1. Panon tayon nakaiba si Jehova?

LABALABAY tayon nakaiba iray totoon inar-aro tayo. Singa bilang, labalabay na sanasawa so manistoryaan kayari sanagew. Nai-enjoy met na saray kabataan no saniiba iran sanbabarkada. Tan amin tayo et labalabay tayon kaiba iray agagi. Pero diad ami-amin, say labalabay tayon nakaiba et si Jehova. Singa tayo kaibay Jehova kada no manpipikasi tayod sikato, no babasaen tayoy Salita to, tan no dadalepdepen tayo ray kualidad tan gagala to. Importantin maong ya walay panaon tayo parad si Jehova.—Sal. 139:17.

2. Antoy labalabay tayon gawaen pero aliwan mainomay?

² Anggano labalabay tayon walay panaon tayo parad si Jehova, no maminsan et aliwan mainomay itan ya gawaen. Lapud inka-busy tayo, ompan nanairapan tayon i-eskedyul iray espiritual a bengatla. Singa bilang, ompan lapud trabaho, responsabilidad ed pamilya, tan arum ni ran obligasyon tayo et ngalngali anggapo lay panaon tayon manpikasi, manaral, o mandalepdep.

3. Anto ni so nayarin mangupot ed panaon tayo?

³ Pero ompan agtayo nalilikas ya wala ni manayay arum ya manguupot na panaon tayo. Ompan agmet iratan mauges, balet nayarin saratan laingen so mangala na panaon tayo ya para komon ed si Jehova. Singa bilang, isip mo pa no pigaran oras so nauusar mod panagrelaks. Tua, kaukolan tayoy manrelaks sagpaminsan, tan nayarin agmet kontra ed Biblia iray pipilien tayon libangan. Pero no agtayo manalwar, ompan atan laingen  so rason ya kera-kera labat so oras ya iiter tayod si Jehova. Tandaan tayo ya aliwan manuna ed bilay tayo so panagrelaks.—Pro. 25:27; 1 Tim. 4:8.

4. Anto ray pantongtongan tayod sayan artikulo?

⁴ Pantongtongan tayo ed sayan artikulo no akin ya importantin seguroen tayo ya duga iray prayuridad tayod bilay. Aralen tayo met no anto ray gawaen tayo pian nasulit tayoy panaon ya inyeskedyul tayo ya nakaibay Jehova. Tan amtaen tayo no anto ray maabig ya epekto no gawaen tayo iratan.

5. Panon ya makatulong so bilin ya walad Efeso 5:15-17 no mandedesisyon so sakey a kabataan no antoy gawaen tod bilay to?

⁵Nonot moy panlabayan nen Jehova no mandedesisyon ka. Natural labat ya isipen na saray kabataan ya marakep komon so pansumpalan na bilay da. Ompan kombinsien iran man-college na saray teacher tan kanayon dan aliwan Tasi pian makalmo ra kunoy marakep ya trabaho ya baleg so sueldo. Pero dakel ya taon so pangala na atagey ya edukasyon, tan upoten toy panaon na saray kabataan. Duma balet so ipapaseseg na saray ateng dan Tasi tan saray kakongregasyon da. Lanang da ran bibilinen ya iyuna day Jehova ed bilay da. No sakey kan kabataan tan inar-arom si Jehova, antoy makatulong pian duga so desisyon mo? Maabig no basaen tan dalepdepen moy ibabaga na Efeso 5:15-17. (Basaen.) Insan mo tepetan so sarilim: ‘Antoy labay o “linawa nen Jehova” ya gawaen ko? No aya ay so pilien ko, naliketan kasi Aman Jehova tan nausar ko ed sankaabigan so panaon ko?’ Tandaan mo ya “mauges iray agew” ya pambibilayan tayo, tan asingsingger lan naderal iyan sistema nen Satanas. Maabig sirin no usaren moy bilay mo parad si Jehova, tan seguradon naar-aro to ka no ontan so gawaen mo!

