1. Akin et importante ya tinaon tayon onatendi ed Memoryal na impatey nen Jesus?

 SAY dondon et mabmablin regalo nen Jehova ed sika! (2 Cor. 9:15) Lapud dondon, nagmaliw ya kaarom si Jehova tan walay ilalom ya manbilay na andi-anggaan. Talagan inar-aro to tayo nen Jehova, kanian inter toy bilay na mismon Anak to pian nadondon to tayo. Misatsalamat tayo lapud satan! (Roma 5:8) Pero diad ilalabas na panaon, ompan agtayo nalilikas ya baliwala lad sikatayo so dondon. Agtayo labay ya nagawa itan. Pian agtayo nalingwanan so ginawa nen Jehova tan Jesus parad sikatayo, ingganggan nen Jesus ya tinaon tayon atendian so Memoryal na impatey to.—Luc. 22:​19, 20.

2. Antoy pantongtongan tayo ed sayan artikulo?

² Say Memoryal ed sayan taon et nagawa no Sabado, Abril 12, 2025. Seguradon tatalaranan tayo la itan ya agew. Marakep no pigaran simba antis tan kayari na Memoryal et dalepdepen a tayoy ginawa nen Jehova tan nen Jesus parad sikatayo. Pantongtongan tayo ed sayan artikulo no anto ran kualidad tan ugali nen Jehova tan Jesus so naaralan tayo ed dondon. Insan diad onsublay, pantongtongan tayo no anto ran bendisyon so awaten tayo lapud dondon, tan no panon tayon nipanengneng so pisasalamat ed si Jehova tan ed si Jesus.

ANTO RAN KUALIDAD NEN JEHOVA SO NAARALAN TAYO ED DONDON?

3. Akin et sarag na sakey ya perpekton too ya dondonen so milyon-milyon ya totoo manlapud kasalanan tan patey? (Nengnengen met so litrato.)

³ Say sakey ed saray kualidad nen Jehova ya naaralan tayo ed dondon et say inkahustisya to. (Deu. 32:4) Antoy koneksion na hustisya ed dondon? Isip mo pa ’ya: Manlapu la nen nanrebelde ed Dios si Adan, impatawir tod sikatayo so kasalanan, tan atan  ya kasalanan et mansumpal ed ipapatey. (Roma 5:12) Labay nen Jehova ya nibulos tayod kasalanan tan patey, kanian imbaki toy Jesus diad dalin pian ompatey parad sikatayo. Pero say tepet, akin et sarag na sakey ya perpekton too ya dondonen so milyon-milyon ya totoo manlapud kasalanan tan patey? Oniay imbaga nen apostol Pablo: “No panon a diad panamegley na ag-intulok na sakey a too [si Adan] et dakel so nagmaliw a makasalanan, ontan met a diad panamegley na intulok na sakey a too [si Jesus] et dakel so magmaliw a matunong.” (Roma 5:19; 1 Tim. 2:6) Simpli labat so labay ya ibaga nen Pablo. Nagmaliw tayon aripen na kasalanan tan patey lapud agtinmulok ed Dios so sakey ya perpekton too, si Adan. Kanian no walay sakey ya perpekton too ya ontulok ed Dios, sarag to tayon ibulos manlapud kasalanan tan patey. Ontan ya ontan so ginawa nen Jesus.

4. Akin et agnayarin basta labat ikdan nen Jehova na bilay ya andi-anggaan iray matulok ya ananak nen Adan?

⁴ Ompan nitepet mo, ‘Akin et kaukolan nin ompatey si Jesus parad sikatayo? Akin et agla nandesisyon si Jehova ya ikdan toy bilay ya andi-anggaan iray matulok ya ananak nen Adan anggano anggapoy dondon?’ No diad pakanengneng na too, singa atan so sankaabigan ya gawaen. Pero tandaan tayo ya perpektoy hustisya nen Jehova. No basta to labat ikdan na bilay ya andi-anggaan iray matulok ya totoo, ompapaway ya singa to kinonsenti imay graben kasalanan ya ginawa nen Adan. Pero andi, aliwan ontan ya Dios si Jehova.

5. Akin et makaseguro tayo ya lanang ya gawaen nen Jehova no antoy duga?

⁵ Isip mo pa no antoy epekto ed sikatayo ran totoo no basta labat ikdan nen Jehova na bilay ya andi-anggaan iray ananak nen Adan anggano anggapoy dondon. No ontan so gawaen nen Jehova, agto natumbok so sarili ton estandarte ed hustisya, kanian ompan pandudaan tayo la tan kuestionen tayo lay arum ya desisyon to. Singa bilang, ompan isipen tayo ya wala ray sipan to ya agto tooren. Pero anggapoy ontan ya pampapagaan tayo natan ta amta tayon ginawa nen Jehova no antoy duga. Intarya to so dondon anggano balbaleg so kaukolan ton isakripisyo. Inyapay toy mismon Anak to pian natumbok toy estandarte to ed hustisya. Makaseguro tayo sirin ya lanang ton gawaen no antoy duga.

