AARALEN YA ARTIKULO 4
Akin et Onaatendi Tayod Memoryal?
“Itultuloy yon gawaen iya bilang pannodnonot ed siak.” —LUC. 22:19.
KANSION 20 Inter Moy Pinablim ya Anak
DIAD SAYAN ARTIKULO *
1-2. (a) Kapigan tayo lalon nanonotan iray inatey lan kapamilya tan kakaaro tayo? (b) Antoy inggapo nen Jesus diad samay labi antis na impatey to?
ANGGANO abaybayag lan inatey so kapamilya odino kaaro tayo, sankanonot tayo ni ran siansia. Dakdakel so nanonotan tayod sikara lalo la diad agew na death anniversary da.
2 Kada taon, kaiba tayo ed minilyon ya totoo ya mantitipon diad interon mundo diad agew na death anniversary nen Jesu-Kristo—say Anak na Dios ya inar-aro tayo. (1 Ped. 1:8) Gagawaen tayo itan pian nodnonoten so impangiter to na bilay to bilang dondon pian nibulos tayod kasalanan tan patey. (Mat. 20:28) Diad tua et labay nen Jesus ya nodnonoten na saray papatumbok to so impatey to. Diad samay labi antis na impatey to, walay ginawa ton espisyal ya pangdem kaiba iray apostol to. Tan oniay ingganggan to: “Itultuloy yon gawaen iya bilang pannodnonot ed siak.” *—Luc. 22:19.
3. Anto ray pantongtongan tayo ed sayan artikulo?
3 Daiset labat ed saray onaatendi ed Memoryal odino pannodnonot ed impatey nen Kristo so parad tawen. Pero minilyon ed saray onaatendi et parad dalin. Pantongtongan tayo ed sayan artikulo no akin ya importantin maong ed sayan duaran grupo so Memoryal. Pantongtongan tayo met no antoy maabig ya epekto ed sikara kada no onatendi ira. Aralen tayon unona no akin ya onaatendi iray alanaan.
AKIN ET ONAATENDI IRAY ALANAAN?
4. Akin et saray alanaan labat so mamangan na tinapay tan oniinum na alak no Memoryal?
4 Kada Memoryal, saray alanaan labat so mamangan na tinapay tan oniinum na alak. Akin ey? Nengnengen tayoy agawa ed samay labi antis na impatey nen Jesus. Kayari na pangdem parad Paskua, inggapo nen Jesus so espisyal ya pangdem ya natan et tatawagen tayon Pangdem na Katawan. Impasa to ed 11 ya matoor ya apostol to so tinapay tan alak, tan imbaga to ya kanen tan inumen da itan. Imbaga nen Jesus ed sikara so duaran sipanan odino paknaan—say balon sipanan tan say sipanan parad Panarian. * (Luc. 22:19, 20, 28-30) Lapud sarayan sipanan, naikdan na pribilehyo iray apostol tan arum nin totoo ya pinili nen Jehova pian magmaliw ya arari tan saserdote ed tawen. (Apo. 5:10; 14:1) Saray alanaan labat ya wadia nid dalin so mamangan na tinapay tan oniinum ed alak no Memoryal ta kaiba ira ed sayan duaran sipanan.
5. Antoy nepeg ya gawaen na saray alanaan pian naawat day premyo da?
5 Wala ni sakey ya rason no akin ya tatalaranan na saray alanaan so tinaon ya Memoryal: Espisyal itan ya panaon pian nodnonoten da so ilalo da. Nikadkaduma so ilalo ya inter nen Jehova ed sikara—magmaliw iran imortal ya espiritu diad tawen, agla ran balot ompatey, tan nakaiba dan manuley si Jesu-Kristo tan say arum nin membro na 144,000. Tan say sankabalegan ya pribilehyo da et nanengneng da lay Aman Jehova. (1 Cor. 15:51-53; 1 Juan 3:2) Natatalosan na saray alanaan ya importantin manmatoor ira anggad ipatey da pian naawat day premyo ra ya manbilay diad tawen. (2 Tim. 4:7, 8) Malikeliket iray alanaan kada no iisipen da so ilalo da ya manbilay ed tawen. (Tito 2:13) Saray ‘arum ya karnero’ ey? (Juan 10:16) Akin et onaatendi ra ed Memoryal?
AKIN ET ONAATENDI IRAY ARUM YA KARNERO?