6. Antoy ginawa nen Maria nen binisita ira nen Jesus, tan akin et dugay pinili to?

⁶Dapat duga iray prayuridad mo. No maminsan, walay duaran bagay ya labay mon gawaen pero kaukolan moy manpili labat na sakey pian nausar mod sankaabigan so panaon mo. Walay naaralan tayo tungkol ed saya diad samay imbisita nen Jesus ed abung di Marta tan Maria. Lapud maparawes si Marta tan espisyal so bisita ra, dakdakel so imparaan to. Si Maria balet, inmirong ed abay nen Jesus tan sinambot toy dinmengel ed bangat to. Aliwa met ya mauges so ginawa nen Marta, pero imbaga nen Jesus ya “pinili nen Maria so sankaabigan a parte.” (Luc. 10:38-42, paimanod leksab) Seguro diad inlabas na panaon, alingwanan la nen Maria no antoy inakan da ed saman ya agew. Pero seguradon agton balot alingwanan iray imbangat nen Jesus. Agsinayang nen Maria iman ya panaon ya nakaiba toy Jesus. Agtayo met labay ya nasayang so panaon ya inyeskedyul tayo ya nakaibay Jehova. Anto sirin so gawaen tayo pian nasulit tayo itan ya panaon?

7. Akin et importantin maong so pampikasi, panaral, tan pandalepdep?

⁷Tandaan mo ya parte na panagdayew tayo so pampikasi, panaral, tan pandalepdep. No manpipikasi tayo, mitotongtong tayo ed maar-aron Ama tayo ed tawen. (Sal. 5:7) No aaralen tayoy Biblia, nanaamtaan tayoy “kakabatan nipaakar ed Dios,” say Lapuan na amin a karunongan. (Pro. 2:1-5) No mandadalepdep tayo, sankanonot tayo ray balibalin ugali tan kualidad nen Jehova tan say marakdakep ya gagala to parad sikatayo ran  totoo. Say pampikasi, panaral, tan pandalepdep so sankaabigan ya pangusaran tayoy panaon tayo. Pero, antoy gawaen tayo pian naseguro tayon sulit so inyeskedyul tayon panaon parad saraya?

8. Antoy naaralan tayo ed ginawa nen Jesus legan ya walad kalawakan?

⁸No posible, la ka ed mareen ya pasen. Makaaral tayo ed alimbawa nen Jesus. Antis ton inggapo so ministeryo to ed dalin, sikatoy 40 ya agew ya walad kalawakan. (Luc. 4:1, 2) Marendeen ed satan ya lugar kanian sinambot toy manpikasi ed si Jehova tan dinalepdep toy asainmin ya ipapagawa ed sikato nen Ama to. Akatulong itan pian naiparaan nen Jesus so sarili to ed saray dalanen ton subok. Panon mon naalig si Jesus? No amayamay kayod abung, ompan mairap so mananap na mareen a pasen ed abung yo. No ontan so situasyon mo, maabig no mananap kay mareen ya pasen ed paway no posible. Ontan so gagawaen nen Sister Julie ya taga France. Sikato tan say asawa to et manaayam ed melag labat ya apartment. Kanian agnaiwasan ya walan walay makaisturbo. Onia kunoy gagawaen nen Sister Julie pian impapuson makapanpikasi ed si Jehova: “Kada agew et walay eskedyul kon onla ed park. Diman et mareen so nonot ko, anggapoy makaisturbo ed siak, tan naibagak ya amin ed si Jehova.”

9. Anggano busy ya maong si Jesus, antoy ginawa to pian agto napaulyanan so relasyon tod Ama to?

⁹ Busy ya maong si Jesus legan na ministeryo to diad dalin. Sikatoy tuttumboken na dakel ya totoo anggan iner so laen to, tan amin da et labay day makaasingger ed sikato. Ibabaga na Biblia ya aminsan et “atiptipon ed arap na puerta so totoo ed interon syudad” ta labay dan paabigen ira nen Jesus. Pero anggano ontan la ka-busy si Jesus, agto pinaulyanan so relasyon tod Ama to. “Diad kabkabuasan, legan ya ambilunget ni, . . . linmad sakey a nisulinek a pasen” pian makapanpikasi ed si Jehova.—Mar. 1:32-35.

10-11. Base ed Mateo 26:40, 41, antoy imbaga nen Jesus ya gawaen na saray disipulo to nen wala rad hardin na Getsemani, pero antoy agawa?

¹⁰ Nen manampot lay ministeryo nen Jesus, sikatoy nananap lamet na mareen ya lugar pian makapandalepdep tan makapanpikasi. Diad samay sampot lan labi na bilay to bilang too diad dalin, sikatoy linma ed hardin na Getsemani kaiba iray disipulo to. (Mat. 26:36) Legan iran wadtan, walay importantin imbaga nen Jesus ed sikara tungkol ed panagpikasi.

