1. Akin et nibaga tayon maslak ya totoo natan et anggapoy panangaro rad kapamilyaan da?

IMBAGA na Biblia ya diad kaunoran iran agew, maslak ya totoo et “anggapoy panangaro ra ed kapamilyaan da.” (2 Tim. 3:1, 3) Nanenengneng tayo la itan natan. Singa bilang, dakel ya pamilya so abuyak lapud nansian iray sanasawa ta abalang lay aroan da. Apektado met iray ananak da ta pakalikna ra et anggapoy mangaaro ed sikara. Wala met iray pamilya ya kompleto iran tua, pero walay kanya-kanyan mundo da. Oniay imbaga na sakey ya family counselor: “Agla mantotongtong si mommy, daddy, tan saray ananak da ta say kaarap dan lanang et computer, tablet, cellphone, o video game. Saksakey ya tua so panaayaman da pero singa ag-ira sankakabat.”

2-3. (a) Base ed Roma 12:10, siopa ray nepeg tayon aroen? (b) Antoy aralen tayo ed sayan artikulo?

² Agtayo labay ya naalig so ugali na saray totoo ed mundo. (Roma 12:2) Pabiskegen tayo sirin so panangaro tayo, aliwa labat ya diad saray kapamilya tayo noagta ontan met ed saray kaagian tayo. (Basaen so Roma 12:10.) Diad tua, nepeg tayon ituring iray agagi ya singa tayo ra kapamilya. No ontan kabiskeg so aroan tayo, mansiansia so pankakasakey ed kongregasyon tan amin tayo et maliket ya manlingkor ed si Jehova.​—Miq. 2:12.

³ Pian nipanengneng tayo iyan klase na panangaro, aralen tayo iray pigaran alimbawa ed Biblia.

4. Antoy ibabaga na Exodo 34:6 nipaakar ed panangaro nen Jehova?

⁴ Ipapaamta ed sikatayo na Biblia iray balibalin kualidad nen Jehova. Singa bilang, nabasa ditan ya “say Dios et aro.” (1 Juan 4:8) Atan ni labat ya deskripsion et labalabay tayo lay onapit ed sikato. Tan ibabaga ni ingen na Biblia ya ‘balbaleg so matoor a panangaro’ nen Jehova. (Basaen so Exodo 34:6.) Labay ton ibaga, anggapoy makapipara ed panangaro tod sikatayo!

5. Panon ya ipapanengneng nen Jehova so panangasi, tan panon tayon naalig?

⁵ Imanoen ya diad Exodo 34:6, konektado so panangaro nen Jehova ed inkamapangasi to. (Sant. 5:11) Say sakey ya paraan ya ipapanengneng toy panangasi et diad pameperdona tod saray kasalanan tayo. (Sal. 51:1) Diad Biblia, say panangasi et aglabat ontutukoy ed pamerdona. Atan met may nalilikna tayo no nanenengneng tayon maniirap o naproproblema so arum tan labalabay tayo ran tulongan. Imbaga nen Jehova ya say panangasi to et mas ni nen say nalilikna na sakey ya ina ed anak to. (Isa. 49:15) No mair-irap so situasyon tayo, nakakasian itayo nen Jehova kanian tulongan to tayo. (Sal. 37:39; 1 Cor. 10:13) Nipanengneng tayoy panangasi ed saray agagi no peperdonaen tayo ra tan agtayo mansisinti anggano asakitan da tayo. (Efe. 4:32) Balet say sakey met ya paraan pian nipanengneng tayoy panangasi et no tulongan tayo ra no ondadalan ira ed mairap iran kipapasen. No maaro tan mapangasi tayo, aaligen tayoy Jehova, say sankamaaroan ya Ama.​—Efe. 5:1.

6. Panon ya impanengneng nen Jonatan tan David ya inar-aro day sakey tan sakey?

⁶ Diad Biblia, nabasa tayon wala ray lingkor na Dios nensaman ya impanengneng day tuan panangaro anggano aliwa ran perpekto. Singa si Jonatan tan si David. Ibabaga na Biblia: “Nagmaliw a maapit a sankaaro si Jonatan  tan si David, tan sikatoy inaro nen Jonatan a singa ed sarili to.” (1 Sam. 18:1) Si David so pinili nen Jehova ya onsublay ya ari ed si Saul. Pero nainggit ya maong si Saul tan labay ton pateyey David. Balet si Jonatan ya anak nen Saul et prinotektaan toy David. Nansipanan ni ingen si Jonatan tan David ya mansiansia ran sankaaro tan manmatoor ira ed sakey tan sakey anggan antoy nagawa.​—1 Sam. 20:42.

