“TUAN dakel so aanien, balet daiset so mankikimey. Mikasi kayo sirin ed Katawan na panag-ani a mangibaki na saray mankimey ed aanien to.” (Luc. 10:2) Saratan ya imbaga nen Jesus manga 2,000 taon lay apalabas so manideskribe ed situasyon natan ed Myanmar. Akin? Diad Myanmar, manga 4,200 ya manangipalapag labat so manpupulong na maong a balita ed 55 milyon ya totoo.

Anggaman ontan, tinenyeg nen Jehova, say “Katawan na panag-ani,” so kapusoan na saray nilasus ya agagi manlapud nanduruman bansa, tan linma rad Myanmar diad Southeast Asia pian ontulong ed kimey a panag-ani ed espiritual. Antoy amakiwas ed sikaran taynan so bansa ra? Antoy tinmulong ed sikara pian makaonla rad Myanmar? Tan anto ran bendisyon so panliliketan da? Amtaen tayo.

Pigaran taon lay apalabas, si Kazuhiro, sakey ya payunir ed Japan, et sinmige so epilepsy to tan nalmay, kanian imbatik dad ospital. Imbagad sikato na doktor ya sikatoy agnayarin man-drive diad loob na duay taon. Abigla si Kazuhiro. ‘Panon kon nituloy so labalabay kon gawaen​—say panagpayunir?’ so intepet tod sarili to. Sikatoy masimoon ya nampikasi tan kinerew tod si Jehova ya manggawa komoy paraan pian makapantultuloy ya manlingkor bilang payunir.

Imbaga ni nen Kazuhiro: “Kayari sakey bulan, abalitaan na kaarok ya manlilingkor ed Myanmar so situasyon ko. Tinawagan to ak tan imbaga to: ‘Diad Myanmar, say maslak ya luluganan et bus. No onla kad dia, nituloy moy pampupulong mo anggano anggapoy kotsim!’ Tinepetan koy doktor ko no nasarag kasi na laman ko so mansiansia ed Myanmar. Asurprisa ak ed imbaga to: ‘Wadia natan ed Japan so sakey ya espisyalista ed utek ya nanlapud Myanmar. Ipakabat ta kad sikato. No bilang ta onsige lamet so sakit mo, sarag to kan asikasoen.’ Impasen kon ebat nen Jehova iman ya imbaga na doktor.”

Tampol ya nan-email si Kazuhiro diad branch office ed Myanmar tan imbaga toy pilalek dan sanasawa ya manlingkor ed satan ya bansa bilang payunir. Tan kayari labat na limaran agew et oniay ebat na branch: “Gali dia, kaukolan mi ni dakel ya payunir!” Inlako nen Kazuhiro tan asawa ton si Mari iray kotse da, angala ray visa, tan angaliw iray tiket dad eroplano. Natan, maliket iran manlilingkor ed sakey ya grupo  na sign-language ed Mandalay. Imbaga nen Kazuhiro: “Lapud sayan naeksperiensya mi, alikna min binmiskeg so talek mid promisa na Dios ya nabasad Salmo 37:5: ‘Ipiam ed si Jehova so dalan mo; manmatalek kad sikato, tan sikatoy onkiwas parad sika.’”

Nen 2014, saray Tasi nen Jehova ed Myanmar et apribilehyoan ya man-host ed sakey ya espisyal a kombension. Dakel a delegado ya nanlapud arum a bansa so inmatendi. Say sakey ed sikara et si Monique, sister ya masulok to lan 30 a taga United States, oniay imbaga to: “Kapawil ko manlapud kombension, impikasik ed si Jehova no antoy onsublay ya gawaen ko ed bilay ko. Ontan met, imbagak ed saray ateng ko iray goal ko ed espiritual. Naisip mi ya kaukolan koy ompawil ed Myanmar, balet linmabas ni panaon tan dakel a pikakasi antis ak ya akapandesisyon.” Impaliwawa nen Monique no akin.

“Pinaseseg nen Jesus iray papatumbok to ya ‘kuentaen so nagastos.’ Kanian intepet kod sarilik: ‘Wala kasi nagastos ko diad iyalis ko? Nasuportaan ko kasi sarilik ed satan ya bansa anggano aliwan dakel ya oras so usaren ko ed pantrabaho?’” Imbaga to: “Say naisip kon tampol et anggapoy magenap ya kuartak pian onlad arum ya bansa.” Kanian anto sirin so akatulong ed sikato pian makaalis?​—Luc. 14:28.

Imbaga nen Monique: “Sakey ya agew et labay ak ya katongtongen na boss ko. Mannerbiyos ak, ta say amtak et naekal ak ed trabaho. Balet andi, imbes, akisalamat ed siak so boss ko lapud maong ya pantratrabahok. Insan to imbagan walay naawat kon bonus, et aman so eksakton kuarta ya kakkaukolan ko pian nasuportaan koy sarilik diad iyalis ko!”

