Ipanengneng so Panangasi ed “Amin a Klase na Totoo”
SANEN imbangat nen Jesus iray disipulo to no panon ya ipulong so maong a balita, binidbir ton aliwan amin ya totoo et mangawat ed mensahe na Panarian. (Luc. 10:3, 5, 6) Diad ministeryo tayo, nayarin wala ray naabet tayon negatibo so ibaga rad sikatayo odino ompan sakitan da itayo ni ingen. Diad tua, nayarin nairapan tayon ipanengneng so panangasi ed saray totoon ontan so reaksion da ed mensahen ipupulong tayo.
Say sakey a mapangasin too et nanenengneng toy pankaukolan tan problema na arum, walay simpatya to ed sikara, tan labay to ran tulongan. Balet, no kalkalnan naandi so panangasi tayo ed saray napupulongan tayo, nayarin kalkalna met ya naandi so inkaseseg tan inkaepektibo tayo ed ministeryo. Balet no pansiansiaen tayo so panangasi tayo, a singa pansunglor na kiew ed apoy—napansiansia tayon marlang so seseg tayo ed ministeryo!—1 Tes. 5:19.
Panon tayon napansiansia so panangasi ed arum anggano singa mairap itan ya gawaen? Aralen tayoy taloran alimbawa ya nepeg tayon aligen—say alimbawa nen Jehova, Jesus, tan si apostol Pablo.
ALIGEN SO PANANGASI NEN JEHOVA
Nilibon taon lan aanosan nen Jehova so panagbalaw ed ngaran to. Balet sikatoy mansiasiansian “maong ed saray andiay utang na linawa tan mauges.” (Luc. 6:35) Napatnagan so kamaongan to ed inkaanos to. Labay nen Jehova ya “amin a klase na totoo” et niliktar. (1 Tim. 2:3, 4) Anggaman kabusol na Dios so kaugsan, papablien to ray totoo tan agto labay a walay siopaman ya naderal.—2 Ped. 3:9.
Amta nen Jehova ya epektibon bubulagen nen Satanas iray agmananisian totoo. (2 Cor. 4:3, 4) Dakel so abangatan na palso iran bangat tan kagagawa manlapu lad inkaugaw da, kanian naiirapan iran awaten so katuaan. Labalabay nen Jehova ya tulongan so ontan iran totoo. Panon tayon amta?
Imanoen so impanengneng ton panangasi ed saray taga Ninive nensaman. Anggaman marukruksa ira, siansian imbaga nen Jehova ed si Jonas: “Agko met kasi kawananen so Ninive a baleg a syudad, a wadtan so masulok a 120,000 a totoo ya agda anggan amta so duga tan aliwa?” (Jon. 4:11) Anengneng nen Jehova so pakaskasin kipapasen ed espiritual na saray taga Ninive, kanian lapud panangasi to et ingganggan toy Jonas pian pasakbayan ira.
Singa si Jehova, papablien tayo met iray totoo. Sikatoy naalig tayo no gawaen tayoy anggaay nayarian tayon tulongan iramay nayarin labay day ondengel, anggano singa agmet lanlamang ira onkiwas.
ALIGEN SO PANANGASI NEN JESUS
Singa say Ama to, akasian nen Jesus iray totoon mankakkaukolan ed espiritual. “Sanen anengneng to iray totoo, akasian to ra, lapud singa ra kinatatan tan pinaulyanan a karnero ya andiay managpastol.” (Mat. 9:36) Anengneng to no anton talagay pankaukolan da; binidbir ton saramay ondedengel ed sikato et abangatan na palso iran bangat tan minaltrato na saray lider na relihyon da. Anggano amta nen Jesus ya abuloyan na dakel ed sikara iray problema ya mangamper ed sikaran onaligwas ed katuaan, siansia nin “dakel so imbangat tod sikara.”—Mar. 4:1-9.
Agnadidismaya no diad gapo et anggapoy interes na too
Manguuman so kipapasen na bilay, kanian nayarin manguman met so reaksion na too ed katuaan
No aliwliway reaksion na totoo ed mensahen ipupulong tayo, kaukolan tayon nengnengen no anton talagay pankaukolan da tan tepetan tayoy sarili tayo no akin ya onman so reaksion da. Say arum et nayarin negatibo nipaakar ed Biblia odino ed Inkakristiano lapud saray makapuy ya gagawaen na saramay mangibabagan Kristiano ira. Ompan say arum et katilaan so narerengel da nipaakar ed saray papanisiaan tayo. Say arum balet et nayarin balawen ira na kakaabay da odino saray kapamilya da no positibo so pangawat dad sikatayo.
Wala ray nakatongtong tayod ministeryo ya negatibo so reaksion da lapud saray makapabiglan naeksperiensya da ya akaermenan dan maong. Oniay imbaga nen Kim ya sakey a misionero: “Walay teritorya mi ya dakel iray totoon abiktima na guerra ya lapud satan et naandi so amin ya kaykayarian da. Naandian la ray ilalo. Dismayado ira tan anggapo lay tiwala da ed arum. Ditan et naynay ya nanaabet mi ray totoon kontra ed ipupulong tayo. Aminsan ni ingen et sinakitan da ak legan kon manpupulong.”
