1. Antoy sankanonot na dakel ya totoo natan?

 LABALABAY na dakel ya totoo natan ya irayew ira na arum. Singa bilang, ipo-post da ed social media iray nagagawaan da pian pabiliben da ray totoo. Sarili da labat so sankanonot da imbes ya iter day dayew o gloria ed Dios ya Jehova. Antoy labay ya ibaga na pangiter na gloria ed si Jehova? Tan akin et duga labat ya ontan so gawaen tayo? Panon tayon niiter ed si Jehova so gloria ya kanepegan to? Tan panon ton igloria so ngaran to diad arapen? Aratan ya tepet so pantongtongan tayo ed sayan artikulo.

ANTOY LABAY YA IBAGA NA PANGITER NA GLORIA ED SI JEHOVA?

2. Panon ya impanengneng nen Jehova so gloria to nen walad leksab na Palandey Sinai iray Israelita? (Nengnengen met so litrato.)

² Anto tay gloria? Diad Biblia, say salitan “gloria” et ontutukoy ed antokaman ya gagawaen na sakey ya lapud satan et sikatoy pambiliban o pandinayewan na arum. Nen kakkapangibulos nen Jehova ed bansan Israel manlapud Ehipto, walay makapabilib ya ginawa to pian ipanengneng so gloria to. Imadyin yo pa: Milyon-milyon ya Israelita so walad leksab na Palandey Sinai ta aalagaren day ibaga nen Jehova ed sikara. Walay makapal ya lurem ya sinmakbong ed toktok na palandey. Insan nagunoyan, napno na asewek so interon palandey tan yinmegyeg, katon manmayegmeg ya maong so dalin. Mankarol tan mankirmat, tan walay narerengel dan makmaksil a tanol na tambuyog. (Exo. 19:​16-18; 24:17; Sal. 68:8) Seguradon mankelkelaw tan mandinayew ya maong iray Israelita nen impanengneng nen Jehova so gloria tan kabiskeg na pakayari to.

3. Antoy labay ya ibaga na pangiter na gloria ed si Jehova?

³ On, magloria tan makapadinayew ya Dios si Jehova! Pero  wala nin siansiay nagawaan tayo ran totoo pian niiter tayo ed sikato so gloria. Antoy labay ya ibaga na pangiter na gloria ed si Jehova? Labay ton ibaga, ipaamta tayod arum so makapakelkelaw ya pakapanyari to tan saray balibalin ugali to. No walay maong ya agawaan tayo, ipaarap tayod sikato so dayew ta agawaan tayo itan lapud tulong to. (Isa. 26:12) Say maong ya alimbawa ed saya et si Arin David. Aminsan, nen indaulo toy pikakasi diad arapan na saray Israelita, inggloria ton maong si Jehova. Kuan to: “O Jehova, kien mo so pakapanyari, biskeg, karakpan, karlangan, tan katagyan, ta kien mo so amin a bengatlan walad tawen tan diad dalin.” Kayari nen David ya nampikasi, “indayew na interon kongregasyon si Jehova.”—1 Awa. 29:​11, 20.

4. Panon ya inggloria nen Jesus si Jehova?

⁴ Say sakey met ya talagan angigloria ed si Jehova et si Jesus. Impaamta to ed saray totoo ya nanlapud Ama to so pakapanyari ton manggaway milagro. (Mar. 5:​18-20) Impaamta to met ed sikara iray balibalin ugali nen Ama to, tan inalig to iratan ya ugali kanian maomaong so impantrato to ed arum. Wala tay aminsan ya nen manbabangat si Jesus diad sinagoga, wadman so sakey a biin 18 ya taon lan aselepan na demonyo. Abukot ya maong iyan bii ta papairapen na samay demonyo. Kaskasian! Nen anengneng nen Jesus so kipapasen to, agto nitepel ya aga tulongan. Kanian inasinggeran to tan maar-aro ton kinatongtong. Kuan to: “Bii, nibulos ka lad sakit mo.” Insan to intapew iray lima to ed sayan bii. Tampol ya inmabig, tan petek lay alagey to! “Inggloria toy Dios” tan misatsalamat ta pinmawil lad dati so kasil to tan nagmaliw lamet ya normal. (Luc. 13:​10-13) On, duga labat ya inggloria na sayan bii si Jehova. Sikatayo ey?

AKIN ET DUGA LABAT YA ITER TAYOY GLORIA ED SI JEHOVA?