7. Antoy sakey ya rason ya singa imposiblin magmaliw ya sankaaroy Jonatan tan David?

⁷ Makapabilib so impankaaro nen Jonatan tan David, ta no isipen tayo singa imposible ya magmaliw iran malet ya sankaaro. Akin ey? On, ta mas matatken na 30 taon si Jonatan. No arum man ya too, ompan isipen to ya baleg so pandumaan da nen David ta uga-ugaw ni tan daiset ni eksperiensya tod bilay. Pero aliwan ontan so inisip nen Jonatan. Baleg so respeto tod si David.

8. Parad sika, akin et tuan kaaro si Jonatan?

⁸ Diad tua, wala komoy rason nen Jonatan ya nainggit ed si David. Anak na ari si Jonatan, kanian sarag to komon ya ipilit ya sikato dapat so onsublay ya ari. (1 Sam. 20:31) Pero mapaabebay Jonatan tan matoor ed si Jehova. Kanian sinuportaan toy desisyon nen Jehova ya si David so onsublay ya ari. Agto trinaidor si David anggano amta to ya sikatoy busolen nen ama to lapud panmamatoor tod kaaro to.​—1 Sam. 20:32-34.

9. Panon tayon amta ya ag-impasen nen Jonatan si David ya kakompetensia?

⁹ Inar-aro nen Jonatan si David, kanian agto impasen ya kakompetensia. Makpel ya sundalo si Jonatan tan maong ya managpana. Diad pilalaban, si Jonatan tan si Saul et kabkabat ya “mas maples nen saray agila” tan “mas mabiskeg nen saray leon.” (2 Sam. 1:22, 23) Sarag pa nen Jonatan ya ilastog iratan. Balet agto itan ginawa ta aliwan atagtagey so pakanengneng tod sarili to. Pambiliban to ni ingen so pakpel nen David tan panagmatalek tod si Jehova. Diad tua, naar-aro nen Jonatan si David manlapu la nen anengneng ton tinalo nen David si Goliat. Panon tayo met ya nipanengneng so ontan ya panangaro ed saray agagi tayo?

10. Antoy labay ya ibaga na “manaaroan kayon maong manlapud puso”?

¹⁰ Bibilinen itayo na Biblia ya “manaaroan [tayon] maong manlapud puso.” (1 Ped. 1:22) Impanengneng nen Aman Jehova so alimbawa ed saya. Inar-aro to tayon maong tan ipapaseguro to ya ag-itan manguman basta matoor tayod sikato. (Roma 8:38, 39) Diad lenguahen Griego, say salitan “maong” ya inusar ed 1 Pedro 1:22 et ipasabi toy ideya ya pinaten odino iyupo-upot ni ingen so puersa. Agta tua ya no maminsan et kaukolan tayon “pinaten” odino “iyupo-upot so puersa” tayo pian nipanengneng tayoy impapuson panangaro ed saray agagi? Singa bilang no asakitan da tayo, kaukolan tayon ‘itepel so balang sakey tan gawaen so anggaay nayarian tayon pansiansiaen so pankakasakey tan kareenan.’ (Efe. 4:1-3) No ontan so gawaen tayo, agtayo manpokus ed saray lingo na agagi noagta say kamaongan da so nengnengen tayo, ta atan so nenengnengen nen Jehova ed sikara.​—1 Sam. 16:7; Sal. 130:3.

11. Akin ya no maminsan et aliwan mainomay ya ipanengneng so impapuson panangaro ed saray agagi?

¹¹ No maminsan, aliwan mainomay ya ipanengneng so impapuson panangaro ed saray  agagi, lalo la no nanenengneng tayoy lingo ra. Walay ontan ya agawa ed saray inmuunan Kristiano. Singa bilang, si Euodias tan Sintique et makuli ran nansagpot parad maong a balita kaibay Pablo. Balet wala may panaon ya ag-ira akapanpaknaan. Kanian binilin ira nen Pablo ya komon et “magmaliw a saksakey so nonot da nipaakar ed Katawan.”​—Fil. 4:2, 3.

12. Antoy nepeg tayon gawaen pian nipanengneng tayoy impapuson panangaro ed saray agagi tayo?

¹² Anto sirin so gawaen tayo pian nipanengneng tayoy impapuson panangaro ed saray agagi? Nepeg tayo ran kabaten ya maong pian mas natalosan tan naar-aro tayo ra. Aliwan saray kalahi o kaedaran ti labat so pikaaroan tayo. Si Jonatan et mas matatken na 30 taon ed si David, balet kinaaro to. Diad kongregasyon yo ey? Walay naisip mo ya mas matatken o mas ugaw nen say sika ya labay mon kaaroen? No kabaten mon maong iray kakongregasyon mo, ipapanengneng mo ya ‘inarom so amin ya agagi.’​—1 Ped. 2:17.

