1. Anton mair-irap ya situasyon so inarap nen David?

ONTATAKAS si David ta labay ya pateyen nen Arin Saul. Nen akasabid syudad na Nob, narnarasan la kanian kinmerew kalamor na limaran tinapay ed saserdoten si Ahimelec. (1 Sam. 21:1, 3) Ag-abayag, sikato tan saray bataan to et apilitan ya onamot ed sakey ya ungib. (1 Sam. 22:1) Akin et oniay situasyon nen David?

2. Akin et nibagan kakalabanen nen Saul si Jehova? (1 Samuel 23:16, 17)

² Pandinayewan na totoo si David ta marundunong ya sundalo tan dakel lay impanalo ton laban, kanian nainggit ya maong si Saul. Diad tua, amta nen Saul ya anggapo lad sikatoy pabor nen Jehova ta aminpigapiga ton ag-inunor. Tan amta to met ya si David so pinili nen Jehova ya onsalat ed sikaton ari. (Basaen so 1 Samuel 23:16, 17.) Pero anggapoy kalaban-laban nen David ta si Saul ni so ari tan sikato so susuportaan na saray sundalo na Israel. Kanian apilitan ya ontakas si David. Kasin inisip nen Saul ya napigilan toy gagala na Dios ya pagmaliwen ya ari si David? (Isa. 55:11) Agtayo amta ta anggapoy ibabaga na Biblia. Pero nia so segurado: Kakalabanen nen Saul si Jehova. Mapeligro itan, ta no kalabanen moy Dios, agkan balot manalo!

3. Antoy alikna nen David anggano mair-irap so situasyon to?

³ Mapaabeban too si David. Diad tua, agto pa pinangarap so magmaliw ya ari ed Israel. Si Jehova so nampili ed sikato. (1 Sam. 16:1, 12, 13) Anta anggapoy kasalanan nen David, kabkabusol balet nen Saul. Pero, aga tinetel nen David si Jehova tan agan balot nanreklamo anggan sanen nipeligroy bilay  to, ngalngali anggapoy naakan to, tan kaukolan toy onamot ed ungib. Diad tua, posiblin diad satan ya ungib so nankomposan to na balibalin kansion na panangirayew ed si Jehova, ya angalaan ed pinagkateman teksto tayo: “Saramay manaanap ed si Jehova et ag-onkulang na antokaman a maabig.”—Sal. 34:10.

4. Anto ran tepet so pantongtongan tayo ed sayan artikulo, tan akin et importantin pantongtongan tayo iratan?

⁴ No maminsan, saray lingkor nen Jehova natan et nasasali da met so nakulangay panangan o arum nin materyal ya pankaukolan. * Dakel so aka-eksperiensya na ontan, lalo la legan na pandemic. Tan seguradon mas onirap ni so bilay diad panasingger na “baleg a kairapan.” (Mat. 24:21) Kanian diad sayan artikulo, pantongtongan tayoy apatiran tepet: Akin et nibaga tayon agkinmulang si David na “antokaman a maabig”? Akin et nepeg tayon araley mankontento? Akin et segurado tayo ya asikasoen itayo nen Jehova? Tan antoy gawaen tayo pian makapanparaan tayo la natan ed saray nagawa ed arapen?

5-6. Panon ya makatulong so Salmo 23:1-6 pian natalosan tayo may imbaga nen David ya saray lingkor na Dios et “ag-onkulang na antokaman a maabig”?

⁵ Antoy labay ya ibaga nen David nen imbaga ton saray lingkor nen Jehova et “ag-onkulang na antokaman a maabig”? Walay ontan met ya imbaga nen David nen insulat to so Salmo 23. Kanian makaala tayoy ideya ed satan no antoy labay ton ibaga. (Basaen so Salmo 23:1-6.) Diad gapo na satan ya salmo, imbaga nen David: “Si Jehova so Pastol ko. Agak onkulang na antokaman.” Insan binitla to ray panliliketan ton espiritual ya bendisyon ta impasen toy Jehova ya Pastol to. Sikatoy igigiya nen Jehova ed “basbas na inkatunong” tan alikna to ya “wala [ed] abay [to]” si Jehova diad irap o inawa. Pero, anggano walad singa “marikan panagpastolan” si David, amta to ya wala ni ran siansiay dalanen  ton problema. No maminsan, onkapuy met so liknaan to ta singa kuno manaakar ed “ambilbilunget a dalan,” tan wala ray manbusol ed sikato. Pero matalek si David ya “anggapoy nepeg [ton] takotan” ta si Jehova so Pastol to.

