Say arum ed sikatayo et binmaleg ed kultura ya abebbeba so pakanengneng na saray lalaki ed saray bibii. Singa bilang, oniay imbaga nen Hans ya manangasikaso na sirkito ed Bolivia: “Say arum et binmaleg ed kultura ya ‘lakin-laki’ ka no siga ka. Diad onia ran kultura, iisipen na saray lalaki ya mas lamang ira nen saray bibii.” Onia met so imbaga nen Shengxian ya elder ed Taiwan: “Diad lugar mi, ag-importante ed saray lalaki so opinyon na saray bibii. No dengelen na laki so opinyon na bii, ompan kantiawan na saray barkada to.” Diad arum balet ya lugar, aga masyadon halata so abebbeban pakanengneng da ed saray bibii. Singa bilang, idalan da ed lurey, pero makapasakit so joke da ed saray bibii.

Anggano ontan so kultura ya binalegan na sakey ya brother, sarag ton umanen so panagtrato to ed saray bibii. (Efe. 4:22-24) Nagawaan to itan no aligen toy alimbawa nen Jehova. Talakayen ed sayan artikulo no panon ya tratratoen nen Jehova iray bibii, no panon ya naalig na saray brother so alimbawa nen Jehova, tan no panon ya nipanengneng na saray elder so maong ya alimbawa ed panrespeto ed saray sister.

PANON YA TRATRATOEN NEN JEHOVA IRAY BIBII?

Si Jehova so sankaabigan ya alimbawa na maong ya panagtrato ed saray bibii. Maar-aron Ama si Jehova tan pamilya so turing to ed sikatayo ran totoo. (Juan 3:16) Kanian ananak so turing to ed saray matoor ya sister. Nia ray pigaran paraan ya ipapanengneng nen Jehova ya inar-aro tan rerespetoen to iray bibii.

Patas so panagtrato to ed sikara. Pinalsa nen Jehova so laki tan bii “unong ed indengan [to].” (Gen. 1:27) Agto ginawa ya mas matalino o mas maabilidad iray lalaki nen saray bibii. Tan anggapoy nabasa ed Biblia ya mas paborito to ray lalaki nen saray bibii. (2 Awa. 19:7) Pinalsa toy laki tan bii ya sarag dan talosan iray katuaan ya walad Biblia tan sarag da met ya aligen iray balibalin ugali to. Papablien toy pananisia na amin ya lingkor to.  Kanian aliwan saray lalaki labat so inikdan to na ilalon manbilay na andi-anggaan diad Paraison dalin, odino manuley ya ari tan saserdote diad tawen. Pati saray bibii et inikdan to met na ontan ya ilalo. (2 Ped. 1:1, paimanod leksab) On, mapatpatnag ya aliwan abebbeba so pakanengneng nen Jehova ed saray bibii.

Dedengelen to ra. Importante ed si Jehova so liknaan na saray bibii tan imamalasakit to ra. Singa bilang, dinengel tan inebatan to ray pikakasi nen Raquel tan Hana. (Gen. 30:22; 1 Sam. 1:10, 11, 19, 20) Impaisulat to met ed Biblia iray salaysay tungkol ed saray lalaki ya dinmengel ed saray bibii. Singa bilang, ingganggan nen Jehova si Abraham ya dengelen toy opinyon na asawa ton si Sara, tan inmunor si Abraham. (Gen. 21:12-14) Dinengel nen Arin David si Abigail. Diad tua, imbaga to ingen ya imbaki nen Jehova si Abigail pian napigilan ed panggawa toy kasalanan. (1 Sam. 25:32-35) Inalig met nen Jesus so ugali nen Ama to. Dinengel toy ina to ya si Maria. (Juan 2:3-10) Nanengneng ed sarayan alimbawa ya dedengelen nen Jehova iray bibii. Atan so sakey ya pakanengnengan ya rerespetoen to ra.

Pantitiwalaan to ra. Singa bilang, inyasain nen Jehova si Eva ya ontulong diad pangasikaso ed interon dalin. (Gen. 1:28) Aliwa sirin ya abebbeba so pakanengneng nen Jehova ed sikato kompara ed asawa ton si Adan. Walay talek nen Jehova ed si Eva ya sarasarag ton tulongan so asawa to. Nantiwalaan met nen Jehova so propetesan si Debora tan Hulda. Sikara so inusar ton mangipasabi na mensahe to, anggan diad ukom tan ari ni ingen. (Ukom 4:4-9; 2 Ara. 22:14-20) Diad panaon tayo, baleg met so tiwala nen Jehova ed saray sister ya sarag day mikimeyan ed sikato. Wala ray sister ya maseseg ya manlilingkor bilang publisher, payunir, tan misionero. Say arum balet et ontutulong ed panag-design, panagpaalagey, tan panagmintina na saray Kingdom Hall tan saray pasilidad na branch. Say arum et manlilingkor diad Bethel tan diad saray remote translation office. Sarayan sister et singa “baleg ya armada” ya uusaren nen Jehova pian nasumpal so linawa to. (Sal. 68:11) On, aliwan makapuy so pakanengneng nen Jehova ed saray sister. Amta to ya sarasarag dan gawaen so ipapagawa to.

