1. No iisipen moy Jehova, antoy naiimadyin mo?

 KASIN iisipen mo no maminsan no antoy itsura nen Aman Jehova? Antoy naiimadyin mo no manpipikasi kad sikato? Ibabaga na Biblia ya agtayo nanengneng si Jehova, pero wala ray nabasa ditan ya deskripsion tungkol ed sikato. Sikatoy tinawag ya “agew tan samper” tan “singa apoy a manguupot.” (Sal. 84:11; Heb. 12:29) Sikatoy adeskribe met ya singa mankirlap a metal, akayurong ed trono ya gawad baton safiro, tan apaliberan na maliwliwawan bunlalakaw o rainbow. (Eze. 1:26-28) No nababasam iraya, antoy naliliknam? Seguro manbilib ka tan ompan naliknam ya agka makanepegan ya onasingger ed sikato.

2. Akin et iisipen na arum ya imposiblin naaro ira nen Jehova?

² Lapud agtayo nanengneng si Jehova, ompan mairap tayon panisiaan ya inaro to tayo. Iisipen na arum ya ag-iran balot naaro nen Aman Jehova lapud background da o lapud saray aliwliwan agawad bilay da. Singa bilang, ompan agdan balot alikna so panangaro na sakey ya ama. No ontay situasyon mo, agka mapaga ta natatalosan nen Jehova no akin ya nanairapan kan onapit ed sikato. Pero impaisulat tod Biblia iray ugali to ta labay ton nakabkabat mon maong.

3. Akin et marakep no aralen tayoy panangaro nen Jehova?

³ Diad ami-amin ya deskripsion ed si Jehova, say eksakton mandeskribe ed sikato et say salitan aro. Ibabaga na Biblia ya “say Dios et aro.” (1 Juan 4:8) Amin ya gagawaen to et lapud aro. Agaylay kaaralem tan kabiskeg na panangaro to. Diad tua, anggan saramay agmangaaro ed sikato et papanengnengan toy panangaro. (Mat. 5:44-45) Pantongtongan tayod sayan artikulo iray ugali nen Jehova tan say kaaralem na panangaro to, ta no diman tayo mas nakakabat, diman tayo met mas naar-aro.

INAR-ARO ITAYON MAONG NEN JEHOVA

4. Antoy naliliknam kada no iisipen moy panangaro nen Jehova? (Nengnengen met so litrato.)

⁴ “Si Jehova et maar-aro.” (Sant. 5:11) Diad Biblia, inkompara toy sarili to ed sakey ya maas-asikason ina. (Isa. 66:12, 13)  Imadyin mo pay sakey ya maar-aron nanay ya kokomisan toy baby to. Panlugtoten tod akwalan to tan malamlambing ton katongtongen. No onakis o walay ansakit na baby to, ebaen ton tampol tan iter toy kailangan to. Singa ontan met si Jehova. No onaakis ka lapud saray problemam, makaasa ka ya tulongan to ka. Oniay insulat na salmista: “Sanen nadadaeg ak na saray kapagaan, niligliwa tan pinakalma mo ak.”​—Sal. 94:19.

5. Antoy epekto ed sika na matoor ya panangaro nen Jehova?

⁵ Matoor so panangaro nen Jehova. (Sal. 103:8) No makagawa tayoy aliwa, agto tayo sukoan. Nensaman, aminpigan nanrebelde ed sikato so bansan Israel. Anggano apaermen tan asakitan da, peperdonaen to ira no magbabawi ra. Onia ingen so imbaga tod bansan Israel pian ipaseguro ya ag-anguman so panangaro to: “Nagmaliw kan mabmabli ed pakanengneng ko, apagalangan ka, tan inaro ta ka.” (Isa. 43:4, 5) Atan ya klase na panangaro so ipapanengneng nen Jehova ed sikatayo anggad natan. Agtayo sirin pandududaan ya agto tayo met sukoan no bilang ta makagawa tayoy seryoson kasalanan. No magbabawi tan manguman tayo, ompawil ed dati so relasyon tayod sikato. Im-promise to ya “sikatoy mabulos a mamerdona.” (Isa. 55:​7, paimanod leksab) Ibabaga na Biblia ya ‘nainawaan’ so sakey ya too ya pinerdona la nen Jehova.​—Gawa 3:19.

