1. Anton pananguman so agawa ed arum a bansa ed agano ni iran dekada?

DIAD apalabas a nilibon taon, kaslakan a totoo ed mundo et walaan na relihyon. Balet walay agawan baleg a pananguman ed agano ni ran dekada. Ondarakel iray totoo ya mangibabagan anggapoy relihyon da. Diad tua, wala ray bansa ya mas baleg a porsiento na populasyon da so mangibabagan aliwa iran relihyoso. *—Mat. 24:12.

2. Akin et dakel a totoo so aliwan relihyoso?

² Akin et ondarakel iray totoon ipapasen day sarili da ya aliwan relihyoso? * Nayarin say arum et say panliliket odino saray kapagaan so kawalaan na imano ra. (Luc. 8:14) Wala ray arum ya datin relihyoso balet ta nagmaliw iran ateista. Say arum et manisia ed Dios balet iisipen da ya say relihyon et karaanan la, aliwa lan praktikal, tan kontra ed science tan lohikal a panagnonot. Nayarin narerengelan dad saray kakaaro da, maestro tan maestra, odino diad saray sikat ya totoo ed media ya say bilay et resulta na ebolusyon, balet agda narerengelan iray lohikal a rason no akin ya makapanisia ira ya walay Dios. Wala met iray onsyosyodot ed saray lider na relihyon ya maagum ed kuarta tan autoridad. Tan diad arum a lugar, say gobierno a mismo so manlilimita ed saray aktibidad na relihyon.

3. Antoy gagala na sayan artikulo?

³ Ingganggan itayo nen Jesus ya ‘ibangat iray totoo ed amin a  nasyon pian magmaliw iran disipulo to.’ (Mat. 28:19) Panon tayon natulongan iray totoo ya aliwan relihyoso pian naaralan dan aroen so Dios tan magmaliw iran disipulo na Kristo? Tandaan tayo ya say reaksion na too ed mensahe tayo et nayarin akadepende ed no iner so binalegan to. Singa bilang, saramay nanlapud Europe et nayarin duma so reaksion da ed saramay nanlapud Asia. Akin? Diad Europe, dakel so totoon walay amta ra ed Biblia tan pamilyar ira ed ideya ya pinalsa na Dios so amin a bengatla. Balet diad Asia, kaslakan a totoo et daiset odino anggapo so amta ra ed Biblia, tan nayarin ag-ira manisia ya walay Manamalsa. Say gagala na sayan artikulo et pian tulongan itayon sabien so puso na amin ya nakakatongtong tayo ed ministeryo, inerman so nanlapuan da odino antokaman so papanisiaan da.

4. Akin et walay rason tayon mansiansian positibo?

⁴ Mansiansian Positibo. Kada taon, wala ray totoon aliwan relihyoso ya magmamaliw a Tasi nen Jehova. Dakel ed sikara et dati lan walaan na atagey ya estandarte ed moral tan dismayado ed pansimpisimpitan ya nagagawa ed saray relihyon. Say arum balet et datin abeba so moral ya estandarte ra tan dakel so bisyo ya kaukolan dan itunda. Diad tulong nen Jehova, makaseguro tayo ya naromog tayo iramay “walaan na dugan kipapasen na puso parad bilay ya andi-anggaan.”​—Gawa 13:48; 1 Tim. 2:3, 4.

5. Antoy mabetbet a rason no akin ya ondedengel iray totoo ed mensahe tayo?

⁵ Ipanengneng so Kaabigan tan Magmaliw a Mataktika. Mabetbet ya ondedengel iray totoo ed mensahe tayo, aliwan lapud no antoy ibabaga tayo, noagta lapud paraan na pangibabaga tayo. Mas labay day mitongtong no ipanengneng tayoy kaabigan tan personal ya interes ed sikara, tan no mataktika tayo. Agtayo ra pipiliten ya ondengel ed ibabaga tayo. Imbes, tatalosan tayoy nalilikna ra nipaakar ed relihyon. Singa bilang, wala ray totoon agda labay a pantongtongan so relihyon no say katongtong da et agda kabat. Parad arum, aliwan marespeto so pantepet ed sakey a too no antoy opinyon to nipaakar ed Dios. Saray arum et nababaingan no wala ray makanengneng ed sikaran manbabasa na Biblia, lalo la no kaibay sakey a Tasi nen Jehova. Antokaman so panmoria da, kaukolan tayon talosan so nalilikna ra.​—2 Tim. 2:24, paimanod leksab.

