1. Antoy epekto ed sakey a kabataan ya Estudyante na Biblia nen nadngel to so sakey a paliwawa ed kombension nen 1935?

NEN 1926, abautismoan so sakey ya kabataan ya mantaon ni labat na 18. Saray atateng to et Estudyante na Biblia, say tawag ed Saray Tasi nen Jehova nensaman. Limara iran sanaagi, taloran lalaki tan duaran bibii. Legan na ibabaleg da, imbangat ira na atateng da ya manlingkor ed si Jehova a Dios tan aligen day Jesu-Kristo. Singa gagawaen na amin ya Estudyante na Biblia nensaman, sayan kabataan et mamangan na tinapay tan oniinum na alak diad tinaon a Pangdem na Katawan. Balet nen 1935, anguma-uman so ilalo ya tatalaranan na sayan kabataan lapud samay paliwawa nen Brother Joseph F. Rutherford diad sakey a kombension ed Washington, D.C., U.S.A., ya say tema to et “Say Baleg a Karaklan.” Antoy naamtaan na Saray Estudyante na Biblia ed saman ya paliwawa?

2. Anton katuaan so impalinew nen Brother Rutherford diad samay paliwawa to?

² Impaliwawa nen Brother Rutherford no siopa so tutukoyen to may “baleg a karaklan” (King James Version) odino “baleg ya ulop” a nabasa ed Apocalipsis 7:9. Diad saman ya panaon, say amta na saray Estudyante na Biblia et ontutukoy iya ed grupo na totoo ya onla met ed tawen balet ta ag-ira tanton matoor no ikompara ed saray alanaan. Panamegley na saray teksto ed Biblia, impalinew nen Brother Rutherford ya say baleg ya ulop et aliwan parad tawen, noagta sikara so arum a  karnero * nen Kristo ya makaliktar ed “baleg a kairapan” tan manbilay ira na andi-anggaan diad dalin. (Apo. 7:14) Imbaga nen Jesus: “Wala ni ray arum a karnerok, ya anggapo ed sayan pulok; nepeg ko ran awiten met, tan dengelen day boses ko, tan magmaliw iran sakey a pulok, a walaay sakey a managpastol.” (Juan 10:16) Say abitla dia ya ‘arum a karnero’ et ontutukoy ed saray matoor ya Tasi nen Jehova ya say ilalo da et manbilay ya andi-anggaan diad Paraison dalin. (Mat. 25:31-33, 46) Amtaen tayo no panon ya anguma-uman so bilay na dakel ya lingkor nen Jehova lapud satan ya balon liwawa, kaiba la imay kabataan ya abitla ed gapo.​—Sal. 97:11; Pro. 4:18.

3-4. Diad samay kombension nen 1935, antoy atalosan na nilibon agagi nipaakar ed ilalo da, tan akin?

³ Imadyin mo pay alikna na saramay inmatendi ed kombension nen oniay imbaga nen Brother Rutherford: “Nayarin onalagey so amin ya say ilalo da et manbilay na andi-anggaan diad dalin?” Unong ed sakey a brother ya inmatendi ed saman ya kombension, masulok ya kapaldua ed manga 20,000 ya audience so inmalagey. Insan imbaga nen Brother Rutherford: “Nengneng yo! Say baleg ya karaklan!” Lapud liket na amin ya wadman, inmeyag ira na makmaksil tan andukdukey so tipak da. Atalosan na saramay inmalagey ya aliwa ran parad tawen tan ag-ira alanaan na masanton espiritu na Dios. Diad tinmumbok ya agew na kombension, 840 so nampabautismo, tan karaklan ed sikara et kabiangan na arum a karnero.

⁴ Lapud saman ya paliwawa, samay kabataan ya abitlad gapo tan nilibo nin agagi so tinmunda lan mibiang ed emblema no Pangdem na Katawan. Say alikna ra et mipara ed sayan imbaga na sakey ya mapaabeban brother: “Amay Memoryal nen 1935 so sampot ya impibiang kod emblema. Atalosan ko ya aliwa ak ya parad tawen ta ag-itan impalikna ed siak na masanton espiritu nen Jehova. Say ilalok et manbilay diad dalin, tan kaiba ak ya ontulong pian magmaliw iyan paraiso.” (Roma 8:16, 17; 2 Cor. 1:21, 22) Manlapu lad saman, tuloytuloy ya dinmakel so kabiangan na baleg ya ulop tan susuportaan da so kimey na saray alanaan ya wadia nid dalin.

