1. Singa si Arin David, antoy nitetepet tayo no maminsan?

LABAY tayon amin so mareen ya bilay. Anggapo tay toon labay toy naproblema. Balet no maminsan, talagan agtayo naiwasan so manpaga. Kanian ompan nitepet tayo met imay intepet nen Arin David ed si Jehova ya, “Anggad kapigan so panaburidok, tan panermen na pusok?”​—Sal. 13:2.

2. Antoy pantongtongan tayo ed sayan artikulo?

² Tua, walan-wala ray pampapagaan tayo balet walan-wala met so nagawaan tayo pian agtayo masyadon manaburido. Diad sayan artikulo, amtaen tayo no anto ray posiblin pakaaburidoan tayo. Insan tayo pantongtongan so anemiran sarag tayon gawaen pian mansiansia tayon kalmado no wala ray problema tayo.

3. Anto ray panaaburidoan tayo, tan kasin kontrolado tayo iratan?

³ Dakdakel so nayarin pakaaburidoan tayo, tan agtayo kontrolado so arum ed saratan. Alimbawa, anggapoy nagawaan tayo ed ibibili na sasaliwen, singa say naakan, kawes, tan renta na abung. Agtayo met kontrolado iray katrabaho odino kaklase tayo​—ompan tuksoen da tayon mantila, mantakew, odino manggaway imoral. Tan agtayo met napatunda iray krimen ed lugar tayo. Wala ray ontan ya problema ta ag-uunoren na totoo iray prinsipyo ed Biblia. Sakey ni, si Satanas so dios na  sayan mundo, tan labay to ya nadaeg itayo na “saray kapagaan ed sayan sistema” pian ontunda tayo lan manlingkor ed si Jehova. (Mat. 13:22; 1 Juan 5:19) Agtayo la sirin pankelawan ya amayamay so problema natan.

4. Antoy epekto no mapagpaga tayo?

⁴ No mapagpaga tayo, ompan puro negatibo lay sankanonot tayo. Singa bilang, no melmelag so nanaalmo tayo, ompan isipen tayo ya agtayo nasaliw iray pankaukolan na pamilya tayo. No mansakit tayo, ompan aburido tayo ya agtayo la makaloob ed trabaho ya anggad nasisante tayo la. Ompan iisipen tayo met ya agtayo makapanmatoor ed Dios no walay onsabin tukso. Asingger lan usaren nen Satanas iray onsusuporta ed sikato pian pairapen iray totoo na Dios, kanian ompan panaaburidoan tayo no antoy gawaen tayo no onsabi la itan. Duga kasi ya pampagaan tayo iratan?

5. Antoy labay ya ibaga nen Jesus ed bilin to ya: “Agkayo la mapagpaga”?

⁵ Amta tayo imay bilin nen Jesus ed saray papatumbok to ya: “Agkayo la mapagpaga.” (Mat. 6:25) Kasin say labay ton ibaga et aglan balot manpaga iray lingkor na Dios? Andi. Diad tua wala ray matoor ya lingkor nen Jehova nensaman ya nanaburido met, balet agnakal so pabor nen Jehova ed sikara. * (1 Ara. 19:4; Sal. 6:3) Papaseguroan itayo nen Jesus diad satan ya imbaga to. Agto labay ya pampagaan tayon maong iray pankaukolan tayo, ta ompan naapektoan laingen so panaglingkor tayo ed Dios. Anto sirin so gawaen tayo no napapagaan tayo?​—Nengnengen so kahon ya “ No Panon Tayon Iyaplika Itan.”

6. Base ed Filipos 4:6, 7, antoy gawaen tayo pian mansiansia tayon kalmado anggano walay ambelat ya problema tayo?

⁶ (1) Naynay ya manpikasi. No walay ambelbelat ya problemam, onlemew so liknaan mo no manpikasi ka ed si Jehova. (1 Ped. 5:7) Say sakey a paraan ya ebatan toy pikakasim et iter toy “kareenan na Dios a palumbasan toy amin a pakatalos.” (Basaen so Filipos 4:6, 7.) Iter tod sika so masanton espiritu to pian onkalma ka tan ondeen so nonot mo.​—Gal. 5:22.

