1. Panon tayon napaliket si Jehova?

 IMADYIN mo pa ya inikdan moy regalo so sakey ya kaarom. Pinili-pilim may regalo ya talagan nagustoan tan nausar to. Pero anto kasi naliknam no inyatol to labat tan nilingwanan to la? Seguradon nadismaya ka! Pero no nanengneng mo ya talagan uusaren to tan misatsalamat ed sika, seguradon malikeliket ka! Natan, isip mo pa met si Jehova. Inter toy Anak to pian ompatey parad sikatayo. Inregalo to so dondon ta inar-aro to tayo. Seguradon makakaliket ya maong si Jehova no nanenengneng to ya papablien tayo itan ya espisyal ya regalo to tan no misatsalamat tayod panangaro to!—Juan 3:16; Roma 5:​7, 8.

2. Antoy pantongtongan tayod sayan artikulo?

² Pero diad ilalabas na panaon, ompan naibabaliwala tayo la so dondon. Tua, maliket tayo ta inregalo itan nen Jehova ed sikatayo, pero ompan singa tayo labat inyatol tan nilingwanan tayo la. Agtayo labay ya nagawa itan. Lanang tayo sirin ya nonoten no antoy ginawa nen Jehova tan Jesus parad sikatayo pian agnabalang so panamabli tayo ed dondon. Atan so pampokusan tayod sayan artikulo. Aralen tayo no anto ran bendisyon so aawaten tayo la natan lapud dondon, tan no anto ni ran bendisyon so awaten tayo diad arapen. Pantongtongan tayo met no panon tayon nipanengneng ed si Jehova ya misatsalamat tayod panangaro to, lalo lad saray simba antis tan kayari na Memoryal.

SARAY BENDISYON YA AAWATEN TAYO LA NATAN

3. Antoy sakey ed saray bendisyon ya aawaten tayo la natan lapud dondon?

³ Natan ni labat et wala la ray bendisyon ya aawaten tayo lapud dondon bagat nen Jesu-Kristo. Singa bilang, lapud dondon, peperdonaen nen Jehova iray kasalanan tayo. Agpa obligado si Jehova ya perdonaen itayo, pero atan so labay ton gawaen. Oniay  insulat nen David lapud pisasalamat tod panamerdona nen Jehova: “Maomaong ka, O Jehova, tan akaparaan kan mamerdona.”—Sal. 86:5; 103:​3, 10-13.

4. Parad siopa so dondon? (Lucas 5:32; 1 Timoteo 1:15)

⁴ Ompan iisipen na arum ya ag-ira makanepegan ya perdonaen nen Jehova. Pero diad katuaan to, amin tayo pa et agmakanepegan. Anggan si apostol Pablo et imbaga to ya sikatoy ‘agmanepeg a tawagen ya apostol.’ Pero oniay inyarum to: “Lapud agnaparaan a kaabigan na Dios et niiter ed siak iyan betang.” (1 Cor. 15:​9, 10) No pagbabawian tayo ray kasalanan tayo, perdonaen to tayo nen Jehova. Akin et peperdonaen to tayo? Kasin lapud kanepegan tayoy naperdona? Andi. Peperdonaen to tayo nen Jehova lapud inar-aro to tayo. Kanian no nadidismaya kad sarilim tan say pakaliknam et agka karapat-dapat ya naperdona, tandaan mo ya inter nen Jehova so dondon parad saray makasalanan ya pagbabawian day kasalanan da, aliwan parad saray totoo ya agmankakasalanan.—Basaen so Lucas 5:32; 1 Timoteo 1:15.

5. Kasin duga ya isipen ya dapat labat ya kasian tan perdonaen itayo nen Jehova? Ipaliwawa.

⁵ Kasin duga ya isipen ya dapat labat ya kasian tan perdonaen itayo nen Jehova, lalo la no abaybayag tayo lan manlilingkor ed sikato? Andi, agtayo ’tan dapat iisipen. Tua ya papablien nen Jehova so amin ya gagawaen tayo parad sikato. (Heb. 6:10) Pero tandaan tayo ya say dondon et regalo, aliwan bayar ed panlilingkor tayo. Agtayo sirin iisipen ya lapu labat ta dakdakel lay agawaan tayo parad si Jehova et kanepegan tayo lay naperdona. Ta no ontay isipen tayo, singa tayo ibabaga ya andi-kakanaan so impatey nen Kristo.—Ikompara so Galacia 2:21.

