1-2. Anto ran subok so dadalanen na saray matoor ya lingkor na Dios natan?

 NO WALAY graben subok, bigla labat ya manguman so bilay tayo. Singa bilang, walay masetseseg ya brother ya say ngaran to et Luis a ya a-diagnose ya wala manayay graben cancer to. Tinaningan la na doktor, pigaran bulan labat la kunoy pambilay to. Si Monika tan say asawa to et abayag lan manlilingkor ed si Jehova ya saniba. Pero sakey ya agew, adiskobre nen Monika ya pigaran taon la manayan lolokoen nen asawa to, anta manlilingkor bilang elder. Si Olivia et single ya sister, tan apilitan ya man-evacuate nen walay onsabin maksil ya bagyo ed lugar da. Kapawil to, abigbigla ta ginaygay na bagyo so abung to. Grabe agawa ed sarayan agagi, anto? Diad sakey ya iglap, anguma-uman so bilay da! Kasin asalim met la itan, amay walay biglan agawa tan anguma-uman ya tampol so bilay mo?

² Anggano matoor tayon manlilingkor ed si Jehova, agtayo exempted ed saray problema. Mansasakit tayo, apektado tayoy irap na panagbilay, itetepel tayoy pambusol na arum, tan wala ray lugar ya papairapen na gobierno iray agagi tayo. Anggano ag-itayo ipapaliis nen Jehova ed sarayan subok, im-promise to ya tulongan to tayo. (Isa. 41:10) Kanian diad tulong to, mansiansia tayon maliket, makapandesisyon tayoy duga, tan makapanmatoor tayo anggan anto ni tay onsabin subok. Aralen tayo ed sayan artikulo so apatiran gagawaen nen Jehova pian natulongan to tayo no wala ray ambelbelat ya problema. Pantongtongan tayo met no anto ray gawaen tayo pian naawat tayoy tulong to.

 BANTAYAN KA NEN JEHOVA

3. Antoy mairap ya gawaen no ondadalan tayod graben subok?

³ Antoy mairap ya gawaen? No ondadalan tayod graben subok, mairap so mandesisyon na duga. Akin ey? On ta maguloy nonot tayo tan apektado lay emosyon tayo. Singa aburagas ya amin tan naba-blangko tayo. Ontan so alikna na samay duaran sister ya abitla ed parapo 1. Oniay imbaga nen Olivia: “Nen abagyo may abung ko, agko amta no antoy gawaen ko tan no panon ak ya manumpisa lamet.” Onia met so imbaga nen Monika nen naamtaan to ya agnanmatoor so asawa to: “Alabas nen say ermen so aliknak, asakisakitan ak. Singa walay nansaksak ed pusok. Anggan saray simplin bagay et mairap kon gawaen. Agak makapanisia ya agawa yad bilay ko.” Panon itayon tutulongan nen Jehova no agtayo la amta so gawaen tayo?

4. Base ed Filipos 4:​6, 7, antoy im-promise nen Jehova ya gawaen to parad sikatayo?

⁴ Antoy gawaen nen Jehova? Im-promise to ya ikdan to tayoy “kareenan na Dios.” (Basaen so Filipos 4:6, 7.) Anto tay kareenan na Dios? Atan may nalilikna tayon inkakalmado tan deen na nonot tan puso lapud amta tayo ya walad sikatayo so pabor nen Jehova. Sayan kareenan et “palumbasan toy amin a pakatalos.” Labay ton ibaga, anggano problemado so sakey, kakkalmado nin siansia. Asalim la may kasumpal mon nampikasi ed si Jehova et kinmalma ka? Atan ya aliknam, atan may “kareenan na Dios.”

5. Akin et nibagan babantayan na kareenan na Dios so nonot tan puso tayo?

⁵ Ibabaga met na Filipos 4:7 ya say kareenan na Dios so “manbantay” o manprotekta ed “saray puso tan nonot [tayo].” Diad lenguahen Greek, say salitan impatalos ya “manbantay” et termino diad militar. Ontutukoy itan ed saray sundalo ya mangguaguardia ed sakey ya syudad tan aka-ready ira no walay onlusob ya kalaban. Maligen so nonot na saramay manaayam ed satan ya syudad tan masamit so ugip da ta amta ra ya wala ray sundalo ya manbabantay. Ontan met so gagawaen na kareenan na Dios. Atan so manbabantay ed puso tan nonot tayo. Kalmado tayo labat anggano wala ray problema ta amta tayon kaiba tayoy Jehova. (Sal. 4:8) Singa si Hana nensaman, anggano agni asolusyonan so problema tayo, mareen so nonot tayo. (1 Sam. 1:16-18) No kalmado tayo, mas limpioy panagnonot tayo tan makapandesisyon tayoy duga.