5. Anto ray rason akin et duga labat ya respetoen tayoy Jehova?

⁵ Iglogloria tayoy Jehova ta rerespetoen tayon maong. Dakdakel so rason no akin ya rerespetoen tayoy Jehova. Sikato so makapanyarin-amin, tan anggapoy limitasyon na pakayari to. (Sal. 96:​4-7) Sankanengneng ed saray pinalsa to ya sikatoy marundunong ya Dios. Sikato so nanlapuan na bilay tayo tan iiter toy amin ya nakaukolan tayo pian tuloytuloy tayon manbilay. (Apo. 4:11) Matoor ya Dios si Jehova. (Apo. 15:4) No antoy imbaga to, gawaen ton gawaen. (Jos. 23:14) Kampega ya oniay imbaga nen propetan Jeremias: “Anggapoy mipara ed sika, O Jehova. Makapadinayew ka . . . Diad amin a marunong a totoo ed saray nasyon tan ed amin a panarian da, anggapon balot so mipara ed sika”! (Jer. 10:​6, 7) On, duga labat sirin ya respetoen tayoy Aman Jehova. Pero diad tua, agto labat kanepegan so narespeto, kanepegan to met so naaro.

6. Akin et inar-aro tayoy Jehova?

⁶ Iglogloria tayoy Jehova ta inar-aro tayon maong. Maap-apit so liknaan tayod sikato ta balibali iray ugali tan kualidad to. Makasi si Jehova tan anlemek so puso to. (Sal. 103:13; Isa. 49:15) No maniirap tan nasasakitan tayo, nasasakitan met. (Zac. 2:8) Sikato lay nanggaway paraan pian onapit tayod sikato tan nakaaro tayo. (Sal. 25:14; Gawa 17:27) Tan mapappaabeba si Jehova. Diad tua, ibabaga na Biblia ya “sikatoy onuusdong pian nengnengen so tawen tan dalin, [tan] ipapaalagey to manlapud dabok imay pakaskasi.” (Sal. 113:​6, 7) On, agtayo napigilan so sarili tayo ya igloria so maomaong ya Dios tayo!—Sal. 86:12.

7. Antoy pribilehyo tayon gawaen?

 ⁷ Iglogloria tayoy Jehova ta labay tayon nakabat met na arum. Binulag nen Satanas so isip na dakel ya totoo natan, tan angikayat na saray tila pian naderal so reputasyon na Dios. (2 Cor. 4:4) Kanian agla laingen amta na totoo no anton talaga ya klase na Dios si Jehova. Apanisia ira nen Satanas ya maruksa si Jehova, anggapoy pibabali tod sikatayo, tan sikato kuno so natetel ed amin ya paniirap tayo. Pero katilaan iratan ya amin. Idepensa tayo sirin si Jehova ta amta tayo no antoy tua. Pribilehyo tayon ibagad arum ya sikatoy maar-aro tan maomaong ya Dios! No ontan so gawaen tayo, naikdan met ira na tsansa ya igloria si Jehova. (Isa. 43:10) Pantongtongan tayo natan so Salmo 96, ta atan ya salmo et nipaakar ed pangiter na gloria ed si Jehova. Legan tayon aaralen so pigaran bersikulo ed satan ya salmo, manisip kay paraan no panon mo nin niiter ed si Jehova so gloria ya kanepegan to.

PANON TAYON NIITER ED SI JEHOVA SO GLORIA YA KANEPEGAN TO?

8. Antoy sakey ya paraan ya nigloria tayoy Jehova? (Salmo 96:​1-3)

⁸ Basaen so Salmo 96:1-3. Nigloria tayoy Jehova diad saray ibabaga tayo. Nabasa ed bersikulo 1 anggad 3 na Salmo 96 ya ‘kansionan tayoy Jehova,’ ‘idayew tayoy ngaran to,’ ‘iyabawag tayoy maong a balita nipaakar ed panangiliktar to,’ tan ‘iyabawag tayoy gloria to diad saray nasyon.’ Niglogloria tayoy Ama tayo ed tawen no gawaen tayo iratan. Ontan so ginawa na saray matoor ya Judio nensaman tan anggan saray inmuunan Kristiano. Makmakpel dan indepensa si Jehova, tan imbaga dad arum so amin ya kamaongan to. (Dan. 3:​16-18; Gawa 4:29) Panon tayo met ya nagawaan itan?

9-10. Antoy naaralan mod eksperiensya nen Angelena? (Nengnengen met so litrato.)

⁹ Imanoen so eksperiensya nen Sister Angelena a ya tagad United States. Makpel ton indepensa si Jehova diad kompanyan pantratrabahoan to. Nen balo ni labat ya empleyado si Angelena ed saman ya kompanya, walay miting ya kaiba so amin ya balon empleyado tan kaukolan dan ikabat so sarili da. Angiparaan na saray litrato si Angelena pian nipanengneng to ed saray katrabaho to ya maliket so bilay to bilang Tasi nen Jehova. Pero say problema, amay tumbokan to ya katrabaho ton laki et inkabat toy sarili to ya binmaleg  ed pamilyan Tasi, insan to binalawbalaw iray papanisiaan tayo. “Manpukal so pagew ko,” kuan nen Angelena, “pero say kuan kod sarilik, ‘Agak ompayag ya deralen na sayan too so reputasyon nen Jehova. Kaukolan ya naamtaan na saray katrabahok no antoy tua.’”