5. Antoy pakanengneng nen Jehova ed saramay tinmunda lan mibiang ed saray emblema ed Memoryal?

⁵ Antoy pakanengneng nen Jehova ed saramay tinmunda lan mibiang ed emblema ed Memoryal kayari na 1935? Tan anto met so pakanengneng tod saray bautismadon Tasi natan ya akibiang ed saray emblema balet atalosan da lanlamang ya aliwa ra manayan alanaan? (1 Cor. 11:28) Akibiang ed emblema so arum ya agagi ta say amta ra et para irad tawen. Balet no mapaabeba dan aminen ya alingo ira tan agla ra mibiang ed emblema, awaten ni ran siansia nen Jehova bilang kabiangan na arum a karnero, basta tuloytuloy iran manlingkor ed sikato. Anggano agla ra mangan na tinapay tan oninum na alak no Memoryal, onaatendi ni ran siansia lapud papablien day ginawa nen Jehova tan Jesus parad sikara.

6. Antoy ingganggan nen Jesus ed saray anghel?

⁶ Lapud manasingger la so baleg ya kairapan, marakep no aralen tayo so ibabaga na Apocalipsis kapitulo 7 nipaakar ed saray alanaan ya Kristiano tan say baleg ya ulop. Nabasa ed Apocalipsis 7:1-4 ya ingganggan nen Jesus iray anghel ya itultuloy dan pigilan so apatiran dagem na kadederal. Ibulos da labat itan diad dalin no atatakan la so amin ya alanaan ya Kristiano. Labay ton ibaga, apaneknekan la nen Jehova ya talagan matoor ira. Lapud katooran da, magmaliw iran arari tan saserdote diad tawen. (Apo. 20:6) No nakompleto la so 144,000 diad tawen, seguradon malikeliket si Aman Jehova, si Jesus, tan saray anghel!

7. Base ed Apocalipsis 7:9, 10, siopa ray anengneng nen Juan, tan antoy gagawaen da? (Nengnengen so litrato ed apis.)

⁷ Insan walay nikadkaduman anengneng nen Juan, sakey a “baleg ya ulop” ya akaliktar ed Armagedon. Kompara ed 144,000, sayan grupo et mas dakel tan anggapoy eksakton bilang da. (Basaen so Apocalipsis 7:9, 10.) “Akasulong ira na amputin kawes,” labay ton ibaga et nansiansia ran “andian na mantsa” ed mundo nen Satanas tan matoor ira ed Dios tan ed si Kristo. (Sant. 1:27) Iyeeyag da ya say inkiliktar da et utang da ed si Jehova tan ed si Jesus, say Kordero na Dios. Wala ray sankabembenan dan sanga na palma, a pakanengnengan ya malikeliket dan inawat si Jesus bilang say tinuro nen Jehova ya ari.​—Ikompara so Juan 12:12, 13.

8. Base ed Apocalipsis 7:11, 12, antoy reaksion na saray walad tawen nen anengneng da so baleg ya ulop?

⁸ Basaen so Apocalipsis 7:11, 12. Antoy reaksion na saray walad tawen nen anengneng da so baleg ya ulop? Insulat nen Juan ya malikeliket iran amin tan indayew da so Dios. Seguradon malikeliket si Jehova, si Jesus, saray anghel, tan say 144,000, sano nagawa la iyan propesiya tan nanengneng dan makaliktar ed baleg ya kairapan so baleg ya ulop.

9. Base ed Apocalipsis 7:13-15, antoy gagawaen la natan na baleg ya ulop?

⁹ Basaen so Apocalipsis 7:13-15. Insulat nen Juan ya say baleg ya ulop et “nilinisan da ray kawes da tan pinaputi da iratan ed dala na Kordero.” Ipapanengneng na satan ya walaan ira na malinis a konsiensia tan matunong la ra ed pakanengneng nen Jehova. (Isa. 1:18) Indedika ray bilay da, nampabautismo ira, mabiskeg so pananisia ra ed dondon bagat nen Jesus, tan maapit so relasyon da ed Dios. (Juan 3:36; 1 Ped. 3:21) Naliliketan si Jehova ed sikara kanian akaalagey irad arap na trono to tan “agew-labi iran manlilingkor ed sikato” diad dalin. Baleg so nagagawaan da ed kimey ya panagpulong tan panagbangat, tan iyuuna dad bilay da so Panarian na Dios.​—Mat. 6:33; 24:14; 28:19, 20.