6. Antoy gawaen tayo pian naawat tayoy kareenan na Dios? (Nengnengen met so litrato.)

⁶ Antoy gawaen tayo? No maguloy nonot mo, tawag mo may guardia, ya singa panangibaga. Panon mo itan ya gawaen? Manpikasi  ka, tan agka ontutundan manpikasi anggad naliknam so kareenan na Dios. (Luc. 11:9; 1 Tes. 5:17) Nen naamtaan nen Luis ya abitlad parapo 1 ya pigaran bulan labat lay pambilay to, antoy akatulong ed sikato tan ed asawa ton si Ana? Oniay imbaga nen Luis: “Diad onia ran situasyon, mair-irap so mandesisyon. Pero kada no manpikasi kami, ondeen so nonot mi.” Mabetbet tan impapuso ira kunon manpipikasi. Kekerewen dad si Jehova ya ikdan to ra na deen na nonot, kalmadon puso, tan karunongan pian makapandesisyon iray duga. Aliklikna da kunoy tulong to. No ondadalan ka met ed subok, seetan moy manpikasi, tan seguradon bantayan na kareenan nen Jehova so nonot tan pusom.​—Roma 12:12.

TULONGAN KA NEN JEHOVA PIAN ONLIGEN SO LIKNAAN MO

7. Antoy nayarin nalikna tayo no ondadalan tayod graben subok?

⁷ Antoy mairap ya gawaen? No ondadalan tayod graben subok, mairap so magmaliw ya balanse. Agtayo natatalosan so nalilikna tayo, nambabangil so naiisip tayo, tan agtayo nakontrol so reaksion tayo. Lapud aliwan maligen so liknaan tayo, singa tayo barko diad pegley na dayat legan na maksil ya bagyo. Ontan so alikna nen Ana ya abitla nen niman. Nanduruma kunoy emosyon to nen inatey si Luis. Kuan to: “A-depress ak tan kaskasian koy sarilik. No arum ingen, makapasnok ak ta agko natanggap ya intilak to ak.” Ontan met, apasal kunoy Ana ya si Luis so mandedesisyon, kanian agto kuno amtay gawaen to no wala ray kaukolan ya desisyonan. No nambabangil lay iisipen tan nalilikna tayo, panon itayon tutulongan nen Jehova?

8. Base ed Isaias 33:​6, antoy gawaen nen Jehova no ondadalan tayod graben subok?

⁸ Antoy gawaen nen Jehova? Im-promise to ya tulongan to tayo pian onligen so liknaan tayo. (Basaen so Isaias 33:6.) No walay bagyo, angkakabaleg so daluyon kanian magalaw so barko. Delikado itan! Pero maong labat ta maslak ya barko et walay singa duaran payak da ya akalegep ed danum. Atan so manbalanse ed barko. Ontulong itan pian mas maligen tan mainawa so biahe. Pero mas onggana itan no onaabante so barko kompara no steady labat. Mipadpara, tutulongan itayo nen Aman Jehova pian onligen so liknaan tayo. Pero mas onggana so tulong to no tuloytuloy tayon manlingkor ed sikato anggano wala ray subok.

9. No nambabangil lay nalilikna tayo lapud graben subok, panon ya makatulong iray research tools tayo? (Nengnengen met so litrato.)

