1-2. (a) Antoy nalikna tayo no dalepdepen tayoy bilay tan ministeryo nen Jesus? (b) Antoy pantongtongan tayod sayan artikulo?

 NO INATEYAN itayo na kaaro o kapamilya, seguradon nami-miss tayon maong. No agano ni, ansakisakit itan ta sankanonot tayo ni iramay agawgawad sikato antis ya inatey, lalo la no pinasyay impanirap to. No ombabayag la balet, anggan panon et onlelemew met lay liknaan tayo, lalo la no nanonotan tayo ray makapaseseg odino makapa-touch ya imbaga o ginawa to.

² Ompan naeermenan tayo met no babasaen tayoy impanirap tan impatey nen Jesus. Antis tan kayari na Memoryal, ipi-personal study tayo so tungkol ed dondon tan say impansakripisyo to parad sikatayo. (1 Cor. 11:24, 25) Balet naliliketan tayo no dadalepdepen tayoy amin ya imbaga tan ginawa nen Jesus nen sikatoy wadiad dalin. Ombibiskeg met so liknaan tayo no iisipen tayo no antoy gagawaen to la natan tan no antoy gawaen to ni parad sikatayo diad arapen. No dalepdepen tayoy panangaro tod sikatayo, napakiwas tayon manisip na paraan pian nipanengneng tayoy pisasalamat tayo, tan atan so aralen tayo ed sayan artikulo.

3. Akin ya misatsalamat tayo ed dondon?

³ Talagan misatsalamat tayo no dalepdepen tayo ray bangat nen Jesus tan say impansakripisyo to parad sikatayo. Nen wadiad dalin, imbangat tod saray totoo no anto ray bendisyon ya iter na Panarian na Dios. Papablien tayo iratan ya katuaan ta atan so mangiiter ed sikatayo na tuan ilalo. Misatsalamat tayo met ed dondon ta lapud satan et sarag tayoy mikaaro ed si Jehova  tan si Jesus. No ipanengneng tayoy pananisia ed si Jesus, walay pag-asa tayon manbilay na andi-anggaan tan napinengnengan tayo lamet iray inad-aro tayon naandid bilay. (Juan 5:28, 29; Roma 6:23) Diad tua, saratan ya bendisyon et agtayo kanepegan ya awaten. Tan agtayo met nabayaran so Dios tan si Jesus ed amin ya ginawa ra parad sikatayo. (Roma 5:8, 20, 21) Pero sarag tayon ipanengneng ya misatsalamat tayod sikara. Panon?

4. Antoy ginawa nen Maria Magdalena pian nipanengneng toy pisasalamat tod samay ginawa nen Jesus parad sikato? (Nengnengen so litrato.)

⁴ Nengnengen tayo so alimbawa na sakey ya Judion bii, si Maria Magdalena. Pakaskasi kipapasen to ta sinelepan tan papairapen na pitoran demonyo. Seguro, iisipen to ya aglan balot manguman so situasyon to tan anggapoy makatulong ed sikato. Kanian seguradon agaylay liket to nen pinapaway nen Jesus iray demonyo ya sinmelep ed sikato. Lapud pisasalamat to, sikatoy nagmaliw ya disipulo nen Jesus tan inusar toy panaon, biskeg, tan kayamanan to pian suportaan so ministeryo nen Jesus. (Luc. 8:1-3) Seguro diad gapo, agni masyadon natatalosan nen Maria Magdalena ya iter nen Jesus so bilay to parad saray totoo pian siopaman a “mangipapanengneng na pananisia et nawalaan na bilay ya andi-anggaan.” (Juan 3:16) Pero anggano agto ni itan masyadon natatalosan, sikatoy nansiansian matoor tan misatsalamat ed ginawa nen Jesus parad sikato. Nen manpapanabos lad panamairapan a poste si Jesus, wadman si Maria Magdalena pian ipanengneng so suporta tod si Jesus tan ed arum ni ran disipulo. (Juan 19:25) Nen niponpon lay Jesus, angawit si Maria Magdalena tan duara nin bibii na saray pampabalingit ed bangkay to. (Mar. 16:1, 2) Benendisyonan nen Jehova so katooran nen Maria Magdalena. Nen apaoli lay Jesus, sikato so sakey ed saray nampanengnengan tan akitongtongan to. Pigpigaran disipulo so awalaan na ontan ya pribilehyo!—Juan 20:11-18.