7. Anto ray tandaan tayo no manpipikasi tayo ed si Aman Jehova?

⁷ No manpipikasi kad si Jehova, ibagam ed sikato so amin ya naliliknam. Espisipikom ya ibaga no antoy problemam, tan no antoy epekto tod sika. No walay solusyon na problemam, kerew kad si Jehova na karunongan pian naalmom itan ya solusyon tan ipikasim ya ikdan to ka met na biskeg pian nagawaan mo itan. Pero no anggapo lan talagay nagawaan mo, ipikasim ed si Jehova ya tulongan to kan agla manaburidon maong. No espisipiko so pikakasim, mas mainomay mon nanengneng so ebat nen Jehova. Panon to balet no ag-ebatan ya tampol nen Jehova iray pikakasim? Agka onsasawan manpikasi. Labay nen Jehova ya espisipiko ka ed saray pikakasim, balet labay to met ya agka ontutundan onkerew na tulong ed sikato.​—Luc. 11:8-10.

8. Antoy agtayo lilingwanan no manpipikasi tayo?

⁸ No manpipikasi kad si Jehova, aliwan puro problema labat so ibagam. Agmo met lilingwanan so misalamat. Anggano nantatabonan lay problema, maabig no sansakeyen tayon bitlaen tan pisalamatan iray bendisyon  na Dios ed sikatayo. No maminsan, agtayo la amtay ibaga tayo ed si Jehova ta nanlalaok lay nalilikna tayo. Balet tandaan ya ebatan nen Jehova so pikakasim, anggan say ibagam labat et ‘Aman Jehova, tulongan mo ak!’​—2 Awa. 18:31; Roma 8:26.

9. Antoy gawaen tayo pian agtayo ontakot?

⁹ (2) Manmatalek ed karunongan nen Jehova, aliwan diad sarilim. Nen panaon nen propetan Isaias, natatakot iray totood Juda ta lusoben la ra na saray Asiryano. Apagaan iran maong tan agda labay so nasakop kanian kinmerew iray tulong ed Ehipto. (Isa. 30:1, 2) Pinasakbayan ira nen Aman Jehova ya aliway pansumpalan da no manmatalek irad Ehipto. (Isa. 30:7, 12, 13) Imbaki nen Jehova si Isaias pian ibaga ed saray totoo To no antoy nepeg dan gawaen pian ag-ira ontakot. Imbaga to: “Say biskeg yo et akadepende ed pansiansia yon kalmado tan pangipatnag yoy panagmatalek.”​—Isa. 30:15b.

10. Diad anto ran situasyon ya nipanengneng tayo ya talagan manmamatalek tayod si Jehova?

¹⁰ Panon tayon nipanengneng ya talagan manmamatalek tayod Aman Jehova? Isip mo pa irayan situasyon. Singa bilang, panon to no walay nan-offer ed sika na trabaho ya baleg so sueldo, balet ta upoten toy oras mo tan apektoen toy panaglingkor mod si Jehova? Odino panon to no walay katrabahom ya manggusto ed sika, balet aliwan bautismadon Tasi? Odino panon to no taktakoten ka na pamilyam tan ibaga ran: “No agka onekal ed satan ya relihyon, itakwil mi ka.” Aliwan mainomay so mandesisyon ed ontan iran situasyon, balet makaseguro ka ya igiya ka nen Jehova pian duga so desisyon mo. (Mat. 6:33; 10:37; 1 Cor. 7:39) Balet say tepet: Kasin manmatalek ka ed si Jehova tan unoren moy panangigiya to?

