AARALEN YA ARTIKULO 3
KANSION 35 ‘Seguroen Iray Mas Importantin Bengatla’
Segurom ya Saray Desisyon Mo et Makapaliket ed si Jehova
“Say takot ed si Jehova et gapoan na karunongan, tan say pikakabat ed Sankasantosan et mankabaliksay pakatalos.”—PRO. 9:10.
DIAD SAYAN ARTIKULO
Amtaen no panon ya makatulong so kakabatan, pakatalos, tan pakatebek pian makapandesisyon tayoy duga.
1. Antoy mairap ya gawaen no maminsan?
INAGEW-AGEW tayon mandedesisyon. Wala ray mainomay labat ya desisyonan—singa bilang, no antoy almusalen mo odino no anton oras ka onugip. Pero wala met iray mairap ya desisyonan, lalo la no antam ya naapektoan so liket mo, kondisyon na laman mo, pamilyam, tan say panagdayew mo. Siempre, labay tayo ya makapandesisyon tayoy duga, amay parad pankaabigan tayo tan na pamilya tayo. Pero say importante ed amin, labay tayon seguroen ya saray desisyon tayo et makapaliket ed si Jehova.—Roma 12:1, 2.
2. Antoy gawaen mo pian makapandesisyon kay duga?
2 Baleg so posibilidad ya makapandesisyon kay duga no (1) amtaen mo iray detalye, (2) talosan mo no antoy panlabayan nen Jehova, tan (3) isipen mo nin maong no antoy sankaabigan ya desisyon. Pantongtongan tayo iratan diad sayan artikulo, tan pantongtongan tayo met no panon tayon napasalan ya usaren so pakatebek tayo.—Pro. 2:11.
AMTAEN MO RAY DETALYE
3. Akin et importante ya amtaen mo ni ray detalye antis kan mandesisyon? Mangiter na ilustrasyon.
3 Antis kan mandesisyon, say unona ya nepeg mon gawaen et amtaen mo ni iray detalye. Akin et importante itan? Singa onia ’tan ay: Imadyin mo pa so sakey ya pasyente ya nampa-check up ed doktor ta walay graben sakit to. Kasin resitaan ya tampol na doktor tan mangirekomenda lay paraan na panagpatambal anta agto ni ineksamin o tinepetan may pasyente? Siempre andi! Ta no ontay gawaen to, ompan aliwa laingey nairesita o nairekomenda to. Ontan met ed panagdesisyon. Mas marakep no amtaen mo ni iray detalye ya makatulong pian makapandesisyon kay duga. Panon mon nagawaan itan?
4. Antoy gawaen mo pian naamtaan mo ray detalye? (Proverbio 18:13) (Nengnengen met so litrato.)
4 Naamtaan mo ray detalye no mantepet ka. Singa bilang, panon to no walay angimbita ed sika ed sakey ya gathering? Antoy makatulong pian naamtaan mo no kasin onla ka odino andi? No agmo tanton kabat imay angimbita odino agmo amta iray plano ton gawaen ed satan ya gathering, tepetan mo ni. Singa bilang: “Iner ’tan ganapen tan kapigan? Pigaray onla? Siopay mangiyulo tan mangasikaso ed satan? Siopa ni ray arum ya imbitado? Anto ray akaplanon gawaen ed satan ya gathering? Walay iparungon alak?” Mas makapandesisyon kay duga no naamtaan moy ebat ed saratan ya tepet.—Basaen so Proverbio 18:13.
Naamtaan mo ray detalye no mantepet ka (Nengnengen so parapo 4) a
5. Antoy gawaen mo no naamtaan mo la ray detalye?
5 Natan ta antam la ray detalye, manisip kan maong base ed saratan ya naamtaan mo. Singa bilang, panon to no naamtaan mo ya wala ray imbitado ed samay gathering ya agda uunoren iray prinsipyo nen Jehova? Tan panon to no naamtaan mon walay iparungon alak pero anggapoy mangiyulo o man-monitor ed karakel na alak ya inumen na saray bisita? Seguro naiimadyin mo la ya nayarin mansumpal itan ed “mabanday a panliliket.” (1 Ped. 4:3) Nia ni sakey: Panon to no amay gathering et tinmama ed oras na aral yo odino eskedyul na kapapaway mo? No isipen mo iraya, mas mainomay mo lay mandesisyon na duga. Pero wala ni nepeg mon gawaen. Anggano naisip mo la irayan amin, kaukolan mo met ya amtaen no antoy nibaga nen Jehova.—Pro. 2:6.
TALOSAN MO NO ANTOY PANLABAYAN NEN JEHOVA
6. Base ed Santiago 1:5, akin et agtayo dapat nababaingan ya manpatulong ed si Jehova?
6 No walay kaukolan mon desisyonan, ipikasim ed si Jehova ya tulongan to ka pian natalosan mo no antoy panlabayan to. Ibabaga na Biblia ya labalabay to tayon ikday karunongan ta atan so ontulong ed sikatayo pian natebek tayo no anton desisyon so makapaliket ed sikato. Diad tua, ‘agto tayo balawen’ no onkerew tayod sikatoy karunongan. ‘Mabunlok to ni ingen itan ya iter’ ed sikatayo.—Basaen so Santiago 1:5.
