1. Antoy tutukoyen tayo no bibitlaen tayo so salitan “katuaan”?

“PANON mon nalmoy katuaan?” “Kasin binmaleg ka ed katuaan?” “Panon ka lan kabayag ed katuaan?” Nayarin wala lay nantepet ed sika na ontan, odino intepet mo met la iratan ed arum. Anto so labay tayon ibaga no bibitlaen tayo so salitan “katuaan”? Ontutukoy itan ed saray papanisiaan tayo, say panagdayew tayo ed Dios, tan say kabibilay tayo bilang Kristiano. Saray totoo ya walad “katuaan” et amta ra no anto so ibabangat na Biblia, tan iyaaplika da ed bilay da iratan. Kanian nibulos la ra ed saray katilaan ya ibabangat na palson relihyon tan malikeliket ira anggano aliwa ran perpekto.​—Juan 8:32.

2. Base ed Juan 13:34, 35, antoy nayarin makasagyat ed sakey pian aralen so katuaan?

² Antoy akasagyat ed sika ya aralen so katuaan? Ompan say maabig ya ugali na saray Tasi nen Jehova. (1 Ped. 2:12) Odino aliknam ya mismo so panangaro da. Ontan so alikna na arum nen first time day akiaral. Atan so mas atandaan da nen samay paliwawa ya nadngel da. Agla itan makapakelaw ta imbaga nen Jesus ya naamtaan na saray totoo no siopa ray disipulo to diad panangaro da ed sakey tan sakey. (Basaen so Juan 13:34, 35.) Balet aliwan satan labat so kaukolan pian ombiskeg so pananisia tayo.

3. Antoy nayarin nagawa ed pananisia tayo ed Dios no akabase labat itan ed panangaro na saray agagi?

³ Say pananisia tayo et aglabat komon akabase ed panangaro na saray agagi. Akin? On ta panon to no walay elder odino payunir ya akagawa na seryoson kasalanan? Odino walay agi ya akasakit ed liknaan mo? Odino nagmaliw ya apostata so sakey ya agi, ya ibabaga ton aliwan tua so papanisiaan tayo? No  walay ontan ya nagawa, kasin nagapol ka tan ontunda ka lan manlingkor ed si Jehova? Nia so punto: No labay mo ya ombiskeg so pananisiam ed Dios, nepeg ya akabase itan ed relasyon mo ed si Jehova, aliwan base labat ed balibalin ugali na arum ya too. Ta no akabase labat so pananisiam ed gagawaen na arum ya too, aliwan matibay so pundasyon na pananisiam. Di ba no manpaalagey kay abung mo, agmo labay so mangusar na lupok iran materyales. Ontan met ed pananisia. Aliwa itan ya matibay no akabase labat ed liknaan tan emosyon. Pian malet so pundasyon na pananisiam, kaukolan mon aralen no anton talagay ibabangat na Biblia. Nepeg ya kombinsido ka ya say nanaaralan mo nipaakar ed si Jehova et tua.​—Roma 12:2.

4. Base ed Mateo 13:3-6, 20, 21, antoy agawa ed pananisia na arum nen asubok ira?

⁴ Imbaga nen Jesus ya wala ray “maliket ya angawat” ed katuaan, balet nen asubok ira et kinmapuy so pananisia ra. (Basaen so Mateo 13:3-6, 20, 21.) Ompan agda atalosan ya no magmaliw kan patumbok nen Jesus et walan walay dalanen mon subok tan problema. (Mat. 16:24) Odino ompan say amta ra et puro labat liket tan bendisyon so bilay na sakey ya Kristiano. Balet lapud manbibilay itayo ed sayan mauges ya mundo, walan wala ray subok. Tan wala ray ag-iilaloan ya nagawa, kanian no maminsan et naandi so liket tayo.​—Sal. 6:6; Ecl. 9:11.

5. Panon ya papaneknekan na dakel ya agagi tayo ya kombinsido ra ed katuaan?

⁵ Papaneknekan na dakel ya agagi tayo a kombinsido ra ed katuaan. Akin ya ontan so nibaga tayo? Lapud agkinmapuy so pananisia ra anggano walay agi ya akasakit ed liknaan da odino akagawa na seryoson kasalanan. (Sal. 119:165) No diman ira nasusubok, diman met ombibiskeg so pananisia ra. (Sant. 1:2-4) Antoy gawaen mo pian magmaliw ya ontan kabiskeg so pananisiam?

