1-3. Anto ray rason ya no maminsan et onakis iray lingkor nen Jehova?

KAPIGAN so sampot ya inyakis mo? No maminsan, makaakis tayo lapud liket. Pero mas mabetbet ya onaakis tayo lapud ermen. Singa bilang, agtayo napigilay onakis no inateyan tayoy kapamilya o kaaro. Oniay insulat nen Lorilei, sakey a sister ed United States: “Singa bebetagey pusok kada no nanonotan koy impatey na ana’kon bii. Ansakisakit, tan singa aglan balot onabig so sugat ed pusok.” *

² No maminsan et makaakis tayo met lapud nanduruman rason. Oniay inamin nen Sister Hiromi ya payunir ed Japan: “Ngalngali anggapoy interesado ed teritorya mi kanian makapakapuy na liknaan. No maminsan, makalua ak legan kon ipipikasi ed si Jehova ya wala komoy naromog kon interesado.”

³ Kasin naliliknam met no maminsan so alikna na sarayan sister? Ontan so nalilikna na dakel ya agagi tayo. (1 Ped. 5:9) Labalabay tayoy ‘manlingkor ya maliket ed si Jehova.’ Pero no maminsan, agtayo napigilay onakis no inateyan tayo, onkakapuy so liknaan tayo, odino ondadalan tayo ed ambelbelat ya problema ya nasusubok so katooran tayo ed Dios. (Sal. 6:6; 100:2) Antoy gawaen mo no ontan so naliliknam?

4. Antoy pantongtongan tayo ed sayan artikulo?

⁴ Makaaral tayod si Jesus. Wala ray nabasa ed Biblia ya sikatoy dinmalan ed nanduruman situasyon ya agto apigilay onakis. (Luc. 19:41; 22:44; Juan 11:35; Heb. 5:7) Pantongtongan tayo iratan ya salaysay ed Biblia, tan nengnengen tayo no anto ray naaralan tayo ed saratan. Amtaen tayo met no anto ray sarag tayon gawaen no bilang ta ondalan tayod saray situasyon ya singa onman ed dinalan nen Jesus.

5. Antoy naaralan tayod si Jesus ed samay salaysay ya nabasad Juan 11:32-36?

⁵ Nen bandad sampot na taon 32 C.E., say malet ya kaaro nen Jesus ya si Lazaro et nansakit tan ag-abayag et inatey. (Juan 11:3, 14) Inar-aron maong nen Jesus si Lazaro, pati say duaran atsi to ya si Maria tan Marta. Taga ed Betania irayan sanaagi. Agaylay ermen nen Maria tan Marta nen inatey so agi ra, kanian nila ira nen Jesus pian ligliwaen ira. Nen naamtaan nen Marta ya paarap lay Jesus ed abung da, inabet to lad dalan. Imadyin mo pay emosyon nen Marta legan ton ibabagad si Jesus ya: “Katawan, no wadia ka labat, agkomon inatey so agik.” (Juan 11:21) Nagunoyan, nen anengneng nen Jesus ya nitan met lay Maria ya manak-akis kaiba toy arum ya Judio, “akaakis si Jesus.”—Basaen so Juan 11:32-36.

6. Akin et akaakis si Jesus nen linmad Betania pian ligliwaey Maria tan Marta?

⁶ Akin et akaakis si Jesus ed saman? Oniay ibabaga na libron Insight on the Scriptures: “‘Naney-ey tan akaakis’ si Jesus lapud impatey na kaaro ton si Lazaro tan lapud anengneng toy ermen na saray atsi nen Lazaro.” * Ompan naimadyin nen Jesus so irap ya dinalan na kaaro to nen mansasakit tan nen manpapanabos la. Tan seguro, singa pipilatey puso nen Jesus nen anengneng toy ermen tan panak-akis nen Maria tan Marta. No bilang ta asalim lay inateyan na kapamilya o kaaro, seguradon aliknam met la itan. Pantongtongan tayoy taloran leksion ya naaralan tayo ed sayan agawa.