7. Panon mon naamtaay panlabayan nen Jehova? Mangiter na ilustrasyon.
7 No nampikasi ka lad si Jehova, kaukolan mon imanoen ya maong no antoy ebat to ed pikakasim. Singa onia ’tan ay: Imadyin mo pa ya linma kad sakey ya lugar, pero alikas mo ya singa nababalang ka la kanian nantepet ka ed sakey ya tagad man. Kasin kayarim ya nantepet et onalis ka la anta agmo ni arengel so ebat to? Siempre andi! Ondengel kan maong ed ibaga to. Singa ontan met no onkerew kay karunongan ed si Jehova. Naamtaan moy ebat to no aralen mo ray prinsipyo tan ganggan ed Biblia ya konektado ed situasyon mo. Singa bilang, diad samay abitlan situasyon nen niman ya walay angimbitad sika diad gathering, marakep no aral moy ibabaga na Biblia nipaakar ed mabanday ya panliliket, mauges ya kaulop, tan no akin ya importantin unaen moy Panarian imbes ya say panlabayan mo.—Mat. 6:33; Roma 13:13; 1 Cor. 15:33.
8. Antoy gawaen mo no nanairapan kan anapen iray prinsipyo ed Biblia ya onaplikad situasyon mo? (Nengnengen met so litrato.)
8 Panon to no nanairapan kan anapen iray prinsipyo ed Biblia ya onaplikad situasyon mo? Sarag moy manpatulong ed saray maespiritual ya agagi. Pero duman-duma nin siansia no sikan mismo so man-research. Wala ray intarya na organisasyon tayo ya makatulong ed pan-research mo, singa say Giya ed Pan-research na Saray Tasi nen Jehova tan Manpaigiya ed Saray Prinsipyo na Biblia. Basta aya so tandaan mo: Gawaen mo ’tan ta labay mon say desisyon mo et makapaliket ed si Jehova.
Talosan mo no antoy panlabayan nen Jehova (Nengnengen so parapo 8) b
9. Panon mon naseguro ya naliketan si Jehova ed desisyon mo? (Efeso 5:17)
9 Panon mon naseguro ya naliketan si Jehova ed desisyon mo? Importante ya kabaten mon maong si Jehova. Ibabaga na Biblia ya “say pikakabat ed Sankasantosan et mankabaliksay pakatalos.” (Pro. 9:10) On, no amta tayo ray kualidad nen Jehova, say gagala to, tan saray labay tan agto labay, mas mainomay tayon natalosan no antoy makapaliket ed sikato. Tepetan moy sarilim, ‘Anto kasin desisyon so makapaliket ed si Jehova?’ Mainomay mon naebatan itan no kabkabat moy Jehova.—Basaen so Efeso 5:17.
10. Akin ya mas importante iray prinsipyo na Biblia nen say kultura o ibaga na pamilya tayo?
10 No maminsan, pian napaliket tayoy Jehova, kaukolan tayon tanggian no antoy labay na pamilya o kakaaro tayo. Singa bilang, ompan piliten na atateng so anak da ya miasawa ed brother ya mayaman pero makapuy so espiritualidad to. Ompan say ibaga ra, ‘Say importante, amay nabilay to ka.’ Natural met labat ed sakey ya ateng ya labay ton mainaway bilay na anak to. Pero no sika may anak, tepetan moy sarilim, ‘Natulongan ak kasi na sayan brother pian lalo ak ya ontatken ed espiritual? Antoy nibaga nen Jehova ed saya ey?’ Say ebat et walad Mateo 6:33. Ibabaga na satan ya teksto ya kaukolan tayon “anapen nin unona so Panarian.” Kanian anggano rerespetoen tayo ray atateng tayo tan iisipen tayo met so ibaga na arum ya too, dapat say manunan sankanonot tayo et no antoy makapaliket ed si Jehova.
ISIP MO NIN MAONG NO ANTOY SANKAABIGAN YA DESISYON
11. Base ed Filipos 1:9, 10, antoy makatulong pian nanengneng mo no antoy sankaabigan ya desisyon?
11 No inaral mo la ray prinsipyo na Biblia ya onaplikad situasyon mo, kaukolan mo la natan ya isipen no antoy sankaabigan ya desisyon, lalo la no pigapigaray pampipilian mo. (Basaen so Filipos 1:9, 10; nengnengen so study note ya “malalim na unawa” diad nwtsty-TG.) Makatulong so pakatebek pian nanengneng mo la no antoy pansumpalan na kada desisyon ya pampipilian mo. Wala ray situasyon ya mainomay labat ya desisyonan. No maminsan balet, ompan masyadon komplikado kanian kaukolan mo nin panisipan ya maong. Pero anggano ontan so situasyon, sarag mo nin siansiay makapandesisyon na duga, basta usar moy pakatebek mo.
12-13. No manaanap kay trabaho, panon ya makatulong so pakatebek pian makapandesisyon kay duga?