¹⁰ Nen asumpal lan nansalita imay laki, nampikasin agano si Angelena. Nen wala lad arap, oniay imbaga tod samay laki: “Binmaleg ak met ed pamilyan Tasi ya singa sika, tan Tasi ak ni anggad natan.” Anggano tensionado so situasyon, kakkalmado si Angelena. Impanengneng tod saray katrabaho to iray litrato to kaiba iray agagi diad saray pantitipon tayo, tan marespeto ton impaliwawa iray papanisiaan tayo. (1 Ped. 3:15) Antoy resulta? Nen asumpal lan nansalita si Angelena, anguman so siplog na dagem. Linmemek so puso to may katrabaho ton laki. Imbaga to ni ingen ya wala ray agto nalinglingwanan ya maliket ya agawad bilay to nen nakakaiba to ni ray Tasi nen Jehova. Antoy naaralan nen Angelena ed sayan agawa? Kuan to: “Dapat labat ya idepensa tayoy Jehova. Ipapasen kon baleg a kagalangan ya nidepensak so ngaran to.” On, no babalawen na arum si Jehova, tsansa itan pian nigloria tayoy ngaran to. Balbaleg itan ya kagalangan tayo!

11. Manlapu la nensaman, antoy gagawaen na saray matoor ya lingkor nen Jehova pian nausar da iray materyal ya kaykayarian da parad sikato? (Salmo 96:8)

¹¹ Basaen so Salmo 96:8. Nigloria tayoy Jehova no usaren tayo ray materyal ya kaykayarian tayo parad sikato. Manlapu la nensaman et talagan ontan lay gagawaen na saray matoor ya lingkor nen Jehova. (Pro. 3:9) Singa bilang, mabulbulos ya nandonasyon iray Israelita pian nipaalagey tan namintina so templo. (2 Ara. 12:​4, 5; 1 Awa. 29:​3-9) Wala met iray disipulo nen Jesus ya ‘inusar day kayamanan da’ pian nasuportaan day Jesus tan saray apostol to diad pampupulong da. (Luc. 8:​1-3) Tan wala met iray Kristiano nen inmunan siglo ya angipawit na tulong ed saray agagin apektado na eras. (Gawa 11:​27-29) Natan ey? Niglogloria tayo met si Jehova kada no mabulos tayon mangiiter na donasyon.

12. Akin et nibaga tayon niglogloria si Jehova lapud saray donasyon tayo? (Nengnengen met so litrato.)

¹² Akin et nibaga tayon niglogloria si Jehova lapud saray donasyon tayo? Niay sakey ya eksperiensya. Nen 2020, ngalngali anggapoy uran diad Zimbabwe kanian milyon-milyon ya totoo so apektadoy eras, anggan saray agagi ya singa si Sister Prisca. Mair-irap so bilay da diman, pero manpupulong nin siansia si  Prisca kada Mierkoles tan Biernes. Tutumboken to ’tan ya eskedyul to anggan nen panagbabaka la na dalin. No nanengneng la na saray kakaabay ya manpulong lay Prisca imbes ya mankimey ed alog, kakkantiawan da tan kuan da: “Ay, seguradon ompatey kad eras!” Pero baleg so tiwala nen Prisca ya si Jehova lay akauley ed sikato. Kanian oniay iyeebat to: “Agbalot paulyanan nen Jehova iray lingkor to.” Ag-abayag, angibunog so organisasyon tayo na abasto ed saray agagi, tan sakey si Prisca ed saray akaawat. Apawala iman ya tulong lapud saray donasyon tayo. Manbilib iramay kakaabay di Prisca! Say kuan dad sikato: “Tua may kuan mo, talagan agka pinaulyanan na Dios mo.” Lapud saman, nagmaliw iran interesado ed katuaan. Makapaliket ta pitora ed sikara so ginmapon inmatendi ed saray aral tayo.