6. Panon ya impanengneng nen apostol Pablo ya amta ton itukoy so pitotongtong to, tan panon tayon naalig?

⁶ Antoy gawaen tayo no say too et mapatnag ya agto labay ya narengel iray salitan singa say “Biblia,” “impamalsa,” “Dios,” odino “relihyon”? Sarag tayon aligen si apostol Pablo tan itukoy tayoy pitongtong tayo ed sikato. Nen katongtong nen Pablo iray Judio, akikatunongan ed sikara ya inusar toy Kasulatan. Balet, nen katongtong to iray Griegon pilosopo diad Areopago, agto binitla ya saray ibabaga to et nanlapud Kasulatan. (Gawa 17:2, 3, 22-31) Panon tayon naalig si Pablo? No walay nakatongtong mo ya agmanisia ed Biblia, ompan mas maabig no agmo ni itan bibitlaen diad pitongtong mod sikato. No nalikas mo ya say sakey ya too et agto labay ya nanengneng na arum ya babasaen toy Biblia ya kaibam, salim ya ipanengneng ed sikato iray teksto ed paraan ya agnaimano na arum, singa diad gadyet.

7. Panon tayon naalig so alimbawa nen Pablo a singa nabasa ed 1 Corinto 9:20-23?

⁷ Talosan tan Dengelen Ira. Nepeg tayon talosan so liknaan tan kanonotan na saray nakakatongtong tayo. (Pro. 20:5) Imanoen lamet so alimbawa nen Pablo. Sikatoy binmaleg ed komunidad na saray Judio. Kanian nen pinulongan to iray aliwan Judio, seguradon kaukolan ton iyadapta so panagpulong to lapud daiset odino anggapo so amta ra ed si Jehova tan ed Kasulatan. Pian naalig tayoy Pablo, ompan kaukolan tayoy man-research odino tepetan tayo ray eksperiensyadon agagi ed kongregasyon pian mas natalosan tayo iray totoo diad teritorya tayo.​—Basaen so 1 Corinto 9:20-23.

8. Antoy sakey a paraan ya nigapo tayoy tongtongan nipaakar ed Biblia?

 ⁸ Say gagala tayo et pian anapen iray “makanepegan.” (Mat. 10:11) Pian magmaliw tayon epektibo, kaukolan tayon tepetan iray totoo no antoy opinyon da tan dengelen tayo ran maong. Walay sakey a brother diad England ya tetepetan to ray totoo pian naamtaan toy opinyon da nipaakar ed no antoy gawaen na sanasawa pian magmaliw iran maliket, no panon so pamabaleg na ananak, odino no panon ya nasarag so ag-inkahustisya. Kayari ton dengelen iray komento da, ibaga to, “Antoy nibagam ed sayan simbawa ya insulat manga 2,000 taon lay apalabas?” Insan ipanengneng to ed cellphone to iray pinili ton teksto, tan agto la bitlaen so salita ya “Biblia.”

9. Panon tayon natulongan iray totoo ya agda labay ya pantongtongan so nipaakar ed Dios?

⁹ Pian nasabi tayo so puso na saray totoon agda labay ya pantongtongan so nipaakar ed Dios, say itongtong tayod sikara et saray paninteresan da. Singa bilang, dakel so mandinayew ed kalikasan. Kanian nayarin oniay ibaga tayo: “Seguro antam la ya dakel ya imbension na saray sientista so inalig da ed saray walad kalikasan. Singa bilang, saray managdesinyo na mikropono et aaralen day layag, tan saray managdesinyo na kamera et aaralen day mata. Antoy nibagam ey? Kasin say kalikasan et basta labat linmesa, walay nanggawa ed satan, odino wala ni arum ya naisip mo?” Dengel mon maong so ibaga to insan nayarin oniay iyarum mo: “No makakaaral iray sientista ed desinyo na layag tan mata, ompan isipen tayo no siopa kasin talaga so pakakaaralan da. Makapainteres iyay imbaga na sakey a managsulat nensaman: ‘Samay nanggawa na layag, agkasi makarengel? Samay nanggawa na mata, agkasi makanengneng? . . . Sikato so mangiiter na kakabatan ed totoo!’ Wala ray sientista ya mipakna ed saya tan manisia ra ya walay amalsa.” (Sal. 94:9, 10) Insan sarag tayon ipanengneng so sakey ya video odino artikulo ed serye ya “Saray Papanisiaan ed Nanlapuan na Bilay” diad jw.org^®. (Onlad BANGAT NA BIBLIA > SCIENCE TAN BIBLIA.) Odino sarag tayon ikdan na brosyur ya Pinalsa Kasi Bilay? odino say brosyur ya The Origin of Life​—Five Questions Worth Asking.

