1. Singa nabasa ed 3 Juan 3, 4, antoy panliliketan tayo?

SEGURADON malikeliket si apostol Juan nen abalitaan to ya matoor ya manlilingkor ed si Jehova iramay atulongan to ya makaamta ed katuaan. Amta to ya amayamay so problema ra kanian ginawa toy anggaay nayarian to ya pabiskegen so pananisia ra, ta inturing to la ran singa ananak to. Ontan met natan. Malikeliket tayo no saramay ituturing tayon ananak tayo ed espiritual odino saray mismon ananak tayo et idedika day sarili da ed si Jehova tan matoor iran manlingkor ed sikato.​—Basaen so 3 Juan 3, 4.

2. Akin et sinulatan nen Juan iray Kristiano?

² Nen 98 C.E., nayarin walad Efeso si Juan odino diad lugar ya asingger ditan. Ompan ditan la so nanayaman to manlapu la nen nibulos ed impakapriso to diad isla na Patmos. Diad satan a panaon, inusar nen Jehova so masanton espiritu to pian igiya si Juan ya manggawa na taloran sulat. Sinulatan to iray matoor ya Kristiano pian mansiansian mabiskeg so pananisia ra ed si Jesus tan mantultuloy iran manakar ed katuaan.

3. Anto ran tepet so ebatan tayo?

³ Si Juan labat lay mabilay ya apostol ed saman, tan aburidon maong lapud wala ray palson managbangat ya akaloob ed saray kongregasyon. * (1 Juan 2:18, 19, 26) Ibabaga na saraman ya apostata ya kabat da so Dios balet agda uunoren iray ganggan nen Jehova. Aralen tayo iray bilin nen Juan ed saray Kristiano tan legan tayon aaralen iratan, ebatan tayo irayan taloran tepet: Antoy labay ya ibaga na panakar ed katuaan? Anto ray  makaamper ed sikatayo diad panaakar tayo ed katuaan? Tan panon tayon natulongan so sakey tan sakey pian makapantultuloy tayon manakar ed katuaan?

4. Base ed 1 Juan 2:3-6 tan 2 Juan 4, 6, anto ray kaukolan tayon gawaen pian makapanakar tayo ed katuaan?

⁴ Pian makapanakar tayo ed katuaan, kaukolan tayon amtaen iray katuaan ya walad Biblia, tan kaukolan tayon ‘unoren iray ganggan nen Jehova.’ (Basaen so 1 Juan 2:3-6; 2 Juan 4, 6.) Say sankaabigan ya alimbawa ed saya et si Jesus. Kanian no labay tayon unoren si Jehova, aligen tayoy alimbawa nen Jesus.​—Juan 8:29; 1 Ped. 2:21.

5. Nepeg ya kombinsido tayo ed anto ran katuaan?

⁵ Pian tuloytuloy tayon makapanakar ed katuaan, nepeg ya kombinsido tayo ya si Jehova so panlalapuan na katuaan tan amin ya impaisulat to diad Biblia et tua. Nepeg met ya kombinsido tayon si Jesus so insipan ya Mesias. Dakel natan so agmanisia ya si Jesus so Ari ed Panarian na Dios. Impasakbay la nen Juan ya ‘onlesa so dakel ya managpalikdo’ ya mangibalang ed saramay agkombinsido ed katuaan nipaakar ed si Jehova tan Jesus. (2 Juan 7-11) Insulat nen Juan: “Siopa so matila noag samay mangibuburi a si Jesus et Kristo?” (1 Juan 2:22) Kanian no agtayo labay so naloko odino napalikdo, nepeg ya aralen tayon maong so Salita na Dios. No ontan so gawaen tayo, talagan nakabkabat tayoy Jehova tan Jesus. (Juan 17:3) Tan ditan tayo labat magmaliw ya kombinsido ya saray papanisiaan tayo et tua.