13. Akin et imposiblin naka-close tayo so amin ya agagi ed kongregasyon, balet antoy iwasan tayon gawaen?

¹³ No inaro tayo ray agagi, labay to kasin ibaga ya naka-close tayo ran amin? Andi, imposible itan. Normal labat ya wala ray mas naka-close mo ta dakel so pamparehoan yo. Singa bilang, kaaro nen Jesus so amin ya apostol to, balet mas asingger so liknaan tod si Juan. (Juan 13:23; 15:15; 20:2) Pero, aglabay ya ibaga na satan ya mas espisyal so trato to ed si Juan. Diad tua, nen kinerew nen Juan tan say kuya ton si Santiago ya ikdan ira nen Jesus na atagey ya posisyon ed Panarian na Dios, oniay imbaga nen Jesus: “Say iyurong ed nikawanan ko odino ed nikawigik et aliwan siak so mandesisyon.” (Mar. 10:35-40) Aligen tayoy Jesus. Anggano wala ray mas ka-close tayo ed kongregasyon, nepeg ya patas so panagtrato tayo ed amin tan anggapoy papaboran tayo. (Sant. 2:3, 4) Ta no walay  papaboran tayo, ompan naapag-apag so kongregasyon.​—Jud. 17-19.

14. Base ed Filipos 2:3, antoy makatulong pian agtayo ipasen ya kakompetensia iray agagi?

¹⁴ No ipapanengneng tayoy panangaro ed saray agagi, naiwasan tayoy kompetisyon ed loob na kongregasyon. Si Jonatan et agto impasen ya kakompetensia toy David tan agto impilit ya sikato so magmaliw ya ari. Aligen tayoy Jonatan. Agtayo ipapasen ya kakompetensia iray agagi tan agtayo naiinggit ed sikara no walay abilidad da ya anggapod sikatayo. Imbes, ‘magmaliw tayon mapaabeba, ya ipasen tayon mas atagey so arum nen say sikatayo.’ (Basaen so Filipos 2:3.) Tandaan, kada sakey ed sikatayo et walay nitutulong tod kongregasyon. No mapaabeba tayo, mas nanengneng tayo ray kamaongan na saray agagi tan napakiwas itayon aligen so balibalin alimbawa ra.​—1 Cor. 12:21-25.

15. Antoy naaralan mo ed eksperiensya nen Tanya tan say pamilya to?

¹⁵ No walay aliwliwan nagawad bilay tayo, uusaren nen Jehova iray agagi tayo pian ontulong tan ipaliknan walay mangaarod sikatayo. Imanoey agawad si Tanya tan ed taloran anak to kayari dan inmatendi ed sesyon na Sabado ya 2019 “Say Aro Agbalot Mangangga!” ya Internasyonal a Kombension diad United States. Oniay inistorya nen Tanya ya agawa: “Nen pasempet kami lad hotel, walay luganan ya binmangga ed kotse mi. Anggapo met so arisgo ed sikami, balet mannerbiyos kamin pinmaway ed kotse tan ameneng kamin akaalagey ed gilig na highway. Nagunoyan et walay laki ya mankawey tan isisinyas tod sikami ya diman kami nin magano ed kotse to. Kaagian  tayo met manaya ya inmatendi ed kombension. Tan wala met so limaran delegate ya nanlapud Sweden ya tinmunda. Saramay sister et nilakap dan malmalet imay ana’kon bii tan pati siak. Aman so nampakalma ed sikami! Imbagak ed sikara ya OK kami labat tan anggan onalis la ra, balet agda kami tinaynan. Anggano wadtan la ray paramedics, agni ran siansia inmalis tan sinegurado da ya anggapo lay panaburidoan mi. Aliklikna min maong so panangaro nen Aman Jehova. Lapud sayan agawa, mas naar-aro mi ray agagi tan si Aman Jehova.” Sika ey? Walay nanonotan mon agawa ed bilay mo ya kakkaukolan moy tulong tan walay agi ya maar-aron tinmulong ed sika?

16. Akin et importantin ipanengneng tayoy impapuson panangaro ed sakey tan sakey?

¹⁶ Dakel so rason no akin ya importantin ipanengneng tayoy impapuson panangaro ed sakey tan sakey. Napapabiskeg tayo ray agagi lalo la no walay dadalanen dan problema. Makakatulong tayo met pian napansiansiay pankakasakey tayo. Tan nipapanengneng tayo ya tuan disipulo itayo nen Jesus kanian nasagyat tayoy arum ya manlingkor met irad si Jehova. Tan say sankaimportantian, nirarayew tayoy Jehova, “say Ama na maaron panangasi tan say Dios na amin a ligliwa.” (2 Cor. 1:3) Komon ta gawaen tayoy anggaay nayarian tayon ipanengneng so impapuson panangaro!