DIAD Greek, amay salitan impatalos ya “karwahe” ed Balon Mundo a Patalos et aglabat ontutukoy ed saksakey a klase na luluganan. (Gawa 8:28, 29, 38) Mapatnag balet ya mas baleg imay niluganan to may Etiope kompara ed saray tipikal ya karwahe ya parad guerra o karera. Akin et ontan so nibaga tayo? Nia ray pigaran rason.

Atagey ya opisyal imay Etiope tan arawrawi so biniahe to. Ibabaga na Biblia ya atagey so posisyon to ta “panlilingkoran to so Candace a reyna na saray Etiope, tan mangaasikaso ed amin a kayamanan to.” (Gawa 8:27) Nensaman, say Etiopia et sakop to ray lugar ya sakop la natan na bansan Sudan, ontan met ed saray lugar ya walad bandad leksab na Ehipto. Lapud kaarawi na laen na sayan opisyal, seguradon wala ray awit ton bagahe tan aminpigan nampalipat-lipat na luluganan. Nen inmunan siglo, saray luluganan ya uusaren ed panagbiahe et singa met karwahe, pero walay tarong to tan apatira so dalig to. Oniay imbaga na libron Acts​—An Exegetical Commentary (Saray Komento tan Eksplinasyon ed Libron Gawa): “Say ontan ya luluganan et makakarga na dakel ya bagahe. Mainawa so pasahero tan naibiahe ed arawi.”

Manbabasa imay Etiope nen inasinggeran nen Felipe. Ibabaga na Gawa 8:30 ya “batik si Felipe a binansagan to [so karwahe] tan nadngel ton babasaen a maksil na eunoko so libro nen propeta Isaias.” Saray karwahe ya uusaren ed panagbiahe et matantan labat so batik da. Atan so rason no akin ya relaks ya manbabasa imay eunoko tan mainomay ya nausilan nen Felipe imay luluganan.

“Pinalugan [na Etiope si] Felipe tan pinayurong tod abay to.” (Gawa 8:31) No say niluganan da et karwahen parad karera, akaalagey ira. Mapatpatnag sirin ya say niluganan da et amay karwahe ya talagan parad panagbiahe. Ta no andi, agnapayurong na eunoko si Felipe ed abay to.

Lapud sarayan detalye ya nabasad Gawa kapitulo 8 tan saray ebidensya base ed history, nanengneng ed saray litrato diad saray balon publikasyon tayo ya samay Etiope et akalugan ed mas baleg a luluganan imbes ya diad karwahe ya parad guerra o karera.