1. Antoy epekto ed sika na panangaro na Dios?

INSULAT nen apostol Juan ya “say Dios et aro.” (1 Juan 4:8) Antiktikey labat itan ya insulat to, pero makabkabaliksan. Ipapanonot na satan ya say Dios et aliwa labat ya Lapuan na bilay, noagta Lapuan met na aro. Lapud inar-aro itayo nen Aman Jehova, maligen so liknaan tayo tan maliket so bilay tayo.

2. Base ed Mateo 22:37-40, anto so duaran sankaimportantian ya ganggan, tan akin ya no maminsan et nairapan tayon unoren imay komadua?

² Basaen so Mateo 22:37-40. Obligasyon na amin a Kristiano ya ipanengneng so panangaro lapud ingganggan itan nen Jehova. No kabkabat tayoy Jehova, main-inomay tayon unoren imay unonan ganggan. Siempre ta perpektoy Jehova; maar-aro tan maas-asikason Dios. Balet ompan nairapan tayon unoren imay komaduan ganggan. Akin ey? On ta aliwan perpekto iray kapara tayon totoo, anggan saray agagi. Kanian no maminsan et nasakitan da tayo ed ibabaga odino gagawaen da. Amta itan nen Jehova, kanian impaisulat tod Biblia iray bilin no panon tayon ipanengneng so panangaro ed sakey tan sakey, tan no akin ya kaukolan tayon gawaen itan. Sakey ed saray inusar nen Jehova ya mangisulat nipaakar ed aro et si Juan.​—1 Juan 3:11, 12.

3. Antoy indanet nen Juan ed saray sulat to?

³ Diad saray sulat nen Juan, aminpigapiga ton binitla ya kaukolan ya ipanengneng na saray Kristiano so panangaro. Diad tua, ed amin ya nansulat na bilay nen Jesus, si Juan so sankarakelay imbaga nipaakar ed panangaro. Manga 100 lay taon to  nen insulat toy libron Juan, pati say Unona, Komadua, tan Komatlon Juan. Nabasa tayo ed sarayan libro ya importantin ipanengneng tayo so aro ed amin ya gagawaen tayo. (1 Juan 4:10, 11) Balet diad tua, anggan si Juan et inaral to met no panon ton nipanengneng so panangaro.

4. Diad anto ran inkagawa ya ag-impanengneng nen Juan so panangaro?

⁴ Nen medyo ugaw ni Juan, wala ray panaon ya agto impanengneng so panangaro. Singa bilang, aminsan nen paarap si Jesus ed Jerusalem kaiba iray disipulo to, say dinalan da et diad Samaria tan kaukolan day napanpundoan. Balet diad samay nakar dan baryo, anggapoy nampatuloy ed sikara. Antoy reaksion nen Juan? Imbaga tod si Jesus ya labay ton papelagen so apoy manlapud tawen pian naupot so interon baryo! (Luc. 9:52-56) Aminsan met et walay ginawa nen Juan ya ag-agustoan na saray kapara ton apostol. Sikato tan say kuya ton si Santiago et sinugsogan day ina ra ya mitongtong ed si Jesus pian ikdan to ra na atagey a posisyon ed Panarian. Asyodotan iray arum ya apostol nen naamtaan da itan! (Mat. 20:20, 21, 24) Balet, anggano wala ray ontan ya lingo nen Juan, inar-aro nin siansia nen Jesus.​—Juan 21:7.

5. Antoy aralen tayo ed sayan artikulo?

⁵ Diad sayan artikulo, aralen tayo so alimbawa nen Juan tan no anto ray insulat to nipaakar ed panangaro. Legan tayon aaralen iratan, naamtaan tayo no panon tayon ipanengneng so panangaro ed saray agagi. Tan aralen tayo met no antoy nepeg ya gawaen na saray ama pian nipanengneng dan inaro day pamilya da.