6. Akin et onaatendi iray arum ya karnero ed tinaon ya Memoryal?
6 Onaatendi ed Memoryal iray arum ya karnero aliwan pian mangan na tinapay tan oninum na alak, noagta pian miliket ed saray alanaan. Nen 1938, first time ya naimbitaan iray parad dalin ya onatendi ed Memoryal. Oniay imbaga na Marso 1, 1938 ya isyu na The Watchtower: “Duga labat ya onatendi iray [arum ya karnero] ed sayan pantitipon tan obserbaan da no antoy nagagawa. . . . Maliket iyan okasyon tan nepeg labat ya miliket met ira.” No panon ya saray bisita ed sakey ya bansal et malikeliket ya mangoobserba ed seremonya, saray arum ya karnero et malikeliket met ya onaatendi ed Memoryal.
7. Akin et tatalaranan na saray arum ya karnero so paliwawa ed Memoryal?
7 Onaatendi met iray arum ya karnero ed Memoryal pian nodnonoten da so ilalo da. Tatalaranan da so paliwawa ed Memoryal. Diad satan ya paliwawa, talakayen na espiker iray gawaen nen Jesu-Kristo tan say 144,000 ya kaiba ton manuley parad saray matoor ya totoo legan na Sanlibon Taon ya Uley to. Sarayan manuley et bendisyonan day sagpot na totoo ya gawaen a paraiso so dalin tan tulongan da ran magmaliw ya perpekto. Legan na paliwawa ed Memoryal, mabilabilay ed isip na saray arum ya karnero iray sipan na Dios ya nabasa ed Biblia, singa samay walad Isaias 35:5, 6; 65:21-23; tan Apocalipsis 21:3, 4. No iimadyinen day sarili ra ed balon mundo kaibay kapamilya tan kakaaro ra, mas ombibiskeg so pananisia ra ed saray sipan na Dios tan mas desidido iran manmatoor ed si Jehova.—Mat. 24:13; Gal. 6:9.
8. Anto ni rason no akin ya onaatendi iray arum ya karnero ed Memoryal?
8 Wala ni sakey ya rason no akin ya onaatendi iray arum ya karnero ed Memoryal. Labay dan ipanengneng so panangaro tan suporta ra ed saray alanaan. Impropesiya lad Biblia ya mankasakey tan mantulongan iray alanaan tan saray arum ya karnero. Panon itan ya nagagawa natan? Pantongtongan tayoy pigaran propesiya.
9. Panon ya indeskribe na propesiya ed Zacarias 8:23 so tiwala tan panangaro na saray arum ya karnero ed saray alanaan?
9 Basaen so Zacarias 8:23. Indeskribe na sayan propesiya so tiwala tan panangaro na saray arum ya karnero ed saray alanaan ya agagi ra. Samay “sakey a Judio” et ontutukoy ed saray alanaan ya wadia nid dalin. (Roma 2:28, 29) Pero saramay “samploran lalaki a nanlapud amin a lenguahe na saray nasyon” et ontutukoy ed arum ya karnero. “Ombemben [ira] a malet” ed samay Judio. Labay ton ibaga, baleg so tiwala tan panangaro da ed saray alanaan, kanian mikasakey irad sikara diad dugan panagdayew. Atan so sakey ya rason no akin ya iibaan na saray arum ya karnero iray alanaan no Memoryal.
10. Antoy ginawa nen Jehova pian nasumpal imay propesiya ya walad Ezequiel 37:15-19, 24, 25?
10 Basaen so Ezequiel 37:15-19, 24, 25. Pian nasumpal iyan propesiya, malmalet ya pinankasakey nen Jehova iray alanaan tan saray arum ya karnero. Walay duaran bislak ya abitlad sayan propesiya. Say “bislak na Juda” (say tribu ya nanlapuan na saray arari ed Israel) et ontutukoy ed saray alanaan. Balet say “bislak na Efraim” et ontutukoy ed saray arum ya karnero. * Pankasakeyen nen Jehova iyan duaran grupo pian magmaliw iran “saksakey a bislak.” Diad panaon tayo, nankakasakey iran manlilingkor ed si Jehova diad panangidaulo na saksakey ya Ari, si Kristo Jesus. Kanian kada Memoryal, onaatendi iray alanaan tan saray arum ya karnero aliwan bilang nambiigan ya grupo, noagta bilang “sakey a pulok” ya igigiya na “sakey a managpastol.”—Juan 10:16.
