1. Anton propesiya so imbaga nen Jehova kayarin mismo na impankasalanan nen Adan tan Eva? (Genesis 3:15)

 KAYARIN mismo na impankasalanan nen Adan tan Eva, walay imbaga nen Jehova ya propesiya ya angiter na ilalo ed saray magmaliw ya ananak da. Satan ya sankaunaan ya propesiya et nabasa ed Genesis 3:15.—Basaen.

2. Akin et importantin maong imay propesiya ed Genesis 3:15?

² Nabasa iyan propesiya diad unonan libro na Biblia. Pero, amin ya libro na Biblia et konektado ed satan. No panon ya say spring et pankakasakeyen to so amin ya pahina na sakey ya notebook, samay propesiya ya nabasad Genesis 3:15 et pankokonektaen to so amin ya libro na Biblia. Saksakey so mensahe ra: Say Dios et mangibaki na Manangiliktar ya deralen toy Diablo tan amin ya alipores to. * Marakdakep itan ya ilalo parad amin ya mangaaro ed si Jehova!

3. Antoy pantongtongan tayod sayan artikulo?

³ Pantongtongan tayo ed sayan artikulo so ebat ed sarayan tepet: Siopa so isisimbolo na saramay karakter ya abitla ed Genesis 3:15? Anto la ray ginawa nen Jehova pian nasumpal iyan propesiya? Antoy epekto na sayan propesiya ed bilay mo?

4. Siopa so “uleg,” tan panon tayon amta?

⁴ Abitla ed Genesis 3:14, 15 so sakey ya “uleg,” say “ilalak” na uleg, sakey ya “bii,” tan say “ilalak” na bii. Ipapaamta lanlamang na Biblia no siopay isisimbolo na saraya. * Amtaen tayon unona no siopa may “uleg.” Aliwa itan ya literal ya uleg, ta siempre agnatalosan na literal ya uleg imay imbaga nen Jehova diad hardin na Eden. Siopa sirin so katongtong nen Jehova nen imbaga to imay propesiya? Naamtaan tayoy ebat diad Apocalipsis 12:9. Nabasa ditan ya “say sankaunaan ya uleg” et si Satanas a Diablo. Siopa balet so ilalak na uleg?

5. Siopa so ilalak na uleg?

⁵ No maminsan, uusaren na Biblia so salitan “ilalak” pian tukoyen iramay aaligen da so ugali o kagagawa na sakey, kanian singa sikato so ama ra. Say ilalak na uleg sirin et ontutukoy ed saray agmatoor ya anghel tan totoo ya aaligen day Satanas—kakalabanen day Jehova tan saray lingkor to. Kaiba ed satan iramay anghel ya pinagmaliw day sarili da ya too diad panaon nen Noe, ontan met ed saray mauges ya totoo ya say ugali da et singa ugali na Diablo, say ama ra.—Gen. 6:1, 2; Juan 8:44; 1 Juan 5:19; Jud. 6.

6. Akin ya imposiblin si Eva imay “bii”?

⁶ Say onsublay ya amtaen tayo et no siopa imay “bii.” Imposible ya si Eva iman. Akin ey? Niay sakey ya rason: Ibabaga na propesiya ya say ilalak na bii et “mekmeken” toy ulo na uleg. Singa apantongtongan tayo nen niman, say uleg et say mauges ya anghel ya si Satanas. Anggapod saray agperpekton ananak nen Eva so makasarag ya manderal o  manmekmek ed si Satanas. Siopa sirin imay bii?

7. Base ed Apocalipsis 12:1, 2, 5, 10, siopa imay bii ya abitlad Genesis 3:15?

⁷ Ipapaamta na sampot ya libro na Biblia no siopa imay bii ya abitlad Genesis 3:15. (Basaen so Apocalipsis 12:1, 2, 5, 10.) Aliwa iyan ordinaryon bii! “Say bulan et walad silong na saray sali to” tan sikatoy “akoronaan na 12 bitewen.” Sayan bii et angiyanak na nikadkaduman ugaw—say Panarian na Dios. Walad tawen so Panarian kanian seguradon wala met ed tawen iyan bii. Isisimbolo na bii so walad tawen ya kabiangan na organisasyon nen Jehova—say amin ya matoor ya anghel.—Gal. 4:26.