6. Panon tayon amta ya inar-aro itayo nen Jehova?

⁶ No nabibitla so salitan aro, maslak et ikokonekta tayon tampol itan ed emosyon. Balet tandaan tayo ya say tuan aro et aliwa labat ya emosyon, noagta nepeg met ya nanengneng diad gawa. (Ikompara so Santiago 2:17, 26.) Singa bilang, amta tayo ya inaro itayo nen Jehova. (1 Juan 4:19) Diad Biblia, wala ray nabasa ya pakapatnagan ya inar-aro to tayo. (Sal. 25:10; Roma 8:38, 39) Balet prinuebaan to met itan ed gawa. Insulat nen Juan: “Diad saya et nipatnag so panangaro na Dios nipaakar ed sikatayo, ya imbaki na Dios so bogbogtong ya Anak to diad mundo pian nagamoran tayoy bilay diad panamegley to.” (1 Juan 4:9) Imbaki nen Jehova so inar-aro ton Anak pian manirap tan ompatey parad sikatayo. (Juan 3:16) Atan lay sankabiskegan ya prueba ya inar-aro itayo nen Jehova.

7. Panon ya impanengneng nen Jesus ya inar-aro to tayo?

 ⁷ Maar-aro met si Jesus. Imbaga tod saray disipulo to ya inar-aro to ra. (Juan 13:1; 15:15) Tan impanengneng to met diad gawa no panon kabiskeg so panangaro tod sikara tan ed sikatayo. Imbaga to: “Anggapo lay walaan na mas baleg a panangaro nen saya, a say sakey et iter toy bilay to parad kakaaro to.” (Juan 15:13) No iisipen mo ray ginawa nen Jehova tan Jesus parad sikatayo, antoy epekto tod sika?

8. Antoy ibabaga na 1 Juan 3:18 ya gawaen tayo?

⁸ Ipapanengneng tayon inaro tayoy Jehova tan Jesus no uunoren tayo ra. (Juan 14:15; 1 Juan 5:3) Sakey ed saray ganggan nen Jesus et manaaroan tayo. (Juan 13:34, 35) Agtayo labat ibabaga ed saray agagi ya inar-aro tayo ra, ipanengneng tayo met itan ed gawa. (Basaen so 1 Juan 3:18.) Diad anto ran paraan ya nipanengneng tayo ya talagan inaro tayo ra?

9. Lapud panangaro, antoy ginawa nen Juan?

⁹ Antis ya nagmaliw a disipulo si Juan, kaiba toy ama to ed panagsigay. Atan so negosyo na pamilya ra. Balet tinaynan to itan tan inusar to lay bilay to pian manpulong tan manbangat nipaakar ed si Jehova tan Jesus. Satan ya desisyon to et walay kaiba ton sakripisyo. Asali toy apairap, tan nen manga 96 C.E. nen masiken lay Juan, sikatoy inyakar ed arawrawin isla. (Gawa 3:1; 4:1-3; 5:18; Apo. 1:9) Anggano walad prisoan, sankanonot to nin siansia iray agagi. Singa bilang, nen walad isla na Patmos, insulat to may pasingawey ya anengneng to tan impawit to itan ed saray kongregasyon pian naamtaan da “no anto ray magano lan nagawa.” (Apo. 1:1) Tan nen nibulos la, mapatnag ya insublay ton insulat so Ebanghelyo na bilay tan ministeryo nen Jesus. Insulat to met so Unona, Komadua, tan Komatlon Juan pian napaseseg iray agagi. Panon mon naalig so inkamasakripisyo nen Juan?

10. Panon mon nipanengneng ya inarom so kaparam ya too?

¹⁰ Nipanengneng mo ya inarom so kaparam ya too diad saray desisyon mod bilay. Labay nen Satanas ya upoten moy panaon tan biskeg mo ed pananap na kuarta tan manpursige ka pian irayew ka na arum. Duma balet iray tuan Kristiano, akaparaan iran mansakripisyo pian mas dakel so panaon dan manpulong tan manbangat, diad ontan et nakabat na totoo si Jehova. Wala ra ingey agagi ya nampayunir pian nagawaan da itan.