6. Akin et makulikuli si Pablo ya nanlingkor ed si Jehova?

⁶ Amta nen Pablo ya anggan antoy panlingkor to, agton balot nabayaran so panamerdona nen Jehova. Anto sirin so rason akin et makulikulin nanlingkor ed si Jehova? Ginawa to itan aliwan lapud labay ton paneknekan ya kanepegan toy nakasian, noagta lapud labay ton ipanengneng so pisasalamat ed agnaparaan a kaabigan nen Jehova ed sikato. (Efe. 3:7) Singa si Pablo, komon ta maseseg tayon panlingkoran si Jehova lapud labay tayon ipanengneng so pisasalamat ed panangasi to, aliwan lapud labay tayon paneknekan ya kanepegan tayoy nakasian.

7. Antoy sakey nin bendisyon ya aawaten tayo la natan lapud dondon? (Roma 5:1; Santiago 2:23)

⁷ Say sakey nin bendisyon ya aawaten tayo la natan lapud dondon et sarag tayo lay onapit ed si Jehova tan makapikaaro tayo la ed sikato. a Singa abitlad imbeneg ya artikulo, anggapo tay too ya nen inyanak et automatic lan maapit so liknaan tod si Jehova. Pero lapud dondon, sarag na kada sakey ed sikatayo so ‘mikareenan ed Dios’ tan makapikaaro tayo la ed sikato.—Basaen so Roma 5:1; Santiago 2:23.

8. Akin et misatsalamat tayod si Jehova ed pribilehyo tayon manpikasi ed sikato?

⁸ Lapud kaaro tayoy Jehova, sarag tayoy manpikasi ed sikato. Balbaleg itan ya pribilehyo! Aliwan saray pikakasi labat diad aral so dedengelen nen Jehova. Dedengelen to met iray personal ya pikakasi tayo. Kada no manpipikasi tayo, onkakalma so puso tayo tan ondedeen so nonot tayo. Pero aliwa labat ya pampakalma so pikakasi. No lanang tayon manpipikasi, lalon onelet so pikakaaro tayod Dios. (Sal. 65:2; Sant. 4:8; 1 Juan 5:14) Nen wadiad dalin si Jesus, lanang ya manpipikasi ta amta to ya akaparaan si Jehova ya ondengel. Tan amta to met ya atan so sekreto pian lalon ombiskeg so panangaro tod Ama to. (Luc. 5:16) Maong labat ta walay dondon! Lapud  dondon, makapikaaro tayod si Jehova tan makapitongtong tayo ni ingen ed sikato!

SARAY BENDISYON YA AWATEN TAYO DIAD ARAPEN

9. Antoy awaten na saray matoor ya lingkor nen Jehova diad arapen lapud dondon?

⁹ Diad arapen ey, antoy awaten na saray matoor ya lingkor nen Jehova lapud dondon? Ikdan to ra na bilay ya andi-anggaan. Iisipen na dakel ya totoo ya imposible so bilay ya andi-anggaan, ta anggapo met ni tay toon tuloytuloy ya nambilay. Pero tandaan, say talagan gagala nen Jehova parad totoo et manbilay iray andi-anggaan. No aga komon nankasalanan si Adan, normal labat so bilay ya andi-anggaan tan agtayo isipen ya imposible itan. Singa agtayo ni masyadon naimadyin natan so bilay ya andi-anggaan. Pero akin et manisia tayo ya talagan nagawa itan? On ta mabmabli so imbayar nen Jehova pian niwala itan ed sikatayo. Imbayar to so mismon bilay na inad-aro ton Anak!—Roma 8:32.