6. Akin et nibaga tayo ya say dondon et patunay ya inar-aro to tayo nen Jehova? (1 Juan 4:​9, 10)

⁶ Aliwa labat ya hustisya so nalalanor ed impangiter nen Jehova na dondon. Say manunan rason no akin ya imbaki toy Jesus pian ompatey parad sikatayo et lapud inar-aro to tayo. (Juan 3:16; basaen so 1 Juan 4:​9, 10.) Lapud dondon, posible lamet ya makapanbilay na andi-anggaan iray totoo. Pero aliwan satan labat. Intarya nen Jehova so dondon ta labay ton magmaliw tayon parte na pamilya to. Nen nankasalanan si Adan, inekal nen Jehova ed pamilya to. Kanian nen inyanak itayo, ag-itayo parte  na pamilya nen Jehova. Pero lapud abayaran la so dondon, sarag la nen Jehova ya perdonaen iray kasalanan tayo, basta ipanengneng tayoy pananisia ed sikato tan unoren tayo ray ganggan to. Tan diad arapen, ituring to tayo lan peteg ya ananak to! Pero natan ni labat, sarag tayo lan nakaaro si Jehova tan saray kapara tayon mandadayew ed sikato. On, talagan inar-aro to tayo nen Jehova!—Roma 5:​10, 11.

7. Akin et lalo tayon natalosan so kabaleg na panangaro nen Jehova no isipen tayoy impanirap nen Jesus?

⁷ Lalo tayon natalosan so kabaleg na panangaro nen Jehova ed sikatayo no isipen tayo ray intepel to pian nabayaran so dondon. Imbaga nen Satanas ya no say sakey ya lingkor nen Jehova et manirap la, seguradon agla manmatoor. Pian napruebaan ya matila si Satanas, pinaulyanan nen Jehova ya manirap si Jesus antis ya ompatey. (Job 2:​1-5; 1 Ped. 2:21) Nen ininsulto na saray lider na relihyon si Jesus, nen sinipsiplatan na saray sundalo, tan nen impasak dad panamairapan ya poste, anengneng iratan ya amin nen Jehova. Anengneng to met so ansakisakit ya impanpanabos na inad-aro ton Anak. (Mat. 27:​28-31, 39) Diad tua, walay pakayari nen Jehova ya pigilan iratan ya amin. Singa bilang, nen akapasak lad panamairapan ya poste si Jesus, oniay imbaga na saray totoo ya wadman: “No labay na Dios ya ilaban, natan la komon.” No pinunuyan ira nen Jehova, sarasarag to pan ilaban so Anak to. (Mat. 27:​42, 43) Pero no ontay ginawa nen Jehova, aga abayaran so dondon. On, inabuloyan nen Jehova ya manirap so Anak To anggad sampot ya ingas to, ta amta To ya atan labat so alenleneg ya paraan pian naikdan To tayoy ilalo.

8. Akin et seguradon ansakisakit ed si Jehova ya nanengneng ton maniirap so Anak to? (Nengnengen met so litrato.)

⁸ On tua ya si Jehova so Makapanyarin-amin ya Dios. Pero agto labay ya ibagan anggapoy liknaan to. Di ba, sikatayo ran totoo, makakalikna tayo na nanduruman emosyon? Ibabaga na Biblia ya ginawa to tayo nen Jehova unong ed indengan to. Labay ton ibaga sirin, walay liknaan met nen Jehova. Diad tua, impaisulat tod Biblia ya ‘nasasakitay liknaan to’ tan ‘naeermenan’ met. (Sal. 78:​40, 41) Isip yo pa met imay salaysay ed Biblia nipaakar ed si Abraham tan ed anak ton si Isaac. Ingganggan nen Jehova si Abraham ya ibagat toy alenleneg ya anak to. (Gen. 22:​9-12; Heb. 11:​17-19) Imadyin yo pay ermen tan nanduruman emosyon ya alikna nen Abraham nen kuan to lan pateyen so anak to. Seguradon ansakisakit man ed sikato! Kanian imadyin yo pa met so sakit ya intepel nen Jehova nen sankanengneng ton papairapen na mauges ya totoo so inad-aro ton Anak!—Nengnengen ed jw.org so video ya Aligen so Pananisia Ra—Abraham, Part 2.