5. Panon tayon nipanengneng ya misatsalamat tayo ed amin ya ginawa nen Jehova tan Jesus parad sikatayo?

 ⁵ Nipanengneng tayo ya misatsalamat tayo ed amin ya ginawa nen Jehova tan Jesus parad sikatayo no usaren tayoy panaon, biskeg, tan kuarta tayo pian suportaan so Panarian. Singa bilang, sarag tayoy manboluntaryo diad pampaalagey tan panmintina na saray Kingdom Hall tan arum nin pasilidad ya uusaren tayod panagdayew.

6. Akin ya panisiaan tayon say dondon et regalo na Dios ed kada sakey ed sikatayo?

⁶ No isipen tayoy kabaleg na panangaro nen Jehova tan Jesus ed sikatayo, mas naar-aro tayo ra. (1 Juan 4:10, 19) Pero lalon onelet so panangaro tayod sikara no tandaan tayo ya inter nen Jesus so bilay to parad kada sakey ed sikatayo. Atalosan itan nen apostol Pablo tan agaylay pisasalamat to. Oniay imbaga to nen sinulatan to ray agagi ed Galacia: “Manbibilay ak natan unong ed pananisia ed Anak na Dios, ya angaro ed siak tan inter toy sarili to parad siak.” (Gal. 2:20) No anggapoy dondon, agka makaasingger ed si Jehova tan agka nayarin magmaliw ya kaaro to. (Juan 6:44) Isip mo pa: Inyasingger ka nen Jehova ta walay anengneng ton kamaongan ed pusom tan mabmabli imbayar to pian magmaliw kan kaaro to. Makapa-touch anto? On, dakdakel so rason ya aroen moy Jehova tan si Jesus. Kanian say tepet, anto met so gawaen mo pian napatunayan mon inarom ira?

7. Singa nanengneng ed litrato, panon tayon nipanengneng ya inar-aro tayoy Jehova tan Jesus? (2 Corinto 5:14, 15; 6:1, 2)

⁷ No inaro tayoy Jehova tan Jesus, aligen tayoy panangaro da ed totoo. (Basaen so 2 Corinto 5:14, 15; 6:1, 2.) Say sakey ya paraan et no makuli tayon manpulong. Anggapoy pipilien tayon pulongan—mairap man ira  o mayaman, atagey man so inaral da o andi, tan anggan antoy nanlapuan dan tribu o lahi. No makuli tayod panagpulong tan anggapoy pipilien tayo, aaligen tayoy Jehova ta say labay to et “niliktar so amin a klase na totoo tan nawalaan ira na suston kakabatan ed katuaan.”—1 Tim. 2:4.

8. Panon tayon nipanengneng ya inar-aro tayo ray agagi?

⁸ Nipanengneng tayo met ya inar-aro tayoy Jehova tan Jesus no inar-aro tayo ray agagi. (1 Juan 4:21) Imamalasakit tayo ra tan tutulongan tayo ra no ondadalan irad saray subok. Akaparaan tayon manligliwa ed sikara no inateyan ira, papasyaren tayo ra no mansasakit ira, tan agtayo onsasawan mamabiskeg ed liknaan da no nadi-depress ira. (2 Cor. 1:3-7; 1 Tes. 5:11, 14) Agtayo met ira lilingwanan ya ipikasi ta amta tayon “balbaleg so nagawaan na masimoon a pikakasi na sakey a matunong.”—Sant. 5:16.

9. Anto ni so sakey ya paraan pian nipanengneng tayon inar-aro tayo ray agagi tayo?

⁹ Nipanengneng tayo met ya inar-aro tayo ray agagi no gawaen tayoy anggaay nayarian tayon mikareenan ed sikara. Aligen tayoy Aman Jehova ya akaparaan ya mamerdona. No si Jehova et mabulos ton inter so mismon Anak to pian ompatey parad saray kasalanan tayo, di mabulos tayo met sirin ya perdonaen iray agagi tayo. Agtayo labay ya aligen imay mauges ya aripen ed sakey ya ilustrasyon nen Jesus. Anta agla impabayaran na katawan to imay balbaleg ya utang to, pipiliten to balet imay kapara ton aripen ya bayaran imay melag ya utang tod sikato! (Mat. 18:23-35) No walay agyo pantatalosan na sakey ya agi, anto kasi no sika lay unonan manggawa na paraan pian naayos yoy problema yo antis na Memoryal? (Mat. 5:23, 24) No ontan so gawaen mo, papaneknekan mo ya inar-arom si Jehova tan Jesus.