11. Panon ya ipapanengneng na saray Kristiano so panangaro da ed si Jehova tan ed saray agagi ra?

¹¹ Dakel ya Kristiano natan so full-time ed trabaho pian nalegpet day pamilya ra. Anggaman ontan, sarayan matoor ya agagi et susuportaan day organisasyon na Dios diad paraan ya sarag da. Singa bilang, ontutulong ira no walay kalamidad, say arum et manboboluntaryo ed panagpaalagey na Kingdom Hall tan arum ni ran pasilidad, tan agda lilingwanay mandonasyon pian nasuportaan day sankamundoan a kimey. Gagawaen da iraya lapud inaro day Dios tan say kapara dan too. Say sakey met a paraan ya ipapanengneng tayon inaro tayo ray agagi et diad iyaatendi tayod aral tan pankomento. No maminsan anggano naksawan tayo, mimiaral tayo nin siansia. Tan lalabanan tayoy nerbiyos tayo pian makapankomento tayo. Amin tayo et walay kanya-kanyan problema, pero gagawaen tayoy anggaay nayarian tayon mamaseseg antis odino kayari  na aral. (Heb. 10:24, 25) Misalsalamat tayon maong ed amin ya pansasagpot na saray kaagian tayo!

12. Anto ni ginawa nen Juan pian nipanengneng ton inaro to ray agagi?

¹² Aliwa labat ya puro komendasyon so insulat nen Juan ed saray agagi. Binilin to met ira ta inaro to ra. Singa bilang, kinomendaan ira nen Juan lapud panmamatoor da, balet diretsaan to met iran binilin nipaakar ed pankasalanan. (1 Juan 1:8–2:1, 13, 14) Ontan met natan, importantin komendaan tayo ray agagi ed saray maong ya nagagawaan da. Balet no nalilikas tayon aliwa lay aarapen na sakey ya agi, nipanengneng tayon inaro tayo no bilinen tayo. Tua, aliwan mainomay itan ta kaukolay pakpel pian nabilin moy kaarom, balet ibabaga na Biblia ya say tuan sankaaro et “patataremen” o ipepetek day sakey tan sakey.​—Pro. 27:17.

13. Antoy agtayo nepeg ya gawaen?

¹³ Say sakey met ya paraan pian nipanengneng tayon inaro tayo ray agagi et no agtayon tampol onsyosyodot no walay imbaga ra ya agtayo agustoan. Isipen pa imay aminsan ya agawa nen wadiad dalin si Jesus. Imbaga tod saray disipulo to ya kaukolan dan kanen so laman to tan inumen so dala to pian nawalaan iray bilay ya andi-anggaan. (Juan 6:53-57) Abigbigla tan asyodotan so dakel a disipulo kanian agla ran balot akiulop ed sikato. Balet aliwan ontan so ginawa na saray matoor ya kakaaro nen Jesus, kaiba lay Juan. Agda tinaynan si Jesus. Diad tua, agda pa met atalosan so imbaga to tan ompan abigla met ira. Balet ag-ira mansyodot tan agda inisip ya aliwa lay ompapaway ed sangi to. Imbes, nanmatalek irad si Jesus, ta amta ran tuan lanang so ibabaga to. (Juan 6:60, 66-69) Balibali no aligen tayoy alimbawa ra. Agtayo onsyosyodot ya tampol no walay nibaga na kaaro tayo ya agtayo agustoan. Ompan duma labat so atalosan tayo. Mas maabig no tepetan tayo no anton talagay labay ton ibaga.​—Pro. 18:13; Ecl. 7:9.

14. Akin et agtayo nepeg ya busolen iray agagi?

¹⁴ Diretsaan met ya imbaga nen Juan ya agtayo bubusolen iray agagi. No agtayo unoren itan ya bilin, ompan agtayo naliklikas ya uusaren itayo la manaya nen Satanas pian nagaway labay to. (1 Juan 2:11; 3:15) Ontan so agawa ed arum ya Kristiano nen inmunan siglo. Labay nen Satanas ya naderal so pankakasakey da, kanian nanggaway paraan  pian manbubusolan ira. Diad samay panaon ya ginawa nen Juan iray sulat to, wala ray akaloob ed kongregasyon ya singa Satanas so ugali da. Sakey ed saratan et si Diotrefes. Wala ray ginawa to pian naderal so pankakasakey na kongregasyon. (3 Juan 9, 10) Anggapoy respeto to ed saray ibabaki na mananguley ya ulop. Sinali to ingen ya ekalen ed kongregasyon iramay manasangkaili ed sikara. Talagan mamaong! Labay nen Satanas ya naderal met so pankakasakey tayo natan. Agtayo labay ya nagawa itan. Kanian imbes ya manbubusolan tayo, pabiskegen tayoy sakey tan sakey.