10. Antoy tatalaranan la na saray alanaan tan say arum a karnero?

¹⁰ Anggano dia nid arapen so bilay ya andi-anggaan, labay nen Jehova ya natan ni labat et sankanonot tayo la itan. Tatalaranan la na saray alanaan so pambilay da ed tawen, ya ditan et magmaliw iran arari kaibay Kristo tan uleyan da so dalin. (Apo. 20:6) Eksayted met la so arum a karnero ya manbilay ed paraison dalin, ya ditan et agla ra manirap tan manermen. (Apo. 21:​3, 4) Kasin kabiangan ka na arum a karnero kanian say ilalom et manbilay na andi-anggaan diad dalin? Agmo komon iisipen ya mas abebbeba itan ya premyo no ikomparad bilay ya andi-anggaan diad tawen. Ta diad tua, ginawa nen Jehova so too ya manbilay na andi-anggaan diad dalin! Makaseguro tayo sirin ya talagan makapaliket so bilay ed balon mundo.

11-12. Anto ray tatalaranan tayon bendisyon diad Paraiso? (Nengnengen met so litrato.)

¹¹ Imadyin mo pa ya Paraiso la. Agka la manaburido no kasin walay mansakit ed sikayon pamilya odino no kasin walad sikayo so naandid bilay. (Isa. 25:8; 33:24) Iter nen Jehova so amin ya maong ya pirawat na pusom. Anto ray labay mon gawaen diad balon mundo? Kasin labay mon aralen iray nanduruman ayayep? Kasin  labay moy manaral ya mantogtog na instrumento? Odino kasin labay moy manaral ya man-paint? No Paraiso la, seguradon kakkaukolan tayo ray marunong ya mandesinyo na abung. Kakkaukolan tayo met iray karpentero tan dumaralos. Say arum et akaasain ya mangiparaan na materyales, say arum et tagaluto, tan wala met iray mantanem na nanduruman tanaman pian parakepen so kaliberliber. (Isa. 35:1; 65:21) Lapud anggapo lay anggaan na bilay tayo, nagawaan tayo la ray amin ya labay tayon gawaen tan agtayo naupotan na panaon parad saray labay tayo nin aralen.

¹² Makapalikliket met no abeten tayo la ray napaoli! (Gawa 24:15) Tan imadyin mo pay liket ya naliknam ya mas nakakabat moy Jehova legan ya mas ondadakel so antam ed saray pinalsa to. (Sal. 104:24; Isa. 11:9) Pero say sankarakepan ed amin, lapud perpekto ka la, sarag mo lan dayewen si Jehova ya anggapo lan balot so pakakonsiensiaan mo! No isipen mo irayan amin ya bendisyon, kasin isalat mo itan ed “temporaryon panliket ed kasalanan” natan? (Heb. 11:25) Siempre andi! Antokaman so kaukolan mon isakripisyo natan, ag-itan makakiking ed saray bendisyon ya ipaparaan nen Jehova parad sika. Tandaan tayo ya onsabi panaon et agtayo la kaukolan ya alagaren so Paraiso, ta Paraiso la! Tan nagmaliw itan ya posible lapud inar-aro to tayo nen Jehova tan inter tod sikatayo so Anak to.

NO PANON TAYON NIPANENGNENG YA MISATSALAMAT TAYOD PANANGARO NEN JEHOVA

13. Panon tayon nipanengneng ya misatsalamat tayod panangaro nen Jehova? (2 Corinto 6:1)

¹³ Panon tayon nipanengneng ed si Jehova ya misatsalamat tayod impangiter toy dondon? No iyuna tayod bilay tayo so panlingkor ed sikato. (Mat. 6:33) Duga met labat ya ontan so gawaen tayo. Ibabaga na Biblia ya inatey si Jesus “pian saramay manbibilay et agla ra manbilay parad sarili ra, noagta parad samay sakey ya inatey lapud sikara tan pinaoli.” (2 Cor. 5:15) No mamasya tayo ed panlilingkor tayod si Jehova, ipapanengneng tayo ya agtayo ibabaliwala so agnaparaan ya kaabigan to.—Basaen so 2 Corinto 6:1.