10. Antoy naseguro na baleg ya ulop, tan anton sipan so nanengneng da lan nagawa?

¹⁰ Kayari na baleg ya kairapan, makaseguro so baleg ya ulop ya tuloytuloy iran asikasoen nen Jehova, ta “tarongan to ra na tolda to.” Nagawa lan siansia iyan sipan ya abaybayag da lan tatalaranan: “Punasen [na Dios] so amin a lua ed kamataan da, tan anggapo lay patey, anggapo met lay panermen tan panakis tan panotot.”​—Apo. 21:3, 4.

11-12. (a) Base ed Apocalipsis 7:16, 17, anto ran bendisyon so awaten na baleg ya ulop? (b) Antoy nepeg ya gawaen na arum a karnero no Memoryal, tan akin?

¹¹ Basaen so Apocalipsis 7:16, 17. Wala ray  lingkor nen Jehova natan ya onkukulang so naakan da lapud irap na bilay odino lapud magulo tan walay guerra diad lugar da. Say arum et impriso lapud pananisia ra. Balet amta na baleg ya ulop ya kayari dan makaliktar ed baleg a kairapan, dakdakel so itarya nen Jehova ya literal tan espiritual ya naakan. Protektaan ira nen Jehova ed “mansasnit a petang” na sanok to no deralen to la so sistema na mundo nen Satanas. Kayari na baleg ya kairapan, igiya ira nen Jesus diad “saray subol na danum na bilay [ya andi-anggaan].” Espisyal so ilalo na baleg ya ulop. Isip mo pa: Diad amin ya binilyon ya totoon nambilay diad dalin, posible ya agda lan balot nasali so ompatey!​—Juan 11:26.

¹² Misalsalamat so arum a karnero ed si Jehova tan Jesus lapud ilalo da! Tua ya aliwa ran parad tawen, balet inar-aro ira nen Aman Jehova ya singa panangaro to ed saray alanaan. Anggano mandumaan so ilalo da, pareho dan iglogloria so Dios tan si Kristo. Say sakey a paraan ya nagagawaan da itan et diad iyaatendi da ed Pangdem na Katawan.

13-14. Akin et nepeg ya onatendi so amin ed Memoryal?

¹³ Diad agano ni ran taon, manga sakey labat ed kada sanlibo ya onaatendi ed Memoryal so mibibiang ed tinapay tan alak. Diad dakel ya kongregasyon ingen et anggapoy mibibiang ed saray emblema. Karaklan ya onaatendi ed Memoryal et parad dalin. Akin balet et onaatendi ni ran siansia? Singa met itan no onatendi ka ed bansal na kaarom. Mibansal ka ta labay mon ipanengneng so panangarom tan suportam ed nobyo tan nobya. Mipadpara, say arum a karnero et onaatendi ed Memoryal ta labay dan ipanengneng so panangaro tan suporta ra ed si Kristo tan ed saray alanaan. Onaatendi met ira ta papablien dan maong so dondon bagat nen Jesus, ya lapud satan et walay ilalo dan manbilay na andi-anggaan diad dalin.

¹⁴ Say sakey nin rason no akin ya onaatendi iray arum a karnero ed Memoryal et lapud uunoren day ganggan nen Jesus. Nen inggapo nen Jesus iyan espisyal ya pangdem kaiba iray matoor ya apostol to, imbaga tod sikara:  “Itultuloy yon gawaen iya bilang pannodnonot ed siak.” (1 Cor. 11:23-26) Kanian anggad wala ni ray alanaan diad dalin, itultuloy na arum a karnero ya nodnonoten so Pangdem na Katawan. Diad tua et iyiimbita da met itan ya pantitipon ed arum.