11. Anto ran salaysay ed Biblia so aralen tayo pian mansiansia tayon kalmado anggano wala ray onsumpa ed sikatayo?

¹¹ (3) Makaaral ed saray maong tan makapuy ya alimbawa. Nanengneng ed dakel ya salaysay na Biblia ya importante so pansiansian kalmado tan panmatalek ed si Jehova. Aral mo irayan salaysay tan imanom no antoy akatulong ed saray lingkor na Dios pian mansiansia ran kalmado anggano wala ray onsusumpad sikara. Singa bilang, nen saray apostol et ingganggan na korte na saray Judio ya ontunda la ran manpulong, ag-ira tinmakot. Imbes, oniay makmakpel dan imbaga: “Nepeg min unoren so Dios bilang manuley imbes a saray totoo.” (Gawa 5:29) Anggan sanen nilelewet da ra, kalmado ni ran siansia. Akin ey? On ta amta ra ya kaiba day Jehova tan napapaliket da lapud katooran da. Kanian ag-ira tinmundan nampulong. (Gawa 5:40-42) Ontan met so impanengneng na disipulon si Esteban. Anggano amta to ya asingger da lan pateyen, kalmado nin siansia. Anggan saray kalaban et anengneng da ya say lupa to et “singa lupay anghel,” ta kakkalmado. (Gawa 6:12-15) Akin et kakkalmado si Esteban? On ta amta to ya naliliketan si Jehova ed panmamatoor to.

12. Base ed 1 Pedro 3:14 tan 4:14, akin et maliket tayo nin siansia anggano pairapen itayo na saray kalaban?

¹² Kombinsido iray apostol ya kaiba ray Jehova ta inikdan to ra na pakayarin manggawa na saray milagro. (Gawa 5:12-16; 6:8) Tua, anggapo lay iikdan nen Jehova natan na pakayarin manggaway milagro, balet inter tod sikatayo so Salita to. Ditan et nabasa tayo ya no bilang ta manirap tayo lapud gagawaen tayoy duga, napapaliket tayo so Dios tan walad sikatayo so espiritu to. (Basaen so 1 Pedro 3:14; 4:14.) Kanian imbes ya say isipen tayo  et no antoy gawaen tayo no bilang pairapen itayo na saray kalaban, say pampokusan tayo et no panon tayon napabiskeg so panagmatalek tayod si Jehova. Aligen tayo iray disipulo nen inmunan siglo. Manmatalek tayo ed sayan sipan nen Jesus: “Iter kod sikayo iray salitan ibaga yo tan say karunongan, ya agnayarian a kontraen odino suppiaten na amin ya onsusumpad sikayo.” Tan oniay impaseguro to: “Diad pansungdo yo et niliktar yoy bilay yo.” (Luc. 21:12-19) Tandaan mo met ya no bilang ompatey ka lapud katooran mod si Aman Jehova, agton balot lingwanan so anggan sankamelagan ya detalye nipaakar ed sika pian napaoli to ka.

13. Akin et maabig no aralen tayo met so agawa ed saramay agnansiansian kalmado tan agnanmatalek ed si Jehova?

¹³ Makaaral tayo met ed saramay agnansiansian kalmado tan agnanmatalek ed si Jehova. Aralen tayo sirin no antoy agawa ed sikara pian agtayo naulit so lingo ra. Singa bilang, diad bandad gapo na impanuley nen Arin Asa diad Juda, nilusob ira na sakey milyon ya sundalo, balet nanmatalek si Arin Asa ed si Jehova kanian analo ra. (2 Awa. 14:9-12) Balet diad inlabas na panaon, nen nilusob ira na mas melag ya armada nen Arin Baasa na Israel, imbes ya manmatalek lamet komon si Asa ed si Jehova, binayaran toy puersa militar na Sirya pian tulongan da. (2 Awa. 16:1-3) Tan nen asingger lan ompatey lapud walay graben sakit to, sikatoy inmasingger ed saray managtambal imbes ya onkerew na tulong ed si Jehova.​—2 Awa. 16:12.