9. Diad Roma 8:​32, 38, 39, antoy naaralan mo ed kabaleg na panangaro nen Jehova ed sika tan ed arum nin lingkor to?

⁹ Nia ni sakey ya naaralan tayo ed dondon: Say panangaro nen Jehova ed sikatayo et mas  ni nen say panangaro na anggan siopan too, anggan say kapamilya o say best friend tayo. (Basaen so Roma 8:​32, 38, 39.) Mas inaro ka ni ingen nen Jehova nen say panangarom ed sarilim! Singa bilang, isip mo pa: Kasin labalabay mo lay manbilay ya andi-anggaan? Mas labalabay nen Jehova ya manbilay kay andi-anggaan! Kasin labay mon naperdona iray kasalanan mo? Mas labalabay nen Jehova ya naperdona iray kasalanan mo! Say kekerewen to labat et ipanengneng moy pananisia ed dondon tan magmaliw kan maunor ed sikato. On, say dondon et mabmablin regalo nen Jehova, tan ebidensya itan ya inar-aro to tayo. Diad balon mundo, seguradon dakel ni naaralan tayo nipaakar ed panangaro nen Jehova.—Ecl. 3:11.

ANTO RAN KUALIDAD NEN JESUS SO NAARALAN TAYO ED DONDON?

10. (a) Akin et maer-ermen si Jesus nen asingger lay ipatey to? (b) Panon ya nilinisan o pinasanto nen Jesus so ngaran nen Jehova? (Nengnengen met so kahon ya “ Nanmatoor si Jesus Kanian Apasanto To so Ngaran nen Jehova.”)

¹⁰ Sankanonot nen Jesus so ngaran o reputasyon nen Ama to. (Juan 14:31) Nen inakusaan si Jesus ya kriminal tan senentensiaan na patey lapud agto kuno rerespetoen so Dios, maer-ermen ya maong ta ompan mangiter na kababaingan ed Ama to so ipatey to. Kanian oniay impikasi to: “Amak, no nayari, ipaliis mod siak iyan kopa.” (Mat. 26:39) Lapud nanmatoor si Jesus anggad impatey to, apaneknekan ya matila si Satanas, kanian alinisan o apasanto so ngaran nen Ama to.

11. Panon ya impanengneng nen Jesus ya inar-aro to iray totoo? (Juan 13:1)

¹¹ Naaralan tayo met ed dondon ya inar-aro nen Jesus iray totoo, lalo la ray disipulo to. (Pro. 8:31; basaen so Juan 13:1.) Singa bilang, amta nen Jesus ya dakel ya subok so dalanen to diad dalin, tan amta to met ya ansakisakit so ipatey to. Pero agto inisip ya basta nasumpal  toy ipapagawa nen Jehova et duga la. Ginawa toy asainmin to, aliwa labat ya lapud obligasyon to ’tan, noagta lapud inar-aro to iray totoo. Kada no manpupulong, manbabangat, tan tutulongan nen Jesus so arum, sankapatnagan so panangaro tod sikara. Anggan diad samay labi antis na impatey to, inurasan to ni sali na saray apostol to. Tan dakel ni imbangat tod sikara pian ombiskeg so liknaan da tan amta ray gawaen da anggano agda la kaiba. (Juan 13:​12-15) Insan anggano manpapanabos la ed panamairapan ya poste, inusar toy nakekeran ingas to pian ikdan na ilalo imay kriminal ya walad abay to. Tan imbilin to met ed si apostol Juan ya asikasoen toy ina ton si Maria. (Luc. 23:​42, 43; Juan 19:​26, 27) On, aliwan samay impatey labat nen Jesus so paneknek ya inar-aro to ray totoo. Nanengneng met ed saray ginawa to nen wadia ni ed dalin ya espisyal ed sikato iray totoo.

12. Akin et nibaga tayon dakdakel nin siansiay gagawaen nen Jesus parad sikatayo natan?

¹² Anggano “aminpinsan ya inatey” si Jesus pian nabayaran so dondon, dakdakel nin siansiay gagawaen to parad sikatayo. (Roma 6:10) Akin et ontay nibaga tayo? On ta anggad natan et tuloytuloy nin mankikimey si Jesus pian niiter tod sikatayo iray bendisyon ya nagmaliw ya posible lapud dondon. Isipen pa so nanduruman gagawaen to natan. Sikatoy manlilingkor la bilang Ari tan Atagey a Saserdote tayo, tan sikato met so ulo na kongregasyon. (1 Cor. 15:25; Efe. 5:23; Heb. 2:17) Sikato met so mangidadaulo ed pantipon ed saray alanaan tan ed baleg ya ulop, tan seguroen ton nasumpal itan antis ya manampot so baleg ya kairapan. b (Mat. 25:32; Mar. 13:27) Seseguroen to met ya napapakan ed espiritual iray matoor ya papatumbok to legan na sayan kaunoran iran agew. (Mat. 24:45) Tan diad Sanlibon Taon ya Uley to, dakdakel nin siansiay gawaen to parad sikatayo. On, ag-anampot so panangaro nen Jesus ed sikatayo ran totoo nen inter toy bilay to pian nabayaran so dondon. Talagan mabmablin regalo nen Jehova ed sikatayo si Jesus!