10-11. Panon ya nipanengneng na saray elder ya inar-aro day Jehova tan Jesus? (1 Pedro 5:1, 2)

¹⁰ Panon ya nipanengneng na saray elder ya inar-aro day Jehova tan Jesus? Say sakey ya importantin paraan et no asikasoen da iray karnero nen Jesus. (Basaen so 1 Pedro 5:1, 2.) Atan imay impurek to ed si apostol Pedro. Amitlon imburi nen Pedro si Jesus, pero pagbabawian to iman ya ginawa to. Nen inmoli lay Jesus, oniay intepet tod si Pedro: “Simon ya anak nen Juan, kasin inarom ak?” Seguradon tatalaranan nen Pedro no antoy onsublay ya ibaga tan ipagawa nen Jesus, ta labay ton paneknekan so panangaro tod sikato. Oniay ingganggan nen Jesus ed si Pedro: “Pastolan mo iray angkekelag a karnerok.” (Juan 21:15-17) Impapuso itan nen Pedro, ta manlapu lad saman et inasikaso to iray karnero nen Jesus bilang patunay ya inar-aro to.

¹¹ Sikayo ran elder, panon yon nipanengneng antis tan kayari na Memoryal ya ipapapuso yo met imay imbaga nen Jesus ed si Pedro? Nipanengneng yo ya inar-aro yoy Jehova tan Jesus no maan-anos yon i-shepherding iray inaktibo tan tulongan yo ran ompawil ed si Jehova. (Eze. 34:11, 12) Maabig met no asinggeran yo tan mikaaro kayod saray iyaaralan na Biblia tan saray first time day onatendi ed Memoryal. Ipalikna yon welcome ira, tan labalabay yon magmaliw met iran disipulo nen Jesus.

12. Akin ya makapanpakpel tayo no dalepdepen tayo imay imbaga nen Jesus antis na impatey to? (Juan 16:32, 33)

¹² Diad samay labi antis na impatey nen Jesus, oniay imbaga tod saray disipulo to:  “Diad mundo et manirap kayo, balet manpakpel kayo! Tinalok so mundo.” (Basaen so Juan 16:32, 33.) Akin et makmakpel ya inmarap si Jesus ed saramay mamubusol ed sikato tan akapanmatoor anggad impatey to? Lapud buo so tiwala tod si Jehova. Amta to ya nasubok met iray papatumbok to kanian impikasi tod si Jehova ya bantayan to ra. (Juan 17:11) Akin et makapabiskeg na liknaan ya babantayan itayo nen Jehova? On ta mas mabiskeg si Jehova nen saray mamubusol ed sikatayo. (1 Juan 4:4) Nanenengneng toy amin ya nagagawa. Kanian no mantiwala tayod sikato, agtayo ontakot ed too tan makapanpakpel tayo.

13. Panon ya impanengneng nen Jose ya taga Arimatea so pakpel?

¹³ Nengnengen tayoy alimbawa nen Jose ya taga Arimatea. Baleg so respeto ed sikato na saray Judio ta membro na Sanhedrin (say korte suprema na saray Judio). Insulat nen apostol Juan ya si Jose et “sakey a disipulo nen Jesus, balet ta agto imbaga iya ed arum lapud takot tod saray Judio.” (Juan 19:38) Legan na ministeryo nen Jesus diad dalin, kulang ni so pakpel nen Jose. Tua, inawat to so mensahe na Panarian. Pero agto labay ya naamtaan na arum ya sikatoy manisia ed si Jesus. Seguro, natatakot ya ompan manguman so pakanengneng ed sikato na saray kabaleyan to. Antokaman so rason, ibabaga na Biblia ya nen inatey lay Jesus, nampakpel a siansia si Jose tan “linmad si Pilato tan kinerew toy bangkay nen Jesus.” (Mar. 15:42, 43) Agla natatakot si Jose ya ipaamta ed arum ya sikatoy disipulo nen Jesus!