15. Panon tayon nigloria so Dios tan si Kristo no Memoryal?

¹⁵ Diad Memoryal, niglogloria tayoy Dios tan si Kristo ed pangansion tan pampikasi tayo. Say tema na paliwawad Memoryal ed sayan taon et “Apresyam so Ginawa na Dios tan nen Kristo Parad Sika!” Diad satan ya paliwawa, seguradon lalo tayon napabli so ginawa nen Jehova tan si Kristo parad sikatayo. Legan ya ipapasa iray emblema, nipapanonot ed sikatayo so isisimbolo na satan​—say laman tan dala nen Jesus. Tan nanonotan tayoy sakripisyo nen Jehova nen imbaki toy Anak to ya ompatey pian nadondon itayo. (Mat. 20:28) Onaatendi tayod Memoryal lapud inar-aro tayoy Jehova tan say Anak to.

16. Anto ray pamparehoan na saray alanaan tan say arum a karnero?

¹⁶ Wala ray pamparehoan na saray alanaan tan say arum a karnero. Pareho iran inaro nen Jehova. Diad tua, saksakey labat so imbayar to pian nadondon ira​—say bilay na inad-aro ton Anak. Say pandumaan da labat et say ilalo da. Balet importante ya pareho iran mansiansian matoor ed Dios tan ed si Kristo. (Sal. 31:23) Tandaan met ya balanglan alanaan itayo odino kabiangan itayo na arum a karnero, ikdan itayo nen Jehova na masanton espiritu to depende ed pankaukolan tayo.

17. Antoy tatalaranan na saray alanaan ya wadia nid dalin?

¹⁷ Say ilalon manbilay ed tawen et agnisipor ed saray alanaan ya Kristiano. Inyan itan a mismo nen Jehova ed puso ra. Sankanonot day ilalo da, ipipikasi da itan, tan labalabay da lan awaten so premyo ra ed tawen. Siempre, agda ni amta natan no antoy magmaliw ya itsura da no espiritu la ra. (Fil. 3:20, 21; 1 Juan 3:2) Pero seguradon tatalaranan day panaon ya nanengneng da lay Jehova, Jesus, saray anghel, tan arum nin alanaan, tan nakaiba da la ra ed Panarian diad tawen.

18. Anto ray tatalaranan na arum a karnero?

¹⁸ Say ilalo na arum a karnero et say pambilay na andi-anggaan diad dalin, atan so sipor ya inyan nen Jehova ed puso na amin ya totoo. (Ecl. 3:11) Labalabay da lan onsabi so  agew ya mitulongan ira pian magmaliw ya paraiso so interon dalin. Eksayted la ran manpaalagey na abung, mantanem na sarili dan hardin, tan agla ra mapagpaga ya manpamilya ta amta ran agmansakit iray ananak da. (Isa. 65:21-23) Seguradon labalabay da met ya napasyar so nanduruman parte na dalin​—saray kapalandeyan, isla, tan dayat. Tan eksayted la ran aralen so dakdakel ya pinalsa nen Jehova. Balet manuna ed amin, say talagan panliketan da et amay diad ilalabas na agew et mas onaapit ira ed si Jehova.

19. Akin et espisyal ya agew so Memoryal, tan kapigan nagawa so Memoryal ed sayan taon?

¹⁹ Inikdan nen Jehova so kada dedikadon lingkor to na balibalin ilalo ed arapen. (Jer. 29:11) Say Memoryal na impatey nen Kristo et espisyal ya agew, ta diad satan et nigloria na kada sakey ed sikatayo so Dios tan si Kristo lapud ginawa ra pian makapanbilay tayo na andi-anggaan. On, say Memoryal so sankaimportantian ya pantitipon na saray tuan Kristiano. Nagawa itan no Sabado, Marso 27, 2021, kaselek na agew. Diad sayan taon, nayarin dakel ed saray onatendi ed sayan importantin pantitipon et anggapoy makasbel ed sikara. Say arum et nayarin walay pananebel ed bansa ra balet siansian onatendi ra. Ompan say arum ya agagi et gawaen da so Memoryal diad prisoan. Antokaman so situasyon tayo no Memoryal, tandaan tayo ya sankanengneng itayo nen Jehova, Jesus, saray anghel, tan saray pinaolin alanaan. Komon ta kada kongregasyon, kada grupo, tan kada sakey ed sikatayo et malikeliket ya onatendi ed Memoryal diad sayan taon!