10. Panon tayon igapo so tongtongan ed sakey ya agto labay ya pantongtongan so nipaakar ed Dios?

¹⁰ Labay na dakel a totoo so nawalaan na maong ya arapen. Balet dakel met so natatakot ya ompan naderal so mundo odino onsabi panaon ya agla napanayaman. Imbaga na sakey a ombiabiahen manangasikaso ed Norway ya saray totoon agda labay ya pantongtongan so nipaakar ed Dios et mas labay dan pantongtongan so  kipapasen na mundo. Kayari ton ibano so too, oniay ibaga to: “Parad sika, wala kasi maong ya arapen parad totoo? Kasin niiter itan na saray politiko, sientista, odino wala ni arum ya naisip mo?” Kayari ton dengelen ya maong so ibaga ra, ibasa odino bitlaen to so sakey a teksto ya nipaakar ed maong ya arapen. Wala ray totoon nainteresan ed sipan na Biblia ya say dalin et mansiansia ya anggad angga tan ditan manbilay ya andi-anggaan iray maong ya totoo.​—Sal. 37:29; Ecl. 1:4.

11. Akin et maabig no mangusar tayo na nanduruman paraan ed pangigapo na tongtongan, tan panon tayon naalig so alimbawa nen Pablo ya nabasa ed Roma 1:14-16?

¹¹ Maabig no mangusar tayoy nanduruman paraan ed pangigapo na tongtongan. Akin? Lapud nanduruma iray totoon nakakatongtong tayo. Say makapainteres ed sakey et nayarin aglabay ya pantongtongan na sananey. Wala ray totoo ya ayos labat ed sikara ya pantongtongan so nipaakar ed Dios odino Biblia, balet say arum et ondengel no aliwan satan ya tampol so pantongtongan tayo. Antokaman so situasyon, nepeg tayon gawaen so anggaay nayarian tayon katongtongen so amin a klase na totoo. (Basaen so Roma 1:14-16.) Balet siempre, nepeg tayon tandaan ya si Jehova so mamapabaleg ed katuaan ya nitanem ed puso na saray totoo ya mangaaro ed inkatunong.​—1 Cor. 3:6, 7.

12. Antoy sarag tayon gawaen pian natulongan tayo ray totoon nanlapud Asia ya agda ni apannonotan ya maong no kasin walay Manamalsa?

¹² Diad interon mundo, dakel ya manangipalapag so makakapitongtong ed saray totoo ya nanlapud Asia, kaiba la ray nanlapud bansa ya lilimitaan na gobierno iray aktibidad na relihyon. Diad dakel ya bansa ed Asia, amayamay so totoo ya agda ni apannonotan ya maong no kasin walay Manamalsa. Say arum et mangawat na panangiyaral na Biblia lapud labay dan naamtaan no antoy wadtan, balet say arum et manaalangan ni diad gapo. Antoy nagawaan tayo pian natulongan tayo ra? Wala ray eksperiensyadon manangipalapag ya apaneknekan da ya mas maabig no igapo day tongtongan ya aliwan masyadon pormal tan no ipanengneng day personal ya interes. Insan no matukoy et istoryaen da no panon ya nagmaliw a mas maliket so bilay da nen inyaplika da iray espisipikon prinsipyo na Biblia.

13. Antoy makatulong pian magmaliw ya interesado ed Biblia iray totoo? (Nengnengen so litrato ed apis.)

¹³ Dakel so nagmaliw ya interesado ed Biblia lapud saray praktikal ya karunongan ya wadtan. (Ecl. 7:12) Diad New York, oniay imbaga na sister ya manpupulong ed saray totoon mansasalita na Chinese: “Ipapanengneng koy personal ya interes ed sikara tan dedengelen ko ra. No naamtaan ko ya kakkasabi da manlapud arum ya bansa, tetepetan ko ra: ‘Kumustay inyalis mo dia? Akalmo ka lay trabaho? Kumustay trato ed sika na saray totoo dia ey?’” No maminsan et makatulong itan pian nigapo toy tongtongan nipaakar ed sakey a bangat na Biblia. No matukoy, oniay iyarum na sister: “Anto kasi makatulong pian maong so relasyon tayod arum? Walay labay kon ipanengneng ed sika ya simbawa ya nanlapud Biblia. Say kuan to: ‘Say pangigapo na kolkolan et singa pangilulukas ed puerta na danum; antis nin ompetang so sangsangan, taynan ka la.’ Makatulong kasi iyan simbawa?” (Pro. 17:14) Diad ontan iran pitotongtong et naamtaan tayo no siopa ray totoo ya interesado.