14. Panon tayon nipanengneng ya mantitiwala tayo ed bilin nen Jehova?

¹⁴ Nipanengneng tayo met ya misatsalamat tayod panangaro nen Jehova no mantiwala tayo ed bilin to tan unoren tayo itan. Nanengneng ed saray desisyon tayo no kasin mantitiwala tayo ed si Jehova. Singa bilang, ompan paniisipan mo natan no kasin mankolehyo ka o andi, odino no kasin awaten moy sakey ya trabaho o andi. Panon mon nipanengneng ya mantitiwala kad si Jehova? Antis kan mandesisyon, importante ya isip mo ni no antoy labay to ya gawaen mo. (1 Cor. 10:31; 2 Cor. 5:7) No mantiwala tayod si Jehova tan lanang tayon isipen so panlabayan to no mandedesisyon tayo, ombiskeg so pananisia tayod sikato, lalo to tayon ar-aroen, tan magmaliw met ya  tudtua ed sikatayo so ilalo tayo.—Roma 5:​3-5; Sant. 2:​21, 22.

15. Diad saray simba antis tan kayari na Memoryal, panon tayon nipanengneng ed si Jehova ya misatsalamat tayod panangaro to?

¹⁵ Wala ni sakey ya paraan pian nipanengneng tayon misatsalamat tayod panangaro nen Jehova. Pigaran simba antis tan kayari na Memoryal, gawaen tayoy anggaay nayarian tayon ipanengneng ya papablien tayoy dondon. Siempre, seguroen tayo ya sikatayon mismo et makaatendi ed Memoryal, pero imbitaan tayo met so arum. (1 Tim. 2:4) Ipaliwawam ed saramay imbitaan mo no antoy gawaen ed Memoryal. Marakep no ipabantay mod sikara diad jw.org so video ya Akin ya Inatey si Jesus? tan Nodnonoten so Impatey nen Jesus. Importante met ya seguroen na saray elder ya naimbitaan da iray agagin inaktibo. No walay anggan sakey ed sarayan abalang ya karnero ya ompawil ed si Jehova, seguradon malikeliket ira diad tawen tan ontan tayo met diad dalin! (Luc. 15:​4-7) Tan no Memoryal la, aliwan saray agagi labat so ibano tayo. Ibano tayo met iray interesado tan saramay abaybayag lan aga onaatendi. Ipalikna tayod sikara ya welcome ira!—Roma 12:13.

16. Akin et maabig no aruman tayoy oras tayon manpulong diad saray simba antis tan kayari na Memoryal?

¹⁶ Kasin sarag mon aruman so oras mon manpulong diad saray simba antis tan kayari na Memoryal? Sakey itan ya paraan pian nipanengneng mon misatsalamat ka ed amin ya ginawa nen Jehova tan Jesus parad sika. No dakelan tayoy panaon tayod ministeryo, mas nalikna tayoy suporta nen Jehova kanian mas ombiskeg so tiwala tayod sikato. (1 Cor. 3:9) Seguroen tayo met ya natutumbok tayo may eskedyul na panagbasay Biblia parad Memoryal ya nanengneng ed Usisaen so Kasulatan ya Inagew-agew odino diad samay tsart ya walad Workbook ed Aral. Balibali no agmo labat babasaen iray akaeskedyul ya bersikulo. Marakep no i-personal study’m met iratan.

17. Antoy makapaliket ed si Jehova? (Nengnengen met so kahon ya “ No Panon Mon Nipanengneng ya Misatsalamat Kad Panangaro nen Jehova.”)

¹⁷ Siempre, nandurumay situasyon tayo kanian ompan wala ray abitlad sayan artikulo ya agmo nagawaan. Pero tandaan mo ya agbalot ikompara nen Jehova so nagagawaan mo ed nagagawaan na arum. Say nenengnengen to et no antoy walad pusom. Seguradon makakaliket si Jehova no nanengneng to ya napnapno so pusom na pisasalamat ed espisyal ya regalo tod sika, say dondon.—1 Sam. 16:7; Mar. 12:​41-44.

18. Akin et misatsalamat tayod si Aman Jehova tan ed si Jesu-Kristo?

¹⁸ On, lapud dondon, sarag nen Jehova ya perdonaen iray kasalanan tayo, makapikaaro tayo ed sikato, tan walay ilalo tayon manbilay na andi-anggaan. Lanang tayo sirin ya ipanengneng ya misatsalamat tayod panangaro nen Jehova. Ta no agto tayo inaro, anggapo iratan ya bendisyon ya naawat tayo. (1 Juan 4:19) Ipanengneng tayo met so pisasalamat tayod si Jesus ta inar-aro to tayo tan mabulbulos ton inter so bilay to parad sikatayo!—Juan 15:13.