Mapatnag ya nagmaliw ya Atagey ya Saserdote si Jesus nen sikatoy abautismoan nen 29 C.E. Panon tayon nibaga itan? Nen abautismoan si Jesus, imbagat to so bilay to diad simbolikon altar na Dios pian nasumpal so “linawa” To. (Gal. 1:4; Heb. 10:5-10) Manlapu nen abautismoan si Jesus et wala la itan ya simbolikon altar. No ontan sirin, diad satan ya panaon et wala met la so babaleg ya espiritual ya templo ya mangirerepresenta ed uksoyan parad dugan panagdayew ed si Jehova. Nagmaliw itan ya posible lapud dondon bagat nen Jesus. Say altar et importantin kabiangan na satan ya espiritual ya templo.​—Mat. 3:16, 17; Heb. 5:4-6.

No wala lay babaleg ya espiritual ya templo, kaukolan ya wala met la sirin so atagey ya saserdote. Kanian nilanaan nen Jehova si Jesus bilang atagey ya saserdote “panamegley na masanton espiritu tan pakayari.” (Gawa 10:37, 38; Mar. 1:9-11) Panon tayon amta ya aturo lay Jesus bilang Atagey ya Saserdote antis ni na impatey tan inkioli to? Naebatan tayo itan ya tepet no aralen tayo so ginawa nen Aaron tan saray tinmutumbok ed sikato ya atagey ya saserdote.

Base ed Mosaikon Ganggan, say atagey ya saserdote labat so makaloob ed Sankasantosan na tabernakulo, tan diad inlabas na panaon et Sankasantosan na templo. Kurtina so dibisyon na Sankasantosan tan say Masanto. Dia labat ed Agew na Pananakbong so idalan na atagey ya saserdote ed satan ya kurtina. (Heb. 9:1-3, 6, 7) Si Aaron tan saray tinmutumbok ed sikato et alanaan la bilang atagey ya saserdote antis ni ran makadalan ed satan ya kurtina. No ontan sirin, si Jesus et tinuro la nen Jehova bilang Atagey ya Saserdote na babaleg ya templo antis ni na impatey to, kanian sarag to lay ‘onlabas ed kurtina’ tan makapawil ed tawen. (Heb. 10:20) Atan so rason no akin ya imbaga nen Pablo ya “sanen sinmabi si Kristo bilang atagey a saserdote,” sikatoy linmoob “diad mas baleg tan mas perpekton tabernakulo ya agginawa na too,” tan ed “mismon tawen.”​—Heb. 9:11, 24.

Anggapoy pandumaan no kapigan pinaletan so balon sipanan tan no kapigan itan inmepekto. Akin? Kapawil nen Jesus ed tawen tan impresenta tod si Jehova so bili na perpekton bilay to parad sikatayo, inggapo to so proseso pian napaletan odino gawaen ya legal so balon sipanan. Lapud satan ya proseso et inmepekto met so balon sipanan. Anto ray kaiba ed satan ya proseso?

Unona, inmarap si Jesus ed si Jehova; insan, impresenta nen Jesus ed si Jehova so bili na bagat to; tan inawat nen Jehova so bili na bagat nen Jesus. Anggad agni iraya asumpal, agni onepekto so balon sipanan.

Anggapoy espisipikon nabasa ed Biblia no kapigan inawat nen Jehova so bili na bagat nen Jesus. Kanian agtayo nibaga no kapigan eksakton apaletan tan inmepekto so balon sipanan. Balet amta tayo ya pinmawil ed tawen si Jesus samploran agew antis na Pentecostes. (Gawa 1:3) Diad satan ya pigaran agew, impresenta to ed si Jehova so bili na bagat to tan inawat itan nen Jehova. (Heb. 9:12) Papaneknekan na saray agawa nen Pentecostes ya apaletan la so balon sipanan. (Gawa 2:1-4, 32, 33) Manlapu la ed saman et inmepekto la itan.

Bilang sumaryo, say balon sipanan et pinaletan tan inmepekto nen inawat nen Jehova so bili na bagat nen Jesus tan nen akisipanan si Jehova ed saray alanaan. Tan si Jesus so Manamegley na satan ya sipanan lapud sikato so Atagey ya Saserdote.​—Heb. 7:25; 8:1-3, 6; 9:13-15.