¹¹ Imanoen no antoy agawa. Lablabi la nen akasabi ira ed hardin na Getsemani, ompan pegley-labi la ingen. Imbaga nen Jesus ed saray apostol to ya “mantultuloy [iran] manbantay,”  insan sikatoy inmarawi na daiset pian makapanpikasi. (Mat. 26:37-39) Pero nen manpipikasi si Jesus, akaugip iray apostol. Nen asabian to ran nanaugip, imbaga to lamet ed sikara ya “mantultuloy [iran] manbantay tan [ag-ira] ontutundan manpikasi.” (Basaen so Mateo 26:40, 41.) Amta nen Jesus ya mapagpaga ra tan naknaksawan la ra. Diad tua, imbaga to ingen ya “maletey so laman.” Pero duaran beses ni ya inmarawi si Jesus pian makapanpikasi. Balet imbes ya manpikasi met iray disipulo to, asabian to ra lamet ya nanaugip.—Mat. 26:42-45.

12. Antoy makatulong no agtayo la makakapampikasi no maminsan ta nai-stress o naknaksawan tayo la?

¹²Gawaen itan ed dugan oras. Ompan no maminsan, agtayo la makapanpikasi ta na-stress odino naknaksawan tayon maong. No asalim la itan, diad tua et agmo bukbukor. Antoy makatulong? Wala ray agagi ya apasalan day manpikasi ed si Jehova antis iran onugip. Pero apansin da ya mas maabig no manpikasi la ra pigaran oras antis na kakaugip, ta mas alerto ni so isip da. Imbaga met na arum ya mas makakapampokus ira ed pikakasi da no dugay posisyon da, singa bilang no akayurong o akatalimukor ira. Panon to balet no singa anggapo lay biskeg mon manpikasi ta onkakapuy so liknaan mo odino dakdakel so pakakaaburidoan mo? Maabig no atan so ibagam ed si Jehova. Seguradon natatalosan na maar-aron Ama tayo ed tawen so naliliknam.—Sal. 139:4.

13. Akin ya no maminsan et makaisturbo iray gadyet tayo diad panaon ya inyeskedyul tayo parad si Jehova?

¹³Seguroen ya anggapoy makaisturbo no manaaral ka. Aliwan pikakasi labat so mamaelet ed pikakaaro tayod si Jehova. Lalo tayo met ya onapit ed Dios kada no aaralen tayoy Salita to tan no mimiaral tayo. Antoy gawaen mo pian anggapoy makaisturbo ed sika legan kan manpi-personal study tan no wala kad aral? Tepetan moy sarilim, ‘Antoy manederal ed pokus ko no wala ak ed aral tan no manpi-personal study ak?’ Kasin wala ray ontatawag ed sika, manti-text, o mani-email diad smartphone o arum nin gadyet mo? Diad tua pa, mausa-usar irayan gadyet. Pero ibabaga na saray researcher ya mairap so manpokus no walay smartphone ed abay mo. “Imbes ya akapokus ka ed gagawaen mo, . . . mantekkiab so isip mo,” so imbaga na sakey ya professor na psychology. No asemblea tan  kombension, lanang ya ibabaga na chairman ya i-adjust tayoy gadyet tayo ed setting ya agmakaisturbo ed arum. Anto kasi no ontan met so gawaen mod gadyet mo diad panaon ya inyeskedyul mo parad si Jehova pian anggapoy makaisturbo ed sika?

14. Base ed Filipos 4:6, 7, panon kan tulongan nen Jehova pian makapampokus ka?

¹⁴Ipikasim ed si Jehova ya tulongan to kan manpokus. No napapansin mo ya mantekkiab so nonot mo legan kan manpi-personal study tan no wala kad aral, kerew mod si Jehova ya tulongan to kan manpokus. No dakel so pakakaaburidoan mo, ompan atan laingen so sankanonot mo. Pero importante ya lingwanan mo nin magano iratan pian makapampokus kad saray espiritual ya bengatla. Ipikasim ed si Jehova ya iter tod sika imay ‘kareenan ya manbantay ed puso tan nonot’ mo.—Basaen so Filipos 4:6, 7.

15. Antoy sakey ya balibalin epekto no nakakaibam ya lanang si Jehova?

¹⁵ No lanang mon sankanonot si Jehova, tan lanang kan mitotongtong tan ondedengel ed sikato, balibali epekto to ed sika. Unona, mas makapandesisyon kay duga. Ibabaga na Biblia ya “samay miuulop ed marunong et magmaliw a marunong.” (Pro. 13:20) Kanian no nakakaibam ya lanang si Jehova, magmaliw ka met ya marunong ta sikato so Lapuan na amin ya karunongan. Sakey ni, lapud sikatoy mas nakakabat mo, kabisadom la ray labay tan agto labay. Kanian no mandedesisyon ka, agmo la gawaen iramay antam ya nasakitan moy liknaan to.

