1-2. Akin et tinaon tayon onaatendi ed Memoryal?

 MANGA 2,000 taon lay apalabas, inter nen Jesus so bilay to parad sikatayo, tan lapud satan et walay ilalo tayon manbilay na andi-anggaan. Diad samay labi antis ya ompatey, walay inggapo ton simplin seremonya ya diad satan et sikatoy angusar na tinapay tan alak. Ingganggan to ray disipulo to ya ontan met so gawaen da pian nodnonoten day panangaro tan sakripisyo to parad totoo.—1 Cor. 11:23-26.

² Uunoren tayo itan ya ganggan ta inar-aro tayoy Jesus. (Juan 14:15) Pigaran simba antis tan kayari na Memoryal, wala ray gagawaen tayo pian lalo tayon nipanengneng ya misatsalamat tayod dondon. Singa bilang, ipi-personal study tayo itan, dadalepdepen tayon maong, tan bungay sangi tayod pikakasi tayo. Dadakelan tayo met so oras tayod ministeryo tan mamapasya tayon man-imbita ta labay tayo ya dakel so onatendi ed Memoryal. Tan diad mismon agew na Memoryal, seseguradoen tayo ya makaatendi tayo anggano wala ray hadlang.

3. Anto ray pantongtongan tayod sayan artikulo?

³ Pantongtongan tayod sayan artikulo so taloran gagawaen na saray lingkor nen Jehova pian nodnonoten so impatey  nen Jesus: (1) uunoren tayo imay paraan ya imbangat nen Jesus, (2) iimbitaan tayo ray totoo ya onatendi ed Memoryal, tan (3) onaatendi tayod Memoryal anggano mairap so situasyon o wala ray hadlang.

4. Anto ran katuaan so ipapaliwawa no Memoryal, tan akin et kaukolan tayon pablien iratan? (Lucas 22:19, 20)

⁴ Kada Memoryal, walay paliwawa ya ditan et natalakay so malinew ya ebat na Biblia ed sarayan tepet: Akin et kaukolan tayo so dondon? Kasin posible ya lapud impatey na sakey ya too et nadondon so kasalanan na amayamay? Antoy isisimbolo na tinapay tan alak? Siopa labat so nayarin mangan tan oninum ed saratan? (Basaen so Lucas 22:19, 20.) Anto ran bendisyon so awaten na saramay say ilalo da et manbilay na andi-anggaan diad dalin? (Isa. 35:5, 6; 65:17, 21-23) Papablien tayoy ebat na Biblia ed saratan ya tepet. Saratan ya katuaan et ag-amta na binilyon ya totoo. Agdan talaga natatalosan no akin ya importante so impatey nen Jesus. Agda met uunoren imay imbaga to ya dugan paraan na pannodnonot ed impatey to. Akin et aliway gagawaen da?

5. Nen pigpigara lan apostol so mabilay, akin et agla uunoren na totoo imay imbaga nen Jesus ya dugan paraan na pannodnonot ed impatey to?

⁵ Nen pigpigara labat lan apostol nen Jesus so mabilay, wala ray peke ya Kristiano ya akaloob ed kongregasyon. (Mat. 13:24-27, 37-39) “[Pinikewet] da so katuaan pian kombinsien iray disipulo ya ontumbok ed sikara.” (Gawa 20:29, 30) Singa bilang, ibabaga na Biblia ya “aminpinsan ya inyapay [nen Jesus so laman to] pian awiten to ray kasalanan na dakel.” Pero imbangat na saray peke ya Kristiano ya kaukolan ya paulit-ulit ya iyapay so laman nen Jesus. (Heb. 9:27, 28) Katilaan itan, pero manisia so dakel ya totoo. Atan so rason no akin ya sinimba odino inagew-agew ni ra ingen ya mimimisa pian nodnonoten da kuno so impangiyapay nen Jesus ed laman to. Diad saray Katoliko, tatawagen da itan ya “Holy Communion.” b Diad arum ya relihyon, aliwan ontan kabetbet, pero agda masyadon natatalosan no akin ya importante so dondon bagat nen Jesus. Itetepet na arum ed sikara, ‘Talaga kasin naperdona iray kasalanan ko lapud impatey nen Jesus?’ Akin et ontay tepet da? Ompan naimpluensyaan ira na saramay mangibabaga ya imposiblin naperdona iray kasalanan tayo lapu labat ed impatey na sakey ya too. Antoy ginawa na saray tuan Kristiano pian naamtaan na totoo no antoy tua?