7. Antoy naaralan tayod si Jehova nen akaakis si Jesus lapud panangaro tod kakaaro to?

⁷Natatalosan nen Jehova so naliliknam. Amin ya ugali tan kualidad nen Jesus et naaralan tod si Ama to. (Heb. 1:3) Kanian sanen manakis tan nanermen si Jesus nen inateyan na kaaro, seguradon ontan met so alikna nen Jehova. (Juan 14:9) Kanian no inateyan ka na kapamilya o kaaro, tandaan mo ya amta nen Jehova so paneermen mo. Diad tua, anggan  sikato et maermen met tan labalabay ton paabigen so sugat ed pusom.—Sal. 34:18; 147:3.

8. Akin et makaseguro tayo ya paolien nen Jesus iray inatey lan kapamilya tan kakaaro tayo?

⁸Labalabay nen Jesus ya bilayen iray inatey lan kapamilyam tan kakaarom. Antis ya akaakis si Jesus, oniay impaseguro tod si Marta: “Say agim et onoli.” Panisiaan itan nen Marta. (Juan 11:23-27) Akin et kombinsido si Marta ya nabilay si Lazaro? On ta amta to ray impairekord nen Jehova ya salaysay ed Kasulatan ya nensaman et wala la ray pinaoli nen propetan Elias tan Eliseo. (1 Ara. 17:17-24; 2 Ara. 4:32-37) Tan seguradon abalitaan to met ya wala la ray binilay nen Jesus ya inaatey. (Luc. 7:11-15; 8:41, 42, 49-56) Singa si Marta, manmatalek ka ya nabilay iray inatey lan kapamilyam tan kakaarom. On, nakaibam ira lamet! Samay inyakis nen Jesus nen liligliwaen to ray inateyan ya kakaaro to et prueba ya talagan labalabay ton paolien iray inaatey!

9. Singa si Jesus, panon mon natulongan tan naligliwa iray inateyan? Mangiter na alimbawa.

⁹Tulongan tan ligliwaen iray inateyan. Aglabat akiakis si Jesus ed si Marta tan Maria. Dinengel tan niligliwa to met ira. Maabig no aligen tayoy ginawa nen Jesus. Oniay imbaga nen Dan ya elder ed Australia: “Nen inatey si asawak, kakkaukolan koy tulong tan ligliwa. Wala ray brother ya anggan anton oras et akaparaan iran ondengel ed siak, tan ipipila day asawa ra. Agda ak pipigilan no labay koy onakis tan no labay kon ipaway so naliliknak. Tinulongan da ak diad kimey ed abung—inlinisan da ak na kotse, ingrocery-an da ak, tan inlutoan da ak ni ingen. Tan no pasyaren da ak, seseguroen da ya makapanpikasi ira ya kaiba ak. Apaneknekan ko ya tua iran kakaaro ya ‘nailaloan diad panaon na gonigon.’”—Pro. 17:17.

10. Ideskribe so agawa ya akarekord ed Lucas 19:36-40.

¹⁰ Nen Nisan 9, 33 C.E., linmay Jesus ed Jerusalem. Nen paonla ni labat, dakel lan totoo so manatalaran ed sikato tan imbibilkag da ed dalan iray ilalatop dan kawes pian ipanengneng ya sikatoy bibidbiren dan Ari da. Malikeliket iran amin! (Basaen so Lucas 19:36-40.) Pero abigla iray disipulo nen Jesus ed reaksion to. Nen sikatoy akaasingger la, kuan na Biblia: “Binantag toy syudad tan inakisan to.” Legan ya onteterter so lua nen Jesus, impropesiya to so kaderal na Jerusalem.—Luc. 19:41-44.

11. Akin et inakisan nen Jesus so Jerusalem?

¹¹ Anggano malikeliket ya inmabet iray totoo ed si Jesus, sikatoy manakis ta amta to ya maslak ed saray kabaleyan to et agda awaten so mensahe na Panarian ya ipupulong to. Amta to met ya lapud satan et naderal so Jerusalem, tan no bilang wala ray makaliktar, naaripen lanlamang ira ed arum ya bansa. (Luc. 21:20-24) Makapaermen ta talagan ag-anisia ed sikato so dakel ya Judio. Diad lugar yo ey, antoy reaksion na totoo no manpupulong kayo? No dagdaiset so ondengel ed mensahen ipupulong mo, antoy naaralan mod inyakis nen Jesus? Pantongtongan tayoy taloran leksion ya naaralan tayo ed saya.