11. Antoy manunan paraan ya susuportaan na “saray karnero” ya abitlad Mateo 25:31-36, 40 iray agagi nen Kristo?
11 Basaen so Mateo 25:31-36, 40. “Saray karnero” ya binitla dia nen Jesus et ontutukoy ed arum a karnero—saray totoon matoor ed Dios diad panaon na anggaan tan say ilalo ra et manbilay diad dalin. Say manunan paraan ya susuportaan da ray alanaan et diad makulikulin itutulong da ed kimey ya panagpulong tan panagbangat diad interon mundo pian nasumpal na saray agagi nen Kristo itan ya balbaleg ya responsabilidad da.—Mat. 24:14; 28:19, 20.
12-13. Anto ni ray gagawaen na arum ya karnero pian nipanengneng day suporta ra ed saray agagi nen Kristo?
12 Pigaran simba antis na Memoryal, ipapanengneng na saray arum a karnero so suporta da ed saray agagi nen Kristo diad pangiimbita da ed saray interesado ya onatendi ed Memoryal. (Nengnengen so kahon ya “ Kasin Manpaparaan Ka La Parad Memoryal?”) Ontutulong met ira pian magmaliw ya organisado so Memoryal ed kada kongregasyon diad interon mundo, anggano diad maslak ya kongregasyon et anggapoy alanaan ya onatendi. Malikeliket iyan gagawaen na saray arum ya karnero pian nasuportaan da ray agagi nen Kristo. Amta ra ya aapresyaen nen Jesus so sagpot da tan amta ra met ya saray gagawaen da parad saray alanaan ya agagi to et singa da met la ginawan mismo ed sikato.—Mat. 25:37-40.
13 Balanglan say ilalo tayo et manbilay ed tawen odino diad dalin, anto ni ray kaaruman ya rason no akin ya onaatendi tayo ed Memoryal?
AKIN ET ONAATENDI TAYON AMIN?
14. Panon ya impanengneng nen Jehova tan Jesus so agnaparaan ya panangaro ra ed sikatayo?
14Misalsalamat tayo ed panangaro ya impanengneng nen Jehova tan Jesus ed sikatayo. Dakdakel so ginawa nen Jehova pian nipanengneng ya inar-aro to tayo. Pero diad sarayan amin, say agnaparaan et say impangibaki to ed inar-aro ton Anak pian manirap tan ompatey parad sikatayo. (Juan 3:16) Impanengneng met nen Jesus ya inar-aro to tayo ta mabulos ton inter so bilay to parad amin ya totoo. (Juan 15:13) Diad tua, agtayon balot nabayaran so panangaro nen Jehova tan Jesus. Pero nipanengneng tayon misalsalamat tayo ed sikara no gawaen tayoy panlabayan da kada agew. (Col. 3:15) Tan onaatendi tayo ed Memoryal pian nodnonoten tayoy panangaro da tan pian nipanengneng tayo met ya inar-aro tayo ra.
15. Akin et misalsalamat ya maong iray alanaan tan saray arum ya karnero ed dondon?
15Misalsalamat tayo ed mabmablin regalo ya dondon. (Mat. 20:28) Misalsalamat iray alanaan ed dondon ta lapud satan et walay ilalo dan manbilay ed tawen. Lapud pananisia ra ed dondon bagat nen Kristo, inyabawag la ra nen Jehova ya matunong tan tinagibi to la ra bilang ananak to. (Roma 5:1; 8:15-17, 23) Misalsalamat met iray arum ya karnero ed dondon. Lapud pananisia ra ed dondon bagat nen Kristo, malinis so konsiensia ra ed pakanengneng nen Jehova. Aawaten toy panaglingkor da ed sikato, tan walay ilalo ran makaliktar ed “baleg a kairapan.” (Apo. 7:13-15) Kanian say sakey ya rason no akin ya onaatendi ray alanaan tan saray arum a karnero ed Memoryal et pian nipanengneng da ya importantin maong ed sikara so dondon.
16. Anto ni sakey ya rason no akin ya onaatendi tayo ed Memoryal?
16Labay tayon unoren si Jesus. Balanglan say ilalo tayo et manbilay ed tawen odino diad dalin, labay tayon unoren may ingganggan nen Jesus diad samay labi ya inggapo toy Memoryal: “Itultuloy yon gawaen iya bilang pannodnonot ed siak.”—1 Cor. 11:23, 24.