⁶ Kanian niay ebat ed samay tepet ya: Akin et nibaga tayon agkinmulang si David na “antokaman a maabig”? On ta agan balot kinmapuy so espiritualidad to. Ag-akadepende ed materyal so liket to. Kontento lay David ed no antoy itatarya nen Jehova. Say importante ed sikato et walad sikatoy pabor tan proteksion na Dios.

7. Base ed Lucas 21:20-24, anton subok so inarap na saray Kristiano ed Judea nen inmunan siglo?

⁷ Antoy naaralan tayo ed imbaga nen David? Komon ta aliwan say materyal so sankaimportantian ed bilay tayo. Siempre, agto labay ya ibaga ya sibletan tayo lay sarili tayo. Pero delikado no materyal lan lanang so sankanonot tayo. Diad tua, subok itan ed saray Kristiano ed Judea nen inmunan siglo. (Basaen so Lucas 21:20-24.) Impropesiya nen Jesus ya onsabi panaon, say syudad na Jerusalem et ‘paliberan na mankakampo iran armada.’ No nagawa la itan, say instruksion nen Jesus et ‘ombatik la ra ed kapalandeyan.’ Atan labat so paraan pian makaliktar ira. Pero wala ray kaukolan dan isakripisyo. Oniay nabasad Say Panag-bantayan pigay taon lay apalabas: “Tinaynan da ray kaumaan tan kaabungan da, ya agla ra anggan akapangibalkot na kaykayarian da . . . Lapud matalek [ira] ed proteksion tan suporta nen Jehova, inyuna ray panagdayew ed sikato nen say antokaman.”

8. Antoy naaralan tayo ed saray Kristiano ed Judea nen inmunan siglo?

⁸ Nayarin wala ray nagawad arapen ya ditan met nasubok no antoy sankaimportantian ed bilay tayo. Oniay nabasad Say Panag-bantayan ya abitla niman: “Kasin [say] sankaimportantian [ed sikatayo et materyal], odino . . . say kilalaban?” * No onsabi anggaan, seguradon dakel ya irap so dalanen tayo. Dapat akaparaan tayon mansakripisyo ya singa ginawa na saray Kristiano ed Judea nen inmunan siglo.

9. Antoy epekto ed sika na samay bilin nen apostol Pablo ed saray Hebreon Kristiano?

⁹ Imadyin mo pay situasyon na saraman ya inmuunan Kristiano. Pian naunor da may imbaga nen Jesus, kaukolan dan taynanan so abung da tan manumpisa ra lamet ed lugar ya laen da. Kaukolan day mantiwala ya itarya nen Jehova iray manunan pankaukolan da. Pero walay akatulong ed sikara pian niparaan day puso ra. Limay taon antis ya pinaliberan na saray Romanon sundalo so Jerusalem, oniay bilin nen apostol Pablo ed saray Hebreon Kristiano: “Komon ta agnapatnagan ed kabibilay yo so panangaro ed kuarta, tan mankontento kayo ed saray bengatlan walad sikayo. Ta inkuan na Dios: ‘Agta kan balot taynanan, tan agta kan balot paulyanan.’ Diad ontan et makapanmatalek itayo tan ibaga tayo: ‘Si Jehova so mananulong ko; agak ontakot. Antoy nagawaan na too ed siak?’” (Heb. 13:5, 6) Saray Kristiano ya angiyaplika ed satan ya bilin et seguradon agla tanton nairapan ed simplin panagbilay diad lugar ya nakar da. Lapud samay sulat nen Pablo, binmiskeg so pananisia ra ya ag-iran balot paulyanan nen Jehova. No lanang tayo met ya nonoten imay imbaga nen Pablo, makapanmatalek tayo met ya asikasoen itayo nen Jehova anggan antoy nagawa.