8. Siopa so manunan ilalak na bii, tan kapigan nagmaliw ya ilalak na bii? (Genesis 22:15-18)

⁸ Ipapaamta met na Biblia no siopa so manunan ilalak na bii. Akapropesiya ya sayan ilalak et manlapud poli o pamilya nen Abraham. (Basaen so Genesis 22:15-18.) Si Jesus et apo nen Abraham. (Luc. 3:23, 34) Pero base ed propesiya, say ilalak na bii et nepeg ya mas makapanyari nen say too lapud sikato so manderal ed si Satanas ya Diablo. Nen manga 30 so taon nen Jesus, sikatoy nilanaan na masanton espiritu na Dios. Nen alanaan si Jesus, diman nagmaliw ya manunan ilalak na bii. (Gal. 3:16) Kayari na impatey tan inkioli nen Jesus, sikatoy “kinoronaan [na Dios] na gloria tan galang” tan inter nen Jehova ed sikato so “amin a pakauley ed tawen tan diad dalin,” pati say autoridad ya “deralen . . . iray kimey na Diablo.”—Heb. 2:7; Mat. 28:18; 1 Juan 3:8.

9-10. (a) Siopa ni ray kabiangan na ilalak na bii, tan kapigan to ira nagmaliw ya ilalak? (b) Antoy onsublay ya pantongtongan tayo?

⁹ Pero, walay onkokomaduan kabiangan na ilalak na bii. Impaamta nen apostol Pablo no siopa iratan nen oniay imbaga to ed saray Judio tan aliwan Judio ya alanaan ya Kristiano: “No kayarian kayo nen Kristo, sikayoy peteg ya ilalak nen Abraham, saray tomatawir nipaakar ed sipan.” (Gal. 3:28, 29) Say sakey ya Kristiano et magmaliw ya kabiangan na ilalak na bii no sikatoy nilanaan la nen Jehova na masanton espiritu. On, say ilalak na bii et si Jesu-Kristo tan say 144,000 ya kaiba ton manuley. (Apo. 14:1) Pansasagpotan dan aligen so ugali nen Jehova, say Ama ra.

¹⁰ Natan ya amta tayo la no siopay isisimbolo na saramay karakter ya abitlad Genesis 3:15, pantongtongan tayo no anto la ray ginawa nen Jehova pian nasumpal iyan propesiya tan no antoy epekto na satan ed bilay tayo.

11. Panon ya asumpal imay propesiya ya nasugatan “ed mukor” imay ilalak na bii?

¹¹ Base ed Genesis 3:15, say uleg et sugaten to “ed mukor” so ilalak na bii. Agawa itan nen sinugsogan nen Satanas iray Judio tan saray Romano ya pateyen so Anak na Dios. (Luc. 23:13, 20-24) No say sakey et nasugat ed mukor, agni makaakar na pigaran agew. Ontan so agawad si Jesus nen sikatoy inatey ed loob na taloy agew.—Mat. 16:21.

12. Panon tan kapigan namekmek so ulo na uleg?

¹² Pian nasumpal so propesiya ed Genesis 3:15, agdapat mansiansia si Jesus ed lubok. Akin ey? On ta ibabaga met na propesiya ya mekmeken na ilalak na bii so ulo na uleg. Labay ton ibaga, onabig so sugat ed mukor na ilalak na bii. Tan talagan ontan so agawa! Kayari na taloran agew, binilay na Dios si Jesus  bilang imortal ya espiritu. Permanente lan deralen nen Jesus si Satanas diad panaon ya inyeskedyul nen Jehova. (Heb. 2:14) Kaiba nen Kristo so 144,000 ya manderal ed amin ya ilalak na uleg.—Apo. 17:14; 20:4, 10. *

13. Panon tayon minanabang ed kasumpalan na sayan propesiya?

¹³ No sakey kan dedikado ya lingkor na Dios, minanabang ka ed kasumpalan na sayan propesiya. Pian nasumpal so Genesis 3:15, imbaki nen Jehova si Jesus diad dalin. Nen wadia, inalig toy ugali tan kualidad nen Ama to. (Juan 14:9) Lapud satan, lalo tayon akabkabat tan naar-aroy Aman Jehova. Minanabang tayo met ed saray bangat nen Jesus tan ed pangidadaulo to ed saray kongregasyon natan. Imbangat to tayo no anto ray nepeg tayon gawaen pian napaliket tayoy Aman Jehova. Tan walay balbaleg ya epekto ed sikatayo na impakasugat nen Jesus ed mukor. Anto ’tan ey? Nen pinaoli si Jesus, inyapay to so bili na dala to bilang perpekton bagat kanian posible la ya nalinisan itayo ed “amin a kasalanan.”—1 Juan 1:7.