Si Monique et manlilingkor ed Myanmar manlapu la nen Disyembre 2014. Antoy nibaga to ed ministeryo to bilang sakey ya manlilingkor ed lugar ya mas baleg so pankaukolan? “Malikeliket ak dia,” so inkuan to. “Walay taloran iyaaralan ko na Biblia. Sakey ed sikara et 67 lay taon to. Kapagno mannengneng kami, iimisan tan lalakapen to ak. Nen naamtaan ton say ngaran na Dios et Jehova, sikatoy akalua. Imbaga to: ‘Diad interon bilay ko, natan ko labat naamtaan ya say ngaran na Dios et Jehova. Mas matatken ak na aminpigapiga nen say sika, balet imbangat mod siak so sankaimportantian a nepeg kon naaralan.’ Agak la akasalita tan akaakis ak met. Say onia ran eksperiensya na panlilingkor ed lugar ya mas baleg so pankaukolan et talagan makapalikliket.” Diad agano ni, si Monique et apribilehyoan ya manaral ed School for Kingdom Evangelizers.

Say sakey ya amaseseg ed arum ya onlad Myanmar et say report nipaakar ed sayan bansa ya walad 2013 Yearbook of Jehovah’s Witnesses. Sakey a sister ya masulok lan 30 so taon to, ya manngaran na Li, et manaayam ed Southeast Asia. Full-time so trabaho to, balet say report ed Yearbook so amaseseg ed sikato ya ikonsidera so panlingkor ed Myanmar. “Nen 2014, inmatendi ak ed sakey ya espisyal a kombension diad Yangon, akabat ko diman so sanasawan manlilingkor ed mas baleg so pankaukolan diad teritoryan wala ray mansasalita na Chinese. Lapud makasalita ak na Chinese, nandesisyon ak ya onsuporta ed Chinese group diman. Say partner ko et si Monique, tan inmalis kamid Mandalay. Benendisyonan nen Jehova so impananap mi na part-time ya trabaho bilang teacher ed saksakey ya eskuelaan, tan walay aromog min apartment ya asingger labat ditan. Anggano ampetang so panaon tan medyo aliwan kombeniente, mani-enjoy kami ed panlilingkor mi dia. Simpli labat so panagbilay na saray totoo ed Myanmar, pero marespeto ra tan labalabay day ondengel ed maong a balita. Makapalikliket ya nanengneng ya papepelesen nen Jehova so kimey. Talagan kombinsido ak ya linawa nen Jehova ya wadia ak ed Mandalay.”

Dakel ya manlilingkor ed lugar ya mas baleg so pankaukolan et akaeksperiensyan mismo ed pakayari na  pikakasi. Singa bilang si Jumpei tan say asawa ton si Nao, ya masulok lan 30 so taon dan dua, et manlilingkor lad sign-language congregation ed Japan. Akin et inmalis ni rad Myanmar? Imbaga nen Jumpei: “Labalabay mi nen asawak so manlingkor ed arum a bansa ya mas baleg so pankaukolan. Walay brother ya kakongregasyon mi ed sign-language ed Japan ya inmalis diad Myanmar. Anggano melag labat so tipon mi, inmalis kami met ed Myanmar nen Mayo 2010. Malikeliket kamin in-welcome na saray agagi ed Myanmar!” Antoy nibaga to nipaakar ed pamboboluntaryo tod sign-language diad Myanmar? “Dakdakel so interesado. No mangipabantay kami na saray video ed sign-language, manbilib iray unabung ya telek. Malikeliket kami ta nandesisyon kamin onla dia pian manlingkor ed si Jehova!”

Panon ya nasusuportaan nen Jumpei tan Nao so sarili da? “Kayari taloy taon, ngalngali la naupot so tipon mi tan anggapo lay magenap ya ibayar mid abung ya rerentaan mi diad onsublay ya taon. Naynay kamin masimoon ya manpipikasi nen asawak. Agmi iilaloan, walay naawat min sulat manlapud branch office ya iimbitaan da kamin magmaliw ya espisyal a payunir! Nanmatalek kamid si Jehova, tan talagan agto kamin balot pinaulyan. Lanang to kamin aasikasoen ed amin ya pankaukolan mi.” Diad agano ni, apribilehyoan si Jumpei tan Nao ya manaral ed School for Kingdom Evangelizers.