6. Antoy naaralan tayod Zacarias 2:8 tungkol ed si Jehova?

⁶ Basaen so Zacarias 2:8. Malikas si Jehova ed liknaan tayo, tan sikatoy akaparaan ya manprotekta ed sikatayo ta inar-aro to tayo. No nasasakitan itayo, nasasakitan met. Kanian seguradon dengelen to tayo no ipikasi tayon: “Alwaran mo ak pa a singa bukel na matam.” (Sal. 17:8) Say mata et sensitibo tan importantin parte na laman. Kanian nen inkompara itayo nen Jehova ed bukel na mata to, singa to ibabagan, ‘Importante kayon maong ed siak. Kanian no sakitan da kayo, singa da ak met sasakitan.’

7. Akin et importante ya kombinsido tayo ya inaro itayo nen Jehova?

⁷ Aglabay nen Jehova ya pandudaan mo ya inar-aro to ka. Pero amta to ya lapud background o aliwliwan agawa ed bilay tayo, ompan onsagi ed isip tayo ya agto tayo inaro. Odino ompan walay dadalanen tayon subok natan tan say pakalikna tayo et singa to tayo la  pinaulyanan. Antoy gawaen tayo pian mas ombiskeg so tiwala tayo ya inar-aro itayo nen Jehova? Makatulong no amtaen tayo no panon ton imbalikas so panangaro tod si Jesus, diad saray alanaan, tan ed amin ya totoo.

NO PANON YA IMBALIKAS NEN JEHOVA SO PANANGARO TO

8. Akin et kombinsidoy Jesus ya sikatoy inar-aro nen Ama to?

⁸ Bilyon-bilyon lan taon ya saniba si Jehova tan Jesus, kanian seguradon maap-apit so liknaan da ed sakey tan sakey. Diad interon uniberso, anggapoy makapipara ed elet na aroan dan sanama. Nabasa ed Mateo 17:5 ya imbalikas ya mismo nen Jehova so panangaro tod si Jesus nen wadiad dalin. Nayari pan say ibaga labat nen Jehova et, ‘Saya imay inabobonan ko.’ Pero labay ton naamtaan tayo ya inar-aro toy Jesus, kanian say imbaga to et, “Saya so Ana’ko, say inad-arok.” Pap-proud si Jehova ed si Jesus, lalo la ta mabulbulos iyan Anak to ya isakripisyoy bilay to parad totoo. (Efe. 1:7) Amta met nen Jesus ed sarili to ya sikatoy inar-aro nen Ama to. Agton balot itan nandudaan. Aminpiga to ingen ya imbaga ya sikatoy inar-aro nen Ama to.​—Juan 3:35; 10:17; 17:24.

9. Panon ya indeskribe na Roma 5:5 so panangaro nen Jehova ed saray alanaan?

⁹ Ipapalikna met nen Jehova so panangaro to ed saray alanaan. (Basaen so Roma 5:5.) Diad sayan teksto, kasin naimano yo imay salitan “nikalbo”? Base ed sakey ya reperensya, say panangaro nen Jehova ed saray alanaan et singa “kulos ya onaagus ed puso ra.” Idadanet na satan ya manleppua so panangaro tod sikara. On, sankalikna na saray alanaan ya “inad-aro [ira] na Dios.” (Jud. 1) Ontan lay pandinayew nen apostol Juan ed panangaro nen Jehova ed saray alanaan, kanian oniay insulat to: “Nonot yoy kabaleg na panangaro na Ama ed sikatayo, a tinawag itayon ananak na Dios!” (1 Juan 3:1) Pero kasin saray alanaan labat so inaro na Dios? Andi, inaro to tayon amin.

10. Anto so sankabelatan ya ebidensya ya inar-aro ka nen Jehova?

¹⁰ Anto so sankabelatan ya ebidensya ya inar-aro itayo nen Jehova? Say dondon. Inter toy inar-aro ton Anak tan pinaulyanan ton ompatey pian naperdona so kasalanan tayo tan makapikaaro tayo ed Sikato. (1 Juan 4:10) Balbaleg so insakripisyo nen Jehova parad sikatayo ran totoo. Anggapoy makapantay ed satan ya panangaro! (Juan 3:16; Roma 5:8) No lanang tayon dalepdepen so imbayar nen Jehova tan Jesus pian nadondon itayo, diman tayo mas nakombinse ya inar-aro day kada sakey ed sikatayo. (Gal. 2:20) No hustisya labat komon so nalalanor, nayari pa met ya aliwa lan si Jesus so ibaki nen Jehova pian nabayaran so dondon. Pero si Jesus so pinili to—say inar-aro tan alenleneg ya Anak to! On, sanka-espisyalan ya regalo so dondon. Patunay itan ya inar-aro itayo nen Jehova.