14. Akin et kaukolan nin palabasen so andukey ya panaon antis ya nasumpal imay propesiya ya imbaga nen Jehova diad Eden?

¹⁴ No imanoen tayo imay propesiya ya imbaga nen Jehova diad Eden, mapatnag ya kaukolan nin palabasen so andukey ya panaon antis itan ya nasumpal. Kaukolan so panaon pian niwala so ilalak na bii, natipon na Diablo iray alipores to, tan nagawa so pambubusolan na sayan duaran grupo. Lapud natatalosan tayo iyan propesiya, agtayo la nabibigla ya kabusol na mundo nen Satanas iray lingkor nen Jehova. Diad tua, impasakbay met la itan nen Jesus ed saray disipulo to. (Mar. 13:13; Juan 17:14) On, nanenengneng tayo lay kasumpalan na satan ya propesiya, lalo lad sayay apalabas ya 100 ya taon.

15. Akin et mas onggragrabe so pambusol ed sikatayo na sayan mundo, pero akin et agtayo nepeg ya takotan si Satanas?

¹⁵ Nen introno si Jesus bilang Ari na Panarian nen 1914, imbantak toy Satanas diad dalin. Agla makapawil si Satanas ed tawen, aalagaren to labat lay panderal ed sikato. (Apo. 12:9, 12) Pero legan ton manaalagar, mamapasya met ed pamapairap tod saray lingkor na Dios, tan ipapangget tod sikara so petang na ulo to. (Apo. 12:13, 17) Kampegan mas onggragrabe so pambusol ed sikatayo na sayan mundo! Pero agtayo nepeg ya takotan si Satanas tan saray alipores to. Akin ey? On ta amta tayo ya kaiba tayoy Jehova. Atan imay insulat nen apostol Pablo ya: “No say Dios et walad dapag tayo, siopa so onsumpad sikatayo?” (Roma 8:31) Halos amin ya kabiangan na samay propesiya ed Genesis 3:15 et asumpal la. Sakey itan ya rason no akin ya mabisbiskeg so tiwala tayo ed si Jehova.

16-18. Antoy epekto ed si Brother Curtis, Sister Ursula, tan Sister Jessica nen atalosan da so Genesis 3:15?

¹⁶ Makatulong so sipan nen Jehova ed Genesis 3:15 pian nasarag tayo so anggan anton subok. Oniay imbaga nen Brother Curtis ya missionary ed Guam: “Wala ray agawad bilay ko ya asubok so katooran kod si Jehova. Pero nen dinalepdep ko imay propesiya ed Genesis 3:15, binmiskeg so tiwalak ed Amak diad tawen.” Sankanonot nen Brother Curtis ya ekalen lanlamang nen Jehova so amin ya irap ya dadalanen tayo natan.

 ¹⁷ Imbaga nen Sister Ursula ya taga Germany ya nen atalosan to so Genesis 3:15, diman akombinse ya say Biblia et nanlapud Dios. Pambiliban to nen anengneng to ya konektado ed satan so amin ya propesiya ed Biblia. Onia ni imbaga to: “A-touch ak nen naamtaan ko ya nanggawan tampol si Jehova na paraan pian naikdan na ilalo iray totoo.”

¹⁸ Onia met so imbaga nen Sister Jessica ya taga Micronesia: “Agkon balot nalingwanan imay aliknak nen a-realize ko ya nalmok lay katuaan! Nen naamtaan ko ya nasusumpal la imay propesiya ed Genesis 3:15, diman ko atalosan ya aliwa nin saya so tuan bilay. Akatulong met iyan propesiya pian nakombinse ak ya magmaliw labat ya maliket so bilay ko no manlingkor ak ed si Jehova, tan walay mas marakep ya bilay ya ipaparaan to diad arapen.”

19. Akin et segurado tayo ya nasumpal imay sampot ya parte na Genesis 3:15?

¹⁹ On, nanenengneng tayo lay kasumpalan na Genesis 3:15. Malinew lad sikatayo no siopa so ilalak na bii tan no siopa so ilalak na uleg. Asumpal la so impakasugat na mukor na ilalak na bii, tan natan et manuuley lay Jesus, say makapanyari tan imortal ya Ari tayo. Asingger met lan nakompleto so onkokomaduan kabiangan na ilalak na bii. Asumpal la so unaan ya parte na sayan propesiya, kanian baleg so tiwala tayo ya nasumpal met imay sampot ya parte—say panmekmek ed ulo na uleg. No nagawa la itan, seguradon makainawa so amin ya matoor a lingkor nen Jehova! Kanian manmatoor tayo tan agtayo onsusuko. Tandaan ya no si Jehova so angisipan, tooren ton tooren. Magano lan usaren nen Jehova so ilalak na bii pian bendisyonan so “amin a nasyon ed dalin”!—Gen. 22:18.