6. Anto so pundasyon na pananisia na saray disipulo nen inmunan siglo?

⁶ Say pundasyon na pananisia na saray disipulo nen inmunan siglo et akabase ed katuaan ya walad Kasulatan tan ed saray bangat nen Jesu-Kristo. Diad Biblia et tinawag itan ya “katuaan na maong a balita.” (Gal. 2:5) Kaiba ed sayan katuaan so amin ya papanisiaan na saray Kristiano, pati say bangat nipaakar ed dondon bagat nen Jesus tan say inkioli to. Kombinsido si apostol Pablo ya tua iratan ya bangat. Akin? Lapud pinaneknekan tod “panamegley na saray sulsulat a say Kristo et kaukolan a manirap tan onoli manlapud inaatey.” (Gawa 17:2, 3) Sineguro na saray disipulo nen inmunan siglo ya saratan a bangat et akabase diad Kasulatan. Antoy resulta? Anisiaan da iratan ya bangat tan lanang iran nampaigiya ed masanton espiritu pian natalosan da so Kasulatan. (Gawa 17:11, 12; Heb. 5:14) Say pananisia ra et aglabat akabase ed liknaan tan emosyon, tan manlilingkor ira ed si Jehova aliwa labat ya lapud malikeliket iran nakaiba iray kapara dan kristiano. Say pundasyon na pananisia ra et say ‘suston kakabatan nipaakar ed Dios.’​—Col. 1:9, 10.

7. Antoy resulta no mabiskeg so pananisiam ed saray katuaan ya walad Biblia?

⁷ Say katuaan ya walad Salita na Dios et mansiansia ya anggad angga, kanian agla nauman no anto so akasulat ditan. (Sal. 119:160) Ag-itan nauman anggano walay agi ya makasakit ed liknaan tayo odino makagaway seryoson kasalanan. Tan agmet itan nauman anggano nipaarap tayo ed saray subok. No labay tayo sirin ya matibay so pundasyon na pananisia tayo, kaukolan ya kabisado tayo iray  ibabangat na Biblia tan kombinsido tayo ya tua iratan. Bilang resulta, mansiansian mabiskeg so pananisia tayo anggano wala ray subok. Singa itayo baloto ya mabiskeg so angkla to, kanian agniyanor-anor anggano maksil so bagyo. Antoy gawaen mo pian segurado ka ya tua iray papanisiaan mo?

8. Base ed 2 Timoteo 3:14, 15, antoy akatulong ed si Timoteo pian magmaliw ya kombinsido ed katuaan?

⁸ Si Timoteo et kombinsido ya tua iray papanisiaan to. Antoy akatulong ed sikato? (Basaen so 2 Timoteo 3:14, 15.) Manlapud inkaugaw to et imbangat lad sikato nen nanay to tan bai to iray “masanton sulat.” Balet segurado tayo ya inaral ton mismo iratan. Kanian sikatoy ‘atangguyor ya manisia’ ya katuaan so karga na saratan. Agnambayag et apulongan na saray Kristiano si Timoteo, nanay to, tan bai to. Seguradon panbiliban nen Timoteo so panaaroan na saray patumbok nen Jesus, tan labalabay ton nakaiba tan natulongan iray agagi. (Fil. 2:19, 20) Balet say pananisia to et aglabat akabase ed liknaan to parad saray agagi, noagta akabase itan ed saray katuaan ya naaralan to nipaakar ed si Jehova. Ontan met so dapat mon gawaen. Aral mon mismo so Biblia pian magmaliw kan kombinsido ya tua so ibabangat na satan nipaakar ed si Jehova.