12. Antoy naaralan tayod si Jehova nen inakisan nen Jesus so Jerusalem?

¹²Inar-aro nen Jehova iray totoo. Ipapanonot ed sikatayo na inyakis nen Jesus ya talagan inar-aro nen Jehova iray totoo. Ibabaga na Biblia ya “agto labay a walay siopaman a naderal noagta labay to ya amin et naikday pankanawnawan magbabawi.” (2 Ped. 3:9) Nipanengneng tayo met ya inar-aro tayoy  kapara tayon too no gagawaen tayoy anggaay nayarian tayo ya ipulong ed sikara so maong a balita diad paraan ya ontagos ed puso ra.—Mat. 22:39.

13-14. Panon ya impanengneng nen Jesus so panangaro tan malasakit tod totoo, tan panon tayon naalig so alimbawa to?

¹³Makulikulin nampulong tan nambangat si Jesus. Anggapoy pinalagpas nen Jesus ya pagkakataon pian napulongan tan nabangatan to iray totoo. (Luc. 19:47, 48) Akin ey? On ta inar-aro to ra tan walay malasakit tod sikara. No maminsan ingen, sikato tan saray disipulo to et “agda anggan naarap so mangan” lapud karakel na malabay ya ondengel ed bangat to. (Mar. 3:20) Tan nen walay sakey ya laki ya say labay ton pitongtong ed si Jesus et diad labi, pinmayag si Jesus. (Juan 3:1, 2) Anggano agnagmaliw ya disipulo so maslak ed saramay apulongan nen Jesus, say importante et pinulongan to ra. Ontan met natan, labay tayon seguroen ya naamtaan na amin ya totoo so maong a balita. (Gawa 10:42) Pian nagawaan tayo itan, ompan walay kaukolan tayon umanen ed panagpulong tayo.

¹⁴Salien tayon umanen so oras na panagpulong tayo. No apasakey so oras na panagpulong tayo, ompan agtayo nakatongtong iramay interesado ed maong a balita. Oniay imbaga na payunir ya si Sister Matilda: “Nanduruman oras so pampupulong mi nen asawak. No kabkabuasan, say pampulongan mi et diad lugar na negosyo. No oras lay panangugto, man-cart witnessing kami ta dakel so totoo ed dalan. Insan diad bandad ngarem, manpulong kami lad kaabungan ta mas dakel lay nasabi min totoo ed saman.” On, agtayo labat manpupulong ed oras ya apasalan tayo la odino komportable ed sikatayo. Nepeg ya akaparaan tayon i-adjust so eskedyul tayo pian mas dakel so napulongan tayo. Seguradon naliketan si Jehova ed pansakripisyo tayo.

15. Base ed Lucas 22:39-44, antoy agawa ed samay labi antis ya ompatey si Jesus?

¹⁵ Nen labi na Nisan 14, 33 C.E., linmay Jesus diad hardin na Getsemani. Ditan et  sikatoy nampikasi ed si Jehova tan imbaga toy amin ya nalilikna to. (Basaen so Lucas 22:39-44.) Ambelbelat so liknaan tod saman kanian “masimoon a nampikasi . . . tekep na maksil ya akis tan saray lua.” (Heb. 5:7) Antoy impikasi nen Jesus ed sayan labi antis ya ompatey? Kinerew tod si Jehova ya pabiskegen To komon so liknaan to pian makapansiansian matoor tan nasumpal toy ipapagawa nen Ama to. Dinengel nen Jehova so pikakasi na Anak to tan angibaki na anghel ya mamabiskeg ed sikato.

16. Akin et manakis si Jesus legan ya manpipikasi diad hardin na Getsemani?

¹⁶ Seguradon say sakey ya rason no akin ya akaakis si Jesus legan ton manpipikasi diad hardin na Getsemani et lapud sikatoy naakusaan ya anggapo kunoy respeto tod Dios. Say sakey met ya rason et lapud amta to ya kaukolan toy mansiansian matoor, ta no andi, nabalaw so ngaran nen Ama to. No bilang ta ondadalan ka met natan ed mair-irap a situasyon tan nasusubok so katooran mod si Jehova, antoy naaralan mo ed inyakis nen Jesus? Pantongtongan tayo so taloran leksion.