11. Antoy naaralan tayo ed Jeremias 31:3?

¹¹ Singa naaralan tayo la, say panangaro nen Jehova ed sikatayo et aglabat angangga ed emosyon. Ibabalikas to met itan. (Basaen so Jeremias 31:3.) Inar-aro to tayo kanian nanggaway paraan pian nakaaro to tayo. (Ikompara so Deuteronomio 7:7, 8.) Anggapon balot so makapangisian ed sikatayo ed panangaro to. (Roma 8:38, 39) Antoy epekto ed sika na panangaro nen Jehova? No basaen moy Salmo 23, nanengneng moy epekto na panangaro nen Jehova ed si David. Legan tayon pantotongtongan itan, nengneng mo met no antoy epekto ed sika na panangaro nen Jehova.

ANTOY EPEKTO ED SIKA NA PANANGARO NEN JEHOVA?

12. Tungkol ed anto so Salmo 23?

¹² Basaen so Salmo 23:1-6. Say Salmo 23 et kansion ya kinompos nen David. Insulat to dia  so panamabli to ed pangaasikaso tan panangaro nen Jehova ed sikato. Indeskribe toy elet na pankakaaro dan dua nen Jehova ya inturing ton Pastol to. Sikatoy lanang ya akadepende ed si Jehova. Maligen so liknaan to ta say Dios so mangigigiya ed sikato. Matalek si David ya agmanguman so panangaro nen Jehova ed sikato diad interon bilay to. Akin et ontan lay kabiskeg na tiwala tod si Jehova?

13. Akin et segurado si David ya sikatoy asikasoen nen Jehova?

¹³ “Agak onkulang na antokaman.” Lanang ya itatarya nen Jehova so amin ya pankaukolan nen David kanian agton balot alikna ya sikatoy apaulyanan. Amta to ya kaaro so turing nen Jehova ed sikato tan walad sikato so pabor na Dios. Aratan so rason no akin ya seguradoy David ya sikatoy asikasoen nen Jehova anggan antoy nagawa. Lapud amta nen David ya sikatoy inaro tan aasikasoen nen Jehova, aga aburidon maong. Malikeliket ingen, ta singa wala lad sikaton amin basta wadtay Jehova.​—Sal. 16:11.

14. Panon itayon aasikasoen nen Jehova?

¹⁴ Maar-aro itayon aasikasoen nen Jehova, lalo la no wala ray aliwliwan nagawa ed bilay tayo. Apatunayan itan nen Sister Claire a ya masulok ya 20 taon ya nanlingkor ed Bethel. Wala may panaon ya nantutumbokan so problema na pamilya to tan agto la amtay gawaen to. Na-stroke so tatay to, adispelo so sakey ya agi to, alugi so melag ya negosyo na pamilya ra, tan arimata so abung da. Pero panon ya inasikaso nen Jehova so pamilya to? Oniay imbaga nen Claire: “Sinegurado nen Aman Jehova ya nitaryan amin so pankaukolan na pamilyak. No maminsan, sobra ni ingen. Lanang kon iisipen iray ginawa nen Jehova parad sikami.  Agkon balot nalingwanan iraman. Kanian anggano wala ray problema, maliket ak nin siansia. Kombinsido ak ya tulongan ak nen Jehova ta tinulongan to ak la nensaman.”

15. Akin et nainawaan si David? (Nengnengen met so litrato.)

¹⁵ “Paiinawaen to ak.” No maminsan, agla amta nen David so gawaen to lapud karakel na subok ya aarapen to. (Sal. 18:4-6) Pero makakainawa kada no nalilikas toy panangaro tan panangasikaso nen Jehova. No naknaksawan la, sikatoy iyakar nen Jehova ed “saray marikan panagpastolan” tan ed “saray pasen a painawaan diad abay na danum.” Kanian anggano dakel so subok, akapantultuloy ya nanlingkor si David ed si Jehova.​—Sal. 18:28-32.

16. Mangisalaysay na eksperiensyam ya akainaway liknaan mo lapud aliknam so panangaro nen Jehova.

¹⁶ Singa si David, nasasarag tayo met so antokaman ya subok tan problema “lapud matoor a panangaro nen Jehova.” (Tag. 3:22: Col. 1:11) Imanoen so eksperiensya nen Sister Rachel. Legan na COVID-19 pandemic, sikatoy abigbigla tan asakisakitan ta akisian so asawa to tan tinmunda lan nanlingkor ed si Jehova. Antoy ginawa nen Jehova parad si Sister Rachel? Oniay imbaga to: “Amayamay so ginawa nen Jehova pian naliknak ya walay mangaaro ed siak. Inusar to ray kakaarok pian agko naliknan bukbukor ko. Inyawitan da ak na panangan, mansi-send iray makapaseseg iran message tan teksto. Onlelemew so liknaan ko no nanenengneng koy imis da. Tan lanang dan ipapanonot ed siak ya aga ak paulyanan nen Jehova. Naynay kon pisasalamatan si Aman Jehova ta inikdan to ak na balbaleg tan maar-aron pamilya.”