9. Anton talora ya manunan bangat na Biblia so kaukolan mon aralen pian magmaliw kan kombinsido ed katuaan?

⁹ Kaukolan ya kombinsido ka ed talora ya manunan bangat na Biblia. Unona, kaukolan ya kombinsido ka ya si Jehova a Dios so Amalsa ed amin ya bengatla. (Exo. 3:14, 15; Heb. 3:4; Apo. 4:11) Komadua, nepeg ya antam so rason no akin ya manisia ka ya say Biblia et nanlapu ed Dios. (2 Tim. 3:16, 17) Tan komatlo, nepeg ya malinew ed sika ya walay organisadon grupo ya mandadayew ed si Jehova ya idadaulo nen Kristo, tan satan ya grupo et Saray Tasi nen Jehova. (Isa. 43:10-12; Juan 14:6; Gawa 15:14) Agmo kaukolan ya kabisadoen so amin ya karga na Biblia pian napaneknekan mo ya tua iratan ya bangat. Basta usar mo so ‘pakayarim ya mankatunongan’ pian napaneknekan mo no anton talagay tua.​—Roma 12:1.

10. Anto ni nepeg tayon gawaen no kombinsido tayo lad katuaan?

¹⁰ No talagan kombinsido ka la ya say Dios so Amalsa, say Biblia et nanlapu ed Dios, tan walay organisasyon na Dios diad dalin, aral mo no panon mon usaren so Biblia pian nibangat mo iratan ya katuaan ed arum. Akin? Lapud disipulo itayo nen Jesus tan responsabilidad tayon ibangat irayan katuaan ed saramay ondengel ed sikatayo. * (1 Tim. 4:16) Tan legan tayon tutulongan so arum pian magmaliw met iran kombinsido ed saray katuaan ed Biblia, ombibiskeg met so pananisia tayo.

11. Antoy naaralan tayo ed si apostol Pablo diad impanbangat to?

¹¹ Pian natangguyor nen apostol Pablo iray totoo ya manisia ed si Jesus, imbangat to ra “base ed Ganggan nen Moises tan ed saray Propeta.” (Gawa 28:23) Panon tayon naalig si Pablo no ibabangat tayod arum so katuaan? Agtayo labat basta ipapaamta ed sikara iray bangat na Biblia. Tulongan tayo ray iyaaralan tayo ya aralen dan mismo iray ibabangat na Biblia pian nawalaan iray personal ya relasyon ed si Jehova. Say labay tayo et awaten da so katuaan aliwan lapud manbilib ira ed sikatayo, noagta lapud kombinsido ira ya talagan tua so nanaaralan da nipaakar ed si Aman Jehova.

12-13. Antoy gawaen na atateng pian mansiansia ed katuaan iray ananak da?

¹² Atateng, seguradon labay yo ya mansiansia ed katuaan iray ananak yo. Ompan isipen yo ya no walaan ira na maong a kakaaro ed kongregasyon et ombiskeg met lay pananisia ra. Pero aliwan atan labat so nakaukolan pian magmaliw iran kombinsido ed katuaan. Importantin nawalaan ira na personal ya relasyon ed Dios tan seguroen da ya tua iray ibabangat na Biblia.

¹³ Pian ontan so gawaen na ananak, nepeg ya mangipanengneng na maong ya alimbawa iray atateng. Dapat nanengneng na ananak da ya makuli ran manaral na Biblia tan dadalepdepen da iray nanaaralan da pian ontan met so gawaen na ananak da. Importante ya ibangat da ray ananak da no panon so pan-research legan na personal ya panag-aral da na Biblia, ya singa ibabangat da ed arum ya iyaaralan da. Bilang resulta, naaralan na ananak da ya aroen si Jehova tan manmatalek ira ed “matoor tan makabat ya aripen” ya uusaren to pian nitarya iray espiritual ya naakan. (Mat. 24:45-47) Atateng, aliwa labat ya saray manunan bangat na Biblia so ibangat yod saray ananak yo. Ibangat yo met ed sikara iray “aralem a bengatlan nipaakar ed Dios”  ya dugaruga ed edad tan abilidad da pian ombiskeg so pananisia ra.​—1 Cor. 2:10.

14. Akin et nepeg tayon aralen iray propesiya ed Biblia? (Nengnengen met so kahon ya “ Kasin Nipaliwawam Irayan Propesiya?”)