6. Nen 1872, antoy atalosan na sakey ya grupo nen inaral da so ibabangat na Biblia?

⁶ Nen 1870, walay sakey ya grupo ya indaulo nen Charles Taze Russell tan makulikuli dan inaral so ibabangat na Biblia. Labay dan naamtaan no antoy tua tungkol ed impangiyapay nen Jesus ed bilay to tan no panon ya nodnonoten so impatey to. Nen 1872, atalosan dad impanaral day Biblia ya inter nen Jesus so bilay to pian nadondon so amin ya totoo. Anggano duma itan ed papanisiaan na arum, agda itan inyamot. Im-publish da itan diad saray libro, dyaryo, tan magasin. Manlapu lad saman, inalig da so gagawaen na saray Kristiano nen inmunan siglo—maminsan labat la kada taon so panseselebra day Memoryal.

7. Akin et misatsalamat tayo ed impan-research na samay grupo ya inaral day ibabangat na Biblia?

 ⁷ Misatsalamat tayo ed impan-research na sayan grupo. Diad tulong nen Jehova, nagmaliw ya malinew ed sikatayo no antoy nagawaan na dondon bagat nen Jesus. (1 Juan 2:1, 2) Naamtaan tayo met ya walay duaran klase na ilalo na saray totoon maunor ed Dios—wala ray apili ya manbilay ya imortal diad tawen pero maslak ya totoo et manbilay na andi-anggaan diad dalin. Nen naamtaan tayo so kabaleg na panangaro nen Jehova tan saray bendisyon ya iter to lapud dondon bagat nen Jesus, inmapit so liknaan tayo ed Dios. (1 Ped. 3:18; 1 Juan 4:9) Kanian iimbitaan tayo ray totoo ya onatendi ed Memoryal pian nanengneng da no antoy dugan paraan na pannodnonot ed impatey nen Jesus. Ontan lay gagawaen na saray agagi tayo nensaman.

8. Antoy ginawa na saray lingkor nen Jehova pian iyimbita so Memoryal? (Nengnengen so litrato.)

⁸ Abaybayag la ya iyiimbita na saray lingkor nen Jehova so Memoryal. Nen 1881, naimbitaan iray agagi ed United States ya man-Memoryal ed sakey ya abung diad Allegheny, Pennsylvania. Ag-abayag, say Memoryal et gagawaen lad kada kongregasyon. Nen Marso 1940, impaamta ed saray agagi ya sarag dan imbitaan so anggan siopan interesado ed teritorya da. Nen 1960, first time ya angipawit so Bethel na akaimprintan imbitasyon. Manlapu lad saman, binilyon lan imbitasyon parad Memoryal so imbunog tayod totoo. Akin et agaylay kuli tayon man-imbita?

9-10. Anto ray maabig ya resulta na pangiimbita tayo parad Memoryal? (Juan 3:16)

⁹ Say sakey ya rason no akin ya iimbitaan  tayo ray totoo ya onatendi ed Memoryal et pian naamtaan day ginawa nen Jehova tan Jesus parad amin ya totoo. (Basaen so Juan 3:16.) Baleg so nitulong na saray narengel o naobserbaan da legay Memoryal pian labayen da nin kabaten si Jehova tan magmaliw met iran lingkor to. Pero aliwan sikara labat so iimbitaan tayo.

¹⁰ Iimbitaan tayo met iramay nagmaliw ya inaktibo ed panlilingkor dad si Jehova. Labay tayon ipalikna ed sikara ya inar-aro ni ran siansia nen Jehova. Malikeliket tayo no nanengneng tayo rad Memoryal. No onatendi ra, seguro nanonotan day malikeliket ya impanlingkor dad si Jehova nensaman. Imanoen so imbaga nen Monica c ya abayag ya inactive, tan a-reactivate legay COVID-19 pandemic. Kayari na Memoryal nen 2021, oniay imbaga to: “Espisyal iyan Memoryal. Kayari na 20 ya taon, first time ko lamet so manpulong tan man-imbita parad Memoryal. Amasya ak ta misatsalamat ak ed ginawa nen Jehova tan Jesus parad siak.” (Sal. 103:1-4) Tandaan tayo ya onatendi man iray totoo o andi, makulikuli tayon mangiimbita parad Memoryal ta amta tayon napapaliket tayoy Jehova.

11. Panon ya bebendisyonan nen Jehova so pansasagpot tayon man-imbita parad Memoryal? (Aggeo 2:7)

¹¹ Bebendisyonan nen Jehova so pansasagpot tayon man-imbita parad Memoryal. Nen 2021, anggano wala ni ray restriksion lapud COVID-19 pandemic, first time ya say bilang na inmatendi et asabi toy 21,367,603! Masulok itan ya doble ed bilang na saray Tasi nen Jehova ed interon mundo! Pero siempre, aliwan say karakel na onaatendi so importante ed si Jehova. Say iimanoen to et say puso na kada sakey ya onaatendi. (Luc. 15:7; 1 Tim. 2:3, 4) Kanian no panag-iimbita la parad Memoryal, tandaan tayo ya uusaren itan nen Jehova pian naromog tayo ray mauyamon totoo.—Basaen so Aggeo 2:7.