17. Akin et imbaga nen David ya “anggapoy nepeg kon takotan”?

¹⁷ “Anggapoy nepeg kon takotan, ta wala kad abay ko.” Naynay ya walad peligro so bilay nen David. Maimpluensya tan mabiskeg iray kalaban to tan amayamay ira. Pero maligen so liknaan to ta amta ton sikatoy inar-aro nen Jehova. Kombinsido si David ya antokaman so situasyon, kaiba toy Jehova. Inkansion to ingen ya sikatoy insalba na Dios ed “amin a pakatatakotan [to].” (Sal. 34:4) On, nalalabanan nen David so takot to kada no iisipen to ya sikatoy inar-aro nen Jehova.

18. No antam ya inaro ka nen Jehova, antoy epekto tod sika anggano natatakot ka?

¹⁸ Anggano wala tayod mair-irap ya situasyon tan natatakot tayo, ombiskeg so liknaan tayo  no amta tayon inar-aro itayo nen Jehova. Ontan so alikna na sakey ya payunir, si Susie, tan say asawa to nen nambikkel so anak da. Kuan nen Susie: “No walay nagawan trahedya, makapa-trauma. Talagan onkapuy so liknaan mo tan natatakot ka ta ompan wala lamet so nagawa. Pero aliklikna mi panangaro nen Jehova. Pinabiskeg to kami kanian linmigen so liknaan mi.” Onia met kunoy nanonotan nen Rachel ya abitlad parapo 16. Kuan to: “Wala may labi ya singa bebetagen so pusok, aburido ak ya maong, tan natatakot ak. Nampikasi ak ed si Jehova tan inyaki-akis ko. Kayari to man, say pakaliknak et singa ak tinapok-tapok nen Jehova kanian akainawa ak, insan ak la akaugip. Singa ak ugaw ya ineba na nanay to. Agkon balot man nalingwanan.” Imanoen met so eksperiensya na sakey ya elder, si Brother Tasos. Sikatoy akulong na apat taon lapud agnaako na konsiensia to so mansundalo. Oniay imbaga to: “Inasikaso ak nen Aman Jehova tan intarya toy amin ya kaukolan ko. Kanian binmiskeg so tiwalak ed sikato. Lapud tulong na espiritu nen Jehova, maliket ak nin siansia anggano makapa-depress ed prisoan. Anengneng kon mismo ya no diman ko gagawaen so panlabayan nen Jehova, mas walay rason to ya bendisyonan ak. Kanian nandesisyon ak ya man-regular payunir legan ya wala ak ed prisoan.”

ASINGGER KA ED MAAR-ARON DIOS TAYO

19. (a) No kombinsido ka ya inar-aro ka na Dios, antoy epekto to itan ed saray pikakasim? (b) Anton teksto tungkol ed panangaro nen Jehova so favorite mo? (Nengnengen so kahon ya “ Nalikliknam so Panangaro nen Jehova ed Sarayan Teksto.”)

¹⁹ Ipapanengneng na saray eksperiensyan apantongtongan tayo ya kaiba tayoy Jehova, “say Dios na aro.” (2 Cor. 13:11) Sikatoy interesado ed kada sakey ed sikatayo. “Apaliberan [itayo] na matoor a panangaro To”! (Sal. 32:10) No dalepdepen tayoy panangaro nen Jehova, sikatoy magmaliw ya tudtua ed bilay tayo kanian magmaliw tayon close ed sikato. Agtayo met nababaingan ya manpikasi tan ibagan kakkailangan tayoy panangaro to. Agtayo met manalangan ya ibagad sikato iray pakakaaburidoan tayo ta amta tayon makatalos si Jehova tan labalabay to tayon tulongan.​—Sal. 145:18, 19.

20. Akin et anap-anapen tayoy panangaro nen Jehova?

²⁰ Say panangaro nen Jehova et singa apoy ya papetangen toy laman no nakeketel tayo. Atan so manpabiskeg na liknaan tayo no ondadalan tayod saray subok tan kairapan. Kanian asingger kad si Jehova tan awat moy panangaro to. Tan komon et proud mo met ya ibagan: “Inad-arok si Jehova”!​—Sal. 116:1.