10. Antoy “sekreto” nen Pablo ya imbaga tod sikatayo?

¹⁰ Walay ontan ya bilin nen Pablo ed si Timoteo ya pakaaralan tayo met natan. Oniay insulat to: “No walay naakan tan kawes tayo, mankontento tayo la ed saratan.” (1 Tim. 6:8) Labay to kasin ibaga, agtayo la nayarin mangan na masarap, nawalaay presentablin abung, odino mangaliw na balon kawes sagpaminsan? Aliwan ontan so labay ya ibaga nen Pablo. Say punto nen Pablo et nepeg ya mankontento tayo la ed antokaman ya walad sikatayo. Atan so “sekreto” nen Pablo—say pankontento. (Fil. 4:12) Say sankaimportantian ya kayamanan tayo et say relasyon tayo ed Dios, aliwan say materyal iran bengatla.—Hab. 3:17, 18.

11. Antoy naaralan tayo ed samay imbaga nen Moises ed saray Israelita?

¹¹ No maminsan, wala ray iisipen tayo ya kaukolan tayo, pero diad pakanengneng nen Jehova et agtayo met manaya kaukolan. Makaaral tayo ed samay imbaga nen Moises ed saray Israelita kayari na 40 taon ya impanakar-akar da: “Benendisyonan kayo nen Jehova a Dios yo ed amin a ginawa yo. Amta toy impanakar yo ed sayan baleg a kalawakan. Diad sarayan 40 taon et walad sikayo si Jehova a Dios yo, tan agkayon balot kinmulang na antokaman.” (Deu. 2:7) Diad loob na 40 taon, inagew-agew ya iikdan nen Jehova iray Israelita na mana pian walay naakan da. Ontan met, saray kawes da nen imbulos to ra ed Ehipto et agbalot dinmaan. (Deu. 8:3, 4) Ompan inisip na arum ya Israelita ya  simplin maong iratan. Balet, impanonot nen Moises ed sikara ya ag-iran balot kinmulang na antokaman. Antoy naaralan tayod saya? Labay nen Jehova ya aralen tayoy mankontento. Anggan panon kasimpli iray iiter to, pisalamatan tayo tan ipasen tayo ya bendisyon iratan.

12. Akin et nibaga tayon nantiwala si David ed si Jehova, aliwan diad sarili to?

¹² Amta nen David ya inar-aro nen Jehova iramay mangaaro ed Sikato tan aasikasoen To ra. Nen insulat nen David may Salmo 34, napepeligro so bilay to. Pero lapud mabiskeg so pananisia to, amta to ya sikatoy ‘babantayan na anghel nen Jehova.’ (Sal. 34:7) Seguro iimadyinen nen David ya kaiba ton mankakampo so anghel nen Jehova, ya singa sundalon akabantay ya tatalaranan toy iyataki na kalaban. Diad tua pa, makmakpel ya sundalo si David. Sarasarag ton taloen so kalaban ta marundunong ya mangusar na palsot tan espada. Sakey ni, insipan la nen Jehova ya sikato so onsublay ya ari. Pero aga nantiwala si David ed sarili to. (1 Sam. 16:13; 24:12) Si Jehova so nantiwalaan to. Mataletalek ya ‘isalba na anghel nen Jehova iramay ontatakot ed Sikato.’ Amta tayo ya agla manggagaway milagro si Jehova natan pian protektaan iray lingkor to. Pero amta tayo met ya anggano nipeligroy bilay tayo natan, ipapaseguro nen Jehova ya ikdan to tayoy bilay ya andi-anggaan diad arapen.

13. No onataki lay Gog na Magog, akin et singa anggapoy kalaban-laban tayo? Pero akin et anggapoy nepeg tayon takotan? (Nengnengen so litrato ed apis.)

¹³ Asingsingger lan nasubok so panagmatalek tayo ed si Jehova no atakien itayo la na Gog na Magog, say alyansa na saray bansa. Ompan isipen tayo ya sarasarag da tayon pateyen. Pero no walay tiwala tayo ed si Jehova, kombinsido tayo ya sarasarag to tayon protektaan. Diad pakanengneng na saray bansa, singa anggapoy kalaban-laban tayo. (Eze. 38:10-12) Akin ey? On ta anggapoy armas tayo tan agtayo met amtay milaban, kanian ompan isipen da ya matmainomay da tayon upoten. Pero say agda amta, akaparaan la ray anghel nen Jehova ya manprotekta ed sikatayo. Sikatayo balet, amta tayo itan ta mabiskeg so pananisia tayo. Pero anggapon balot so pananisia na saray lider na bansa, kanian seguradon nabigla ra no milaban la ray anghel parad sikatayo!—Apo. 19:11, 14, 15.