14. Antoy gawaen mo no lalabanan mo ni takot ed too?

¹⁴ Kasin maka-relate kad si Jose ya taga Arimatea, ta no maminsan et natatakot kad too? Kasin diad eskuelaan o trabaho et nababaingan mon ipaamta ya sakey kan Tasi nen Jehova? Kasin manaalangan kan magmaliw ya publisher o manpa-baptize ta natatakot ka ed ibaga na arum? Agka komon manpapatalo ed takot ed too. Manpatulong kad si Jehova. Ipikasim ed sikato ya ikdan to kay pakpel pian nagawaan moy panlabayan to tan no antoy duga. No nanengneng mo ya eebatan nen Jehova iray pikakasim, ombiskeg so liknaan mo tan makapanpakpel ka.—Isa. 41:10, 13.

15. Nen inmoli lay Jesus tan nampanengneng ed saray disipulo to, antoy ginawa ra lapud liket da? (Lucas 24:52, 53)

¹⁵ Nen inatey si Jesus, maer-ermen iray disipulo to. Aglabat ira naandian na kaaro, pati  ilalo da et singa naandi met la. (Luc. 24:17-21) Balet nen inmoli si Jesus tan nampanengneng ed sikara, impaliwawa to ya saray agawgawad sikato et kasumpalan na saray propesiya ed Biblia. Inikdan to met ira na importantin asainmin. (Luc. 24:26, 27, 45-48) Nen pinmawil lay Jesus ed tawen kayari na 40 ya agew, say ermen na saray disipulo to et asalatan na liket. Malikeliket ira ta amta ran mabilay si Jesus tan tulongan to ra ed kimey ya ipapagawa tod sikara. Lapud liket da, ag-ira tinmundan nanlingkor ed si Jehova.—Basaen so Lucas 24:52, 53; Gawa 5:42.

16. Panon tayon naalig iray disipulo nen Jesus?

¹⁶ Panon tayon naalig iray disipulo nen Jesus? Maliket tayo komon ya dayewen tan panlingkoran si Jehova diad interon taon, aliwa labat ya diad panaon na Memoryal. Nagawaan tayo itan no manuna ed bilay tayo so Panarian na Dios. Wala ray agagi ya in-adjust day eskedyul dad trabaho pian regular iran makapanpulong, makapiaral, tan makapan-family worship. Say arum et pinasimpli day bilay da pian mas dakel so nagawaan dad kongregasyon o makatulong irad lugar ya daiset so Tasi. Tua, dakel so kaukolan tayon isakripisyo pian tuloytuloy tayon makapanlingkor ed si Jehova, pero impaseguro to ya bendisyonan to tayo no iyuna tayod bilay tayo so Panarian.—Pro. 10:22; Mat. 6:32, 33.

17. Anto ray plaplanoen mon gawaen ed sayan Memoryal? (Nengnengen so litrato.)

¹⁷ Eksayted tayo lan mi-Memoryal no Martes, Abril 4. Balet agmo la aalagaren ya onsabi itan ya petsa insan mo labat dalepdepen so bilay tan impatey nen Jesus, ontan met ed panangaro to tan nen Jehova ed sikatayo. Komon ta sankanonot mo iratan ya lanang antis tan kayari na Memoryal. Maabig no kaibad eskedyul mo ya basaen tan dalepdepen iray salaysay ya akalista ed tsart ya “Say Sampot a Simba na Bilay nen Jesus Diad Dalin” ya naromog ed Apendise B12 na Balon Mundo a Patalos. Legan mon babasaen iratan, imanom ya maong iray teksto ya makatulong ed sikan mas nipanengneng so pisasalamat, panangaro, pakpel, tan liket. Insan ka manisip na paraan no panon mon nipanengneng ya talagan misatsalamat ka ed dondon. Seguradon malikeliket si Jesus no antis tan kayari na Memoryal et nanengneng ton pansasagpotan mon nodnonoten so panangaro tan impansakripisyo to parad sika.—Apo. 2:19.