ANTOY MAABIG YA EPEKTO NO ONATENDI TAYO?
17. Akin et lalo tayon onaapit ed si Jehova kada no panaon na Memoryal?
17Lalo tayon onapit ed si Jehova. (Sant. 4:8) Singa naaralan tayo ed akauna iran parapo, say Memoryal et espisyal ya panaon pian nodnonoten tayoy ilalo ya inter nen Jehova ed sikatayo tan say agnaparaan ya panangaro ya impanengneng to. (Jer. 29:11; 1 Juan 4:8-10) No dalepdepen tayoy balibalin ilalo tayo tan say agnaparaan ya panangaro na Dios, lalon ombiskeg so panangaro tayod si Jehova tan lalon onasingger so liknaan tayo ed sikato.—Roma 8:38, 39.
18. Antoy epekto ed sikatayo no dalepdepen tayoy alimbawa nen Jesus?
18Napakiwas tayon aligen so alimbawa nen Jesus. (1 Ped. 2:21) Pigaran agew antis na Memoryal, babasaen tayo ray salaysay ed Biblia tungkol ed sampot lan simba na bilay nen Jesus bilang too diad dalin, say impatey to, tan say inkioli to. Tan diad mismon Memoryal, ipanonot na paliwawa so panangaro nen Jesus ed sikatayo. (Efe. 5:2; 1 Juan 3:16) Legan tayon babasaen tan dadalepdepen so impansakripisyo nen Jesus, napakiwas tayon “mantultuloy a manbilay a singa ed impanbilay [to].”—1 Juan 2:6.
19. Antoy gawaen tayo pian mansiansia tayo ed panangaro na Dios?
19Mas desidido tayon mansiansia ed panangaro na Dios. (Jud. 20, 21) Mansiansia tayo ed panangaro na Dios no gawaen tayoy anggaay nayarian tayon unoren iray ganggan to, pasantosen so ngaran to, tan paliketen so puso to. (Pro. 27:11; Mat. 6:9; 1 Juan 5:3) Diad kada Memoryal, mas desidido tayon manbilay diad paraan ya singa tayo ibabagad si Jehova ya, ‘Ama, labay koy mansiansia ed panangarom anggad angga!’
20. Anto ray rason no akin ya onaatendi tayo ed Memoryal?
20 Dakel so rason no akin ya onaatendi tayo ed Memoryal, balanglan say ilalo tayo et manbilay na andi-anggaan ed tawen odino diad dalin. Espisyal itan ya okasyon ta nodnonoten tayoy impatey na inar-aro tayo, si Jesu-Kristo. Manuna ed amin, sankanonot tayoy agnaparaan ya panangaro nen Jehova diad impangiter to na Anak to pian nadondon tayo. Diad sayan taon, nagawa so Memoryal diad labi na Biernes, Abril 15, 2022. Inar-aro tayoy Jehova tan say Anak to, kanian diad anibersaryo na impatey nen Jesus, anggapo lay mas importantin gawaen tayo nen say onatendi ed Memoryal.
KANSION 16 Idayew si Jehova Lapud Anak To ya Nilanaan
^ par. 5 Kada taon et tatalaranan tayoy agew na Memoryal, balanglan say ilalo tayo et manbilay ed tawen odino diad paraison dalin. Pantongtongan tayo ed sayan artikulo iray rason ya nabasa ed Biblia no akin ya onaatendi tayod Memoryal tan no antoy maabig ya epekto kada no onatendi tayo.
^ par. 2 Diad arum ya patalos, say nabasa ed sayan bersikulo et “Gawa yo ’ya a pakanodnonotan ed siak” (Say Biblia, PBS).
^ par. 4 Parad kaaruman ya impormasyon tungkol ed balon sipanan tan sipanan parad Panarian, nengnengen so artikulo ya “Magmaliw Kayon ‘Panarian na Saray Saserdote’” diad Oktubre 15, 2014 ya isyu na Say Panag-bantayan, p. 15-17.
^ par. 10 Parad kaaruman ya impormasyon ed propesiya tungkol ed duaran bislak ya abitlad Ezequiel kapitulo 37, nengnengen so libron Say Dugan Panagdayew ed si Jehova—Nipawil a Siansia!, p. 129-135, par. 3-17.