PANON YA NAALIG NA SARAY BROTHER SO ALIMBAWA NEN JEHOVA?

Sikayo ran brother, panon tayon nanengneng no kasin aaligen tayoy alimbawa nen Jehova diad panagtrato ed saray bibii? Kailangan tayon usisaen so panagnonot tan kilos tayo. Panon tayo itan ya gawaen? Isipen iyan ilustrasyon: Pian nanengneng na doktor no kasin walay sakit ed puso na pasyente to, kaukolan ton ipa-X ray. Sikatayo ey? Antoy gawaen tayo pian singa tayo na-X ray so simbolikon puso tayo? Mantepet tayo ed maespiritual ya kaaro tan aralen tayoy ibabaga na Biblia pian naamtaan tayo no kasin aaligen tayoy panagtrato nen Jehova ed saray bibii.

Mantepet ed maespiritual ya kaarom. (Pro. 18:17) Singa bilang, tepetan mo: “Antoy naoobserbaan mod siak ya panagtratok ed saray sister? Kasin nipapaliknak ed sikara ya rerespetoen ko ra? Antoy nai-advice mod siak pian na-improve ko ni panagtratok ed sikara?” No impaimano ed sika na kaarom iray kaukolan mon umanen ed sarilim, agka la manrarason. Awat moy advice to tan gawam so anggaay nayarian mon manguman.

Aral moy ibabaga na Biblia. Pian naamtaan mo no kasin duga so panagtratom ed saray sister, aral moy ibabaga na Salita na Dios. Makatulong itan pian nausisam no anto ray kaukolan mon umanen ed sarilim. (Heb. 4:12) Nabasam ditan iray lalaki ya maong so impantrato dad saray bibii, say arum balet et andi. Legan mon aaralen iratan ya alimbawa, isip mo no siopay kaparehom na ugali. Sakey ni, no aaralen moy ibabaga na Biblia tungkol ed saray bibii, agka labat komon manpopokus ed sakey ya bersikulo. Ta no andi, ompan aliway pakatalos mo. Singa bilang, ibabaga na 1 Pedro 3:7 ya nepeg a pagalangan na asawan laki so misis to “lapud saray bibii et mas makapuy a singa ed mibebetag a pananginan.” a Kasin labay ya ibaga na satan ya teksto ya mas maabilidad tan mas matalino iray lalaki? Andi. Ikomparam  itan ya imbaga nen apostol Pedro ed samay nabasad Galacia 3:26-29. Nabasa ditan ya parehon lalaki tan bibii so pinili nen Jehova ya nakaiba nen Jesus ya manuley ed tawen. On, no amtaen moy ibabaga na Biblia tan mantepet kad maespiritual ya kaarom, nausisam so sarilim no kasin duga tan marespeto so panagtratom ed saray sister.

PANON YA NIPANENGNENG NA SARAY ELDER YA RERESPETOEN DA IRAY SISTER?

Diad kongregasyon, makaaral iray brother ed maong ya alimbawa na saray maar-aron elder. Panon ya ipapanengneng na saray elder so maong ya alimbawa ed panagrespeto ed saray sister?

Kokomendaan da iray sister. No panangiter na komendasyon so pantongtongan, maabig ya alimbawa si apostol Pablo. Diad samay sulat to ed kongregasyon diad Roma, espisipiko ton binitla so kangaranan na saray sister tan saray maong ya nagagawaan da. (Roma 16:12) Imadyin yo pay liket na sarayan sister nen imbasa ed kongregasyon iyan sulat nen Pablo! Ontan met so gagawaen na saray elder natan. Naynay dan kokomendaan iray sister lapud maong ya ugali da tan lapud saray nagagawaan da parad si Jehova. Katon nalikna ra ya rerespetoen tan aapresyaen ira na kongregasyon. Kanian sikayo ran elder, agyo isisiblet so komendasyon ed saray sister. Malay yo, wala manayay dadalanen to tan amay ibaga yo so mamaseseg ed sikaton mantultuloy ya manlingkor ed si Jehova.​—Pro. 15:23.

No kokomendaan yo ray sister, marakep no impapuso tan espisipiko so komendasyon yo. Akin ey? Oniay imbaga nen Sister Jessica: “Tua, balibali met ed liknaan no ibaga na saray brother ya, ‘Nakomendaan kayo sister.’ Pero mas napaseseg kami no espisipiko so komendasyon, singa bilang, no komendaan da kami lapud mareen iray  ananak mi diad aral odino lapud inabet mi so sakey ya Bible study pian makapiaral.” No espisipiko so komendasyon na saray elder, nipapalikna ra ed saray sister ya importante irad kongregasyon.