17. Antoy naaralan tayod si Jehova nen inebatan to iray impapuson kerew nen Jesus?

¹⁷Dedengelen nen Jehova iray impapuson kerew mo. Inebatan nen Jehova iray impapuson kerew nen Jesus. Akin ey? On ta say sankanonot nen Jesus et say pansiansia ton matoor ed si Ama to tan labay ton napasanto so ngaran nen Jehova. No sankanonot tayo met ya lanang so pansiansia tayon matoor ed si Jehova tan labay tayon napasanto so ngaran to, seguradon iter to so tulong ya kekerewen tayo.—Sal. 145:18, 19.

18. Akin et nibaga tayon si Jesus et kaaro ya natatalosan toy liknaan tayo?

¹⁸Natatalosan nen Jesus so naliliknam. No nanaaburido kan maong lapud walay ambelbelat ya problemam, seguradon misalsalamat ka no pabiskegen ka na kaarom ya natatalosan to ka, lalo la no dinalan to met la itan. Ontan ya kaaro si Jesus. Asali to met so dinmalan ed situasyon ya sikatoy aburidon maong, makapkapuy so liknaan to, tan kakkaukolan toy tulong. Kanian natatalosan to no onkakapuy tayo la, tan amta to met no anton tulong so kakkaukolan tayo. Seguroen to ya  naawat tayo itan “diad dugan panaon.” (Heb. 4:15, 16) No si Jesus ya mismo et inawat toy tulong na sakey ya anghel diad hardin na Getsemani, mapaabeba tayo met ya awaten so tulong ya iiter nen Jehova ed sikatayo, balanglan say usaren to et publikasyon, video, paliwawa, shepherding na saray elder, odino panamaseseg na sakey ya maespiritual ya brother o sister.

19. Panon kan pabiskegen nen Jehova no ondadalan kad mair-irap ya situasyon tan nasusubok so katooran mod sikato? Mangiter na alimbawa.

¹⁹Naliknam so “kareenan na Dios.” No ondadalan kad mair-irap ya situasyon tan nasusubok so katooran mod si Jehova, panon to kan pabiskegen? No manpikasi ka, naawat moy “kareenan na Dios a palumbasan toy amin a pakatalos.” (Fil. 4:6, 7) Pakalmaen na satan so pusom kanian mas makapannonot kay duga. Naeksperiensya itan nen Sister Luz. Oniay imbaga to: “Lapud ermen ko, say pakaliknak et bukbukor ko. No maminsan ingen, iisipen ko ya agto ak inaro nen Jehova. Pero no ontan lay naiisip ko, manpikasi ak ya tampol tan ibagak ed si Jehova so naliliknak. Kayarik ya manpikasi, onlelemew so liknaan ko.” On, no ibaga tayod si Jehova so amin ya nalilikna tan pakakaaburidoan tayo, ondeen so nonot tayo.

20. Anto ran leksion so naaralan tayo ed inyakis nen Jesus?

²⁰ Dakel ya leksion so naaralan tayo ed inyakis nen Jesus. Naaralan tayo ya kaukolan tayon tulongan tan ligliwaen iray inateyan, tan makaseguro tayon tulongan itayo met nen Jehova tan Jesus no sikatayon mismo so inateyan na kapamilya o kaaro. Anengneng tayo met so panangaro tan malasakit nen Jehova tan Jesus ed saray totoo, tan labay tayo met ya ipanengneng itan ed saray napupulongan tan iyaaralan tayo. Naaralan tayo met ya natatalosan nen Jehova tan Jesus no aburido tayo lan maong, amta ra no onkakapuy lay liknaan tayo, tan labalabay da tayon tulongan pian nasarag tayoy nanduruman subok. Komon ta iyaplika tayo irayan leksion anggad isabi na agew ya tooren la nen Jehova so marakdakep ya sipan to ya “punasen to so amin a lua ed kamataan [tayo]”!—Apo. 21:4.