14. Antoy naaralan tayo ed lingo nen Asa?

¹⁴ Diad gapo, kada no walay problema nen Asa, si Jehova so naynay ya aasinggeran to. Balet ag-abayag, sikatoy anguman. Imbes ya onkerew na tulong ed Dios, nanmatalek lad sarili to. No nengnengen, singa maong met so resulta nen nampatulong si Asa ed saray Siryano. Balet temporaryo labat so deen ed Juda. Oniay mensahe nen Jehova ed si Asa ya impasabi nen propetan Hanani: “Lapud nanmatalek ka ed ari na Sirya tan agka nanmatalek ed si Jehova a Dios mo, say armada na ari na Sirya et akablos ed limam.” (2 Awa. 16:7) Antoy naaralan tayo ed satan? Manalwar tayo ta ompan agtayo naliklikas ya sobra la manayay talek tayod sarili tayo tan agtayo la onkonsulta ed Biblia pian naamtaan so panlabayan nen Jehova. Anggano bilang kakkaukolan tayo lay mandesisyon a tampol, kaukolan ya kalmado tayo labat tan manmatalek tayod si Jehova. Seguradon tulongan to tayo pian duga so desisyon tayo.

15. Antoy marakep ya gawaen no manbabasa tayoy Biblia?

¹⁵ (4) Man-memorize na saray teksto ed Biblia. No wala ray nabasam ya teksto ed Biblia ya importante so mansiansian kalmado tan manmatalek ed si Jehova, marakep no i-memorize mo iratan. Makatulong no basaen mon maksil odino isulat mo, insan mo pawilpawilen ya basaen. Nensaman, ingganggan nen Jehova si Josue ya lanang ton dalepdepen so libro na Ganggan pian ag-ontakot, magmaliw ya marunong, tan makpel ton nidaulo iray totoo na Dios. (Jos. 1:8, paimanod leksab, 9) Diad tua, amayamay so teksto ed Biblia ya makatulong pian onkalma ka tan ondeen so nonot mo no nanaaburido odino natatakot ka.​—Sal. 27:1-3; Pro. 3:25, 26.

16. Panon ya uusaren nen Jehova so kongregasyon pian mansiansia tayon kalmado tan mas manmatalek tayod sikato?

¹⁶ (5) Miulop ed saray agagi. Uusaren nen Jehova iray agagi tayo pian natulongan itayon mansiansian kalmado tan mas manmatalek ed sikato. Diad saray aral et napapaseseg  tayo ed saray paliwawa, saray komento na agagi, tan diad piistoryaan tayod sikara. (Heb. 10:24, 25) Onlemew met so liknaan tayo no ibaga tayod saray pantitiwalaan tayon kaaro ed kongregasyon iray problema tayo. Makatulong iray “maabig a salita” na kaaro pian ombiskeg tayo.​—Pro. 12:25.

17. Base ed Hebreo 6:19, panon ya makatulong so ilalo tayo ed arapen pian mansiansia tayon kalmado anggano wala ray problema?

¹⁷ (6) Lanang mon nonoten so ilalo ed arapen. Say ilalo tayo et singa “angkla” na bilay tayo. Ontulong itan pian kalmado tayo labat anggano onsabi ni ray singa bagyon problema. (Basaen so Hebreo 6:19.) Lanang mon nonoten so sipan nen Jehova ya diad arapen et anggapo lan balot so panaburidoan mo. (Isa. 65:17) Imadyin mo ya wala ka lad Paraiso, ya ditan et mareen tan mainawa lay bilay. (Miq. 4:4) Ombiskeg so pananisiam ed saratan ya sipan no ibagam itan ed arum. Kanian mankuli ka ed kimey ya panagpulong tan panagbangat. No ontan so gawaen mo, ‘say ilalom et magmaliw a segurado anggad sampot.’​—Heb. 6:11.

18. Antoy seguradon nagawa ed arapen, tan panon tayon nasarag itan?

¹⁸ Legan ya manasingger so anggaan na sayan sistema na mundo, seguradon mas ondakel iray subok ya arapen tayo. Ontulong so teksto tayo parad taon 2021 pian nasarag tayo iratan tan mansiansia tayon kalmado, aliwan lapud sarili tayon biskeg, noagta lapud manmamatalek tayo ed si Jehova. Kanian diad sayan taon, ipanengneng tayod kabibilay tayo ya talagan manisia tayo ed sayan imbaga nen Jehova: “Say biskeg yo et akadepende ed pansiansia yon kalmado tan pangipatnag yoy panagmatalek.”​—Isa. 30:15.