14. Antoy gawaen tayo pian makapanparaan tayo la natan ed saray nagawad arapen?

¹⁴ Antoy gawaen tayo pian makapanparaan tayo la natan ed saray nagawad arapen? Manuna ed amin, tandaan tayo ya aliwan say materyal so sankaimportantian ed bilay. Onsabi lanlamang so panaon ya kaukolan tayon taynanan iratan. Mankontento tayo la ed no antoy wala. Tan nepeg ya say manunan panlalapuan na liket tayo et say maapit ya relasyon tayo ed si Jehova. Itultuloy tayo met ya kabaten si Jehova pian mas ontibay so tiwala tayo ya sarasarag to tayon protektaan no onataki lay Gog na Magog.

15. Akin et baleg so talek nen David ya sikatoy agbalot paulyan nen Jehova anggan antoy nagawa?

¹⁵ Antoy akatulong ed si David ya makatulong met ed sikatayo pian niparaan tayo lay puso tayo ed saray onsabin subok? Oniay imbaga to: “Tawayan yo tan nengneng yo a si Jehova et maong; maliket so toon pasasalimbengan ed sikato.” (Sal. 34:8) Aminpiga lan ‘atawayan’ nen David so kamaongan nen Jehova. Kanian kombinsido ya basta manmatalek  ed si Jehova, anggapoy nepeg ton pampagaan. Nen kabataan ni, makmakpel ya inmarap ed si Goliat. Tan oniay imbaga tod sayan higante ya Filisteo: “Diad sayan mismon agew et iyawat ka nen Jehova ed limak.” (1 Sam. 17:46) Ag-abayag nen nagmaliw ya managtogtog na arpa parad si Arin Saul, sikatoy aminpigan sinalin pateyen nen Saul. Pero aliktaran iratan nen David ta “walad sikato si Jehova.” (1 Sam. 18:12) Lapud apaneknekan la nen David ya kaiba ton lanang si Jehova, baleg so talek to ya agbalot paulyan nen Jehova anggan antoy nagawa.

16. Panon tayon ‘natawayan’ so kamaongan nen Jehova?

¹⁶ No natan ni labat et manmamatalek tayo lad si Jehova tan nalilikna tayoy tulong to, mas kombinsido tayo ya sarasarag to tayon tulongan ed saray nagawad arapen. Kaukolay mabiskeg ya pananisia tan talek ed si Jehova no onkerew tayoy day off ed amo tayo pian makaatendi tayo ed asemblea o kombension. Kaukolan met itan no pai-adjust tayoy eskedyul na trabaho tayo pian naatendian tayoy amin ya aral tan mas dakel so panaon tayon manpulong. Panon to balet no agka payagan na amom tan ibaga ton ekalen to kad trabahom? Kasin mabiskeg so pananisiam ya agkan balot taynanan tan paulyanan nen Jehova tan itarya to ray manunan pankaukolan mo? (Heb. 13:5) No tepetan tayo ray agagin manlilingkor ya full-time, seguradon dakel so naistorya dan eksperiensya ra ya talagan ag-ira pinaulyanan nen Jehova nen kakkaukolan da. On, no imbaga nen Jehova ya asikasoen to ka, tooren ton tooren itan.

17. Antoy teksto tayo parad taon 2022, tan akin et dugaruga itan?

¹⁷ No kaibam si Jehova, anggapoy nepeg mon takotan, anggan anto ni tay nagawad arapen. Agto kan balot paulyanan basta iyunam so Panarian ed bilay mo. Labay na Mananguley ya Ulop ya lalo tayon manmatalek ed si Jehova tan manparaan tayo la natan parad saray subok ya onsabi. Kanian say pinili dan teksto parad taon 2022 et Salmo 34:10: “Saramay manaanap ed si Jehova et ag-onkulang na antokaman a maabig.”