16. Akin et magmaliw tayon maong ya managbangat no nakakaiba tayon lanang si Jehova?

¹⁶ Komadua, magmaliw kan maong ya managbangat. No mangiyaaral tayoy Biblia, say manunan sankanonot tayo et no panon tayon natulongan so iyaaralan tayo ya mas naaro toy Jehova. Kanian no sikatayon mismo ya mangiyaaral et maapit so relasyon tayod si Jehova ta lanang tayon manpipikasi tan manpi-personal study, nalikas itan na saray Bible study tayo kanian mas mainomay tayo ran bangatan ya aroen da met si Jehova. Isip mo pay Jesus. Diad pambabangat tod saray disipulo to, alikna dan mismo ya inar-aro toy Ama to kanian naar-aro da met si Jehova.—Juan 17:25, 26.

17. Panon ya makatulong so pikakasi tan pam-personal study pian mas ombiskeg so pananisia tayo?

¹⁷ Komatlo, mas ombiskeg so pananisiam. Isip mo pa ray pikakasim ya inebatan la nen Jehova. Seguro, aminpigam lan kinerew so tulong, suporta, tan panangigiya to. Kada no eebatan nen Jehova iratan ya pikakasim, di ba lalon ombibiskeg so pananisiam? (1 Juan 5:15) Say sakey nin makatulong pian  mas ombiskeg so pananisiam et say pam-personal study. Ibabaga na Biblia ya “nawalaan labat na pananisia so sakey kayari ton narengel so salita [na Dios].” (Roma 10:17) Pero agto labay ya ibaga ya no dakel so antam ed Biblia et mabiskeg lay pananisiam. Wala ni kaukolan tayon gawaen.

18. Akin et kaukolan tayoy mandalepdep? Mangiter na alimbawa.

¹⁸ Kaukolan tayon dalepdepen iray nanaaralan tayo. Imanoen so eksperiensya na samay angisulat ed Salmo 77. Sikatoy napapagaan ya maong ta say pakalikna to et nakal lay pabor nen Jehova ed sikato tan ed saray kapara ton Israelita. Diad tua, agto itan pakakaugipan. (Bersikulo 2-8) Antoy ginawa to ey? Oniay imbaga tod si Jehova: “Dalepdepen koy amin a kimey mo, tan nodnonoten ko ray gagawaen mo.” (Bersikulo 12) Diad tua, amta to ray ginawa nen Jehova parad saray Israelita nensaman. Pero nanduaruwa nin siansia, tan inisip ton “alingwanan la . . . na Dios ya ipatnag so panangabobon to” tan “lapud sanok to et tinmunda lan mangipatnag na panangasi.” (Bersikulo 9) Balet nen dinalepdep to ray kimey nen Jehova tan say impanengneng Ton panangasi ed saray Israelita nensaman, diman akombinse ya agbalot paulyanan nen Jehova iray lingkor To. (Bersikulo 11, 15) No dalepdepen mo met iray ginawa la nen Jehova parad saray lingkor to tan amin ya panangaron impanengneng tod sikan mismo, mas ombiskeg so pananisiam.

19. Anto ni balibalin epekto no lanang tayon nakakaibay Jehova?

¹⁹ Say komapat tan say sankaimportantian et mas naar-arom si Jehova. No inarom si Jehova, gawaen mon amin parad sikato—unoren mo ray ganggan to, akaparaan kan mansakripisyo, tan manmatoor ka anggano wala ray subok. (Mat. 22:37-39; 1 Cor. 13:4, 7; 1 Juan 5:3) Anggapo lay makapipara ed liket ya naliknam no inar-arom si Jehova tan antam ya inar-aro to ka met!—Sal. 63:1-8.

20. Antoy planom ya gawaen pian nasegurom ya lanang mon nakaibay Jehova?

²⁰ Tandaan ya say pampikasi, panaral, tan pandalepdep et parte na panagdayew tayod si Jehova. Singa si Jesus, la ka ed mareen ya pasen no eskedyul mon nakaibay Jehova. Seguroen mo ya anggapoy makaisturbo. Ipikasim ed si Jehova ya tulongan to kan manpokus. No usaren mo ed sankaabigan so panaon mo natan, seguradon ikdan ka nen Jehova na bilay ya andi-anggaan diad balon mundo!—Mar. 4:24.