ITULTULOY MON ARALEN IRAY KATUAAN ED BIBLIA

13. Panon ya makatulong so pandalepdep pian dakel ni naaralan mo ed panangaro nen Jehova tan nen Jesus parad sikatayo?

¹³ Dakdakel ni naaralan mo ed panangaron impanengneng nen Jehova tan Kristo Jesus no itultuloy mon dalepdepen iray ginawa ra parad sika. Kanian marakep no manbasa kay Ebanghelyo pigaran simba antis tan kayari na Memoryal. Agmo pinsanan ya babasaen so pigaran kapitulo. Balibali no matantan labat so  pambasam pian makapandalepdep ka. Legan kan manbabasa, anap mo ray rason no akin et dapat labat ya aroen tayoy Jehova tan si Jesus. Tan agmo sasarilien iray naaralan mo. Ibagam itan ed arum!

14. Base ed Salmo 119:97 tan paimanod leksab, panon ya makatulong so pan-research pian dakel ni naaralan tayo nipaakar ed dondon tan ed arum nin katuaan ed Biblia? (Nengnengen met so litrato.)

¹⁴ No abaybayag ka lad katuaan, ompan isipen mo ya anggapo lay balon naaralan mo ed Biblia, lalo lad saray katuaan ya kabkabisadom la—singa say hustisya na Dios, say panangaro to, tan say dondon. Pero diad tua, anggano kabkabisado tayo la iratan, walan-walay balon naaralan tayo. Anto sirin so gawaen mo pian nadiskobrem iray kayamanan ed Biblia? Basam tan i-personal study’m iray base ed Biblia ya publikasyon tayo. No walay teksto ya agmo masyadon natalosan, i-research mo. Insan no walay balon punto ya naaralan mo, dalepdep mo itan ya sanagew tan isip mo no antoy naaralan mod satan nipaakar ed si Jehova, si Jesus, tan ed panangaro dad sika.—Basaen so Salmo 119:97 tan paimanod leksab.

15. Akin et ituloy tayo labat so pananap na balon kayamanan ed Biblia?

¹⁵ Agka komon nadidismaya no anggapoy naromog mon makapainteres o balon punto kada no manbabasa kay Biblia o kada no manre-research ka. Tandaan mo ya say panaral na Biblia et singa pananap na ankablin bato. Isip mo pa iramay say trabaho da et mananap na gold. Maan-anos ira. No maminsan, nasabi day pigaran oras o pigaran agew ni ingen antis iran makalmo na angkekelag ya piraso na gold. Akin et ontan lay inkaanos da? On ta amta ra ya kada pirason naromog da, anggano melmelag, et mabmabli. Pero siempre, mas mabli ni nen say gold so kada kayamanan ya naromog tayod Biblia! (Sal. 119:127; Pro. 8:10) Kanian anosan mo labat so manbasay Biblia tan ituloy mo labat anggad walay naromog mon balon kayamanan.—Sal. 1:2.

16. Panon tayon naalig si Jehova tan Jesus?

¹⁶ Legan kan manaaral, isip mo no panon mon niyaplika iray nanaaralan mo, tan no panon mon naalig si Jehova tan Jesus. Singa bilang, naalig moy inkahustisya nen Jehova no patas so pantratom ed amin. Naalig moy panangaro nen Jesus ed Ama to tan ed arum no akaparaan kan mansakripisyo parad ngaran nen Jehova tan parad agagi. Naalig mo met si Jesus no samboten moy amin ya pankanawnawa ya pulongan iray totoo pian naamtaan da no antoy ginawa nen Jehova parad sikara, tan pian wala met so tsansa ran ipanengneng so pananisia ed dondon.

17. Antoy aralen tayo ed ontumbok ya artikulo?

¹⁷ On, no aralen tan talosan tayon maong so dondon, mas lalo tayon naar-aro si Jehova tan si Jesus. Tan no nanengneng dan inar-aro tayo ra, lalo da tayo met ya ar-aroen. (Juan 14:21; Sant. 4:8) Kanian usaren tayo so amin ya itatarya nen Jehova pian lalo tayon natalosan so dondon. Dian ontumbok ya artikulo, aralen tayo no anto ran bendisyon so awaten tayo lapud dondon, tan no panon tayon nipanengneng ed si Jehova ya misatsalamat tayo ed panangaro to.