Dedengelen da iray sister. Mapaabeban bibidbiren na saray elder ya wala ray mararakep ya suggestion na saray sister. Kanian mantetepet ira ed saray agagin bibii. Tan ondedengel iran maong no ibabaga day opinyon da. Napapaseseg iray sister no ontan so gagawaen na saray elder. Tan diad tua, makakatulong met itan diad saray elder. Akin ey? Oniay imbaga nen Brother Gerardo ya sakey ya elder tan manlilingkor ed Bethel: “Lalaen koy opinyon na saray sister. Makakatulong iray suggestion da pian na-improve koy trabahok. No maminsan, mas eksperiensyado iray sister diad sakey ya trabaho no ikomparad saray brother.” Diad maslak ya kongregasyon, mas dakel so payunir ya sister tan kakkabisado da so teritorya. Oniay imbaga nen Bryan, sakey ya elder: “Mausa-usar iray sister diad organisasyon tayo. Kanian no labay moy makaaral ed sikara, tepetan mo ra.”

No walay suggestion na saray sister, ag-itan komon ibabaliwala na saray elder. Akin ey? Oniay imbaga na sakey ya elder, si Edward: “No dengelen na elder so opinyon na sakey ya sister, makatulong itan pian mas makapandesisyon na duga tan mas natalosan toy liknaan na arum.” (Pro. 1:5) No bilang ta aliwan samay suggestion na sister so apili na saray elder, pisalamatan da nin siansia ed opinyon to.

Iti-train da iray sister. Mangigagana met na panaon iray elder pian nai-train iray sister. Singa bilang, ibabangat da ra no panon so mangikondukta na meeting for field service no bilang ta anggapoy available ya bautismadon brother. Ibabangat da met ira no panon so pangusar ed saray tools o equipment pian makatulong irad panagpaalagey tan panagmintina na saray pasilidad tayo. Diad Bethel, iti-train na saray overseer iray sister diad nanduruman asainmin, singa diad maintenance, purchasing, accounting, computer programming, tan arum ni. No iti-train na saray elder iray sister, ipapanengneng da ya walay tiwala da ed sarayan agagin bibii.

Uusaren na dakel ya sister so training ya naawat da pian ontulong met ed arum. Singa bilang, saray sister ya asali da lay nan-volunteer ed construction et uusaren day naaralan dan skill pian ontulong ed pangapiger ed abung na saray agagi ya apektadoy kalamidad. Saray sister ya a-train la ed public witnessing et iti-train da met so arum ya sister pian magmaliw met iran epektibo ed sayan klase na panagpulong. Antoy nalilikna na saray sister ed impangi-train ed sikara na saray elder? Oniay imbaga nen Sister Jennifer: “Nen nan-volunteer ak ed Kingdom Hall construction project, in-train ak na overseer. Naynay da ak ya kokomendaan. Labalabay ko ran katrabaho ta maapresya ra tan aliknak ya walay tiwala dad siak.”

ANTOY EPEKTO NO PAMILYA SO TURING TAYO ED SARAY SISTER?

Inar-aro tayo iray matoor ya sister ta amta tayon inar-aro ira nen Aman Jehova. Kanian pamilya so turing tayod sikara. (1 Tim. 5:1, 2) Pap-proud tayod sikara tan baleg ya kagalangan tayo ya kaiba tayo ran manlilingkor. Naliliketan tayo met no amta tayon nalilikna day suporta tan panangaro tayo. Oniay imbaga nen Sister Vanessa: “Misatsalamat ak ed si Aman Jehova ta parte ak na organisasyon to, ya dia et dakdakel so brother ya mamapabiskeg ed siak.” Onia met so imbaga na sakey ya sister ya tagad Taiwan: “Misatsalamat ak ta importantin maong iray bibii ed si Jehova tan ed organisasyon to, tan agda ibabaliwala so liknaan mi. Kada no iisipen ko itan, ombibiskeg so pananisiak tan lalok ya naaapresya ya parte ak na organisasyon nen Jehova.”

Seguradon pap-proud si Aman Jehova no nanenengneng to ya aaligen na saray matoor ya brother so panagtrato to ed saray bibii. (Pro. 27:11) Oniay imbaga nen Benjamin ya elder ed Scotland: “Dakel ya lalaki natan so anggapo lan talagay respeto dad bibii. Kanian kaloob na saray sister diad Kingdom Hall, komon ta nalikna ra ya rerespetoen tan inar-aro tayo ra.” On, kanepegan na saray sister ya nalikna so panangaro tan respeto tayo. Gawaen tayo sirin so anggaay nayarian tayon aligen so panagtrato nen Jehova ed sikara.​—Roma 12:10.