6. Antoy sakey ya makaamper ed saray kabataan ya Tasi diad panaakar da ed katuaan?

⁶ Importantin manalwar tayo pian ag-itayo nibalang na saray bangat na totoo. (1 Juan 2:26) Nagkalalo lan kaukolan ya manalwar iray kabataan ya Tasi. Oniay imbaga nen Alexia, * sakey a sister ya taga France ya mantaon na 25: “Nen medyo ugaw ak ni, naguguloan ak ed saray ibabangat dad eskuelaan, singa say teorya na ebolusyon tan arum nin bangat na totoo. No maminsan, singa nakokombinse ak met lan manisia ed saratan. Pero naisip ko ya agko dapat dengelen so amin ya ibabangat dad eskuelaan. Si Jehova so kaukolan kon dengelen.” Kanian inaral nen Alexia imay libron Life​—How  Did It Get Here? By Evolution or by Creation? Kalabas labat na pigaran simba, amta la nen Alexia no anto so tua. Imbaga to: “Apaneknekan kon mismo ya say ibabaga na Biblia so tua. Tan naisip ko ya no unoren ko ray akasulat ditan, magmaliw ya mareen so nonot ko tan maliket ak.”

7. Antoy nepeg tayon panalwaran, tan akin?

⁷ Amin tayo, ugaw man odino matatken, et nepeg tayoy manalwar, ta ompan ibaga tayon manlilingkor tayod si Jehova balet pasekreto itayon manggagaway mauges. Imbaga nen Juan ya agtayo nayarin pambansagen so panakar ed katuaan tan panggaway imoral. (1 Juan 1:6) No labay tayon napaliket si Jehova, nepeg tayon tandaan ya nanenengneng to so amin ya gagawaen tayo. Kanian anggapoy niyamot tayod sikato ya kasalanan.​—Heb. 4:13.

8. Antoy agtayo nepeg ya panisiaan?

⁸ Agtayo panisiaan so ibabaga na totoo ya gawam labat no antoy labay mo anggano ibabaga na Dios ya kasalanan itan. Insulat nen apostol Juan: “No ibaga tayon, ‘Anggapoy kasalanan tayo,’ papalikdoen tayoy sarili tayo.” (1 Juan 1:8) Nen panaon nen Juan, ibabaga na saray apostata ya anggano manggagawa kay kasalanan et inaro ka nin siansia na Dios. Ontan met so katunongan na totoo natan. Ibabaga ra ya manisia ira ed Dios, balet agda uunoren so ganggan nen Jehova, lalo la no nipaakar ed sex. Wala ray seksual a kagagawa ya isesebel nen Jehova ta kasalanan iratan. Balet ibabaga na totoo ya personal ya desisyon itan tan anggapo kunoy uges to basta maliket ka.

9. Antoy maong ya resulta no unoren na saray kabataan so ibabaga na Biblia?

⁹ Nayarin nairapan iray kabataan ya Tasi ya gawaen so duga ta maksil so impluensya na saray katrabaho odino saray kaklase da ya imoral so kabibilay da. Ontan so agawad si Aleksandar. Oniay imbaga to: “Wala ray bibii diad eskuelaan mi ya pipiliten da ak ya mi-sex ed  sikara. Bakla ak kuno ta anggapoy girlfriend ko.” Posiblin nagawa met itan ed sika. Balet tandaan mo ya no unoren moy ibabaga na Biblia, agnaandi so respetom ed sarilim, agka naalisan na sakit, agka nakonsiensia, tan agnaderal so relasyon mod si Jehova. Tan kada no nalabanan mo so sakey a tukso, mas mainomay mo lan gawaen no antoy duga. Tandaan mo met ya say katunongan na totoo nipaakar ed sex et nanlapud si Satanas. Kanian no agka manpaimpluensya ed sikara, ‘nadaeg mo imay mauges.’—1 Juan 2:14.