¹⁴ Ombiskeg so pananisia tayo ed si Jehova no aralen tayo iray propesiya ed Biblia. Anto ran propesiya so amabiskeg ed pananisiam? Ompan apabiskeg ka ed pakakasumpal na saray propesiya nipaakar ed “kaunoran iran agew.” (2 Tim. 3:1-5; Mat. 24:3, 7) Balet anto ni ran propesiya ed Biblia ya asumpal la so mamabiskeg ed pananisiam? Singa bilang, kasin nipaliwawam no panon ya asumpal tan tuloytuloy ya nasusumpal iray propesiya ya walad Daniel kapitulo 2 odino Daniel kapitulo 11? * No say pundasyon na pananisiam et akabase ed Biblia, ag-itan onkapuy. Singa bilang, isip mo pay alimbawa na saray agagi ya apairap diad Germany nen World War II. Anggano agda ni masyadon natatalosan iray propesiya ed Biblia nipaakar ed kaunoran iran agew, talagan mabiskeg so pananisia ra ed Salita na Dios.

15-17. Akin ya asungdoan na saray agagi tayo so impamairap ed sikara na gobierno na Nazi?

¹⁵ Nen manuuley so gobierno na Nazi ed Germany, nilibon agagi tayo so inyakar ed panamairapan iran kampo. Kabkabusol nen Hitler tan say atagey ya opisyal ya si Heinrich Himmler iray Tasi nen Jehova. Inistorya na sakey a sister ya oniay imbaga nen Himmler ed sakey ya grupo na saray sister diad panamairapan ya kampo: “No diad tawen et satay Jehova yo so manuuley, diad dalin et sikami so manuley! Nengnengen no siopay matibay ed sikatayo!” Antoy akatulong ed saray lingkor nen Jehova pian mansiansia ran matoor?

¹⁶ Amta na sarayan Estudyante na Biblia ya ginmapo lan manuley so Panarian na Dios nen 1914. Kanian agla ra abigla ed graben impamairap  na gobierno ed sikara. Tan kombinsido ira ya anggapoy gobierno na too ya makapatunda ed pakasumpal na gagala na Dios. Amta ra ya agbalot napatunda nen Hitler so dugan panagdayew tan agmakakiking so gobierno to ed Panarian na Dios. Segurado iray agagi tayo ya ombagsak lanlamang so gobierno nen Hitler.

¹⁷ Ag-alingo iraman ya agagi tayo. Agnambayag et binmagsak lanlamang so uley na Nazi, tan si Heinrich Himmler et nanamot-amot anta sikato may angibagan “diad dalin et sikami so manuley.” Legan ya ontatakas et akapannengneng ira nen Brother Lübke, a sakey ya datin priso kanian abidbir to. Amta nen Himmler ya anggapo lay kalaban-laban to kanian tinepetan toy Brother Lübke: “Estudyante na Biblia, anto lay onsublay ya nagawa ey?” Imbaga nen Brother Lübke ed si Himmler ya diad gapo ni labat et amta la na saray Tasi nen Jehova ya nibulos ira lanlamang ta segurado ra ya ombagsak so uley na Nazi. No nensaman et mamaong si Himmler, natan et ag-akasel. Ag-abayag et nambikkel si Himmler. Antoy idadanet na saya? No aralen tayo so Biblia, pati saray propesiya ya wadtan, ombiskeg so pananisia tayo ed Dios tan nasungdoan tayo so anggan anton subok.​—2 Ped. 1:19-21.

18. Base ed Juan 6:67, 68, akin et nepeg tayon nawalaan na “suston kakabatan tan aralem a pakatebek”?

¹⁸ Nepeg tayon aroen so sakey tan sakey pian naamtaan na saray totoo ya sikatayo so tuan Kristiano. Balet kaukolan tayo met so nawalaan na “suston kakabatan tan aralem a pakatebek.” (Fil. 1:9) Ta no andi et matmainomay itayon napalikdo na “saray palson bangat na totoo,” ya singa saray apostata. (Efe. 4:14) Nen tinaynan na dakel ya disipulo si Jesus, agnampaimpluensya si apostol Pedro lapud amta to ya walad si Jesus “iray salita a mangitonton ed bilay ya andi-anggaan.” (Basaen so Juan 6:67, 68.) Anggano agni natatalosan nen Pedro so kabaliksan na amin ya imbangat nen Jesus, sikatoy nansiansian matoor lapud sikatoy kombinsido ya si Jesus so Kristo. Nepeg ya kombinsido ka met ya tua iray ibabangat na Biblia. Bilang resulta, mansiansian mabiskeg so pananisiam anggan antoy nagawa, tan natulongan mo met so arum ya ombiskeg so pananisia ra.​—2 Juan 1, 2.