12. Diad anto ran situasyon ya nayarin subok so iyatendi ed Memoryal? (Nengnengen so litrato.)

¹² Imbaga nen Jesus ya legan na kaunoran iran agew, dakel so arapen tayon mair-irap ya situasyon—singa say ikontra na kapamilya, panagbawal na gobierno, guerra, salot o epidemya, tan arum ni ra. (Mat. 10:36; Mar. 13:9; Luc. 21:10, 11) Lapud saratan, ompan subok ed sikatayo so onatendi ed Memoryal. Anto balet so ginawa na saray agagi anggano wala ray ontan ya hadlang, tan panon iran tinulongan nen Jehova?

13. Panon ya benendisyonan nen Jehova so determinasyon nen Brother Artem ya man-Memoryal anggano walad prisoan?

¹³ Anggano walad prisoan. Anggan saray agagi tayo ya apriso lapud pananisia ra et gagawaen day anggaay nayarian dan makapan-Memoryal. Say sakey ya alimbawa et si Brother Artem. Diad samay Memoryal nen 2020, sikatoy akapriso diad selda ya say kaawang to labat et 17 square meters tan kaiba to ditan so apatira nin priso. Anggano walad prisoan, nanggaway paraan pian walay nausar ton tinapay tan alak parad Memoryal, tan imparaan to met lay paliwawa parad Memoryal anggano anggapoy arum ya ondengel. Say problema balet, masigarilyo tan manaayewan ya lanang iray kaiba ton priso diad saman ya selda. Antoy ginawa nen Brother Artem? Akikasi ed sikara ya no nayari et agni ra mansisigarilyo tan manaayew  anggan sakey oras labat. Agmakapanisia si Artem ta pinmayag ira! Oniay imbaga to: “Diad tua, sinalik ya i-explain ed sikara no anto tay Memoryal.” Agbalet interesado iray kaiba ton priso. Pero nen anengneng day ginawa nen Artem tan arengel day paliwawa to, a-curious ira tan tinepetan da tungkol ed Memoryal.

14. Antoy ginawa tayo pian makapan-Memoryal tayo nin siansia anggano walay COVID-19 pandemic?

¹⁴ COVID-19 pandemic. Nen kasagsagan na pandemic, agsaniiban makapan-Memoryal iray lingkor nen Jehova. Pero akapan-Memoryal ni ran siansia. d Saray kongregasyon ya walay koneksion da ed Internet et nan-Memoryal panamegley na videoconference. Panon to balet iramay minilyon ya agagi ya anggapoy koneksion dad Internet? Diad arum ya bansa, in-broadcast so paliwawa diad TV o diad radio. Diad arum balet ya bansa, inrekord so paliwawa diad masulok ya 500 ya lenguahe ta pian anggan saray agagi ed sulinek iran lugar et narengel day paliwawa parad Memoryal. In-download iratan na saray agagi tan personal dan inawit ed  saray kakongregasyon dan anggapoy Internet da.

15. Antoy naaralan mo ed alimbawa na sakey ya Bible study?

¹⁵ Anggano kontra so pamilya. Wala ray agagi tan Bible study ya say hadlang ed iyatendi dad Memoryal et lapud kontra so pamilya da. Ontan so naeksperiensya nen Sue, ya sakey ya Bible study. Nen 2021, sakey agew antis na Memoryal, imbaga nen Sue ed samay mangiyaaral ed sikato ya agmakaatendi ta babawalan na saray kapamilya to. Imbasa na samay mangiyaaral ed sikato so Lucas 22:44. Impaliwawa tod si Sue ya no ondadalan tayod saray subok, aligen tayoy Jesus—manpikasi tayod si Jehova tan manmatalek tayod sikato. Diad agew na Memoryal, imparaan nen Sue iray emblema, tan binantayan to so special Morning Worship program diad jw.org. Diad saman ya labi, linma ed kuarto to tan kinmonekta ed Memoryal diad gadyet to. Oniay insulat nen Sue ed mangiyaaral ed sikato: “Apaseseg ak ya maong ed imbaga yo karuman. Ginawak ya amin pian makapi-Memoryal ak tan tinulongan ak nen Jehova. Malikeliket ak tan agaylay pisasalamat kod si Aman Jehova!” No nipaarap ka met ed ontan ya situasyon, seguradon tulongan ka nen Jehova.

16. Akin et segurado tayon bendisyonan nen Jehova iray sagpot tayon onatendi ed Memoryal? (Roma 8:31, 32)

¹⁶ Papablien ya maong nen Jehova iray sagpot tayo pian nodnonoten so impatey nen Jesus. Seguradon bendisyonan to tayo no nanenengneng ton misatsalamat tayo ed saray ginawa to parad sikatayo. (Basaen so Roma 8:31, 32.) Seguradoen tayo sirin ya makaatendi tayo ed Memoryal ed sayan taon tan mamasya tayod ministeryo antis tan kayari na Memoryal.