15. Antoy nepeg ya tandaan na sakey ya ulo na pamilya?

¹⁵ Say sakey ya paraan a nipanengneng na ama ya inaro toy pamilya to et diad pangitarya toy materyal ya pankaukolan da. (1 Tim. 5:8) Balet nepeg ton tandaan ya say manunan obligasyon to et say pangasikaso tod espiritualidad da. (Mat. 5:3) Makaaral iray ulo na pamilya ed ginawa nen Jesus. Base ed Ebanghelyo nen Juan, anggano manpapanabos lay Jesus ed panamairapan ya poste, say sankanonot to nin siansia et say pamilya to. Diad saman et akaalagey si Juan ed abay nen Maria ya ina nen Jesus. Anggaman pinasya lay sakit ya nalilikna nen Jesus, pinilit toy mansalita pian nibilin toy Maria ed si Juan. (Juan 19:26, 27) Tua, wala ray agagi nen Jesus ya seguradon nitarya da met so materyal ya pankaukolan nen Maria, balet diad saman et mapatnag ya anggapo nid sikara so disipulo to. Kanian aliwa labat lan materyal ya pankaukolan nen Maria so sankanonot nen Jesus. Sineguro to met ya walay mamaseseg ed ina to pian makapantultuloy ya manlingkor ed si Jehova.

16. Anto ray responsabilidad nen Juan?

¹⁶ Dakel so responsabilidad nen Juan. Bilang sakey ya apostol, indaulo toy panagpulong a kimey. Mapatnag ya wala met so asawa to, kanian kaukolan ton itarya so materyal tan espiritual ya pankaukolan na pamilya to. (1 Cor. 9:5) Antoy naaralan na saray ama ed si Juan?

17. Panon ya nipanengneng na saray ama ya inaro day pamilya da?

¹⁷ No say sakey ya brother et pamilyado, mas dakel so responsabilidad to. Singa bilang, kaukolan toy mankuli ed trabaho pian agnabalaw so ngaran nen Jehova. (Efe. 6:5, 6; Tito  2:9, 10) Ompan walay responsabilidad tod kongregasyon, singa say pan-shepherding ed saray agagi tan pangidaulo ed panagpulong. Anggano wala ray ontan ya responsabilidad to, kaukolan ton iprayuridad so pangiyaral ed saray ananak to. Regular to met ya idaulo so panagdayew na pamilya ra. Obligasyon to ya iter so materyal, emosyonal, tan espiritual ya pankaukolan na pamilya to. Seguradon pisalsalamatan na asawa tan ananak to so amin ya gagawaen to parad sikara!​—Efe. 5:28, 29; 6:4.

18. Kombinsido si Juan ed anto?

¹⁸ Andukey so impanbilay nen Juan tan amayamay so agawa ed bilay to. Nanduruman subok so inarap to balet agkinmapuy so pananisia to. Lanang ton uunoren si Jesus, kaiba la may ganggan ya aroen iray agagi. Lapud maunor si Juan, kombinsido ya sikatoy tulongan nen Jehova tan Jesus pian nasarag toy antokaman ya subok, ta amta ton inar-aro da. (Juan 14:15-17; 15:10; 1 Juan 4:16) Anggan antoy ginawa nen Satanas tan na sayan mundo ed si Juan, agbalot nakal so panangaro tod saray agagi, tan impalikna to itan ed sikara diad salita tan gawa.

19. Antoy ibabaga na 1 Juan 4:7 ya nepeg tayon gawaen, tan akin?

¹⁹ Manbibilay tayo met natan ed mundo ya uuleyan nen Satanas, say maruksan dios na sayan mundo. (1 Juan 3:1, 10) Labay ton ombetel so panangaro tayo ed saray agagi, balet ag-itan nagawa no agtayo manpaimpluensya ed sikato. Kanian komon ta diad saray ibabaga tan gagawaen tayo et ipalikna tayod saray agagi ya inar-aro tayo ra. No pansagpotan tayon gawaen itan, magmaliw ya maliket so bilay tayo lapud nalilikna tayon pamilya itayo nen Jehova.​—Basaen so 1 Juan 4:7.