Antoy amakiwas ed si Simone, sakey a brother ya masulok lan 40 so taon to, ya taga Italy, tan say asawa ton si Anna, sakey a sister ya masulok lan 30 so taon to, ya taga New Zealand, ya onalis irad Myanmar? “Apaseseg kami ed report nipaakar ed Myanmar diad 2013 ya Yearbook!” so inyebat nen Anna. Imbaga nen Simone: “Baleg a pribilehyo so manlingkor ed Myanmar. Mas simpli so panagbilay dia, tan mas dakel so panaon kon manlingkor ed si Jehova. Makapaliket ya naeksperiensya so panangasikaso nen Jehova legan min manlilingkor ed lugar ya mas baleg so pankaukolan.” (Sal. 121:5) Imbaga nen Anna: “Mas maliket ak natan. Simpli so panagbilay mi. Dakel so panaon min saniba nen asawak, tan mas inmapit kamid sakey tan sakey. Awalaan kami met na balon kakaaro. Saray totoo dia et anggapoy panangidumaduma da ed saray Tasi, tan makapadinayew ta dakel so interesado!” Diad anto ran paraan?

Imbaga nen Anna: “Aminsan, sakey ya estudyante ed unibersidad so apulongan ko diad tindaan tan imbagak ya mannengneng kami lamet. Nen pinawil ko, walay kaiba ton kaaro to. Diad tinmumbok, wala lamet iray intagar to. Insan diad sinmublay et naaruman ni intagar to. Natan et iyaaralan ko lay limara ed sikara.” Imbaga nen Simone: “Saray totoo dia et makaaro tan labalabay day ondengel. Dakel so interesado. Kulang so panaon min pawilen iran amin.”

Balet anto ray praktikal a paraan ya makatulong diad pandesisyon ya onalis ed Myanmar? Imbaga nen Mizuho ya taga Japan: “Labalabay mi nen asawak ya si Sachio so manlingkor ed bansan mas baleg so pankaukolan​—balet iner? Kayari min binasa so report nipaakar ed Myanmar diad 2013 ya Yearbook, atenyeg  so puso mi lapud saray balibalin eksperiensya kanian ninonot mi no kasin sarag mi manlingkor ed Myanmar.” Imbaga met Sachio: “Nandesisyon kamin man-tour ya sakey simba ed Yangon, say manunan syudad ed Myanmar, pian nengnengen so lugar. Lapud saman ya antikey ya imbisita mi, akombinse kamin onalis dia.”

Si Rodney tan say asawa ton si Jane, ya taga Australia, a parehon masulok ya 50 so taon da, tan saray anak dan si Jordan tan Danica, et manlilingkor ed lugar ya mas baleg so pankaukolan diad Myanmar manlapu la nen 2010. Imbaga nen Rodney: “Apakiwas kamin maong lapud labalabay na totoo so makaaral nipaakar ed Dios. Irerekomendak ed saray pamilya a salien da so manlingkor ed lugar a singa diad Myanmar.” Akin? “Agnabayaran so agawaan na saya ed espiritualidad na pamilya mi! Dakel a kabataan so busy ed cellphone, kotse, trabaho, tan arum ni. Saray ananak mi balet et busy ya manaaral na saray balon salita ya usaren da ed ministeryo. Aaralen da no panon iran mankatunongan ed saramay aliwan pamilyar ed Biblia tan no panon so mankomento ed aral diad lokal a kongregasyon, tan akapokus irad arum ni ran makapaliket ya aktibidad ed espiritual.”

Si Oliver, sakey a brother ya masulok lan 30 so taon to ya taga United States, et impaliwawa to no akin ya irerekomenda to iyan klase na panaglingkor: “Say panlingkor ed si Jehova diad lugar ya agmo apasalan tan aliwan kombeniente ed sika et dakel so iter ton gunggona. Akatulong ed siak so inyalis ko pian nawalaan ak na kompiyansa tan talek ed si Jehova, antokaman so situasyon ya nadalan ko. Say panlingkor a kaiba iray agagi ya natan ko labat akabat balet parehoy papanisiaan mi et baleg ya akatulong ed siak pian namoriak ya anggapon balot ed sayan mundo so makapipara ed kaimportantian na Panarian na Dios.” Natan, si Oliver tan say asawa ton si Anna, et tuloytuloy ya maseseg a manlilingkor ed teritoryan mansasalitay Chinese.

Si Trazel, sakey a sister ya masulok lan 50 so taon to ya taga Australia, et manlilingkor ed Myanmar manlapu la nen 2004. Imbaga to: “Parad saramay iyabuloy na sirkumstansya ra, talagan irerekomendak so panlingkor ed lugar ya mas baleg so pankaukolan. Naeksperiensyak ya no mabulbulos kan manlingkor, bendisyonan nen Jehova iray sagpot mo. Agko iilaloan so onian bilay. Aya la so sankaliketan ya pipirawaten kon nagawa ed bilay ko.”

Komon ta sarayan imbaga na saray manboboluntaryo ed lugar ya mas baleg so pankaukolan diad Myanmar et mamaseseg ed sikan nonoten so itulong ed totoo diad saray teritoryan agni apulongan. On, oniay ibabaga na saray manboboluntaryo, “Gali dia ed Myanmar tan tulongan yo kami!”