13. Base ed Salmo 96:​9, antoy nepeg tayon gawaen pian nigloria tayoy Jehova?

¹³ Basaen so Salmo 96:9. Nigloria tayoy Jehova no “masanto” o malinis so kabibilay tayo. Seseguroen na saray saserdote nensaman ya malinis ira antis iran manlingkor diad templo nen Jehova. (Exo. 40:​30-32) Seseguroen tayo met natan ya mapalinis tayod laman tayo. Pero antoy mas importante nen say pisikal a kalinisan? Ibabaga na Biblia ya importantin malinis so kabibilay tayo. (Sal. 24:​3, 4; 1 Ped. 1:​15, 16) Gawaen tayo sirin so anggaay nayarian tayo ya lakseben so “daan a personalidad” tan isulong tayoy “balon personalidad.” Labay ton ibaga, iwasan tayoy marutak ya panagnonot tan saray aliwan kagagawa. Tan aligen tayoy panagnonot tan ugali nen Jehova. (Col. 3:​9, 10) Diad tua, anggan say sankaugsan lan too tan anggan samay imoral ya maong so kabibilay to et sarag toy manguman tan nisulong to so balon personalidad diad tulong nen Jehova.

14. Antoy naaralan mod eksperiensya nen Jack? (Nengnengen met so litrato.)

¹⁴ Nengnengen tayoy alimbawa nen Jack. Mauge-uges tan bayolentin maong si Jack, kanian say tawag dad sikato et Demonyo. Grabe ran krimen so ginawa to, kanian death penalty so sentensia ed sikato. Pero aminsan, walay akabat ton brother ya manpupulong diman ed kulaan ton prisoan. Nampaiyaral na Biblia si Jack ed sikato. Inyaplika nen Jack so amin ya nanaaralan tod Biblia, kanian anguma-uman so ugali tan inkatoo to, tan ag-abayag et nampabautismo. Nen asabi la may agew na pamatey ed sikato, maer-ermen iramay guardia tan akaakis ira nen pataniran la. Oniay imbaga to may sakey ya opisyal ed saman  ya prisoan: “Dati, si Jack so sankaugsan diad prisoan. Pero nen anguma-uman, sakey la ed saray sankamaongan ya apriso dia.” Sakey simba kayari na impatey nen Jack, wala ray brother ya pinmawil ed prisoan pian mangikondukta na aral. Walay naimano dan sakey ya priso ya first time toy inmatendi. Akin et inmatendi yan laki? Pambiliban to kunon maong imay impanguman nen Jack. Kanian labay ton naamtaan no anto met so kaukolan ton gawaen pian makapandayew ed si Jehova. On, singa si Jack, no malinis so kabibilay tayo, nigloria tayo so Ama tayo ed tawen.—1 Ped. 2:12.

PANON YA IGLORIA NEN JEHOVA SO NGARAN TO DIAD ARAPEN?

15. Panon ya igloria nen Jehova so ngaran to diad arapen? (Salmo 96:​10-13)

¹⁵ Basaen so Salmo 96:​10-13. Nabasa tayo ed sarayan sampot ya bersikulo na Salmo 96 ya si Jehova et matunong ya Ukom tan Ari. Panon ya igloria nen Jehova so ngaran to diad arapen? Iter toy hustisya. Asingsingger to lan deralen so Makapanyarin Babilonia ya abaybayag lan manudutak ed masanton ngaran to. (Apo. 17:​5, 16; 19:​1, 2) No nanengneng na totoo ya aderal lay Makapanyarin Babilonia, ompan manguman so arum ed sikara tan mandayew met la ra ed si Jehova. Insan diad Armagedon, deralen nen Jehova so arum nin kabiangan na mauges ya sistema nen Satanas. Kaiba la ditan so amin ya onkokontra ed sikato tan mamubusol ed ngaran to. Pero iliktar to so amin ya mangaaro, manguunor, tan mangiglogloria ed sikato. (Mar. 8:38; 2 Tes. 1:​6-10) No asumpal la imay unor ya subok kayari na Sanlibon Taon ya Uley nen Kristo, apasanto lay ngaran nen Jehova tan anggapo lan balot so manderal ed satan. (Apo. 20:​7-10) Diad satan ya panaon, “say dalin et napano na pikakabat ed gloria nen Jehova a singa saray danum a mamapano ed dayat.”—Hab. 2:14.

16. Antoy determinadom ya gawaen? (Nengnengen met so litrato.)

¹⁶ Labalabay tayo lan onsabi so panaon ya amin ya manaayam diad tawen tan diad dalin et iter dad si Jehova so gloria ya manepeg ed ngaran to! Balet legan tayon tatalaranan itan, gawaen tayoy anggaay nayarian tayo ya igloria si Jehova diad saray ibabaga, gagawaen, tan ugali tayo. Pian lanang tayon nanonotan iyan importantin responsabilidad tayo, pinili na Mananguley ya Ulop so Salmo 96:8 bilang teksto ed taon 2025: “Iter yod si Jehova so gloria a manepeg ed ngaran to.”