⁹ Antoy gawaen tayo? Anggano nanairapan  ka lapud dadalanen mon graben subok, agmo komon papaulyanan so panagpikasi, pipiaral, tan panagpulong. Tua, ompan aliwa lan singa dati so nagawaan mo, pero tandaan mo ya natatalosan nen Jehova so situasyon mo. (Ikompara so Lucas 21:1-4.) Marakep met no walay eskedyul mon man-personal study tan mandalepdep. Dakel ya artikulo tan video so itatarya na organisasyon tayo ya makatulong pian onligen so liknaan tayo. Uusaren iratan nen Jehova pian natulongan to tayo. Pian nanengneng mo iratan, sarag mon usaren iray research tools ya singa say JW Library^® app, Giya ed Pan-research na Saray Tasi nen Jehova, tan Watch Tower Publications Index. Ontan so ginawa nen Monika ya abitla nen niman. No nalilikas ton agto la nakontrol so emosyon to, mananap kunoy advice ed sarayan research tools tayo. Singa bilang, in-search to kuno so salitan “sanok.” Wala met kuno may panaon ya say in-search to et “panagtraidor” tan “katooran.” Insan manbasa lan manbasa ya anggad onlemew lay liknaan to. Kuan to: “Diad gapo, manggiwgiw so limak legan ak ya manse-search. Pero kayarik ya manbasa, naliknak ya singa ak nilakap nen Jehova. No manre-research ak, diman ko nare-realize ya natatalosan nen Jehova so amin ya naliliknak tan aalalayan to ak.” On, makatulong so pan-research pian nakontrol tayoy emosyon tayo ya anggad onligen lay liknaan tayo.​—Sal. 119:143, 144.

SUPORTAAN KA NEN JEHOVA

10. No walay aliwliwan agawad bilay tayo, antoy epekto tod sikatayo?

¹⁰ Antoy mairap ya gawaen? No walay aliwliwan agawad bilay tayo, mairap so ompawil ed datin rotina. Ompan wala ray agew ya makapkapuy so laman tayo tan nadi-depress tayo. Singa tayo atleta ya apiley, ya dati et mapmaples ya ombatik pero natan et mankitley la. Ompan wala ray kimey ya dati et matmainomay tan labalabay tayon gawaen, pero natan et nangingirasan tayo la tan anggapoy ganas tayo. Singa si Elias, ompan mairap tayoy ombangon. Say labay tayo labat et onugip. (1 Ara. 19:5-7) Antoy im-promise nen Jehova ya gawaen to no makapkapuy tayo?

11. Anto ni sakey ya paraan ya tutulongan itayo nen Jehova? (Salmo 94:18)

¹¹ Antoy gawaen nen Jehova? Im-promise to ya suportaan to tayo. (Basaen so Salmo 94:18.) Pian makaakar so apiley ya atleta, kailangan ya walay onalalay ed sikato. Ontan tayo met. Pian mansiansia tayon aktibo ed  panaglingkor, kailangan tayo met so suporta no onkakapuy tayo. Oniay im-promise nen Jehova: “Siak, si Jehova a Dios mo, so mamemben ed kawanan a limam, say mangibabaga ed sika na, ‘Agka ontatakot. Tulongan ta ka.’” (Isa. 41:13) Asali itan nen Arin David nen sikatoy dinmalan ed subok tan amayamay so mamubusol ed sikato. Oniay imbaga tod si Jehova: “Susuportaan ak na kawanan a limam.” (Sal. 18:35) Pero panon itayon susuportaan nen Jehova?

12. Siopa ray uusaren nen Jehova ya onsuportad sikatayo no onkakapuy tayo?

¹² Mabetbet et walan-walay pakilosen nen Jehova ya ontulong ed sikatayo no onkakapuy tayo. Singa bilang, nen kinmapuy so liknaan nen David, sikatoy inanap na kaaro ton si Jonatan pian napaseseg to. (1 Sam. 23:16, 17) Inusar met nen Jehova si Eliseo pian walay kaiba tan katulongan nen Elias. (1 Ara. 19:16, 21; 2 Ara. 2:2) Natan ey? Nayarin usaren nen Jehova iray kapamilya, kakaaro, tan saray elder pian onsuporta ed sikatayo. Pero no nadi-depress tayo, no maminsan et mas labay tayo lay manbukbukor kanian ompan ibiig tayo laingen so sarili tayo. Normal met labat itan. Pero antoy gawaen tayo pian nalikna tayoy suporta nen Jehova?