14. Panon ya tutulongan na sakey a brother ed Asia iray totoo ya agmanisia ed Dios?

¹⁴ Antoy sarag tayon ibaga ed saray totoo ya agmanisia ed Dios? Oniay imbaga na sakey ya brother ya dakel lay eksperiensya to ed panagpulong ed saray aliwan relihyoson totoo diad Asia: “Kaslakan, no ibaga na too ya, ‘Agak manisia ed Dios,’ say labay ton ibaga et sikatoy agmanisia ed saray dirios ya dadayewen na totoo ed lugar da. Kanian onabobon ak ya maslak ed  saray dirios et ginawa labat na too tan aliwa ran tua. Mabetbet ya ibabasak so Jeremias 16:20: ‘Makapanggawa kasi so sakey a too na dirios to? Aliwan tuan dirios so gagawaen to.’ Insan ko itepet: ‘Panon tayo sirin ya nibiig so tua ya dios ed saray dirios ya ginawa labat na too?’ Dengelen kon maong so ebat to, insan ko ibasa so Isaias 41:23: ‘Ibaga yo no antoy nagawa ed arapen, pian naamtaan min dirios kayo.’ Insan ak mangiter na alimbawa no panon ya impasakbay nen Jehova so sakey ya nagawa ed arapen.”

15. Antoy naaralan tayo ed alimbawa na sakey ya brother ed East Asia?

¹⁵ Oniay imbaga na sakey ya brother ed East Asia ya gagawaen to no papawilen to iramay angipanengneng na interes: “Ipaimanok ed sikara iray karunongan ya walad Biblia, saray propesiya ed Biblia ya agawa la, tan saray ley ya mangokontrol ed uniberso. Insan ko ipanengneng no panon ya amin iratan et pakapatnagan ya walay mabilay tan marunong ya Manamalsa. No awaten na katongtong ko so posibilidad ya walay Dios, ipanengneng kod sikato no antoy ibabaga na Biblia nipaakar ed si Jehova.”

16. Base ed Hebreo 11:6, akin ya kaukolan na saray iyaaralan so nawalaan na pananisia ed Dios tan ed Biblia, tan panon tayo ran natulongan pian ombiskeg so pananisia ra?

¹⁶ Sano iyaaralan tayo iray totoo ya aliwan relihyoso, nepeg ya tuloytuloy tayo ran tulongan pian ombiskeg so pananisia ra ya walay Dios. (Basaen so Hebreo 11:6.) Tan nepeg tayo met iran tulongan pian ombiskeg so pananisia da ed Biblia. Pian nagawaan tayo itan, ompan kaukolan ya maminpiga tayon idanet so arum ya katuaan. Ompan kaukolan tayon pantongtongan iray ebidensya ya say Biblia et Salita na Dios kada no iyaralan tayo ra. Nayarin diad antikey et pantongtongan tayo iray propesiya ed Biblia ya agawa la, say inkasusto na satan no nipaakar ed science tan history, odino saray praktikal a karunongan ya wadtan.

17. Antoy epekto ed totoo no ipanengneng tayoy panangaro ed sikara?

¹⁷ Natulongan tayo ray totoo ya magmaliw a disipulo na Kristo no ipalikna tayoy panangaro ed sikara, relihyoso man ira o andi. (1 Cor. 13:1) Legan tayo ran ibabangat, say gagala tayo et pian ipanengneng ya amin tayo et inar-aro na Dios tan labay to ya aroen tayo met. Kada taon, nilibon totoo ya dati et daiset odino anggapo so interes da ed relihyon so nababautismoan lapud naaralan dan aroen so Dios. Kanian mansiansia kan positibo, tan ipanengneng moy panangaro tan personal ya interes ed amin a klase na totoo. Talosan tan dengelen ira. Tan ibangat mo ran magmaliw a disipulo na Kristo panamegley na mismon alimbawam.