manpaiyaral, nayarin say manunan iisipen to et say nitulong ed sikato na panaral toy Biblia. Balet legan ya onaaralem so panangaro to ed si Jehova, ompan isipen to met la no panon ton natulongan so arum, pati saray agagi. (Mat. 22:37-39) Diad matukoy a panaon, agka nababaingan ya bitlaen ed sikato so pribilehyo tayon mandonasyon pian suportaan so kimey na Panarian.

15. Panon tayon ibangat so iyaaralan no antoy gawaen to no walay onlesan problema?

 ¹⁵ Ibangat so iyaaralan no antoy gawaen to no walay onlesan problema. Singa bilang, imbagad sika na agbautismadon manangipalapag ya iyaaralan mo a sikatoy asakitan na sakey ya agi. Imbes ya walay pilaan mo, mas maabig no ipaliwawam ed sikato no antoy ibabaga na Biblia ya nepeg ton gawaen. Nayarin palabasen to la so lingo na agi, balet no agton talaga napalabas, katongtongen to diad maong tan maaron paraan ya say gagala to et ‘napapawil’ toy maabig ya ulopan da. (Ikompara so Mateo 18:15.) Tulongan mon manparaan no antoy ibaga to. Ipanengneng mo no panon ya usaren so JW Library^® app, Giya ed Pan-research na Saray Tasi nen Jehova, tan jw.org^® pian naamtaan to ray nepeg ton gawaen ed ontan iran situasyon. No naaralan to la no panon ya resolbien iray ontan ya problema antis nin manpabautismo, mas mainomay toy mibagay ed saray agagi ed kongregasyon no bautismado la.

16. Akin et maabig so mangitagar na nanduruman agagi diad pangiyaral tayo?

¹⁶ Itagar so nanduruman agagi​—tan say manangasikaso na sirkito no bisita na kongregasyon yo—​diad panaral yo. Akin? Likud ed saray abitla niman, say sakey a rason et nayarin mas niiter na arum ya agagi so tulong ya kakkaukolan na iyaaralan mo. Singa bilang, ompan aminpiga lan sinali na iyaaralan ya itunda so pansisigarilyo to balet singa agto nayarian. Salim so mangitagar na agi ya ontan met so datin bisyo to tan aminpiga to met ya sinalin itunda. Nayarin sikato so makapangiter na praktikal iran simbawa ya kakkaukolan na iyaaralan. No agka komportablen mangikondukta na panangiyaral ya kaiba so eksperiensyadon agi, sarag mon kerewen ya sikato so mangikondukta. No mangitagar kay agagi ed panaral yo, nagunggonaan so iyaaralan mo ed eksperiensya da. Tandaan, say gagala tayo et tulongan so iyaaralan tayo ya onaligwas ed espiritual.

17-18. Antoy nepeg mon ikonsidera antis kan mandesisyon no kasin itundam lay pangiyaaral mo ed sakey a too?

¹⁷ No anggapoy pakapatnagan ya onaaligwas so iyaaralan mo, ompan kaukolan mo lan itepet ed sarilim, ‘Kasin itundak lan iyaralan?’ Antis kan mandesisyon, nepeg mon ikonsidera so abilidad na iyaaralan mo. Wala ray iyaaralan ya mas matantan so iyaligwas da nen say arum. Itepet mod sarilim, ‘Base ed situasyon na iyaaralan ko, kasin anggan panon et walay pakapatnagan ya onaaligwas?’ ‘Kasin igagapo to lan unoren odino iyaplika iray nanaaralan to?’ (Mat. 28:20) Anggano matantan so iyaaligwas to, say importante et wala ray gagawaen ton pananguman ed bilay to.

¹⁸ Panon to balet no walay abayag lan iyaaralan mo ya singa agto aapresyaen so panaaral yo? Singa bilang, ompan asumpal to lay libron Antoy Ibabangat odino ompan agapoan yo lan aralen imay libron Mansiansia balet agto nin balot asali so akiaral, pati inmatendi ed Memoryal!  Mabetbet met ya agmanpaiyaral lapud ataptapew iran rason. No ontan so situasyon, kaukolan mo lan katongtongen so iyaaralan mo. *

19. Antoy nayarin itepet mo ed sakey ya singa agto aapresyaen so panaaral toy Biblia, tan anto ray nepeg mon ikonsidera?

¹⁹ Nayarin itepet mo ed iyaaralan mo, ‘Antoy iisipen mon sankairapan ya gawaen pian magmaliw kan Tasi nen Jehova?’ Nayarin say ibaga to, ‘Labalabay koy manaral na Biblia, balet agak onloob ya Tasi nen Jehova!’ No ontan so panmoria to anta abayag met lan manaaral, wala ni kasi rason pian ituloy mo nin iyaralan? Balet posible met ya say ibaga to et say rason no akin ya ag-onaaligwas. Singa bilang, ompan iisipen to ya agto nayarian so manpulong ed kaabungan. No naamtaan moy nalilikna to, mas antam la no antoy gawaen mo pian natulongan.

20. Panon ya makatulong so Gawa 13:48 diad pandesisyon tayo no kasin ituloy odino itunda tayo lay pangiyaaral tayo ed sakey a too?

²⁰ Makapaermen ta say arum ya iyaaralan tayoy Biblia et mipara ed saray Israelita diad panaon nen Ezequiel. Oniay imbaga nen Jehova ed si Ezequiel nipaakar ed sikara: “Parad sikara et singa ka sakey a kansion na panangaro, a kinansion na sakey a marakep so boses to tan marundunong a tinogtog ed nandeles ya instrumento. Dengelen da iray salitam, balet anggapoy mangunor ed saratan.” (Eze. 33:32) Ompan nairapan tayon mangibaga ed sakey ya iyaaralan ya itunda tayo lay pangiyaaral ed sikato. Balet tandaan, “apatikeyan lay akeran panaon.” (1 Cor. 7:29) Imbes ya diad saray ag-onaaligwas ya iyaaralan so pangusaran tayoy panaon tayo, mas maabig no usaren tayo itan ed pananap na saray totoo ya “walaan na dugan kipapasen na puso parad bilay ya andi-anggaan.”​—Basaen so Gawa 13:48.

21. Anto so teksto tayo ed taon 2020, tan akin ya matukoy itan?

²¹ Say teksto tayo ed taon 2020 et ontulong ed sikatayon manpokus ed pamaaligwas na abilidad tayon mangibangat ed totoo pian magmaliw iran disipulo. Komon ta lanang tayon nonoten imay imbaga nen Jesus ed agnalinglingwanan ya pantitipon diad palandey ed Galilea: “Onla kayo sirin tan ibangat yo iray totoo . . . pian magmaliw iran disipulok, a bautismoan yo ra.”​—Mat. 28:19.