13. Antoy gawaen tayo pian naawat tayoy tulong nen Jehova? (Nengnengen met so litrato.)

¹³ Antoy gawaen tayo? Anggad nayari et agmo ibibiig so sarilim. Ta no ibiig moy sarilim, akapokus ka labat ed saray problemam kanian ompan aliwa laingen iray desisyon mo. (Pro. 18:1) Siempre, wala ray panaon ya kailangan tayo met so manbukbukor, lalo la no walay aliwliwan agawa. Pero no naynay tayo lan manbukbukor, ompan agtayo nalilikas ya ipupulisay tayo la manayay tulong ya iiter nen Aman Jehova. Kanian awat moy tulong na saray kapamilyam, kakaarom, tan saray elder. Tandaan mo ya kasuldongan ira na lima nen Jehova.​—Pro. 17:17; Isa. 32:1, 2.

LIGLIWAEN KA NEN JEHOVA

14. Diad anto ran situasyon ya makalikna tayoy takot?

¹⁴ Antoy mairap ya gawaen? Wala ray situasyon ya mairap tayoy manpakpel tan natatakot tayo. Anggan saray matoor ya lingkor na Dios nensaman et asali da kunoy ‘ginmiwgiw tan pinasyay pankebbiew da’ ta wala ray mamubusol ed sikara tan agda la amta no antoy ontumbok ya nagawa. (Sal. 18:4; 55:1, 5) Singa sikara, ompan wala ray onkokontra met ed sikatayo diad eskuelaan, diad trabaho, diad abung, odino say mismon gobierno ni ingen.  Sakey ni, no walay sakit mo tan antam ya agka la onabig, ompan natatakot kan ompatey. Diad ontan iran situasyon, ompan say pakalikna tayo et singa tayo pakaskasin ugaw. Pero panon itayon tutulongan nen Jehova no natatakot tayo?

15. Base ed Salmo 94:​19, antoy gawaen nen Jehova no natatakot tayo?

¹⁵ Antoy gawaen nen Jehova? Ligliwaen tan pakalmaen to tayo. (Basaen so Salmo 94:19.) Naimadyin tayo ed sayan salmo so sakey ya ugaw ya agmakaugip ta natatakot ed karol tan kirmat legan na maksil ya bagyo. Kanian sikatoy nila tan inabayan nen tatay to. Nilakap toy anak to tan agto tinaynan. Tua, tuloytuloy ni may bagyo, pero agla natatakot may ugaw ta sankalakap nen tatay to ya anggad akaugip la. No wala tayod mairap ya situasyon tan natatakot tayo, ontan ya ontan so kailangan tayo—amay nalikna tayon singa to tayo sankalakap nen Aman Jehova tan agto tayo taynan ya anggad onkalma tayo la. Anto balet so gawaen tayo pian naligliwa itayo nen Jehova?

16. Antoy gawaen tayo pian naligliwa itayo nen Jehova? (Nengnengen met so litrato.)

¹⁶ Antoy gawaen tayo? Naynay kan manpikasi ed si Jehova tan inagew-agew kan manbasa na Biblia. (Sal. 77:​1, 12-14) No ontan so apasalan mo, si Jehova ya tampol so naisip mon asinggeran no nai-stress o natatakot ka. Agka nababaingan ya ibagad sikato iray pakakatakotan tan pakakaaburidoan mo. Legan mon babasaen so Biblia, dengel moy mensahe tod sika tan likas mo no panon to kan liligliwaen. (Sal. 119:28) Wala ray libro ed Biblia ya balibalin basaen no natatakot ka ta pabiskegen day liknaan mo. Seguradon napaseseg ka no basaen mo ray libron Job, Salmo, tan Proverbio, pati saramay imbaga nen Jesus ya nabasa ed Mateo kapitulo 6. On, no manpikasi kad si Jehova tan basaen moy Salita to, naliknam so malmalet ya lakap to.

17. Antoy seguradon gawaen nen Jehova no ondadalan tayo ed graben subok?

¹⁷ Seguradon ag-itayo paulyanan nen Jehova no ondadalan tayod graben subok. Agtayo bukbukor ya arapen so problema tayo. (Sal. 23:4; 94:14) Im-promise nen Jehova ya bantayan to tayo, paligenen toy liknaan tayo, suportaan, tan ligliwaen to tayo. Oniay ibabaga na Isaias 26:3 tungkol ed si Jehova: “Salimbengan mo iramay sigpot a manmamatalek ed sika; ikdan mo ra na mantultuloy a kareenan, lapud sika so panmamatalekan da.” Kanian mantiwala kad si Jehova tan awat moy tulong to. No ontan so gawaen mo, seguradon walay biskeg mo ya arapen iray graben subok.