10. Base ed 1 Juan 1:9, akin ya posiblin makapantultuloy tayon manlingkor ed si Jehova anggano nankasalanan tayo?

¹⁰ Bibirbiren tayo ya si Jehova so makanepegan ya mangibaga no anton kagagawa so kasalanan, tan gagawaen tayoy anggaay nayarian tayo pian agtayo mankasalanan. Balet no bilang ta mankasalanan tayo, nepeg tayon ipatua itan ed si Jehova panamegley na pikakasi. (Basaen so 1 Juan 1:9.) Tan no makagawa tayoy ambelat a kasalanan, manpatulong tayod saray elder ta sikara so tinuro nen Jehova ya mangasikaso ed sikatayo. (Sant. 5:14-16) Balet no pinerdona itayo la nen Jehova, agtayo la nepeg ya nakonsiensia lapud saray agawaan tayon kasalanan. Akin? On ta intarya la na maaron Ama tayo so dondon bagat na Anak to pian naperdona iray kasalanan tayo. Imbaga to ya perdonaen to tayo no talagan magbabawi tayo. Kanian anggano nankasalanan tayo, posible nin siansia ya makapantultuloy tayon manlingkor ed si Jehova ya walaay malinis a konsiensia.​—1 Juan 2:1, 2, 12; 3:19, 20.

11. Antoy gawaen tayo pian ag-itayo naloko na saray apostata?

¹¹ Agtayo manpapaimpluensya ed bangat na saray apostata. Manlapu la nen ginmapo so Kristianon kongregasyon, uusaren la na Diablo iray apostata pian onkapuy so pananisia tan manduaruwa iray lingkor na Dios. Kanian no agtayo labay so naloko, kaukolan ya amta tayo  no dinan so tua tan dinan so tila. * Ompan usaren na saray apostata so Internet odino social media pian onkapuy so pananisia tayod si Jehova tan agtayo la panmatalekan iray agagi. Balet tandaan tayo ya si Satanas so walad benegan na satan, kanian arawian tayo itan!​—1 Juan 4:1, 6; Apo. 12:9.

12. Akin et kaukolan tayon pabiskegen so pananisia tayo ed saray katuaan ya naaralan tayo?

¹² Pian agnapakapuy nen Satanas so pananisia tayo, kaukolan tayon pabiskegen so panagmatalek tayod si Jesus ta sikato so uusaren na Dios pian nasumpal so gagala To. Kaukolan tayo met so manmatalek ed “matoor tan makabat ya aripen” ta satan ya grupo so uusaren nen Jehova ya mangidaulo ed organisasyon to diad dalin. (Mat. 24:45-47) Importante so regular ya panagaral na Biblia pian say pananisia tayo et singa kiew ya araldalem so lamot to. Indanet itan nen Pablo nen sinulatan to ray agagi ed Colosas. Imbaga to: “No panon ya inawat yoy Kristo Jesus a Katawan, mantultuloy kayon manakar a nikasakey ed sikato, a nilamot tan niletneg ed sikato tan mansiasiansian malet ed pananisia.” (Col. 2:6, 7) No mabiskeg so pananisia tayo, ag-itayon balot napatunda nen Satanas odino saray alipores to ed panaakar tayo ed katuaan.​—2 Juan 8, 9.

13. Antoy agtayo la pankelawan, tan akin?

¹³ Agtayo la pankelawan ya kabusol itayo na sayan mundo. (1 Juan 3:13) Imbaga nen Juan ya “say interon mundo et walad pakayari na samay mauges.” (1 Juan 5:19) Manasingger lay anggaan na sayan mundo, kanian agaylay pasnok nen Satanas. (Apo. 12:12) Wala ray taktika to ya agnaliklikas, singa say tukso ya manggaway imoral odino saray katilaan ya ikakayat na saray apostata. Balet manguusar met na arap-arapan ya panangataki. Amta nen Satanas ya antiktikey lay nakekeran panaon to kanian mamapasya pian ontunda tayo lan manpulong tan agtayo la manmatalek ed si Jehova. Agtayo la sirin pankelawan ya diad arum ya bansa et nilimitaan odino insebel na gobierno so kimey tayo. Pero saray agagi tayo ditan et tuloytuloy ya mansusungdo. Papaneknekan da ya anggan antoy gawaen nen Satanas, sarag tayoy manmatoor!