Panon ya apansiansia nen Kim so panangasi to anggano ontan so impantrato na arum ed sikato? Imbaga to: “No mauges so panagtrato na arum ed siak, lanang kon nononoten may ibabaga na Proverbio 19:11: ‘Say aralem a pakatalos na too so mamakepa ed pasnok to.’ No nononoten ko so kipapasen na saramay walad teritorya mi, natutulongan ak ya pansiansiaen so panangasik ed sikara. Tan aliwan amin ya nakakatongtong mi et mapaspasnok. Ditan met lanlamang ya lugar, wala ray papawilen min interesado.”
Nayarin tepetan tayoy sarili tayo, ‘Antoy reaksion ko ed mensahe na Panarian no siak so walad kipapasen na saramay pupulongan ko?’ Singa bilang, panon to no puro katilaan so narerengel tayo nipaakar ed saray Tasi nen Jehova? Diad ontan iran kipapasen, nayarin negatibo met so reaksion tayo tan kaukolan tayoy panangasi. No nonoten tayoy ganggan nen Jesus ya tratoen so arum ed paraan ya labay tayon pantrato dad sikatayo, napakiwas tayon ipanengneng so panangasi anggano singa mairap itan.—Mat. 7:12.
ALIGEN SO PANANGASI NEN PABLO
Impanengneng nen apostol Pablo so panangasi ed arum anggan diad saray maruksan onkokontra. Akin? Agto alingwanan ya ontan met so ginawa to nensaman. Imbaga to: “Anggano nensaman et sakey ak a managmudmora ed Dios tan managpairap tan agmangikabkabilangan. Balet, kinasian ak lapud anggapo ni kakabatan ko tan pananisiak nen ginawak iman.” (1 Tim. 1:13) Binidbir to ya sikatoy kinasian a maong nen Jehova tan Jesus. Kanian nayarin anengneng toy datin sarili to ed saramay pinulongan to.
Wala ray nabet nen Pablo ya nigalet lan maong ed palso iran papanisiaan. Antoy reaksion to? Ibabaga na Gawa 17:16 ya legan ya walad Atenas si Pablo, “sikatoy naalipanesan diad impakanengneng tod syudad a napno na saray idolo.” Anggaman ontan, inusar to iyan mismon pakakaalipanesan to pian makapampulong. (Gawa 17:22, 23) Intukoy toy paraan na impanpulong to ed kipapasen na nanduruman klase na totoo pian “diad amin a posiblin paraan et niliktar [to] so arum ed sikara.”—1 Cor. 9:20-23.
Sarag tayo met ya aligen si Pablo no bidbiren tayon wala ray naabet tayon negatibo so reaksion da odino palso iray papanisiaan da, balet mataktika tayon ipaamtad sikara so “maong a balita nipaakar ed magmaong a bengatla.” (Isa. 52:7) Oniay imbaga na sakey a sister ya si Dorothy: “Diad teritorya mi, imbangat ed saray dakel a totoo ya say Dios et maruksa tan manangidumaduma. Kokomendaan ko iratan ya totoo lapud walay pananisia dad Dios, insan ko ipaimano ed sikara no antoy ibabaga na Biblia nipaakar ed maaron personalidad nen Jehova tan saray sipan to ed arapen.”
“ITULTULOY MON DAEGEN SO MAUGES DIAD PANAMEGLEY NA MAONG”
Legan tayon manbibilay diad sampot lan parte na “kaunoran iran agew,” ilaloan tayo ya say ugali na saray pulongan tayo et “magmaliw a lalon mauges.” (2 Tim. 3:1, 13) Balet agtayo abuloyan ya lapud sayan ugali na totoo et naandi lay panangasi tayo odino say liket tayo. Sarag itayon ikdan nen Jehova na biskeg pian “itultuloy [tayon] daegen so mauges diad panamegley na maong.” (Roma 12:21) Oniay imbaga na sakey a payunir ya si Jessica: “Naynay kon nanaabet iray mapaatagey ya totoo tan saramay mamabalaw ed sikatayo tan ed mensahen ipupulong tayo. Makapadismaya itan. Balet no igapok lay mitongtong, manpipikasi ak ni ed si Jehova tan kekerewen koy tulong to pian nengnengen ko so too unong ed pakanengneng to. Makakatulong itan ed siak pian agak manpokus ed liknaan ko noagta say nonoten ko la et no panon kon natulongan imay too.”
Lanang tayon anapen iramay walaan na dugan kipapasen na puso parad bilay ya andi-anggaan
Saray arum et onkikiwas lapud maanos ya pansasagpot tayon tulongan ira ed espiritual
Kaukolan tayo met ya nonoten no panon tayon napaseseg iray agagi tayo. Imbaga nen Jessica: “No walay sakey ed sikami ya aliwliway naeksperiensya to, agko la itan iimanoen a maong. Imbes, dudumaen koy tongtongan pian magmaliw ya positibo, singa say balibalin nagagawaan mi ed ministeryo anggano negatibo so reaksion na arum.”
Amta nen Jehova iray subok ya nanaabet tayod ministeryo. Seguradon sikatoy naliliketan no aaligen tayoy panangasi to! (Luc. 6:36) Siempre, walay anggaan na panangasi nen Jehova. Makapanmatalek tayo ya seguradon amta to so dugan panaon pian panampoten iyan sistema na mundo. Balet kaleganan to, apuraan so panagpulong tayo. (2 Tim. 4:2) Itultuloy tayo sirin ya gawaen so kimey tayon panagpulong ya walaay seseg tan panangasi ed “amin ya klase na totoo.”