12 Isipen pa iyan situasyon: Manaanap kay trabaho pian nasuportaan moy pamilyam, tan akanengneng kay duaran trabaho ya sarag mon aplayan. Inaral mon amin iray detalye—singa bilang, no anto ’tan ya klase na trabaho, no antoy magmaliw ya eskedyul mo, no pigaran oras so biahe paonla ditan, tan arum ni. Sineguradom met ya anggapoy nakontram ya prinsipyo ed Biblia no awaten mo ’tan ya trabaho. Ompan mas labay mo balet may sakey ya trabaho ta mas baleg so sueldo, odino atan may trabaho ya talagan labalabay mon gawaen. Pero tandaan, aliwan say sueldo tan panlabayan mo labat so kaukolan mon ikonsidera.
13 Antis kan mandesisyon no anton trabaho so pilien mo, isip mo ni irayan tepet: ‘Kasin apektoen na sayan trabaho so pipiaral ko? Kasin upoten toy panaon ko kanian ngalngali agko la nakaibay pamilyak tan napaulyanan ko lay espiritualidad da?’ Makatulong iratan ya tepet pian aliwan say pananap na kuarta so akapokusan mo tan pian nasegurom ya niyunam nin siansia iray mas importantin bengatla—say panagdayew mod si Jehova tan say pamilyam. On, no ikonsideram iray mas importantin bengatla, seguradon bendisyonan nen Jehova so desisyon mo.
14. Panon ya makatulong so pakatebek tan panangaro pian agtayo nagapol so arum?
14 Makatulong met so pakatebek pian nanengneng tayo la no antoy epekto na desisyon tayo ed arum, diad ontan et ‘agtayo ra nagapol.’ (Fil. 1:10) Importante iya anggan diad saray personal ya desisyon tayo, singa say panangawes tan panag-ayos. Singa bilang, panon to no walay labalabay mon style na panangawes o panag-ayos pero antam ya walay naibaga na saray kakongregasyon mo tan anggan saray aliwan Tasi? No diad unona ni labat et atebek mo lay reaksion da, iwasan mo la ’tan ya style ta labay mon respetoey nalilikna ra. No inarom ira, iyunam so ‘pankaabigan da’ tan seguroen mon masimpit so panangawes tan panag-ayos mo. (1 Cor. 10:23, 24, 32; 1 Tim. 2:9, 10) No ontan so gawaen mo, nipanengneng mo ya inarom tan rerespetoen moy arum.
15. No seryoson bengatla so kaukolan mon desisyonan, anto ray nepeg mon ikonsidera tan iplano pian seguradon nagawaan mo itan?
15 No seryoson bengatla so desisyonan mo, isip mo met no anto ray nakaukolan pian nagawaan mo itan. Unor mo imay imbaga nen Jesus ya ‘kuentam ni no pigaray nagastos.’ (Luc. 14:28) Aliwa labat ya kuarta so nalalanor ed satan. Ikonsideram met so panaon tan sagpot ya nakaukolan parad satan ya desisyon. Wala ray situasyon ya ompan mas marakep no katongtongen mo ray kapamilyam pian naamtaan da no panon da kan nasuportaan ed desisyon mo. Akin et importante so ontan ya panagplano? On ta ditan mo nanengneng no kasin walay kaukolan ya umanen ed desisyon mo odino wala ni mas praktikal nen samay akaunan desisyon mo. Tan no amta na pamilyam so planom tan ikonsideram no antoy nibaga ra, mas mabulos iran onsuporta ed sika.—Pro. 15:22.
SEGUROM YA MAONG SO PANSUMPALAN NA DESISYON MO
16. Anto ray nepeg mon gawaen pian makapandesisyon kay duga? (Nengnengen met so kahon ya “ No Panon Kan Makapandesisyon na Duga.”)
16 No ginawam la may taloran apantongtongan tayo, mas wala lay kompiyansam ya mandesisyon. Lapud inaral mo la ray detalye tan saray prinsipyo ed Biblia ya onaplikad situasyon mo, antam la no anton desisyon so makapaliket ed si Jehova. Inkonsideram so panlabayan to, kanian sarag mo la natan ya ipikasi ed sikato ya bendisyonan to komon so desisyon mo.
17. Antoy sekreto pian makapandesisyon kay duga?
17 Anggano maong so nansumpalan na saray desisyon mo nensaman, agto labay ya ibagan maong met lay pansumpalan na saray ontutumbok ya desisyon mo. Agka komon mantitiwala ed sarilim ya talino o diskarte. Mantiwala ka ed karunongan ya manlalapud si Jehova. Atan so sekreto pian makapandesisyon kay duga. Si Jehova labat so makapangiter ed sika na tuan kakabatan, pakatalos, tan pakatebek. No walad sika iratan ya amin, magmaliw kan marunong. (Pro. 2:1-5) On, tulongan ka nen Jehova pian makapandesisyon kay duga tan napaliket moy puso to.—Sal. 23:2, 3.
KANSION 28 Pikakaaro ed si Jehova