14. Antoy sakey ya paraan ya natulongan tayo ray agagi ya mansiansia ed katuaan?

¹⁴ Pian natulongan tayo ray agagi tayo ya mansiansia ed katuaan, ipatnag tayoy panangasi tan aroen tayo ra. (1 Juan 3:10, 11, 16-18) Importante ya manaaroan itayo, aliwa labat ya no maong so kipapasen, noagta nagkalalo la no walay problema. Singa bilang, wala tay kabat mon agi ya inateyan ya kaukolan toy ligliwa tan tulong? Odino kasin abalitaan mo ya wala ray agagin naapektoan na kalamidad tan kaukolan day tulong pian nipaalagey lamet so Kingdom Hall odino abung da? Say panangaro tan panangasi tayod saray agagi et aglabat angangga ed salita, noagta ipanengneng tayo ed gawa.

15. Base ed 1 Juan 4:7, 8, antoy nepeg tayon gawaen?

¹⁵ Aaligen tayoy Aman Jehova no manaaroan tayo. (Basaen so 1 Juan 4:7, 8.) Say sakey ya paraan ya nipanengneng tayoy panangaro et no manpeperdonaan tayo. Singa bilang, ompan walay agi ya asakitan toy liknaan tayo. Nipanengneng tayon inar-aro tayo no perdonaen tayo tan palabasen tayo lay lingo to, lalo la no kinmerew na perdona. (Col. 3:13) Ontan so ginawa nen Aldo sanen walay agto agustoan ya imbaga na rerespetoen ton brother nipaakar ed lahi to. Oniay imbaga nen Aldo: “Aminpigak  ya impikasi ed si Jehova ya tulongan to ak pian agak ombarong ed saman ya brother.” Balet wala ni ginawa nen Aldo. Intagar ton manpulong iman ya brother. Legan iran manpupulong, imbaga nen Aldo ed saman ya brother ya asakitan ed samay imbaga to. “Nen naamtaan to may brother ya asakitan to ak,” kuan nen Aldo, “kinmerew na perdona. Alikas kod boses to ya pagbabawian to man ya imbaga to. Kanian anggano onman so agawa, sankaaro kami nin siansia tan nilingwanan mi la iman.”

16-17. Antoy determinado tayon gawaen?

¹⁶ Talagan inar-aro nen apostol Juan iray agagi tan labay to ya mansiansian mabiskeg so espiritualidad da. Nanengneng tayoy panangaro tan panangiyansakit tod sikara diad saramay bilin to ya walad taloran sulat to. Makapaliket ta saray alanaan ya manuley a kaiba nen Kristo et maar-aro ya singa si Juan!—1 Juan 2:27.

¹⁷ Komon ta ipapuso tayo iray bilin ya apantongtongan tayo natan. Nepeg ya determinado itayon manakar ed katuaan, ya unoren tayoy Jehova ed amin ya gagawaen tayo. Aralen tayoy Salita to, tan manmatalek tayo ed satan. Pabiskegen tayoy pananisia tayo ed si Jesus. Agtayo manpapaimpluensya ed saray bangat na totoo tan saray apostata. Agtayo mankukunwari ya manlilingkor tayod si Jehova balet ta masekreto tayon manggagaway mauges. Gawaen tayoy anggaay nayarian tayon unoren so atagey ya estandarte nen Jehova ed moral. Importante met ya perdonaen tayo ray akasakit ed sikatayo tan tulongan tayo ray mankaukolan pian napabiskeg tayoy sakey tan sakey. No gawaen tayo iratan ya amin, makapantultuloy tayon manakar ed katuaan anggan anto ni subok ya onsabi.